Soŋ Ho Baabole Zannezanneba Ka Ba De Gbɛre A Wa Puoro Jehoova

1-2. (a) Bonso ka Baabole zannezanneba mine maŋ naara ka ba de gbɛre a wa puoro Jehoova? (b) Bo yɛlɛ teŋ na zanne a zannoo ŋa poɔŋ?

YƐLƐ mine da bebeŋ a vɛŋ aŋ e kpeɛŋaa ko bo ka ho de gbɛre a wa leɛ Jehoova Sieree Deme kaŋa bee? Aminekaŋaŋ, ho da zoree dabeɛ̃ ka ho tontoŋtaaba, zɔmenne, kyɛbee ho booree deme na iri zɔɔrɔ ne boŋ. Kyɛbee ho da teɛrɛɛŋ ka ho koŋ toɔ̃ de Naaŋmen bege na tonɔ neŋ toma ho zemmo poɔŋ. Ka lɛŋ pɔge bo, lɛ yɛŋ a na eɛ mɔlɔ ko bo ka ho de ho meŋɛ eŋ ho Baabole zannezanna naŋ naara ka o de gbɛre a wa leɛ Jehoova Sieree Deme kaŋa gbɛbɔgriŋ, a baŋ lɛ na yɛlɛ naŋ dɔɔnoo aseŋ.

² Yezu da baŋɛɛŋ ka a yɛlɛ ama taa na baŋ vɛŋeŋ ka neɛ naara ka o de gbɛre a wa puoro Jehoova. (Mat. 13:20-22) Kyɛ, Yezu da moɔrɛɛ o moɔbo zaa ka o soŋ noba naŋ da naara ka ba de gbɛre a wa leɛ o potuuribo na. O da tu la o ewuli soŋ eŋɛŋ a wuli o potuuribo na yɛlɛ anaare mine baŋ na toɔ̃ e a de soŋ a noba ŋa taa. A dɛndɛŋ soba, o da wuli baŋ ka ba soŋ a noba ka ba baŋ bon naŋ pigre ba sori ka ba nyɛ nimitɔɔre gaabo. Ayi soba, o da wuli baŋ ka ba soŋ ba ka ba taa nɔmmo naŋ e zuluŋ ko Jehoova. Ata soba, o da wuli baŋ ka ba soŋ ba ka ba de Jehoova yɛlɛ de weɛ ba zemmo poɔŋ. Anaare soba, o da wuli baŋ lɛ baŋ na toɔ̃ e a soŋ ba ka ba zɔɔtoɔ̃ yelkpeɛne na baŋ tuoro na. Wala teŋ na baŋ e a tɔglɔ sori na Yezu naŋ da maŋ tu a wulo noba na, saŋa na teŋ wa de a Nyɛ Zeŋ Laafeɛ Tegitegilɛ! sonnɔ te Baabole zannezanneba ka ba de gbɛre a wa puoro Jehoova na?

SOŊ HO BAABOLE ZANNEZANNA NA KA O BAŊ BON NAŊ PIGRUU SORI KA O DE GBƐRE A WA PUORO JEHOOVA

3. Bo yɛlɛ la da pigre Nikodemu sori ka o de gbɛre a wa leɛ Yezu potuuro?

³ Nikodemu da eɛ a Gyuu noba paaloŋ kaareba na neŋtegroŋ kaŋa. O da boɔrɔŋ ka o leɛ Yezu potuuro, kyɛ yɛlɛ mine da pigruuŋ sori. Saŋa na Yezu naŋ piili o naaŋ moɔloo toma na aŋa kyuuri ayoɔbo kpakyagaŋ, Nikodemu yɛŋ da taaɛ sagediibu ka Yezu la a Mɛzaaya. (Gyn. 3:1, 2) Kyɛ, Nikodemu naŋ da ‘zoro a Gyuumine dabeɛ̃’ zuŋ, o da boɔrɔŋ ka o wa Yezu zie zisoɔree saŋa. (Gyn. 7:13; 12:42) Aminekaŋaŋ, o da teɛrɛɛŋ ka, ka onaŋ leɛ Yezu potuuro, o na kɔŋ la arezi-kpoŋ ane bondaaŋ boma na oŋ da taa na.a

