Matio

6 “Yɛ kaara soŋ a ta wa tonɔ yɛ tonveɛle nensaaleba niŋesogɔ ka ba na nyɛ yɛ; ka lɛ naane yɛ koŋ nyɛ saŋyɔɔ zaa yi yɛ sazu Saa na zieŋ. 2 Azuŋ, ka yɛneeŋ wa gɛrɛ ka yɛ soŋ nembaalba, yɛ ta maŋ peɛlɛ eelɛ aŋa lɛ a bampuori-kombampoɔ noba naŋ maŋ erɛ a ŋmenpuorederi pooreŋ ane a sobɛrɛ zuriŋ na, ka lɛ na vɛŋ ka noba nyɛ a pugiro ba. Yelmeŋɛ ka N yele korɔ yɛ, ba nyɛ la ba saŋyɔɔ zaa baare. 3 Kyɛ yɛnee yɛŋ, ka yɛ naŋ wa gɛrɛ ka yɛ soŋ nembaalba, yɛ ta vɛŋ ka yɛ nugɔɔ baŋ bon na yɛ nuduluŋ naŋ erɛ, 4 ka lɛ ta vɛŋ ka yɛ nembaalba sommo sãã ka noba nyɛ. Lɛ la ka yɛ Saa naŋ nyɛrɛ yelsɔglɔ zaa na ko yɛ saŋyɔɔ. 5 “Ka yɛneeŋ wa puoro, yɛ ta maŋ erɛ yɛ yɛlɛ aŋa a bampuori-kombampoɔ noba, bonso ba maŋ nɔŋeŋ ka ba puoro a ŋmenpuorederi pooreŋ ane a sobɛrɛ zuriŋ ka noba na nyɛ ba. Yelmeŋɛ ka N yele korɔ yɛ, ba nyɛ la ba saŋyɔɔ zaa baare. 6 Kyɛ ka yɛneeŋ wa puoro, yɛ maŋ kpɛ yɛ deri poore, a pɔge a denoɔre kyɛ pãã puori ko yɛ Saa naŋ be zisɔglaa poɔ. Lɛ la ka yɛ Saa naŋ nyɛrɛ yelsɔglɔ zaa na ko yɛ saŋyɔɔ. 7 Ka yɛneeŋ wa puoro, yɛ ta maŋ bonnɔ yele yelyenaa kaŋa weɛ lɛ aŋa lɛ na a noba naŋ ba e Gyuu noba naŋ maŋ erɛ na, bonso ba maŋ teɛre ka, ka ba naŋ yele yel yaga, lɛ ka Naaŋmen na woŋ ba puoro. 8 Yɛ ta tɔglɔ a ba eebo na, bonso yɛ sazu Saa baŋɛɛ yɛlɛ naŋ fɛrɛ yɛ sɛre kyɛ ka yɛ sɔroo gba. 9 “Azuŋ, ŋaa aŋ seŋ ka yɛ maŋ puori: “‘Te Saa naŋ be sazuŋ, vɛŋ ka ho yuori pɛgeyi. 10 Vɛŋ ka ho Naaloŋ wa. Vɛŋ ka ho poboɔbo nyɛ eebo a tendaa zuŋ aŋa lɛ a naŋ nyɛrɛ eebo sazuŋ na. 11 Ko te a te zenɛ ŋa bondirii; 12 di te yelbebe suuri a ko te, aŋa lɛ te meŋ naŋ di te taaba yelbebe suuri a ko ba na. 13 Ta e ka te kpɛ pigrinyɛ poɔ, kyɛ faa te a yi a neŋfaa na nuuriŋ.’ 14 “Ka yɛneeŋ dire yɛ taaba yelfaare suuri a korɔ ba, yɛ sazu Saa na meŋ na di la yɛ yelfaare suuri a ko yɛ; 15 kyɛ ka yɛneeŋ ba di yɛ taaba yelfaare suuri a ko ba, yɛ Saa meŋ koŋ di yɛ yelfaare suuri a ko yɛ. 16 “Ka yɛneeŋ wa leŋ noɔre, yɛ ta maŋ sãã yɛ niŋe aŋa lɛ a bampuori-kombampoɔ noba naŋ maŋ erɛ na, ba maŋ sãã la ba niŋe ka lɛ na vɛŋ ka noba nyɛ ka ba leŋ la noɔre. Yelmeŋɛ ka N yele korɔ yɛ, ba nyɛ la ba saŋyɔɔ zaa baare. 17 Kyɛ yɛnee yɛŋ, ka yɛ naŋ wa leŋ noɔre, yɛ maŋ pɛge yɛ niŋe, a sɔ yɛ zu kãã, 18 ka lɛ na vɛŋ ka noba ta baŋ ka yɛ leŋ la noɔre, kyɛ yɛ Saa naŋ be zi-sɔglaa yɛŋ na baŋ la. Lɛ la ka yɛ Saa naŋ nyɛrɛ yelsɔglɔ zaa na ko yɛ saŋyɔɔ. 