Yɛ Vɛŋ Ka Te Yi Sigrimennoŋ Poɔŋ A Sage Ka Yɛlɛ Mine Bebeŋ Teŋ Ba Baŋ

1. Sori na Jehoova naŋ maale te na vɛŋɛɛŋ teŋ na baŋ e bo yɛlɛ? Bonso ka Jehoova maale te lɛ?

LƐ NA Jehoova naŋ maale te na eɛ seɛlee yaga zaa. A vɛŋɛɛŋ teŋ maŋ toɔ̃ teɛre yɛlɛ gaa tɔɔre, a zanne yelpaala, a woŋ yɛlɛ na teŋ zanne na muni velaa, ane lɛ teŋ na toɔ̃ de a tonɔ neŋ toma te zemmo poɔŋ. Bonso ka Jehoova maale te lɛ? Ananso la ka, Jehoova boɔrɔŋ ka te maŋ zanne yɛlɛ a baŋ a yɛlɛ muni velaa, ka lɛ vɛŋ ka te derɛ gbɛ-sonne saŋa na teŋ puoruu na.​—Yeng. 2:1-5; Uro. 12:1.

2. (a) Bo yɛlɛ aŋ seŋ ka te baŋ a kyaare te menne? (Urom 11:33, 34) (Kaa a foto.) (b) Ka teneeŋ wa sage ka yelzaa naane teŋ baŋ, sobuo aŋ na baŋ soŋ te?

² Yelmeŋɛ la, lɛ na Jehoova naŋ maale te na maŋ vɛŋeŋ teŋ toɔ̃ zanna yelpaala. Kyɛ, yɛlɛ mine bebeŋ teŋ ba baŋ. (Kanne Urom 11:33, 34.) Te de Gyoob yɛlɛ manne neŋ a yɛlɛ ŋa. Jehoova da soorooŋ soorebie mine, a soorebie da vɛŋɛɛŋ ka Gyoob wa nyɛ ka yɛlɛ yaga bebeŋ oŋ ba baŋ. Dama na o neŋ Jehoova naŋ di na da somooŋ oŋ maaleŋ sigri o meŋɛ, a lɛ leɛre o teɛroŋ meŋ. (Joob 42:3-6) Ka teneeŋ meŋ baŋ te e ta ziiri, a na soŋ teŋ ka te baŋ ka yelzaa naane teŋ baŋ. Ka teneeŋ maŋ taa a teɛroŋ ŋa, a na soŋ teŋ ka te sigri te menne, a lɛ taa sagediibu meŋ ka Jehoova na wuli teŋ yɛlɛ naŋ seŋ ka te baŋ, ka lɛ vɛŋ ka te toɔ̃ derɛ gbɛ-sonne.​—Yeng. 2:6.

3. Bo yɛlɛ teŋ na zanne a zannoo ŋa poɔŋ?

³ A zannoo ŋa poɔŋ, te na nyɛɛ yɛlɛ mine te naŋ ba baŋ, ane yelkpeɛne na teŋ maŋ tuore saŋa na teŋ ba baŋ ana yɛlɛ na. Te na lɛ nyɛɛ bon nanso aŋ soma yaga te naŋ ba baŋ yɛlɛ mine. Jehoova la ‘Neɛ naŋ paale neŋ bammo.’ A zannoo ŋa na soŋ teŋ ka te maaleŋ dɛloo yaga zaa, bonso, o na wuli teŋ yɛlɛ naŋ seŋ ka te baŋ.​—Joob 37:16.