4. Sobuo ka Yezu da tu a vɛŋ ka Nikodemu baŋ yɛlɛ na Naaŋmen naŋ boɔrɔ ka o e?

⁴ Nikodemu da baŋɛɛ a Moosis Bege na velaa zaa, kyɛ o da boɔrɛɛ neɛ naŋ na somoo ka o baŋ yɛlɛ na Jehoova naŋ boɔrɔ ka o e. Sobuo ka Yezu da tu a somoo? Yezu da sagɛɛŋ a vɛŋ ka Nikodemu wa o zie zisoɔree saŋa ka o ne o di dama. Yezu da vɛŋɛɛŋ ka Nikodemu baŋ gbɛɛ na aŋ seŋ ka o de, ka lɛ vɛŋ ka o wa leɛ o potuuro. Yezu da yelko oŋ ka aseŋ ka o leɛre yi o yelfaare poɔŋ, a de suobu, a lɛ de o yel-eree meŋ wuli ka o taaɛ sagediibu Naaŋmen Bidɔɔ na eŋɛŋ.—Gyn. 3:5, 14-21.

5. Wala teŋ na baŋ e a soŋ te Baabole zannezanneba, ka ba baŋ yɛlɛ naŋ pigre ba sori ka ba de gbɛre a wa puoro Jehoova?

⁵ Ka te Baabole zannezanna naŋ woŋ a Baabole poɔ wuluu velaa gba, kyɛ o na boɔrɛɛ sommo ka o baŋ yɛlɛ naŋ pigruu sori ka o de gbɛre a wa puoro Jehoova. Aminekaŋaŋ, o toma la derɛ o wagre kpoŋ zie zaa, kyɛbee o booree deme ba boɔrɔ ka o e Jehoova Sieree Deme kaŋa. Azuŋ, nyɛ wagre ko ho Baabole zannezanna na, ka lɛ vɛŋ ka ho toɔ̃ de sommo naŋ seŋ neŋ koo. Ho na baŋ toŋboɔlooŋ ka o wa ho yiri. Lɛ na yuo la sori ko yɛ ka yɛ di dama. A dama diibu poɔŋ, o soba na baŋ mannɛɛ yelkpeɛne na oŋ tuoro na ko bo. Somoo ka o baŋ leɛroo na aŋ seŋ ka o e. Vɛŋ ka o baŋ ka, bon nanso oŋ erɛ a leɛroo la ka, o boɔrɔŋ ka o pɛlɛ Jehoova poɔ, kyɛ a ba e ka oŋ boɔrɔ ka o pɛle ho poɔ zuŋ la.

6. Sobuo hoŋ na baŋ tu a soŋ ho Baabole zannezanna, ka o tare nyaa a de yɛlɛ na oŋ zanna na tonɔ neŋ toma o zemmo poɔŋ? (1 Korinti 16:13)

⁶ Ka a Baabole zannezannaŋ wa taa sagediibu ka Jehoova na somooŋ ka o de a Baabole poɔ yɛlɛ tonɔ neŋ toma, a na vɛŋeŋ ka o tare nyaa a de yɛlɛ na oŋ zanna na tonɔ neŋ toma. (Kanne 1 Korinti 16:13.) Te na baŋ de la toma na aŋ seŋ ka ho toŋ na manne neŋ toma na sakuu wulwulo naŋ maŋ tonɔ na. Saŋa na hoŋ da be sakuuŋ na, a wulwulo buo soba yɛlɛ la hoŋ da nɔŋ yaga zaa? Aminekaŋaŋ, a wulwulo na naŋ maŋ eŋ bo faŋa, a vɛŋ hoŋ baŋ ka ho na toɔ̃ eɛ yɛlɛ na oŋ boɔrɔ ka ho e na. Lɛ neŋ o zu la, Baabole wulwulo naŋ kyile maŋ wulee o zannezanna na yɛlɛ naŋ seŋ ka o e, kyɛ lɛ yoŋ naane, o maŋ lɛ soŋɛɛ a zannezanna oŋ baŋ ka Jehoova na somooŋ ka o e leɛroo zaa naŋ seŋ ka o e. Sobuo hoŋ na baŋ tu a e lɛ?