19 “Yɛ ta boɔrɔ bondaaŋ boma binne a teŋɛzuŋ kyɛ, zie na mɔgre ane zoɔ̃ naŋ be, ka naŋnyigri meŋ na baŋ kɔɔ kpɛ zu a boma. 20 kyɛ yɛ boɔrɔ bondaaŋ boma binne sazuŋ, beŋ ka mɔgre ane zoɔ̃ ba kye, ka naŋnyigri meŋ koŋ baŋ kɔɔ kpɛ zu a. 21 Zie na ho bondaaŋ boma naŋ be, beŋ ka ho sukyiri meŋ maŋ be. 22 “Nimiri la nensaalaa eŋdaa fentelɛ. Azuŋ, ka ho nimiriŋ wa be yelyenaa eŋɛŋ, ho eŋdaa zaa na kyããne la. 23 Kyɛ ka ho nimiriŋ ba kye yelyenaa eŋɛŋ, ho eŋdaa zaa na ligeŋ. Ka a kyaanee naŋ be ho eŋɛŋ wa leɛ ligroŋ, nyɛ lɛ a ligroŋ naŋ na e kpoŋ a seŋ! 24 “Neɛzaa koŋ baŋ tonɔ korɔ nembɛrɛ bayi; o na kyiiri la kaŋa, a kyɛ nɔŋ kaŋa, kyɛbee ka o kpimare kaŋa a kyɛ gyɛ kaŋa bare. Yɛ koŋ baŋ e gbaŋgbaare a ko Naaŋmen ane Bondaaloŋ. 25 “A lɛ zuŋ ka N yele korɔ yɛ: Yɛ ta kyerɛ yɛ nyɔvoɛ yɛlɛ a kyaare bon yɛŋ na di kyɛbee bon yɛŋ na nyu, kyɛbee yɛ eŋgama yɛlɛ a kyaare bon yɛŋ na su. Nensaalaa nyɔvore ba e tegroŋ a gaŋ bondirii, ka o eŋdaa meŋ e tegroŋ a gaŋ bonsuurii bee? 26 Yɛ maaleŋ kaa a sazu nuuli velaa zaa nyɛ; a ba borɔ bonbie, kyɛbee a derɛ weɛ boma eŋnɛ bugri poɔ, kyɛ a yɛ sazu Saa maŋ koraaŋ bondirii. Yɛ ba e tegroŋ gaŋ a nuuli ŋa yaga zaa bee? 27 Yɛ buo soba la a na kyerɛ o meŋɛ a na toɔ̃ tɔnne o nyɔvore fẽẽ lɛ gba? 28 Ane meŋ, bonso yɛŋ kyerɛ bonsuurii yɛlɛ? Yɛ zanne yelkaŋa yi moɔ poɔ bon-puuro eŋɛŋ, ane lɛ a naŋ maŋ baa; a ba tonɔ toma, kyɛbee a wuoro bonsuurii; 29 kyɛ Maaŋ yele korɔ yɛ, haali Soolomoŋ ne o naaloŋ veɛloŋ zaa daŋ ba veɛlɛ seŋ a boma ŋa. 30 Ka ŋaa la ka Naaŋmen maŋ kaa a moɔ poɔ bon-puuro ka a veɛlɛ, a naŋ maŋ bebe zenɛ ŋa, kyɛ ka zie wa nyaana ka ba de a lɔɔ eŋ vũũ poɔŋ, ka lɛ o koŋ baŋ ko yɛ bonsuurii ka yɛ su bee, yɛnee noba naŋ taa sagediibu naŋ e fẽẽ? 31 Azuŋ, yɛ daŋ ta wa kyerɛ yɛ menne a yele, ‘Boŋ teŋ na di?’ kyɛbee, ‘Boŋ teŋ na nyu?’ kyɛbee, ‘Boŋ teŋ na su?’ 32 Bonso a boma ŋa la ka a paalonne noba zaa moɔ̃ niŋe a boɔrɔ. Yɛ sazu Saa na baŋɛɛŋ ka a boma ŋa yɛlɛ fɛrɛɛ yɛ meŋ. 33 “Yɛ moɔ̃ nimiri a daŋ boɔrɔ Naaŋmen Naaloŋ na, a kyɛ lɛ tuuro o bege na meŋ zaa, lɛ la ka o pãã na de a boma ŋa zaa poɔ yɛ. 34 Azuŋ, yɛ daŋ ta wa kyerɛ bieu yɛlɛ, bonso bieu meŋ na taaɛ o meŋ eŋkyere yɛlɛ. Bebiri zaa maŋ taaɛ o yelwonnii.