Yɛlɛ Noba Naŋ Kanna Te Gama Naŋ Maŋ Soorɔ

Wala ka a ŋmenpuoredie na Soolomoŋ naŋ da mɛ na varanda da do seŋ?

A varanda da eɛ zie na ba naŋ da maŋ tu kpɛ a Zi-forifori na. A Donpaalaa Kɔkɔleɛroo Sɛge Forifori na baŋ da iri sɛre kyɛ ka yuoni 2023 ta na da yeleeŋ ka, “a varanda yɛloŋ da eɛ kubitiri 20, ka o neŋ a die yɛloŋ zaa da seŋ taa, ka o duobu meŋ da e kubitiri 120.” (2 Tun. 3:4) Baabolehe mine meŋ yeleeŋ ka a varanda duobu da eɛ “kubitiri 120,” lɛ wuleeŋ ka o duobu na da eɛ mitare-53 (Gbɛɛ mannoo-175)!

Ŋaa ka a Donpaalaa Kɔkɔleɛroo Sɛge Forifori na baŋ da printi 2023 poɔŋ na yɛŋ da yelkyaare a ŋmenpuoredie na Soolomoŋ naŋ da mɛ na varanda: “O duobu da eɛ kubitiri 20,” bee mitare 9 (Gbɛɛ mannoo 30).a Te nyɛ ananso na mine zuŋ baŋ e a leɛroo ŋa.

1 Namine 6:3 ba yel a ŋmenpuoredie duobu yɛlɛ. Jeremaiya la da sɛge a lɛ sɛgre na, o da wulee a varanda wogloŋ ane lɛ o yɛloŋ naŋ seŋ, kyɛ o ba wuli lɛ o naŋ do seŋ. A sɛgre kyɛlɛɛ naŋ kyɛre na meŋ yelee a ŋmenpuoredie ziiri mine naŋ e nɔmãã yaga yɛlɛ, aŋa a yaawa gbaal-kpoŋ, a yaawa torikori, ane a pilare naŋ da are a varanda nimitɔɔre na. (1 Nam. 7:15-37) Ka a varanda duobuŋ sereŋ da gaŋ mitare 50, lɛ yɛŋ o da na do gaŋ la a ŋmenpuoredie. Ka ananso la wala ka Jeremaiya da ba yel o duobu yɛlɛ? Yuomo kɔɔkɔɔ yaga puoriŋ gba, a Gyuumine takoreŋ yɛlɛ sɛgsɛgreba sɛgɛɛŋ ka a varanda da ba do gaŋ a ŋmenpuoredie na Soolomoŋ naŋ da mɛ na.

Gaŋbanneba mine yeleeŋ ka, a na eɛ kpeɛŋaa ka a ŋmenpuoredie daŋkyime nyɔge varanda duobu naŋ e kubitiri-120 ka o toɔ̃ are. Ziiri baŋ da maŋ mɛ aŋ do yaga zaa takoreŋ saŋa na, aŋa ŋmenpuoredie denɔ-bɛrɛ baŋ da maŋ maale Igyipitiŋ na, a pare seŋ da maŋ eɛ yɛloŋ kyɛ ka a sazu seŋ na te e foɔlee lɛ. Kyɛ a ŋmenpuoredie na Soolomoŋ naŋ da mɛ na yɛŋ da ba waa lɛ. Gaŋbanneba mine yeleeŋ ka o daŋkyime koŋ baŋ e yɛloŋ gaŋ kubitiri 6, bee mitare 2.7 (Gbɛɛ mannoo 9). Theodor Busink naŋ maŋ peɛrɛ yɛlɛ kyaare lɛ baŋ da maŋ mɛ deri takoreŋ saŋa yeleeŋ ka: “Ka teneeŋ kaa lɛ a [ŋmenpuoredie denoɔre] daŋkyime yɛloŋ naŋ da maŋ seŋ na, a wuleeŋ ka a varanda [duobu] koŋ baŋ e kubitiri 120.”

Aminekaŋaŋ saŋa na baŋ da leɛ maaleŋ sɛgrɛ yɛlɛ naŋ be 2 Tungkori 3:4 na, ba da ŋmɛ la gbɛre. Aneazaa ka gaŋ-korɔ mine yeleeŋ ka “120” a sɛgre ŋa poɔŋ, kyɛ gama naŋ be dɛlebo yaga zaa aŋa Codex Alexandrinus baŋ da maale yuomo 1,500 naŋ pare ane Codex Ambrosianus baŋ da maale yuomo 1,600 naŋ pare yeleeŋ ka, o da eɛ “kubitiri 20.” Ananso la wala ka gaŋsɛgrɛ na baŋ ŋmɛ gbɛre a leɛ sɛge ka “120”? A Hiburu kɔkɔre poɔŋ, a yelbie naŋ are ko “kɔɔ” ane “kubitiri” na yi la taa. Azuŋ gaŋsɛgrɛ na baŋ ŋmɛɛ gbɛre a sɛge “kubitiri” ka “kɔɔ.”

Yelmeŋɛ la, te mɔɔrɛɛ te moɔbo zaa ka te baŋ yɛlɛ yaga kyaare a ŋmenpuoredie na Soolomoŋ naŋ da mɛ na, a toɔ̃ wuli o poɔ yɛlɛ soŋ ka a pɛle, kyɛ te maŋ de la te teɛroŋ zaa eŋ lɛ a ŋmenpuoredie ŋa naŋ are ko a siiloŋ poɔ ŋmenpuorede-kpoŋ na. Te puoree Jehoova bareka yaga zaa o naŋ toŋboɔle o puorebiiri zaa ka ba wa puoruu a siiloŋ poɔ ŋmenpuorede-kpoŋ na poɔŋ!​—Hib. 9:11-14; Yel. 3:12; 7:9-17.