SOŊ HO BAABOLE ZANNEZANNA NA KA O TAA NƆMMO NAŊ E ZULUŊ KO JEHOOVA

7. Sobuo ka Yezu da tu a soŋ o kyɛllekyɛlleba na baŋ taa nɔmmo naŋ e zuluŋ ko Jehoova?

⁷ Yezu da baŋɛɛŋ ka, ka o potuuriboŋ nɔŋ Naaŋmen, a na eŋ baŋ faŋa ka ba de yɛlɛ na baŋ zanna a kyaare Naaŋmen na tonɔ neŋ toma. Gbɛɛ yaga, o da maŋ wulee o potuuribo na yɛlɛ naŋ na vɛŋ ka ba taa nɔmmo naŋ e zuluŋ ko Jehoova. Aŋa mannoo poɔŋ, Yezu da de la Jehoova manne neŋ dɔɔ-soŋ naŋ maŋ derɛ bonsonne korɔ o biiri. (Mat. 7:9-11) Aminekaŋaŋ, noba na mine naŋ da kyɛllɛ Yezu yɛlɛ na saamine da ba wulo ba a nɔmmo ŋa tɔ. Yezu da terɛɛ yelmannaa kaŋa a kyaare bi-saa kaŋa naŋ taa nimimaaroŋ. A dɔɔ bidɔɔ kaŋa da eɛ tokpeɛne a yi a yiri a te e yɛlɛ naŋ ba seŋ neŋ. Kyɛ, saŋa na a bidɔɔ naŋ da leɛ waana o saa yiri na, a saa da zo tuorooŋ a koo waayaane. A yɛlɛ ŋa da tɔɛ o kyɛllekyɛlleba na sukyie yaga zaa. Ba da nyɛɛŋ ka Jehoova taaɛ nimibaaloŋ ko o biiri naŋ be a teŋɛzuŋ.—Luk. 15:20-24.

8. Wala hoŋ na baŋ e a de soŋ ho Baabole zannezanna ka o taa nɔmmo naŋ e zuluŋ ko Jehoova?

⁸ Ka hooŋ maŋ manna Jehoova gyog-sonne yɛlɛ korɔ ho Baabole zannezanna na, a na somooŋ ka o taa nɔmmo naŋ e zuluŋ ko Jehoova. Ka ho neŋ o sobaŋ wa zanna a boma, somooŋ ka o nyɛ ka yɛlɛ na oŋ zanna na wuleeŋ ka Jehoova nɔŋɛɛ o yɛlɛ. Ka yɛneeŋ wa zanna Yezu kũũ sareka na yɛlɛ, somoo ka o nyɛ ka Yezu kpieŋ a ko o meŋ. (Uro. 5:8; 1 Gyn. 4:10) Ka a Baabole zannezannaŋ wa baŋ ka Jehoova taaɛ nɔmmo naŋ e zuluŋ a koo, a na tɔɛ o sukyiri ka o meŋ nɔŋ Jehoova.—Gal. 2:20.

9. Boŋ da soŋ Michael oŋ de gbɛre a puoro Jehoova?

⁹ Indonesia paaloŋ ka Michael be. Te de o zemmo yɛlɛ ŋa wuli a yɛlɛ ŋa muni. O bibiiloŋ saŋa zaa oŋ baŋ a yelmeŋɛ. Kyɛ, o da ba de suobu. Saŋa na oŋ wa nyɛ yuomo 18 na, o da tu la sori a gaa paaloŋ kaŋa a te tonɔ toma beŋ. A puoriŋ, o da leɛ gaaɛ Indonesia a te de pɔge, ka o neŋ a pɔge dɔge pɔgeyaa. Kyɛ, o da barɛɛ o booree na kyɛ leɛ gaa paaloŋ yuo kaŋa naŋ e tɔɔre a te tonɔ toma beŋ. O pɔge neŋ o pɔgeyaa na da piili zannɛɛ a Baabole, a de yɛlɛ na baŋ zanna na tonɔ neŋ toma. Saŋa na Michael ma naŋ wa kpi na, o da leɛ waɛ yiri ka o wa kaara o saa. A saŋa oŋ da leɛ piili zanna a Baabole. Saŋa na o neŋ o wulwulo naŋ wa zanna a Nyɛ Zeŋ Laafeɛ Tegitegilɛ! zannoo 27 “Zanne Yɛlɛ Yaga Poɔ” zie na, a yɛlɛ da tɔɛ o sukyiri yaga zaa. O da ŋmaaɛ foto o teɛroŋ poɔŋ a nyɛ lɛ na aŋ da beɛrɛ Jehoova aseŋ, saŋa na oŋ da nyɛ o Bidɔɔ naŋ dire dɔgɛɛ na. Michael da piili ŋmaarɛɛ neŋtaŋ. A zannoo da vɛŋɛɛŋ oŋ taa nimipa naŋ e zuluŋ ko a yɔɔdeɛbo. O da de la gbɛre a leɛre o eebo, a de suobu.

