Hiburu

23 Ane meŋ, a da fɛrɛɛŋ ka noba yaga wa e ŋmenpuore wedeɛreba, bonso kũũ da pigi baŋ sori ka ba e ŋmenpuore wedeɛreba a gɛrɛ tegitegilɛ, 24 kyɛ oŋ e neɛ naŋ bebe tegitegilɛ na zuŋ, neɛzaa koŋ wa leɛre o gbɛbɔgriŋ a e ŋmenpuore wedeɛrɛ. 25 Azuŋ, o taaɛ a kpeɛ̃o ka o faa noba naŋ tuuro o zie a gɛrɛ Naaŋmen nimitɔɔre kpɛlɛŋkpɛlɛŋ, bonso o bebeŋ wagre zaa ka o maŋ sɔrɔ sudi korɔ ba. 26 A somaŋ yaga zaa ka te taa ŋmenpuore wedeɛrekpoŋ naŋ e yelmeŋɛ soba, a ba taa sããnaa bee dɛgre zaa, a wɛle yi yelfa-erebɛ poɔŋ, kyɛ ka ba zɛgoo oŋ do gaŋ sazu. 27 O ba waa ŋa a ŋmenpuore wedeɛrebɛrɛ na, azuŋ a ba fɛre ka o maŋ ire sarekare bebiri la bebiri zaa, a maŋ daŋ iri sareka o meŋɛ yelfaare zuŋ, a kyɛ lɛ iri sareka a noba zuŋ, bonso o iree sareka dayeni aŋ baare saŋa na oŋ de o meŋɛ tere na.