1 Saamiuel

25 Beŋ la ka Saamiuel daaŋ kpi; ka a Izerayɛl noba zaa daaŋ lagre lantaa a komoo, a kyɛ de o uuŋ o die naŋ be Reema poɔŋ. Ka Deevid daaŋ iri a kpɛ Peeran wɛgyɛŋ na poɔŋ. 2 Dɔɔ kaŋa da be la Meeyoŋ ka o toma daaŋ be Kaamɛl. A dɔɔ da eɛ bondaaŋ kpoŋ; o da taaɛ peere 3,000 ane boore 1,000, o da kyeɛrɛɛ o peere kɔɔloŋ Kaamɛl poɔŋ. 3 A dɔɔ yuori da la Neebal, o pɔge meŋ yuori da la Aabigel. O pɔge na da eɛ neɛ naŋ taa yɛŋ naŋ e zuluŋ a kyɛ veɛlɛ, kyɛ a serɛ da yi la Kalɛb booree na poɔŋ, o da eɛ miiroŋ, ka o yel-eree meŋ da ba soma. 4 Deevid da be la a wɛgyɛŋ poɔŋ kyɛ woŋ ka Neebal da kyeɛrɛɛ o peere kɔɔloŋ. 5 Azuŋ Deevid da toŋɛɛ bipɔlɔ pie baŋ gaa Neebal zie, Deevid da yelko la a bipɔlɔ ka: “Yɛ gaa Kaamɛl, ka yɛneeŋ wa ta Neebal zie, yɛ de N yuori a peɛre o laafeeloŋ yɛlɛ nyɛ. 6 Yɛ pãã yeli ŋaaŋ meŋ koo, ‘Naaŋmen na ko bo nyɔvo-tɔɔre ane laafeeloŋ, a ko ho die deme meŋ laafeeloŋ, ka laafeeloŋ meŋ be bonzaa hoŋ taa eŋɛŋ. 7 N woŋeeŋ ka ho kyeɛrɛɛ ho peere kɔɔloŋ. Saŋa na ho pekyeeneba naŋ da be te zieŋ na, te da ba e ba yelfaa zaa, saŋa na zaa baŋ da be Kaamɛl poɔŋ na, ba bonzaa da ba bɔre. 8 Ka hooŋ soore ho bipɔlɔ na, ba na yelko boŋ. Vɛŋ ka N bipɔlɔ ŋa nyɛ nimipɛl ho niŋeŋ, bonso popeɛloŋ saŋa la teŋ wa ho zie. Sɔrebo la, bonzaa ho naŋ taa, naŋ de a ko ho tontonneba ane ho bidɔɔ Deevid.’” 9 Ka Deevid bipɔlɔ na gaa te yeli a yɛlɛ ŋa zaa ko Neebal Deevid yuoriŋ. Saŋa na baŋ da wa yeli a yɛlɛ baare na, 10 Ka Neebal yelko Deevid tontonneba na ka: “Nembuo la Deevid, nembuo la Gyɛɛsi bidɔɔ? Beraayi ŋa poɔŋ, tontonneba yaga zoro yiree ba nembɛrɛ zieŋ. 11 Azuŋ aseŋ ka N de N boroboro ane N koɔ̃ ane N nɛne N naŋ ko ka N de ko noba naŋ kyeɛrɛ N peere kɔɔloŋ na ko neŋyobo, saŋa na maŋ ba baŋ zie ba naŋ yi bee?” 12 Ka Deevid dɔbɔ na da leɛ gaa o zie a wa yeli a yɛlɛ ŋa zaa koo. 13 A tɔntɔbaalɛ ka Deevid da yelko o dɔbɔ na ka: “Neɛzaa de o zɔɔzɔɔsoɔ a gyere!” Azuŋ ba zaa da de la ba zɔɔzɔɔsɔre a gyere, ka Deevid meŋ da de o zɔɔzɔɔsoɔ a gyere, ka dɔbɔ naŋ ta 400 da poɔ Deevid eŋɛŋ a gɛrɛ be, kyɛ ka dɔbɔ 200 zeŋ kaara ba bontaree na. 14 Kyɛ, Neebal tontonɔ na kaŋa da te mannɛɛ a yɛlɛ ko Aabigel, Neebal pɔge na: “Nyɛ! Deevid toŋɛɛ tontonneba baŋ yi a wɛgyɛŋ poɔŋ a wa puore te neŋkpoŋ, kyɛ oŋ nyɔge ba toto. 15 A dɔbɔ ŋa da soŋ teŋ yaga zaa. Ba da ba e te yelzaa naŋ na pere te, te boma bonyenaa da ba bɔre a yi saŋa na zaa te ne ba naŋ da laŋ kpeɛrɛ a moɔ poɔŋ na. 16 Ba da waa ŋa daŋkyini naŋ ŋmaa gyeere te, zisoɔree ane ŋmenaa zaa, lɛ baŋ da erɛ korɔ te a yi saŋa na zaa teŋ da be ba zieŋ a kyeenɛ a peere na. 17 Pampana ŋa, de gbɛre a e yelkaŋa, bozuŋ saammo kpoŋ waanɛɛ te neŋkpoŋ ane o die deme zaa zuŋ, bozuŋ o eɛ dɔɔ naŋ ba taa tɔnɔ zaa, ka neɛzaa meŋ koŋ baŋ yel yɛlɛ koo.” 18 Azuŋ Aabigel da lonnee wieoŋ a de boroboro 200, waiŋ naŋ pa yoe ayi, peere anuu ba naŋ ko a maalaa soŋ zaa, kakyeenii naŋ pa kookoolaare anuu, kekiri 100 ba naŋ de tewɔmɔ maale, ane kekiri 200 ba naŋ de kaŋkanne wɔmɔ maale neŋ, o da de la a zaa dɔgle a bonne zuŋ. 19 Ka Aabigel da yelko o tontonneba na ka: “Yɛ de N weɛ; N na tuuree yɛ puoreŋ.” Kyɛ o da ba yeli yelzaa ko o serɛ Neebal. 20 Saŋa na oŋ da zɔŋ a boŋa a do a taŋa a sigre gɛrɛ na, Deevid neŋ o dɔbɔ na da ba nyɛ o, bonso taŋa kaŋa da be la o neŋ Deevid ane o dɔbɔ na kpakyagaŋ. Kyɛ Deevid neŋ o dɔbɔ na da tuorooŋ, oŋ meŋ da tuoro ba. 21 Deevid da yeleŋ ka: “N go la bonzaa naŋ e a dɔɔ ŋa soobu a wɛgyɛŋ poɔŋ zaala. Haali o bon bonyenaa ba yi o boma na poɔŋ a bɔre, kyɛ oŋ de faaloŋ a yɔɔ neŋ soŋ na maŋ e koo na sane. 22 Ka zieŋ wa nyaaŋ ka maaŋ bare dɔɔ bonyeni gba Neebal die deme poɔŋ, Naaŋmen yɔɔ Deevid dɔndɔnne sane a de mine paale.” 23 Saŋa na Aabigel naŋ da nyɛ Deevid na, o da lonnee wieoŋ a sigi a boŋa zuŋ a le vɔgle teŋɛŋ Deevid nimitɔɔreŋ, a kyuli o zu tori teŋɛŋ. 