SOŊ HO BAABOLE ZANNEZANNA KA O DE JEHOOVA YƐLƐ DE WEƐ O ZEMMO POƆŊ

10. Sobuo ka Yezu da tu a soŋ o potuuribo na baŋ de Jehoova yɛlɛ de weɛ? (Luka 5:5-11) (Kaa a foto.)

¹⁰ Noba naŋ da leɛ Yezu potuuribo a piilee saŋa na da sagedieŋ ka Yezu la a Mɛzaaya. Kyɛ, a da seŋ ka Yezu soŋ ba ka ba de a naaŋ moɔloo toma de weɛ ba zemmo poɔŋ. Piita neŋ Anduru da eɛ Yezu potuuribo saŋa na oŋ da piili o naaŋ moɔloo toma na, kyɛ Yezu da toŋboɔle baŋ ka ba wa poɔ o eŋɛŋ a de ba wagre zaa tonɔ a naaŋ moɔloo toma. (Mat. 4:18, 19) Aminekaŋaŋ, ba neŋ Gyimisi neŋ Gyɔɔn zaaŋ da laŋ tonɔ a zon-nyɔge toma. A toma meŋ yɛlɛ da nyɛrɛɛ nimitɔɔre gaabo yaga zaa. (Mak. 1:16-20) Saŋa na Piita neŋ Anduru naŋ da “bare a ba zonkyogri” a kyɛ tuuro Yezu na, ba da narɛɛ yɛlɛ naŋ na toɔ̃ vɛŋ ka ba booree deme nyɛrɛ ba yelfɛree. Boŋ da eŋ ba faŋa baŋ de Jehoova yɛlɛ de weɛ? Luka gane na vɛŋɛɛŋ teŋ baŋ ka Yezu da eɛ yelseɛlee kaŋa naŋ da vɛŋ baŋ taa sagediibu naŋ e kpeɛŋaa ka Jehoova na kaaɛ ba zu velaa.—Kanne Luka 5:​5-11.

11. Sobuo teŋ na baŋ de te menne zemmo yɛlɛ soŋ te Baabole zannezanna na ka o sagediibu maaleŋ e kpeɛŋaa?

¹¹ Te koŋ baŋ toŋ toŋseɛlɛ aŋa lɛ na Yezu naŋ da e na. Kyɛ, te na baŋ mannɛɛ lɛ na Jehoova naŋ da soŋ noba mine naŋ de O yɛlɛ de weɛ zemmo yɛlɛ ko ba. Aŋa mannoo poɔŋ, ho teɛrɛɛ lɛ na Jehoova naŋ da soŋ bo saŋa na hoŋ piili gɛrɛ te lammore na? Aminekaŋaŋ, a da fɛrɛɛŋ ka ho gaa ho toma neŋkpoŋ zie a te yelkoo ka ho koŋ baŋ lɛ de wagre naŋ pare a toma wagre tonɔ a toma, bonso ho boɔrɔŋ ka ho maŋ gɛrɛ a lammore. Saŋa na hoŋ manna a yɛlɛ korɔ ho Baabole zannezanna na, vɛŋ ka o baŋ ka ho sagediibu da maaleŋ eɛ kpeɛŋaa yaga zaa saŋa na hoŋ nyɛ lɛ na Jehoova naŋ sonnɔ bo hoŋ de o yɛlɛ de weɛ na.

12. (a) Bonso aŋ soma ka te maŋ de te yɔɔdɔba neŋ te yɔɔpɔgeba poɔ te eŋɛŋ saŋa na teŋ gɛrɛ ka te neŋ o soba zanne a Baabole na? (b) Wala teŋ na baŋ e a de a vidiori tonɔ neŋ toma soŋ saŋa na te neŋ o soba naŋ zanna na? Tere ewuli kaŋa.

¹² Ka ho Kristabitaabaŋ meŋ manne lɛ na baŋ e leɛroo a toɔ̃ de Jehoova yɛlɛ de weɛ ba zemmo poɔŋ na, a na soŋɛɛ ho Baabole zannezanna na. Azuŋ, maŋ de ho yɔɔdɔba neŋ ho yɔɔpɔgeba poɔ ho eŋɛŋ saŋa na hoŋ wa gɛrɛ ka ho neŋ a soba zanne a Baabole na. Yelko ho yɔɔdɔɔ bee yɔɔpɔge na ka o manne sori na oŋ tu a wa nyɛ a yelmeŋɛ, ane yɛlɛ na oŋ de iri neŋ sareka, ka lɛ vɛŋ oŋ toɔ̃ de Jehoova yɛlɛ de weɛ o zemmo poɔŋ. Ane meŋ, maŋ mɔɔ ka ho neŋ ho Baabole zannezanna na kaa a vidiori naŋ be a “Zanne Yɛlɛ Yaga Poɔ,” ane a mine naŋ be a “Yɛlɛ Mine Naŋ Lɛ Bebe” ziiri naŋ be a Nyɛ Zeŋ Laafeɛ Tegitegilɛ! gane na poɔŋ. Aŋa mannoo poɔŋ, ka ho neŋ o sobaŋ wa zanna yɛlɛ naŋ be zannoo 37, yɛ na baŋ kaaɛ a vidio, Jehoova Na Vɛmeŋ Ka Te Nu Kpɛ Boma Yɛlɛ Naŋ Fɛre Te. Ka a vidioŋ wa baare, yɛ na baŋ di la o poɔ yɛlɛ dama. A dama diibu poɔŋ, somoo ka o nyɛ ka, Jehoova na soŋɛɛ o meŋ ka o de o yɛlɛ de weɛ.

