Daaniel

31 “Oo naa, ho kaaraŋ a nyɛ bonmeɛraa kaŋa naŋ e kpoŋ yaga zaa. A bonmeɛraa naŋ e kpoŋ a kyaane yaga zaa na da arɛɛ ho nimitɔɔreŋ, o waaloŋ da eŋnɛɛ dabeɛ̃ yaga zaa. 32 A bonmeɛraa zu da waa la sanlii naŋ soma yaga zaa, ka o nyaa ane o kpaŋkpama meŋ da waa ware, o poɔ a de sigre o gbɛ-bɛrɛ meŋ da waa la yaawa, 33 o gbɛɛ da waa la kuribo, ka o gbɛsampama kyɛlee da waa kuribo, ka o kyɛlee meŋ waa yagi. 34 Ho kaaraŋ lɛɛŋ a te ta saŋa na baŋ iri kuurii kaŋa bare, nensaalaa nuure naaneŋ da iri a kuurii bare, a kuurii da wa ŋmɛɛ a bonmeɛraa gbɛsampama naŋ e kuribo ane yagi na, a ŋmore a zaa. 35 A lɛ saŋa na, a kuribo, a yagi, a yaawa, a ware ane a sanlii zaa da laŋɛɛ taa, a zaaŋ da ŋmore a waa ŋa bonpɛgre ba naŋ yeɛle aŋ gaŋ sẽɛ saŋa boma yeɛloo zieŋ, ka saseɛ da wa de a gaa, ka lɛ vɛŋ baŋ ba lɛ nyɛ a togitogi. Kyɛ a kuurii na naŋ wa ŋmɛ a bonmeɛraa na da leɛ la taŋkpoŋ, a da paale a tendaa zaa. 36 “A gaŋzannoo la ŋa, te pãã na wulee a naa yɛlɛ a gaŋzannoo naŋ wulo. 37 Oo naa, ho eɛ namine zaa poɔ naa, azuŋ ka a sazu Naaŋmen de a naaloŋ, a kpeɛ̃o, a faŋa, ane a gyeremɛ ko bo, 38 ho nuureŋ la oŋ de nensaaleba naŋ be zie zaa a eŋ, o de la a wɛdunni naŋ be moɔ poɔŋ ane a sazu nuuli zaa eŋ ho nuureŋ, o vɛŋɛɛŋ hoŋ e naa a kaara a zaa zu—hooŋ la a zu naŋ e sanlii na. 39 “Kyɛ ho puoreŋ naaloŋ kaŋa meŋ na waŋ, o koŋ e tegroŋ seŋ bo; naaloŋ kaŋa meŋ na lɛ waŋ a na naaloŋ na meŋ puoreŋ, a taaloŋ naaloŋ la lɛ, o na waa la yaawa, o na diree naaloŋ a kaara a tendaa zaa. 40 “A naaloŋ anaare soba na yɛŋ, o na eɛ kpeɛŋaa aŋa kuribo. Aŋa lɛ na kuribo naŋ maŋ ŋmore a neɛŋ bonzaa na, o na ŋmoreŋ a lɛ neɛŋ ba zaa. 41 “Aŋa lɛ na hoŋ nyɛ a gbɛsampama ane a gbɛbie kyɛlee naŋ e dogmeɛrɛ yagi na, ka a kyɛlee meŋ e kuribo na, a naaloŋ na wɛlɛɛ taa, kyɛ o na taaɛ kuribo kpeɛ̃o o poɔŋ, aŋa lɛ na hoŋ nyɛ a kuribo naŋ gyɛre a yagi naŋ e baaloo eŋɛŋ lɛ na. 42 Aŋa lɛ na a gbɛbie kyɛlee naŋ e kuribo ka a kyɛlee meŋ e yagi na, a naaloŋ kyɛlee na eɛ kpeɛŋaa ka o kyɛlee meŋ e bambaala. 43 Aŋa lɛ na hoŋ nyɛ kuribo naŋ gyɛre a yagi naŋ e baaloo poɔŋ na, ba na gyɛrɛɛ a noba poɔŋ; kyɛ ba koŋ lantaa, aŋa lɛ na kuribo naŋ koŋ baŋ laŋ yagi poɔŋ na, lɛ meŋ baŋ koŋ lantaa. 44 “A namine ŋa naaloŋ diibu saŋa naŋ ka a sazu Naaŋmen na na biŋ naaloŋ kaŋa naŋ koŋ sãã zaa. Ba koŋ de a naaloŋ ko neŋyobo meŋ. O na ŋmarɛɛ a naalonne ŋa zaa a baare a yɛlɛ, kyɛ ka o yoŋ are a gɛrɛ wagre naŋ ba taa baaraa, 45 aŋa lɛ na hoŋ nyɛ a kuurii na nensaalaa nuure naŋ ba iri bare naŋ yi a taŋazu a wa ŋmore a kuribo, a yaawa, a yagi, a ware, ane a sanlii na. A Naaŋmen Kpoŋ vɛŋɛɛŋ ka a naa baŋ yɛlɛ naŋ na nyɛ eebo nendaare kaŋa. A gaŋzannoo waa la yelmeŋɛ, ka lɛ na baŋ wuli a pare na meŋ taa dɛlebo.”