Wala ka Paradiisi poɔ Kpeɛbo da Be?

Jehoova de la bontare sonne yaga ko Adama ane Hawaa. Munpiilee 1:28

Jehoova la maale a pɔge fɔrɔ na baŋ boɔlɔ Hawaa, a de ko Adama ka o e o pɔgɔ.—Munpiilee 2:21, 22.

Jehoova maale baŋ, ka ba teɛroŋ ane ba eŋgama zaa da tori, ka nɔkpɛnaa zaa da ba kye ba eŋaŋ.

A Paradiisi poɔ ba naŋ da kpeɛrɛ na yuori la Eeden gaadin—be da veɛla la yaga, ka kõɔ da puoro be. Te-ŋmama ane donne meŋ da bebeŋ.

Jehoova da maŋ wullo baŋ sosoŋ naŋ seŋ ka ba tu. Ka ba naŋ da kyɛllɛ wono Jehoova wulibo, ba da koŋ kpi. Ba da naŋ kpeɛrɛ la Paradiisi poɔ a teŋɛ zu kyɛ tegteglɛ.

Naaŋmen da yɛlko baŋ ka, ba tɔɔ dire a te-ŋmanee kaŋa. Munpiilee 2:16, 17

A malkiri kaŋa da zagrɛɛ Naaŋmen noɔre. A malki-faa ŋa la Setaana baŋ boɔlɔ Dɛɛvul.

Jehoova da wullee Adama ane Hawaa te-ŋmanee kaŋa naŋ be a gaadin poɔŋ. O da kpãã baŋ ka, ka ba naŋ diu, ba na kpiŋ.

Setaana da ba boɔrɔ ka Adama ane Hawaa kyɛllɛ Jehoova noɔre. Lɛ zuŋ o da tu la waabo eŋaŋ kyɛ yɛlko Hawaa ka, ka o naŋ di a te-ŋmanee o koŋ kpi, kyɛ o na yinee Naaŋmen. Kyɛ zirii la ka Setaana da ŋma.—Munpiilee 3:1-5.