TE BA BAŊ SAŊA NA A DONƐƐ BAAROO NAŊ NA WA

4. Aŋa lɛ na Matio 24:36 naŋ wuli na, bo yɛlɛ teŋ ba baŋ?

⁴ Kanne Matio 24:36. Te ba baŋ saŋa na a donɛɛ ŋa baaroo naŋ na wa. Saŋa na Yezu meŋɛ naŋ da be a teŋɛzuŋ na, o da yeleeŋ ka o ba baŋ a “bebiri, bee a saŋa.”a A puoriŋ, o da yelko la o bitontonee na ka Jehoova maŋ de la o wagre tonɔ neŋ toma velaa, azuŋ, onaŋ baŋ saŋa na oŋ nare biŋ neŋ “O meŋɛ kpeɛ̃o” ka yɛlɛ mine nyɛ eebo. (Tom. 1:6, 7) Jehoova narɛɛ bebiri na a donɛɛ ŋa naŋ na wa o baaroo na biŋ, kyɛ tenee yɛŋ koŋ toɔ̃ baŋ bebiri na meŋɛ a donɛɛ ŋa naŋ na wa o baaroo.

5. Te naŋ ba baŋ bebiri na meŋɛ a donɛɛ ŋa naŋ na wa o baaroo na zuŋ, bo yɛlɛŋ na baŋ pɔge te?

⁵ Yɛlɛ na Yezu naŋ yeli na vɛŋɛɛŋ teŋ baŋ ka te ba baŋ lɛ na aŋ seŋ ka te kyɛnle kɔɔre seŋ sɛre kyɛ ka a donɛɛ baaroo ta. Ka teneeŋ e noba naŋ de wagre kɔɔroo kaŋa kyɛnlɛ ka Jehoova bebiri na wa, a yɛlɛ ŋa na toɔ̃ vɛŋeŋ ka te kannyiri baare, kyɛbee ka te enne kyoɔre. Ka te booree demeŋ wa erɛ te laara, a na baŋ eɛ kpeɛŋaa ko te ka te are a noɔreŋ. (2 Pit. 3:3, 4) Aminekaŋaŋ, te na baŋ piili teɛrɛŋ ka, ka teneeŋ da baŋ bebiri na meŋɛ a donɛɛ ŋa naŋ na wa o baaroo, a na soŋ teŋ ka te maaleŋ dire kannyiri, a lɛ e mɔlɔ meŋ ko te ka te are yɛlɛ na zaa baŋ erɛ te na noɔreŋ.

6. Bonso aŋ soma yaga zaa te naŋ ba baŋ saŋa na a donɛɛ baaroo naŋ na wa?

⁶ A somaŋ Jehoova naŋ ba wuli te bebiri na meŋɛ a donɛɛ ŋa naŋ na wa o baaroo. Lɛ eebo yuo la sori ko te ka te de te yel-eree wuli ka te dɛlɛɛ Jehoova, a lɛ puoruu te naŋ nɔmoo zuŋ meŋ. Te boɔrɔŋ ka te puoro Jehoova tegitegilɛ. A donɛɛ baaroo naŋ na wa zuŋ naane teŋ puoruu. A koŋ soma ka te maŋ de te teɛroŋ zaa eŋ saŋa na “Jehoova bebiri” naŋ na wa eŋɛŋ. Kyɛ, a na somaŋ yaga zaa ka te maŋ teɛrɛ yelsonne na naŋ na e a donɛɛ baaroo puoriŋ. Lɛ eebo na soŋ teŋ ka te kpimare Jehoova, a moɔrɔ te moɔbo zaa ka te pɛlɛ o poɔ.​—2 Pit. 3:11, 12.

