Matio

8 Saŋa na oŋ daaŋ yi a taŋazu sige wa na, a nembeɛoŋ da tu o la. 2 Nyɛ! kɔŋkɔŋɔ kaŋa da wa la o zie, a wa le gbi-dumo o nimitɔɔreŋ, a yele ka: “Daana, ka hooŋ boɔrɔ, ho na baŋ vɛmeŋ ka N e forifori.” 3 Yezu da teɛ la o nu a seenoo, a kyɛ yelka: “N boɔrɔŋ! E forifori.” A tɔntɔbaalɛ ka a kɔŋkɔnne baaloŋ da yi a dɔɔ eŋɛŋ. 4 Ka Yezu da yelkoo ka: “Kaara soŋ a ta wa mannaa korɔ neɛzaa, kyɛ hooŋ gaa, a de ho meŋɛ te wuli a ŋmenpuore wedeɛrɛ, a kyɛ de a kyɔɔtaa te ko ba aŋa lɛ na Moosis naŋ biŋ noɔre ka ba maŋ tere na, ka a e sieree a ko ba.” 5 Saŋa na oŋ da wa ta Kapanum na, sogyare neŋkpoŋ kaŋa da wa la o zie, a da sɔroo nimizeɛ̃ 6 a yele ka: “N neŋkpoŋ, N toŋtonɔ kaŋa gbɛrɛɛŋ a gaŋ dieŋ, o diree dɔgɛɛ yaga zaa.” 7 Ka Yezu yelkoo ka: “Ka maaŋ wa ta be, N na saŋ la o baaloŋ na.” 8 Ka a sogyare neŋkpoŋ deɛ yelka: “N neŋkpoŋ, N ba seŋ neŋ ka ho wa N die, kyɛ ka hooŋ deɛ yeli a yelbiri N toŋtonɔ na na nyɛɛ sammo. 9 Bonso, neɛ kaŋa eɛ neŋkpoŋ N zuŋ, maŋ meŋ e neŋkpoŋ sogyare mine zuŋ, N maŋ yelko la ba kaŋa ka, ‘Gaa kyɛ!’ ka o gaa, a lɛ yelko kaŋa meŋ ka, ‘Wa kyɛ!’ ka o wa, N maŋ yelko la N gbaŋgbaa ka, ‘E ŋaa!’ ka o e lɛ.” 10 Saŋa na Yezu naŋ wa woŋ a yɛlɛ ŋa na, o noɔre zaa da mãã, azuŋ o da yelko la noba naŋ tuuroo na ka: “Yelmeŋɛ maŋ yele korɔ yɛ, N ba nyɛ neɛzaa naŋ taa sagediibu naŋ e kpoŋ seŋ ŋaa a Izerayɛl paaloŋ zaa poɔŋ. 11 Kyɛ maaŋ yele kɔrɔ yɛ ka, noba yaga na yi la sapare ane saniŋe a wa ka ba neŋ Aboraham ane Aziki ane Gyekɔb laŋ di bondirii a sazu Naaloŋ poɔ; 12 kyɛ ba na de la a Naaloŋ biiri yɛŋ lɔɔ eŋ a yeŋe liŋe na poɔŋ. Beŋ la baŋ na kono a ŋmeɛrɛ kpɛlle a kyɛ ɔɔrɔ ba nyemɛ.” 13 Ka Yezu yelko a sogyare neŋkpoŋ ka: “Iri gɛrɛ. Aŋa lɛ na hoŋ wuli ho sagediibu na, lɛ na nyɛɛ eebo a ko bo.” Ana awa na neŋ o zu ka o toŋtonɔ na da nyɛ baaloŋ saŋ. 14 Saŋa na Yezu naŋ wa kpɛ Piita die na, o da nyɛɛ Piita deɛm-pɔge naŋ gaŋ a beɛrɛ entole baaloŋ. 15 Ka Yezu seene o nu, ka a entole baaloŋ da bare, ka a pɔge vaa iri a piili tonɔ koroo. 