Aizeeya

11 Danu kaŋa na buliŋ a yi Gyeesi teɛ na eŋɛŋ, Ka bulii kaŋa buli yi o nyagaŋ a wɔŋ wɔmɔ. 2 Jehoova vooroŋ na sigi wa la o zuŋ, Yɛŋ ane yɛlɛ pare bammo vooroŋ, Kawane ane kpeɛ̃o vooroŋ, Bammo ane Jehoova zoobu vooroŋ. 3 O na taaɛ popeɛloŋ Jehoova zoobu eŋɛŋ. O koŋ maŋ are yɛlɛ oŋ de o nimie nyɛrɛ eŋɛŋ kyɛ dire sɛrɛɛ, O koŋ maŋ are yɛlɛ oŋ de o tobo woŋ eŋɛŋ kyɛ ko noba kpããmo. 4 O na maŋ di la nembaalba sɛrɛɛ sori naŋ tu poɔŋ, O na maŋ yi la mennoŋ poɔŋ a kyɛ ko sigrimeŋɛ deme naŋ be a teŋɛzuŋ kpããmo. O na de la o noɔre daa na ŋmɛ a tendaa A de o nɔ-gbamɛ vooroŋ ko a neŋfaare zaa. 5 Sontuubu na leŋ la o seɛŋ aŋa bɛlɛŋte, Ka yelmennoŋ meŋ leŋ o seɛŋ aŋa bɛlɛŋte. 6 Gboŋgbori ane pilee na laŋ gaŋeŋ, Loɔraa neŋ bopɔlee meŋ na laŋ gaŋeŋ, Ka napɔlii ane gbeŋni ane duŋ-noɔroo lantaa; Ka bibile deɛ a weɛ. 7 Naabo ane beɛ na laŋ di la bondirii, Ka a bonbilii laŋ gaŋ. Gbeŋni na ɔɔrɛɛ moɔ aŋa nadavaraa. 8 Bibile naŋ mɔgrɔ bere na de la o nu tuŋ karaa bogiŋ, Ka bibile ba naŋ ŋmaa bere de o nu eŋ waabo naŋ taa zɛloŋ yaga zaa bogiŋ. 9 Ba koŋ pere neɛzaa Kyɛbee a sãã saammo zaa N taŋ-forifori na zuŋ, Bonso Jehoova bammo na pa la a teŋɛzu zaa Aŋa lɛ na koɔ̃ naŋ pa mane na. 10 A lɛ bebiri na Gyeesi nyagree na iri areŋ aŋa bon ba naŋ zɛge oŋ do saa a ko a noba. A paalonne noba na gaa la o zie a te bɔ sowuli, Ka o pɛnnoo zie na leɛ gyeremɛ zie.