Matio

4 Beŋ la ka a vooroŋ soŋ de Yezu gaaneŋ a wɛgyɛŋ poɔ ka a Dɛɛvul te pigroo nyɛ. 2 O da leŋ la noɔre bebie 40 ŋmenaa ane teŋsogɔ, ka kɔŋ pãã da kpɛ o. 3 Ka a Enyɛ Soba wa o zie a wa yelkoo ka: “Ka hooŋ wa waa Naaŋmen bidɔɔ, yeli yɛlɛ ko a kubo ŋa ka a leɛ boroboro.” 4 Kyɛ oŋ deɛ yelkoo ka: “Ba sɛgɛɛ la: ‘Bondirii yoŋ naane korɔ nensaala nyɔvore, kyɛ yelbiri zaa naŋ yire Jehoova noɔreŋ la korɔ nyɔvore.’” 5 Beŋ la ka a Dɛɛvul de o gaaneŋ a teŋ-forifori poɔ, a vɛŋ oŋ te are a ŋmenpuoredie zie naŋ do yaga zaa na zuŋ 6 a kyɛ yelkoo ka: “Ka hooŋ wa waa Naaŋmen bidɔɔ, bare ho meŋɛ a le teŋɛŋ, bonso ba sɛgɛɛŋ ka: ‘O na ko la o malekere noɔre a kyaare ho yɛlɛ,’ ane meŋ, ‘Ba na sogi nyɔge boŋ eŋ ba nuure poɔ, ka lɛ vɛŋ ka ho ta de ho gbɛre ŋmɛ kuurii.’” 7 Ka Yezu yelkoo ka: “Ba lɛ sɛgɛɛŋ ka: ‘A ba seŋ ka ho e Jehoova ho Naaŋmen nyɛ.’” 8 Ka a Dɛɛvul lɛ de o gaaneŋ taŋ-wogi wogi kaŋa zuŋ a te wuli o a donɛɛ naalonne zaa ane a gyeremɛ. 9 A kyɛ yelkoo ka: “Ka hooŋ le teŋɛŋ a gbi-dumo puore ma dayeni yoŋ N na de la a boma ama zaa ko bo.” 10 Ka Yezu deɛ yelkoo ka: “Tage yi be te gaa, Setaana! Bonso ba sɛgɛɛŋ ka: ‘Jehoova ho Naaŋmen yoŋ aŋ seŋ ka ho puoro, ona yoŋ aŋ seŋ ka ho tonɔ korɔ.’” 11 Beŋ la ka a Dɛɛvul da baroo kyɛ gaa, nyɛ! malekere da wa la o zie a piili tonɔ koroo. 12 Saŋa na Yezu naŋ da woŋ ka ba nyɔgɛɛ Gyɔɔn te eŋ nempɔgedieŋ na, o da yi la be a gaa Galili. 13 A lɛ puoriŋ, o da iri yi la Naazɛrɛ poɔŋ, o te kpeɛrɛɛ Kapanum naŋ peɛle a mane noɔreŋ a be Zɛbulun ane Nafetalai tenne na pooreŋ, 14 ka lɛ na vɛŋ ka yɛlɛ na daŋyele Aizeeya naŋ yeli na na nyɛ eebo, o da yeleeŋ ka: 15 “Oo Zɛbulun teŋɛ ane Nafetalai teŋɛ naŋ be a mane sobiri noɔreŋ, tenne naŋ be a Gyɔɔdan lombo-zaala naŋ, a paalonne noba Galili! 16 A noba naŋ zeŋ a lige poɔ da nyɛɛ kyaanee kpoŋ kaŋa, ka noba na meŋ naŋ zeŋ kũũ dasuoluŋ poɔ, kyaanee da kyaane eŋ ba la.” 17 A yi ana saŋa na a gɛrɛ, Yezu da piili moɔlɔŋ a yele ka: “Yɛ leɛre yɛ eebo, bonso a sazu Naaloŋ peɛlɛɛ la.” 18 Yezu da kyɛnɛɛ a Galili Mane noɔreŋ, o da nyɛɛ yɔɔmine bayi, Saamon, ona baŋ boɔlɔ Piita na, ane o yɔɔ Anduru, ka ba lɔɔrɔ ba zonkyogri eŋnɛ a mane poɔ, bonso ba da waa la zonnyɔgreba. 19 Ka Yezu yelko ba ka: “Yɛ wa tuuro ma, N na vɛmɛŋ ka yɛ nyɔgrɔ nensaaleba.” 20 A tɔntɔbaalɛ ka ba da bare ba zon-kyogri na kyɛ tuuroo. 21 Saŋa na oŋ da yi a gɛrɛ na, o da nyɛɛ yɔɔmine bayi mine meŋ, Zɛbɛdii bidɔɔ Gyimisi ane o yɔɔ Gyɔɔn. Ba neŋ ba saa la da be a maŋ-gbori poɔ, a liire ba zon-kyogri, ka Yezu da boɔle ba. 22 A tɔntɔbaalɛ, ba da bare la a maŋ-gbori ane ba saa a kyɛ tuuroo. 23 Beŋ la ka o da tuuli a Galili tenne na zaa poore, a wulo noba naŋ be a puoruuderi pooreŋ, a moɔlɔ a Naaloŋ duorisoŋ korɔ noba, a kyɛ saŋna baaloŋ boorɔ zaa ane yelwonaa zaa a noba poɔŋ. 24 Ka o yɛlɛ da yaare te ta Siiriya zaa, ka ba da taa noba na zaa naŋ da beɛrɛ baaloŋ boorɔ zaa a kyɛ dire dɔgɛɛ na, ane noba na zaa malekefaare naŋ da dɔgrɔ, noba naŋ lere kunkunni ane noba naŋ gbɛre waneŋ o zie, ka o da saŋ ba zaa baalonne. 25 Beŋ la ka nembeɛoŋ naŋ yi Galili ane Dekapoli ane Gyɛruzɛlɛm ane Gyudiya ane a Gyɔɔdan lombo-zaala na da tuuroo.