7. Bo yɛlɛ teŋ baŋ?

⁷ A na somaŋ yaga zaa ka te de te teɛroŋ eŋ yɛlɛ na teŋ baŋ na eŋɛŋ. Aŋa mannoo poɔŋ, te baŋɛɛŋ ka a piili yuoni 1914 a waana, te be la a bebi-baaree poɔŋ. Ka hooŋ kaa a Baabole poɔŋ, Jehoova vɛŋɛɛŋ baŋ sɛge daŋyelbo yɛlɛ naŋ wuli ka yuoni 1914 ka a donɛɛ ŋa bebi-baaree piili. Kyɛ lɛ yoŋ naane, Jehoova lɛ wuli teŋ yɛlɛ naŋ na erɛ a donɛɛ poɔŋ a piili ana yuoni na a gɛrɛ. A yɛlɛ ama zaa vɛŋɛɛŋ teŋ sagedi ka “Jehoova bebi-kpoŋ na peɛlɛɛŋ.” (Zef. 1:14) Te baŋɛɛ toma na Jehoova naŋ boɔrɔ ka te tonɔ. O boɔrɔŋ ka te moɔle “a Naaloŋ duorisoŋ” ko noba yaga ka ba woŋ. (Mat. 24:14) Ba moɔlɛɛ a duorisoŋ ŋa paalonne naŋ ta ŋa 240 poɔŋ, a yi kɔkɔɛ naŋ pare 1,000 poɔŋ. Yelmeŋɛ la, te ba baŋ “a bebiri, bee a saŋa,” kyɛ lɛ ba wuli ka te koŋ toɔ̃ de eŋnyagroŋ moɔlɔ neŋ a duorisoŋ.

TE BA BAŊ SORI NA JEHOOVA NAŊ NA TU A SOŊ TE

8. Bo yɛlɛ ka Ikilisiasitiz 11:5 wulo te?

⁸ Wagre zaa naane teŋ maŋ baŋ ‘Naaŋmen naŋ maala boma zaa na toma.’ (Kanne Ikilisiasitiz 11:5.) A Baabole zie ŋa boɔrɔŋ ka o wuli ka, te ba maŋ baŋ yɛlɛ na Jehoova naŋ vɛŋ aŋ nyɛ eebo, kyɛbee yɛlɛ na oŋ tere sori aŋ nyɛ eebo, ka lɛ na vɛŋ ka o boɔbo paale. Te koŋ toɔ̃ baŋ bon nanso Jehoova naŋ maŋ tere sori ka yelkaŋa e, kyɛbee sori na oŋ na tu a soŋ te. (Yiem. 37:5) Aŋa lɛ na teŋ ba baŋ lɛ na bilɛɛ naŋ maŋ maale o ma poɔ na, lɛ meŋ teŋ daaŋ koŋ toɔ̃ baŋ ‘Naaŋmen naŋ maala boma zaa na toma’ te baare. Haali science noba ba baŋ lɛ na bilɛɛ naŋ maŋ maale pɔge poɔ te baare. Lɛ meŋ la teŋ koŋ toɔ̃ baŋ sori na Jehoova naŋ na tu a e o yɛlɛ zaa te baare.

9. Te naŋ ba baŋ sori na Jehoova naŋ na tu a e yɛlɛ na zuŋ, bo yelkpeɛne teŋ na baŋ tuore?

⁹ Te naŋ ba baŋ sori na Jehoova naŋ na tu a soŋ te na zuŋ, a na toɔ̃ vɛŋeŋ ka te naara ka te de gbɛɛ mine te zemmo poɔŋ. Aŋa mannoo poɔŋ, te na baŋ naaraŋ ka te de yɛlɛ mine iri neŋ sareka, ka lɛ vɛŋ ka te toɔ̃ tonɔ yaga a naaŋ moɔloo poɔŋ. Kyɛbee, ka te vɛŋ ka te zemmo e mɔlɔ, ka lɛ vɛŋ ka te gaa zie ba naŋ boɔrɔ naaŋ moɔleba yaga a te soŋ a toma. Ka teneeŋ de yɛlɛ biŋ te nimitɔɔreŋ Jehoova puoruu poɔŋ, a kyɛ ba toɔ̃ ta a yɛlɛ, kyɛbee ka teneeŋ tonɔ tonkpeɛne yaga a naaŋ moɔloo poɔŋ, a kyɛ ba nyɛrɛ noba te ne ba naŋ na zanne a Baabole, a na toɔ̃ vɛŋeŋ ka te teɛre ka Jehoova poɔ sãã ne teŋ. Ka teneeŋ wa tuoro yelkpeɛne saŋa na teŋ sonnɔ Jehoova puoruu toma mine na, a na toɔ̃ vɛŋeŋ ka te teɛre ka Jehoova ba sonnɔ te.

