Toma

27 Azuŋ ba da nyɔge baŋ a taaba gaaneŋ a Gyuu noba Sɛrɛɛ Diibu Zikpoŋ na, ba da de baŋ wa are a sɛre-ŋmaareba nimitɔɔreŋ. Beŋ la ka a ŋmenpuore wedeɛrekpoŋ da piili soorɔ ba yɛlɛ 28 a yelka: “Te kpãã yɛŋ nimizeɛ̃ ka yɛ ta wulo noba a dɔɔ ŋa yuori eŋɛŋ, kyɛ yɛ nyɛ! yɛ paalɛɛ Gyɛruzɛlɛm zaa neŋ yɛ wuluu ŋa, a kyɛ mɔɔrɔ yɛ mɔɔbo zaa ka yɛ de a dɔɔ ŋa zĩĩ dɔgle te zuriŋ.” 29 Beŋ la ka Piita neŋ a bitontonee da iri a noɔre ka: “Aseŋ ka te sagra Naaŋmen noɔre ka o na la te naa a gaŋ teŋ na sagra nensaaleba nɔɛ. 30 Te sããkommine Naaŋmen na la vɛŋ ka Yezu iri yi kũũni poɔŋ, ona yɛŋ kpa a daa zuŋ oŋ kpi na. 31 Naaŋmen zɛgooŋ yaga zaa ka o do saa a leɛ Wedeɛrekpoŋ ane Faara a be o nuduluŋ, ka o soŋ a Izerayɛl biiri ka ba leɛre ba eebo, ka lɛ vɛŋ ka o di suuri ko ba. 32 Te eɛ noba naŋ di sieree kyaare a yɛlɛ ŋa, lɛ ka a vooroŋ soŋ na Naaŋmen naŋ de ko noba naŋ sagra o nɔɛ ka o e la ba naa na meŋ di a yɛlɛ ŋa sieree.” 33 Saŋa na baŋ wa woŋ a yɛlɛ ŋa na, ba suuri da ireeŋ yaga zaa, azuŋ ba da boɔrɔŋ ka ba ko ba zaa. 34 Kyɛ a Farazii dɔɔ kaŋa ba naŋ boɔlɔ Gamaleɛ da iree a noba poɔŋ; o da e la a Bege wulwulo kaŋa naŋ de yuori yaga, o da yeleeŋ ka ba vɛŋ ka a bitontonee yi are yeŋeŋ kyɛnle ba fẽẽ. 35 Beŋ la oŋ da yelka: “N yɔɔmine naŋ e Izerayɛl biiri, yɛ baŋ yɛ menne velaa a kyaare yɛlɛ na yɛ naŋ boɔrɔ ka yɛ de e a dɔbɔ ŋa. 36 Aŋa mannoo poɔŋ, saŋa kaŋa naŋ pare Tiyodase da ireeŋ a yele ka o e la neŋtegroŋ kaŋa, ka dɔbɔ naŋ ta 400 da tuuro o puore. Kyɛ ba da ko o la, ka noba na naŋ da tuuro o puoreŋ na zo yaare a te wɛ. 37 A lɛ puoreŋ, Gyudase naŋ da e a Galili neɛ da iree la a noba yoe sɛgebo saŋa, ka noba yaga da tuuro o puore. Kyɛ o meŋ da kpieŋ a wɛ, ka noba na zaa naŋ tuuroo na zo yaare. 38 Azuŋ a yi a yɛlɛ ŋa poɔŋ, N yele korɔ yɛŋ ka, yɛ ta de yɛ nuure eŋnɛ a dɔbɔ ŋa yɛlɛ poɔŋ, yɛ bare ba yɛlɛ ko ba. Ka a yɛlɛ ŋa bee a toma ŋaŋ yi nensaaleba zie, a toma na sãã la; 39 kyɛ ka a toma ŋaŋ yi Naaŋmen zie, yɛ koŋ baŋ pigi a toma ŋa sori zaa. Ka lɛ naane, yɛ na wa banna ka yɛ neŋ Naaŋmen la zɔɔrɔ.” 40 A noba da sage de la o kawane na, a da boɔle a bitontonee baŋ kpɛ a die poɔ, ba da feɛ baŋ yaga, a kyɛ kpãã ba nimizeɛ̃ ka ba ta lɛ yele yelzaa a kyaare Yezu yuori na eŋɛŋ, a kyɛ bare ba baŋ gaa. 41 Ka a bitontionee da yi a Sɛrɛɛ Diibu Zikpoŋ a gaa, ba da taaɛ popeɛloŋ yaga zaa ba meŋ naŋ seŋ neŋ ka ba di vi a Yezu yuori zuŋ. 42 Bebiri zaa, ba da maŋ gaa la a ŋmenpuoredie ane die neŋ die poore a moɔ̃ niŋe wulo noba a kyɛ moɔlɔ a duorisoŋ naŋ kyaare Yezu Krista.