Yieme
16 Oo Naaŋmen, go ma taa, bonso N de bon hoŋ e N zo-lirizie. 2 N yelko la Jehoova ka: “Hooŋ la Jehoova, Ho zie maŋ maŋ nyɛrɛ bonsoŋ zaa a yire. 3 Ane neŋ-forifori naŋ be a teŋɛzuŋ, N nimipɛle naŋ e kpoŋ maŋ be la noba naŋ taa gyeremɛ yaga na eŋɛŋ.” 4 Noba naŋ tuuro ŋmen yobo maŋ de la toɔrɔ yaga wa dɔgle ba menne zuŋ. Zĩĩ na baŋ de ire neŋ ba bon-nyuurii sareka na, N daŋ koŋ e a taa zaa, N nɔ-gbama meŋ daŋ koŋ boɔle ba yoe. 5 Jehoova la N kyɛŋ ba naŋ poŋ a ko ma, ane N ŋmanlee. Hooŋ la maŋ go N kyɛŋ boma ko ma. 6 Ba mannɛɛ ziiri naŋ soma a ko ma. Ɛɛ, N niŋe paalɛɛ kyɛŋ na N naŋ taa na. 7 N na pugee Jehoova, onaŋ ko ma kawane. Haali zisoɔree saŋa, N sukyiri teɛrɛ maŋ korɔ maŋ dɛnnoo. 8 N de la Jehoova biŋ N nimitɔɔreŋ wagre zaa. Bonso o be la N nuduloŋ, N daŋ koŋ gbigri zaa. 9 Azuŋ ka N sukyiri ane N eŋdaa zaa taa popeɛloŋ. N taaɛ zeŋ laafeɛ meŋ. 10 Bonso ho koŋ bare ma N Yaa poɔ. Ho koŋ tere sori ka neɛ naŋ dire yelmennoŋ korɔ bo poɔ̃. 11 Ho vɛŋɛɛŋ maŋ baŋ a sori naŋ gɛrɛ nyɔvore poɔ. Ho nimitɔɔreŋ ka popeɛloŋ naŋ e kpoŋ be; Eŋyuo be la ho nuduloŋ tegitegilɛ.