10. Teŋ ba baŋ sori na Jehoova naŋ na tu a e o yɛlɛ na zuŋ, bo gyogri la aŋ maŋ vɛŋ teŋ taa?

¹⁰ Te naŋ ba baŋ sori na Jehoova naŋ na tu a e o yɛlɛ na zuŋ, a na baŋ soŋ teŋ ka te maaleŋ taa sigrimennoŋ gyogo, a lɛ baŋ te e ta zie meŋ. A maŋ vɛŋeŋ teŋ baŋ ka Jehoova teɛrɛ neŋ o soe do la saa yaga zaa a gaŋ te teɛrɛ neŋ te soe. (Aiz. 55:8, 9) A maŋ lɛ soŋ teŋ teŋ dɛle Jehoova kpɛlɛŋkpɛlɛŋ, bonso te baŋɛɛŋ ka o na eɛ yɛlɛ ka a tutaa velaa zaa. Ka teneeŋ wa tonɔ a naaŋ moɔloo toma, kyɛbee Jehoova puoruu toma mine ka yelsonne yi be wa, te maŋ de la a pugibu zaa ko Jehoova. (Yiem. 127:1; 1 Kor. 3:7) Ka yɛlɛŋ ba kyɛŋ aŋa lɛ na teŋ kaara soriŋ na, kyɛ aseŋ ka te baŋ ka Jehoova nyɛrɛɛ yelzaa naŋ erɛ. (Aiz. 26:12) Aseŋ ka te maŋ toŋ te faŋa bɔgiŋ, a kyɛ taa sagediibu ka Jehoova na toŋɛɛ ana naŋ kyɛre na. Yelmeŋɛ la, Jehoova koŋ tu soseɛlee kaŋa poɔŋ a ko te sowuli aŋa lɛ na oŋ da e saŋa kaŋa naŋ pare na, kyɛ te na baŋ taaɛ sagediibu ka o naŋ na korɔ teŋ sowuli.​—Tom. 16:6-10.

11. Bo yelnimizeere mine la teŋ baŋ?

¹¹ Te baŋɛɛŋ ka Jehoova waa la nɔmmo ane dantorii soba, a lɛ e neɛ naŋ taa yɛŋ naŋ e zuluŋ. Te lɛ baŋɛɛŋ meŋ ka Jehoova niŋe paalɛɛ toma na teŋ tonɔ koroo, ane te yɔɔmine na yaga zaa. Yelkaŋa teŋ lɛ baŋ la ka, Jehoova maŋ ko la noba na zaa naŋ dire yelmennoŋ koroo na saŋyɔɔ.​—Hib. 11:6.

TE BA BAŊ YƐLƐ NAŊ NA E BIEU

12. Aŋa lɛ na Gyimisi 4:13, 14 naŋ wuli na, bo yɛlɛ la teŋ ba baŋ?

¹² Kanne Gyimisi 4:13, 14. Te kaŋa zaa ba baŋ yɛlɛ naŋ na pɔge te bieu. A donfaa ŋa poɔŋ, “yɛlɛ [te] naŋ ba kaara soriŋ” na baŋ pɔgɛɛ te kaŋa zaa. (Ikil. 9:11) Azuŋ, ka teneeŋ nare yɛlɛ mine biŋ, te koŋ baŋ yeli te baare ka a yɛlɛ na te baarɛɛ soŋ bee. Te koŋ baŋ yeli te baare ka te nyɔvore na eɛ wogi, ka lɛ vɛŋ ka te tu a yɛlɛ zaa te baare.

