Marko

30 Ka a bitontonee da ŋmaa gyeere Yezu a manne yɛlɛ na zaa baŋ da e ane wuluu na zaa ba naŋ da wuli noba. 31 Ka Yezu da yelko ba: “Yɛ wa zie ŋa a yɛ yoŋ sɛŋ a pɛnne belaŋ.” Bonso noba yaga da waanaŋ a kyɛ gɛrɛ, ba gba da ba taa wagre fẽẽ gba a na di bondirii. 32 Azuŋ, ba da kpɛ la gbori a gɛrɛ zie kaŋa a na te bebe ba yoŋ sɛŋ. 33 Kyɛ a noba da nyɛ ba la ka ba gɛrɛ, saŋa na a tenne noba naŋ da wa baŋ a yɛlɛ ŋa na, ba da zo neŋ la gbɛɛ a te ta a zie sɛre ka ba wa ta. 34 Saŋa na baŋ da wa sigi a gbori poɔŋ na, o da nyɛɛ a nembeɛoŋ naŋ araa be, ka nembao da kpɛ o yaga ba yɛlɛ, bonso ba da waa ŋa peere naŋ ba taa pikyeenɛ. Oŋ da piili wulo ba yɛlɛ yaga. 35 Kyɛ wagre da faaɛ la, ka o potuuribo na da wa o zie a wa yelkoo ka: “A zie ŋa ne a teŋɛ poɔ e la tɔɔre, ka wagre meŋ faa. 36 Azuŋ, bare a noba ka ba gaa, ka lɛ vɛŋ ka ba gaa a tenne ane tenbilii naŋ peɛle poɔ a te da bonkaŋa di.” 37 Oŋ da yelko ba ka: “Yɛ ko ba bonkaŋa ka ba di.” Beŋ la ka o potuuribo na yelkoo ka: “Te de denare 200 te da boroboro wa ko ba ka ba di bee?” 38 Ka Yezu yelko ba: “Boroboro awala ka yɛ taa? Yɛ kaa nyɛ!” Saŋa na baŋ da kaa baare na, ba da yelkooŋ ka: “Boroboro anuu ane zommɔ ayi.” 39 Ka Yezu yelko a noba ka ba zeŋ a moɔ zuŋ. 40 Azuŋ a noba da laŋɛɛ taa zeŋ aŋa noba 100, ka ba mine meŋ da lantaa zeŋ aŋa noba 50. 41 Ka Yezu da de a boroboro anuu ane a zommɔ ayi, a zɛge o zu tori sazu a puori. Beŋ la oŋ da ŋmaare a boroboro a de ko o potuuribo na baŋ meŋ de korɔ a noba, o daaŋ po la a zommɔ ayi a ko a noba zaa. 42 Ka ba zaa da di a tigi, 43 ba da de la a bondirii naŋ kyɛre na aŋ pa pɛre 12, kyɛ a zommɔ yɛŋ da ba poɔ. 44 Noba naŋ da ɔɔ a boroboro da eɛ dɔbɔ 5,000.