Gyɔɔn

5 Saŋa na Yezu naŋ da zɛge o zu a nyɛ a nembeɛoŋ na zaa naŋ da waana o zie na, o da yelko la Filipi ka: “Yenee teŋ na baŋ da boroboro ko a noba ŋa ka ba ɔɔ?” 6 Kyɛ, o da yelee lɛ ka o e Filipi nyɛ, bonso o da baŋɛɛ yɛlɛ o naŋ waana ka o e. 7 Ka Filipi deɛ yelkoo ka: “Ka teneeŋ de denari kɔɔraayi da neŋ boroboro ko ba, kyɛ ba kaŋa zaa koŋ nyɛ fẽẽ gba a ɔɔ.” 8 A potuuro kaŋa ba naŋ boɔlɔ Anduru, Saamon Piita yɔɔ na, da yelko oŋ ka: 9 “Bidɔɔbile kaŋa be la kyɛ a taa baali boroboro anuu ane zɔma naŋ e bilii ayi. Kyɛ a boma ŋa na baŋ seŋɛɛ a neŋyaga ŋa bee?” 10 Ka Yezu yelka: “Yɛ vɛŋ ka a noba zeŋ teŋɛŋ.” Moɔ da be la a zieŋ yaga zaa, a dɔba da zeŋ la a zuŋ, ba noɔre da taɛ 5,000. 11 Yezu da de la a boroboro, saŋa na oŋ da wa puore Naaŋmen bareka baare na, o da de la a boroboro poŋ ko noba naŋ da zeŋ be na; lɛ neŋ o zu oŋ da e a zoma naŋ da e bilii na meŋ, ka ba kaŋa zaa da nyɛ aŋa lɛ ba naŋ boɔrɔ. 12 Kyɛ saŋa na baŋ wa di a tigi baare na, o da yelko la o potuuribo na ka: “Yɛ lagre a boma na ba naŋ di kyɛ kyɛre na lantaa, ka lɛ vɛŋ ka bonzaa ta wɛ.” 13 Azuŋ ba da lagrɛɛ a boma na a noba naŋ di kyɛ kyɛre a yi a baali boroboro anuu na poɔŋ lantaa aŋ pa pɛre 12. 38 N yi la sazu wa a teŋɛzu ka N wa e neɛ naŋ toŋ ma na boɔbo, N ba wa ka N e N meŋɛ boɔbo. 40 N Saa boɔbo la ŋa, ka neɛzaa naŋ sagede a Bidɔɔ, a lɛ wulo sagediibu o eŋɛŋ na taa la nyɔvore naŋ ba taa baaraa, N na seŋɛɛ o soba ka o iri yi kũũni poɔŋ a bebi-baaraa daare.” 44 Neɛzaa koŋ baŋ wa N zie ka N Saa naŋ toŋ ma naŋ ba tagoo waneŋ N zie, N na seŋɛɛ o soba ka o iri yi kũũni poɔŋ a bebi-baaraa daare. 68 Ka Saamon Piita deɛ yelkoo ka: “Daana, nembuo zie la teŋ na gaa? Hooŋ la taa nyɔvore naŋ ba taa baaraa yelbie. 69 Te sagedieŋ a wa baŋ meŋ ka hooŋ la a Neŋforifori naŋ yi Naaŋmen zie na.”