1 Timoti

3 A yɛlɛ ŋa seŋ nɛɛ dɛlebo: ka dɔɔŋ nyɛrɛ nimitɔɔre gaabo ka o wa e zukaara, o boɔrɛɛ toma naŋ soma yaga. 2 A ba seŋ ka zukaara taa saanaa zaa, a taa pɔge bonyeni, a baŋ o meŋɛ taabo, a taa teɛroŋ naŋ soma, a maŋ erɛ yɛlɛ ka a tuuro taa velaa zaa, a taa saanoŋ gyogo, a e wulwulo naŋ kyile, 3 a ta e dããnyukuolo, a ba seŋ ka o taa sutuloŋ, a maŋ teɛrɛ yɛlɛ gɛrɛ tɔɔre, a e neɛ naŋ ba zɔɔrɔ ne noba, a ba seŋ ka o e neɛ naŋ nɔŋ libie, 4 a e dɔɔ naŋ kaara o yideme zu velaa zaa, a sonnɔ o biiri ka ba sigri ba menne, a taa nimizeeloŋ ne yelzaa 5 (bonso ka neɛŋ ba baŋ lɛ oŋ na kaa o yideme zu, wala oŋ na baŋ e kaa Naaŋmen lantaapuoruu na?), 6 a ba seŋ ka o e Kristabi-paalaa, ka lɛ naane o na baŋ zɛgrɛɛ o meŋɛ a le a sɛrɛɛ na ba naŋ ŋmaa dɔgle a Dɛɛvul na poɔ. 7 Ane meŋ, aseŋ ka o taa yosoŋ noba naŋ ba sage de a yɛlɛ zie, ka lɛ vɛŋ ka o ta kpɛ nyaaba poɔ ane a Dɛɛvul kyɛbaa na poɔ. 8 A lantaapuoruu nembɛrɛ sonneba meŋ seŋ ka ba e noba naŋ taa nimizeɛ, a ta e nɔ-buyi noba, a ta nyuuro dãã yaga, a ta e bombɔ-gaŋne noba, 9 a maŋ nyɔge a sagediibu yelsɔglaa naŋ e forifori na neŋ zoma naŋ pɛgeyi. 10 Yɛ daŋ tɛgre a noba ŋa nyɛ ka ba seŋ nɛɛŋ bee; ka banaŋ wa e noba naŋ ba taa saanaa zaa yɛŋ, yɛ na baŋ vɛmeŋ ka ba tonɔ a toma. 11 Pɔgeba meŋ seŋ ka ba e nimizi-noba, a ta saana noba yoe, a baŋ ba menne taabo, a e yelmeŋɛ deme yelzaa poɔŋ. 12 A lantaapuoruu nembɛrɛ sonneba seŋ ka ba taa pɔg-yenaa, a kaara ba biiri ane ba die deme zu velaa zaa. 13 Bonso dɔba naŋ tonɔ a toma ŋa velaa zaa boɔrɛɛ yosoŋ, a maŋ taa nyaa kpoŋ yɛlɛ yeluu a sagediibu poɔŋ Krista Yezu eŋɛŋ.