Matio

1 Yezu Krista dɔge-tutaa yɛlɛ, o da eɛ Deevid bidɔɔ, a e Aboraham meŋ bidɔɔ: 2 Aboraham la dɔge Aziki; Ka Aziki dɔge Gyekɔb; Ka Gyekɔb dɔge Gyuuda ane o yɔɔmine na; 3 Ka Gyuuda de Teema a dɔge Piirɛs ane Ziira; Ka Piirɛs dɔge Hɛzerɔn; Ka Hɛzerɔn dɔge Raam; 4 Ka Raam dɔge Aminadab; Ka Aminadab dɔge Naasɔn; Ka Naasɔn dɔge Salmɔn; 5 Ka Salmɔn de Reehab a dɔge Boaz; Ka Boaz de Ruut a dɔge Obɛd; Ka Obɛd dɔge Gyɛɛsi; 6 Ka Gyɛɛsi dɔge naa Deevid. Ka Deevid de Yuuriya pɔge a dɔge Soolomoŋ; 7 Ka Soolomoŋ dɔge Rehoboam; Ka Rehoboam dɔge Abaigya; Ka Abaigya dɔge Asa; 8 Ka Asa dɔge Gyɛhoosafat; Ka Gyɛhoosafat dɔge Gyɛhoram; Ka Gyɛhoram dɔge Yuzaaya; 9 Ka Yuzaaya dɔge Gyootam; Ka Gyootam dɔge Ahaz; Ka Ahaz dɔge Hezekaiya; 10 Ka Hezekaiya dɔge Manaasɛ; Ka Manaasɛ dɔge Amɔn; Ka Amɔn dɔge Gyozaaya; 11 Ka Gyozaaya dɔge Gyɛkonaaya ane o yɔɔmine saŋa na baŋ nyɔge ba gaaneŋ gbaŋgbaaloŋ poɔ Baabilɔŋ paaloŋ na. 12 Baŋ da nyɔge ba gaaneŋ gbaŋgbaaloŋ poɔ Baabilɔŋ paaloŋ na puoriŋ, ka Gyɛkonaaya dɔge Silaateɛl; Ka Silaateɛl dɔge Zɛruubabɛl; 13 Ka Zɛruubabɛl dɔge Abaiyud; Ka Abaiyud dɔge Eliyaakim; Ka Eliyaakim dɔge Azɔ; 14 Ka Azɔ dɔge Zeedɔk; Ka Zeedɔk dɔge Akyim; Ka Akyim dɔge Eliyud; 15 Ka Eliyud dɔge Eliyaaza; Ka Eliyaaza dɔge Maatan; Ka Maatan dɔge Gyekɔb; 16 Ka Gyekɔb dɔge Gyoosɛf a Mareya serɛ, Mareya la dɔge Yezu, ona baŋ boɔlɔ a Krista. 17 A sããkommine dɔge-tutaa zaa la ŋa, a piili Aboraham a te ta Deevid da eɛ dɔge-tutaa 14; a yi Deevid a te ta saŋa na baŋ nyɔge ba gaaneŋ Baabilɔŋ gbaŋgbaaloŋ poɔ na da eɛ dɔge-tutaa 14; a yi saŋa na baŋ nyɔge ba gaaneŋ Baabilɔŋ gbaŋgbaaloŋ poɔ puoriŋ na a wa ta Krista meŋ da eɛ dɔge-tutaa 14. 18 Kyɛ a sori ŋa poɔŋ baŋ da tu kyɛ dɔge Yezu Krista. A lɛ saŋa na, Yezu ma Mareya neŋ Gyoosɛf da eŋɛɛ taa noɔre ka ba na kulee taa, kyɛ sɛre baŋ na kultaa na Naaŋmen da tu la o vooroŋ soŋ eŋɛŋ a kyɛ vɛŋ ka Mareya taa poɔ. 19 Kyɛ, o serɛ Gyoosɛf da waa la sontuuro, azuŋ o da ba boɔrɔ ka o eŋ o pɔge na viŋ gyamaa poɔŋ, azuŋ o da boɔrɔŋ ka o tu sori naŋ sɔgle poɔŋ kyɛ baroo. 20 Saŋa na oŋ da wa teɛre a yɛlɛ ama baare na, nyɛ! Jehoova maleke da iree o meŋɛ wuluu gaŋ-zannoo poɔŋ, a yelkoo ka: “Deevid bidɔɔ Gyoosɛf, ta zoro dabeɛ̃ ka ho de Mareya waneŋ ho die ka o e ho pɔge, bonso a vooroŋ soŋ la e ka o taa a poɔ. 21 O na dɔge la bidɔɔ, ka yɛ ko a bie yuori ka Yezu, bonso o na faa la o noba a yi ba yelfaare poɔ.” 22 A yɛlɛ ama zaa da eɛ la ka lɛ na vɛŋ ka yɛlɛ na Jehoova naŋ tu o daŋyele zie kyɛ yeli na na nyɛ eebo, o da yeleeŋ ka: 23 “Nyɛ! A pɔge naŋ ba baŋ dɔɔ na taa la poɔ, a dɔge bidɔɔ, ka ba ko a bie yuori ka Immanuwɛl,” ka ba naŋ leɛroo eŋ kɔkɔyuo poɔŋ, a tɛgɛ la ka, “Naaŋmen be la te zieŋ.” 24 Ka Gyoosɛf da iri a goɔŋ poɔŋ a e lɛ na Jehoova maleke naŋ da wuluu ka o e na, o da de la o pɔge waneŋ o yiri. 25 Kyɛ o ne o da ba gaŋneŋ taa a te ta saŋa na oŋ wa dɔge a bidɔɔ, ka ba da ko a bie yuori ka Yezu.