13. Te kaŋa zaa ba baŋ bieu yɛlɛ, wala ka a yɛlɛ ŋa maŋ toɔ̃ nyɛ kpeɛ̃o te zuŋ?

¹³ Te naŋ ba baŋ yɛlɛ naŋ na e nendaare kaŋa na zuŋ, a maŋ eɛ kpeɛŋaa ka te are te yelkpeɛne noɔreŋ. Bonso teŋ yeli lɛ? Ananso la ka, te na baŋ vɛŋeŋ ka bieu yɛlɛ dɔɔnɔ te lɛɛŋ te gaali. Ka lɛŋ wa e, te koŋ lɛ taa popeɛloŋ. Ka yel-uraa kaŋa, kyɛbee yɛlɛ te naŋ ba kaara soriŋ wa pɔge te, te maŋ diree woore, ka te teɛroŋ meŋ gyɛre. Ka teneeŋ wa kaara yɛlɛ mine soriŋ kyɛ ka a yɛlɛ ba nyɛrɛ eebo, te enne na baŋ kyoɔreŋ ka te poore meŋ sãã.​—Yeng. 13:12.

14. Bo yɛlɛŋ maŋ vɛŋ teŋ taa popeɛloŋ meŋɛmeŋɛ? (Kaa a fotori.)

¹⁴ Ka teneeŋ wa tuoro yelkpeɛne, a kyɛ are kpeɛŋaa, te maŋ wuliŋ ka lɛ zaa naŋ la, kyɛ te na maŋ yi la nɔmmo poɔŋ a puoro Jehoova. Ka hooŋ kaa a Baabole poɔŋ, ho na nyɛŋ ka Jehoova ba yelka o na go teŋ yi yelkpeɛne zaa poɔŋ. A Baabole zie zaa meŋ ba wuli ka Jehoova sɛgɛɛ yɛlɛ na zaa naŋ na pɔge te biŋ. Jehoova baŋɛɛŋ ka te na baŋ taaɛ popeɛloŋ, haali ka teneeŋ ba baŋ yɛlɛ naŋ na e bieu. Ka teneeŋ maŋ de Jehoova sowuli tonɔ neŋ toma, a maŋ lɛ sagra o nɔɛ, a na vɛŋeŋ ka te taa popeɛloŋ te zemmo poɔŋ. (Jer. 10:23) Gyimisi da sɛgɛɛŋ ka: ‘Ka a naŋ wa e Jehoova poboɔbo ka te naŋ voorɔ, te na e la yeli ŋa bee yeli ŋa.’ (Gyi. 4:15) Ka teneeŋ maŋ gaa Jehoova zie a te bɔ sowuli saŋa na teŋ wa derɛ gbɛɛ na, a na wuliŋ ka te de la a Baabole kawane ŋa tonɔ neŋ toma.

15. Bo yɛlɛ teŋ baŋ a kyaare nendaare kaŋa?

¹⁵ Yelmeŋɛ la, te ba baŋ yɛlɛ naŋ na e bieu, kyɛ te baŋɛɛŋ ka Jehoova eŋɛɛ noɔre ka o na ko teŋ nyɔvore naŋ ba taa baaraa. Te mine na gaaɛ sazu ka te mine meŋ zeŋ a teŋɛzuŋ. Te baŋɛɛŋ ka Naaŋmen koŋ baŋ ŋma zirii, bonzaa meŋ koŋ baŋ pigoo sori ka o paale nɔɛ na oŋ eŋ na. (Tit. 1:2) Daŋyele Aizeeya da sɛgɛɛŋ a kyaare Jehoova ka: “A piiluu saŋa maŋ maŋ wuli a baaraa yɛlɛ, takoreŋ saŋa zaa maŋ maŋ wuli yɛlɛ aŋ naŋ ba nyɛ eebo.” (Aiz. 46:10) Jehoova yoŋ la na baŋ e lɛ. Yɛlɛ na zaa Jehoova naŋ daŋyeli saŋa kaŋa naŋ pare nyɛɛ eebo, yɛlɛ na zaa oŋ daŋyeli a kyaare nendaare kaŋa meŋ na nyɛɛ eebo. Te lɛ baŋɛɛŋ peɛlaaŋ ka neɛzaa, kyɛbee bonzaa kyebe a na baŋ wɛl te yi Jehoova nɔmmo na poɔŋ. (Uro. 8:35-39) Jehoova na dii la te sukyie, a ko te yɛŋ naŋ e zuluŋ, ane faŋa naŋ na toɔ̃ soŋ te ka te are yelkpeɛne zaa teŋ na tuore noɔreŋ. Te na baŋ sagediŋ kpeɛŋaakpeɛŋaa ka Jehoova na soŋ teŋ, a ko te maaloo meŋ.​—Jer. 17:7, 8.