16 Kyɛ a zimaane saŋa, a noba da taa la noba na sefaare naŋ kpɛ ba waneŋ o zie; o da maŋ yelee yelbiri a digi a sefaare yi ba enneŋ, a kyɛ saŋ noba na zaa naŋ beɛrɛ a dire dɔgɛɛ na baaloŋ, 17 Ka lɛ na vɛŋ ka yɛlɛ na daŋyele Aizeeya naŋ yeli na na nyɛ eebo: O meŋɛ na de la te baalonne ane te bambaaloŋ zaa.” 18 Saŋa na Yezu naŋ wa nyɛ lɛ na nembeɛoŋ naŋ ŋmaa gyeeroo na, o da yelko la o potuuribo na ka ba e ka ba gaa a mane lombo zaala. 19 Beŋ la ka wulwulo kaŋa da wa Yezu zie a wa yelkoo ka: “Wulwulo, N na tu boŋ a gaa zie zaa hoŋ na gaa.” 20 Kyɛ ka Yezu yelkoo ka: “Wɛbaare taaɛ ziiri a maŋ gaŋ ka a sazu nuulii meŋ taa kyogri, kyɛ a nensaala Bidɔɔ ba taa zie zaa oŋ na gaŋ.” 21 Beŋ la ka a potuuribo kaŋa yelkoo ka: “Daana, naŋ ko ma sori ka N gaa te uuŋ N saa sɛre.” 22 Ka Yezu yelkoo ka: “Naŋ kyɛnɛ tuuro ma, a kyɛ vɛŋ ka kũũni uuno ba kũũni.” 23 Azuŋ saŋa na oŋ da kpɛ a maŋ-gbori poɔ na, o potuuribo na da tu o la. 24 Nyɛ! sasekpeɛŋaa kaŋa da ŋmeɛrɛŋ a mane zuŋ, ka a kɔmmie ŋmeɛrɛ a maŋ-gbori ka a maŋ-gbori boɔrɔ ka o linni, kyɛ oŋ da gaŋ gbire. 25 Ka ba da seŋoo a yelka: “Daana, faa te, te waanaŋ ka te wɛ!” 26 Kyɛ oŋ yelko ba ka: “Bonso yɛŋ vɛŋ ka dabeɛ̃ kpɛɛ yaga zaa lɛ, yenee noba naŋ taa sagediibu naŋ e fẽẽ?” Beŋ la oŋ da iri a tanne a saseɛ ane a mane, ka a zaa leɛ mãã. 27 Azuŋ a dɔbɔ nɔɛ zaaŋ da mãã ka ba yelka: “Nembuo la a dɔɔ ŋa? Haali ka saseɛ ane a mane zaa sagra o noɔre.” 28 Saŋa na oŋ da wa ta a mane noɔre, a Gadaren teŋɛ na la lɛ, dɔbɔ bayi mine naŋ da taa sefaare da yi la a yaare pooreŋ a tuoroo. Ba yɛlɛ da taaɛ dabeɛ̃ yaga zaa, azuŋ neɛzaa da zoree dabeɛ̃ ka o tu ana sori na. 29 Nyɛ! ba da kyeerɛɛŋ ne kɔkɔkpeɛŋaa a yele ka: “Bo yɛlɛ la ka te ne bo taa, Naaŋmen Bidɔɔ? Ho waɛ la ka ho dɔgre te sɛre kyɛ ka wagre na baŋ sɛgre biŋ na ta bee?” 30 Kyɛ dobaare yaga naŋ da e tɔɔre ne ba da bebeŋ a dire bondirii. 31 Azuŋ a sefaare da piili sɔrooŋ a yele ka: “Ka hooŋ na digi te bare, vɛŋ ka te te kpɛ a dobaare ama poɔ.” 32 Ka o yelko ba ka: “Yɛ yi gaa be!” Beŋ la ka a sefaare yi a te kpɛ a dobaare poɔŋ, nyɛ! a dobaare zaa da zo yi la a taŋazu a te kpɛ a mane koɔ̃ poɔŋ, a zaaŋ da kpi a koɔ̃ poɔŋ. 33 Beŋ la ka a noba naŋ da kaara a dobaare zu na da zo yi be a gaa a teŋɛ poɔ, a te mane a yɛlɛ zaa ko ba, ane a dɔbɔ naŋ da taa sefaare na yɛlɛ ko a noba. 34 Kyɛ nyɛ! a teŋɛ noba zaa da yi gaa la Yezu zie, saŋa na baŋ wa nyɛ o na, ba da sɔrooŋ ka o yi ba teŋɛ na poɔŋ.