Munpiilee

39 Ba da de la Gyoosɛf gaaneŋ Igyipiti, ka Igyipiti dɔɔ kaŋa baŋ boɔlɔ Pɔtifa naŋ da e Faaro nayiri toŋtonɔ na kaŋa, ane a sogyare neŋkpoŋ kaŋa da da o yi a Isimeɛl noba na naŋ da de o waneŋ be na zieŋ. 2 Kyɛ Jehoova da be la Gyoosɛf zieŋ. A lɛ zuŋ, yelzaa Gyoosɛf naŋ da erɛ da nyɛrɛɛ nimitɔɔre gaabo, ka o neŋkpoŋ naŋ da e Igyipiti neɛ na da kaa iruu oŋ kaara o yiri zaa zu. 3 Ka o neŋkpoŋ na da nyɛ ka Jehoova be la o zieŋ, a vɛŋ ka yelzaa oŋ erɛ nyɛrɛ nimitɔɔre gaabo. 4 Ka Gyoosɛf neŋkpoŋ na poɔ da pɛle ne o yaga zaa, ka lɛ vɛŋ oŋ kaa iruu oŋ tonɔ koroo. Azuŋ oŋ da kaa iruu oŋ kaara o yiri zu, a da vɛŋ oŋ kaara bonzaa oŋ taa. 5 A yi saŋa na oŋ da kaa iruu ka o kaara o yiri zu ane bonzaa oŋ taa na, Gyoosɛf zuŋ, Jehoova da vɛŋɛɛŋ ka yɛlɛ kyɛnɛ soŋ zaa a Igyipiti neɛ na yiriŋ, ka Jehoova da maale bon la bonzaa o naŋ taa o yiriŋ ane o weɛ poɔŋ. 6 A baaraa zaa o da wa barɛɛ yelzaa eŋ Gyoosɛf nuuriŋ, o da ba lɛ teɛrɛ yelzaa yɛlɛ ka bondirii na oŋ da dire na yoŋ naane. Gyoosɛf da baaɛŋ a leɛ dɔɔ naŋ veɛlɛ. 7 A yɛlɛ ama puoreŋ, o neŋkpoŋ na pɔge da iree o nimiri eŋ Gyoosɛf, a yelko Gyoosɛf ka: “Wa gaŋne ma.” 8 Ka Gyoosɛf zagre kyɛ yelko o neŋkpoŋ na pɔge ka: “N neŋkpoŋ ba baŋ bon naŋ be N zie o yiriŋ, o de la bon la bonzaa eŋ N nuuriŋ ka N kaara a zu. 9 Neɛzaa kyebe a e kpoŋ gaŋ ma a yiri ŋa poɔŋ, o ba mɔŋ ma bonzaa ka hooŋ yoŋ naane, bonso ho eɛ o pɔge. Azuŋ wala maŋ na toɔ̃ e a yelfaa ŋa naŋ e kpoŋ seŋ ŋaaŋ a kyaare ne Naaŋmen?” 10 Azuŋ, bebiri zaa o da maŋ yelee lɛ korɔ Gyoosɛf, kyɛ o da ba sage ka o ne o gaŋ kyɛbee a be o zieŋ. 11 A bebiri na kaŋa Gyoosɛf naŋ da kpɛ a die poɔ ka o toŋ toma, o tontonneba na kaŋa zaa da ba kye a die poɔŋ. 12 Ka a pɔge naare nyɔge Gyoosɛf bonsuurii a kyɛ yelkoo ka: “Gaŋne ma!” Kyɛ ka Gyoosɛf bare o bonsuurii a pɔge nuuriŋ a kyɛ zo yi yeŋe.