TE BA BAŊ LƐ NA JEHOOVA NAŊ BAŊ TE VELAA TE BAARE

16. Aŋa lɛ na Yieme 139:1-6 naŋ wuli na, bo yɛlɛ ka Jehoova baŋ a kyaare te? Sobuo ka a yɛlɛ ŋa tɔ ho sukyiri aseŋ?

¹⁶ Kanne Yieme 139:1-6. Jehoova baŋɛɛŋ ka tɛne la te. O baŋɛɛ te eŋdaa waaloŋ velaa zaa, a baŋ gyogri zaa te naŋ taa, ane soe na teŋ maŋ tu a teɛrɛ yɛlɛ. Jehoova boɔrɛɛ te yɛlɛ yaga zaa. O baŋɛɛ yɛlɛ na teŋ maŋ yele, ane yɛlɛ naŋ be te sukyieŋ. O baŋɛɛ yelzaa te naŋ erɛ, ane bon nanso teŋ erɛ a yɛlɛ. Naa Deevid da vɛŋɛɛŋ aŋ pɛle ka Jehoova maŋ kaarɛɛ te zu wagre zaa, a maŋ e siri meŋ ka o soŋ te. Nyɛ, Jehoova la a Soobu Kpeɛ̃o Zaa Daana, ane a kpeɛ̃o zaa daana naŋ maale sazu neŋ a teŋgane, kyɛ o naŋ maŋ teɛrɛɛ te yɛlɛ a kaara te zu meŋ velaa. Ho ba nyɛ ka a yɛlɛ ŋa toɔrɛɛ sukyiri yaga zaa bee? Te neŋ Deevid laŋɛɛ teɛroŋ saŋa na oŋ da yelka: ‘Bammo ŋa tɔ eɛ seɛlee gaali ko ma. O doɛŋ yaga zaa. N koŋ toɔ̃ bamoo.’​—Yiem. 139:6.

17. Bonso aŋ na baŋ e kpeɛŋaa ko te ka te sagedi ka Jehoova baŋ teŋ velaa zaa?

¹⁷ Aminekaŋaŋ, yɛlɛ naŋ e te booree poɔŋ, te sããkomyɛlɛ, ane yɛlɛ na teŋ da sagedi sɛre kyɛ wa zanne a yelmeŋɛ na toɔ̃ vɛŋeŋ ka a e kpeɛŋaa ko te ka te nyɛ Jehoova ka o eɛ te Saa naŋ nɔŋ te yɛlɛ. Kyɛbee, te na baŋ teɛreŋ ka yelfaare na teŋ e saŋa kaŋa naŋ pare na eɛ tegroŋ yaga zaa, azuŋ Jehoova koŋ boɔrɔ te yɛlɛ fẽẽ zaa. Azuŋ, o na tagɛɛ o meŋɛ yi te zieŋ. Saŋa kaŋa, Deevid meŋ da maŋ taaɛ a teɛroŋ ŋa neŋ o zu. (Yiem. 38:18, 21) Ka neɛ kaŋaŋ wa moɔrɔ yaga zaa ka o leɛre o eebo, a leɛ erɛ yɛlɛ Naaŋmen naŋ boɔrɔ, kyɛ o soba na baŋ leɛ piili teɛrɛŋ ka, ‘Ka Naaŋmeneŋ sereŋ baŋ ma velaa yɛŋ, bonso oŋ boɔrɔ ka N bare a yɛlɛ ŋa maŋ e minli na?’