24 Beŋ la oŋ daaŋ le Deevid gbɛɛŋ a yelka: “N daana, vɛŋ ka a saammo wa maaŋ zu; vɛŋ ka ho tontoŋ pɔge yeli yɛlɛ ko bo, naŋ kyɛlle woŋ ho tontoŋ pɔge yelyaga meŋ. 25 Sɔrebo la, ta kyɛllɛ a dɔɔ ŋa naŋ ba taa tɔnɔ baŋ boɔlɔ Neebal na yɛlɛ, bonso o waa ŋa lɛ na o yuori naŋ waa na. O yuori la Neebal, dambol yɛlɛ yoŋ la be o eŋɛŋ. Kyɛ maaŋ naŋ e ho tontoŋ pɔge ba nyɛ N daana bipɔlɔ na o naŋ toŋ na. 26 Kyɛ pampana ŋa, N daana, aŋa Jehoova naŋ voorɔ, ka ho meŋ naŋ voorɔ yɛŋ, Jehoova la pige bo sori hoŋ ba di zĩĩ sane, Ona la pige bo sori hoŋ ba de ho meŋɛ nu a yaa faaloŋ sane. Vɛŋ ka ho dɔndɔnne ane noba na zaa naŋ boɔrɔ ka ba pere N daana waa ŋa Neebal. 27 Deɛ a kyɔɔtaa ŋa ho tontoŋ pɔge naŋ de wa ka o ko bo na ko bipɔlɔ na naŋ tuuro N daana na. 28 Sɔrebo la, naŋ di ho tontoŋ pɔge saammo na suuri koo, bonso nɔkpeɛne zaa kyebe ka Jehoova na vɛmeŋ ka N daana die bebe tegitegilɛ, bonso N daana zɔɔrɛɛ Jehoova zɔɔre, ba ba nyɛ yelfaa zaa meŋ ho eŋɛŋ ho nyɔvore bebie zaa poɔŋ. 29 Ka neɛ kaŋaŋ wa iri a boɔrɔ bo ka o iri ho nyɔvore, Jehoova ho Naaŋmen na de la N daana nyɔvore a sɔgle o nyɔvore wuoɔ na poɔŋ, kyɛ o na de la ho dɔndɔnne nyɔvoɛ a za bare aŋa ba naŋ za kuurii yi kpalaa poɔŋ. 30 Ka yelsonne na zaa Jehoova naŋ eŋ noɔre ka o na e ko la N daana naŋ wa nyɛ eebo, ka Jehoova lɛ kaa iri bo ka ho e a Izerayɛl noba wedeɛrɛ, 31 N daana zoma koŋ dɔɔnoo kyɛbee ka o e kaŋdabaŋkalɛ o sukyiriŋ, bonso ho ba kyiri zĩĩ naŋ ba taa saanaa bare kyɛbee a de ho nu yaa faaloŋ sane. Ka N daanaŋ wa nyɛ a yelsonne ŋa zaa yi Jehoova zieŋ, naŋ teɛre ho tontoŋ pɔge yɛlɛ.” 32 Beŋ la ka Deevid yelko Aabigel: “Jehoova, Izerayɛl Naaŋmen na nyɛ pugibu, onaŋ toŋ bo zenɛ ŋa hoŋ wa tuore ma na! 33 Jehoova na maale boŋ neŋ lɛ na hoŋ wuli yɛŋ naŋ e zuluŋ na! Jehoova na maale boŋ, bonso ho nyɔge maŋ zenɛ ŋa a yi zĩĩ sane diibu eŋɛŋ, a kyɛ lɛ pigi ma sori maŋ ba de N meŋɛ nuuri yaa neŋ faaloŋ sane. 34 Ka lɛ naane, aŋa lɛ na Jehoova a Izerayɛl Naaŋmen naŋ pigi ma sori maŋ ba e yelzaa naŋ na pere bo naŋ voorɔ yɛŋ, ka hooŋ da ba wa tuore ma wieoŋ, zie da naŋ wa nyaana ka dɔɔ bonyenaa gba da koŋ kyɛre Neebal die deme poɔŋ.” 35 Beŋ la ka Deevid da deɛ boma na zaa oŋ da de waaneŋ ka o koo na, a kyɛ yelkoo ka: “Leɛ gɛrɛ ho die emmaaroŋ poɔŋ. Nyɛ, N woŋee ho yelyaga na, N na eɛ yɛlɛ na hoŋ sɔre ka N e ko bo na meŋ.”