18. Ka teneeŋ sage ka Jehoova baŋ teŋ velaa a gaŋ lɛ na teŋ baŋ te menne, sobuo aŋ na baŋ soŋ te? (Kaa a fotori.)

¹⁸ A na somaŋ ka te mɔɔ te moɔbo zaa a wa sage ka Jehoova baŋ teŋ a gaŋ lɛ na teŋ baŋ te menne na. Aseŋ ka te lɛ baŋ meŋ ka Jehoova nyɛrɛɛ yelsonne naŋ be te eŋɛŋ, a gaŋ lɛ tenee menne naŋ baŋ. Yelmeŋɛ la, te maŋ ŋmeɛrɛɛ gbɛɛ, kyɛ Jehoova baŋɛɛ bon nanso teŋ maŋ erɛ yɛlɛ mine, ane bon nanso teŋ taa teɛrɛ mine. Aneazaa, Jehoova nɔŋ teŋ. (Uro. 7:15) Ka teneeŋ wa sagedi ka Jehoova baŋɛɛ yelsonne naŋ be te eŋɛŋ, a na toɔ̃ eŋ teŋ faŋa ka te moɔ̃ niŋe a de popeɛloŋ puoruu yelmennoŋ poɔŋ.

19. Bo yɛlɛ la teŋ baŋ peɛlaaŋ a kyaare Jehoova?

¹⁹ Te baŋɛɛŋ ka Jehoova la nɔmmo. Te baŋɛɛŋ peɛlaaŋ ka o gyogo meŋɛ la lɛ. (1 Gyn. 4:8) Te baŋɛɛŋ ka bege na Jehoova naŋ ko te na wuleeŋ ka o nɔnɔ teŋ. Jehoova boɔrɔŋ ka te taa zeŋ laafeɛ meŋ. Te baŋɛɛŋ ka Jehoova boɔrɔŋ ka te nyɛ nyɔvore naŋ ba taa baaraa. Azuŋ oŋ toŋ o Bidɔɔ oŋ wa kpi a yɔɔdeɛ te. A yɔɔdeɛbo kyɔɔtaa na Jehoova naŋ ko te na vɛŋɛɛŋ teŋ baŋ ka, aneazaa ka te eɛ noba naŋ ba pɛgeyi, kyɛ te na baŋ puoree Jehoova sori o naŋ boɔrɔ. (Uro. 7:24, 25) Te lɛ baŋɛɛŋ meŋ ka, “Naaŋmen e la kpoŋ gaŋ te sukyie, kyɛ ka O baŋ yelzaa.” (1 Gyn. 3:19, 20) Jehoova baŋ la yel la yelzaa a kyaare te. O taaɛ sagediibu te eŋɛŋ meŋ ka te na baŋ erɛɛ o boɔbo.

20. Bo yɛlɛŋ na baŋ soŋ te ka te ta vɛŋ ka yɛlɛ dɔɔnɔ te yaga zaa te gaali?

²⁰ Jehoova vɛŋɛɛŋ teŋ baŋ yɛlɛ na zaa naŋ seŋ ka te baŋ. Ka teneeŋ baŋ te e ta zie a sage a yɛlɛ ŋa di, te koŋ vɛŋ ka yɛlɛ teŋ koŋ baŋ e yelzaa kyaaraa dɔɔnɔ te yaga zaa te gaali. Kyɛ, te na de la te teɛroŋ a eŋ yɛlɛ naŋ e nimizeɛ eŋɛŋ. Ka teneeŋ e lɛ, a na wuliŋ ka te dɛlɛɛ Jehoova kpɛlɛŋkpɛlɛŋ, bonso, ona la ‘Neɛ naŋ paale neŋ bammo.’ (Joob 36:4) Yelmeŋɛ la, te ba baŋ yelzaa te baare, te lɛ baŋɛɛŋ meŋ ka Jehoova naŋ na wulo teŋ yelpaala tegitegilɛ. Te eŋɛ nyagraŋ bonso, te baŋɛɛŋ ka te daaŋ koŋ zanne te Naaŋmen naŋ e kpoŋ na yɛlɛ te baare zaa.​—Ikil. 3:11.