SOŊ HO BAABOLE ZANNEZANNA KA O ZƆƆTOƆ̃ YELKPEƐNE NA OŊ TUORO NA

13. Wala ka Yezu da e a de nare o potuuribo na a ko dɔgroŋ na baŋ na tuore na?

¹³ Gbɛɛ yaga, Yezu da maŋ yelko la o potuuribo na ka noba na iri zɔɔrɔ ne baŋ. O da vɛŋɛɛŋ baŋ baŋ ka ba dɔgreba gba na baŋ iri zɔɔrɔ ne baŋ. (Mat. 5:11; 10:22, 36) Saŋa na aŋ da wa kyɛre fẽẽ ka Yezu toŋ o naaŋ moɔloo toma baare na, o da yelko la o potuuribo na ka ba na toɔ̃ kɔŋ la ba nyɔvoɛ Jehoova puoruu zuŋ. (Mat. 24:9; Gyn. 15:20; 16:2) O da kpãã baŋ ka ba maŋ kaara ba menne velaa a naaŋ moɔloo poɔŋ. Aŋa mannoo poɔŋ, o da yelko baŋ ka ba ta wa vɛnɛ ka ba neŋ noba naŋ ba sage ba wuluu na di ŋmeɛrɛ nɔkpeɛne. O da lɛ yelko baŋ ka ba kaara ba yelyelii neŋ ba yel-eree zieŋ soŋ, ka lɛ vɛŋ ka ba naŋ kyɛnɛ tonɔ a naaŋ moɔloo toma.

14. Wala teŋ na baŋ e a nare te Baabole zannezanna a ko lɛ na noba naŋ na iri zɔɔrɔ ne o na? (2 Timoti 3:12)

¹⁴ Te meŋ na toɔ̃ vɛŋeŋ ka te Baabole zannezanna na baŋ ka, Jehoova puoruu zuŋ, o tontoŋtaaba, o zɔmenne, ane o dɔgreba na baŋ iri zɔɔrɔ ne oŋ. (Kanne 2 Timoti 3:12.) Ka o sobaŋ wa piili de a Baabole poɔ yɛlɛ tonɔ neŋ toma, o tontoŋtaaba na baŋ piili erooŋ seɛ. O dɔgreba, kyɛbee noba mine na baŋ yelko oŋ ka yɛlɛ na oŋ sagedi na ba soma. Ka teneeŋ nare te Baabole zannezanneba na wieoŋ a ko lɛ na noba naŋ na iri zɔɔrɔ ne ba na, a na soŋ baŋ ka ba are kpeɛŋaa saŋa na baŋ wa tuoraa na.

15. Boŋ na toɔ̃ soŋ ho Baabole zannezanna na ka o are kpeɛŋaa saŋa na o booree deme naŋ wa iri zɔɔrɔ ne o?

¹⁵ Ka ho Baabole zannezanna na dɔgrebaŋ wa iri zɔɔrɔ ne o, somoo ka o teɛre yɛlɛ gaa tɔɔre a nyɛ bon nanso o dɔgreba suuri naŋ iri, oŋ de a Baabole yɛlɛ tonɔ neŋ toma. Aminekaŋaŋ, o dɔgreba na teɛrɛɛŋ ka ba bɛnlooŋ, kyɛbee o dɔgreba na ba nɔnɔ Jehoova Sieree Deme yɛlɛ. Yezu meŋɛ na booree deme mine poɔ da ba pɛle neŋ toma na oŋ da tonɔ na. (Mak. 3:21; Gyn. 7:5) Wuli ho Baabole zannezanna na ka o maŋ dire kannyiri, a maŋ lɛ yi nimimaaroŋ meŋ poɔŋ a yele yɛlɛ korɔ noba naŋ iri zɔɔrɔ ne o na, ane o booree deme meŋ.

16. Sobuo teŋ na baŋ soŋ te Baabole zannezanna ka o tu gyeremɛ soriŋ a manne o sagediibu yɛlɛ?

¹⁶ Ka ho Baabole zannezanna na dɔgrebaŋ boɔrɔ ka ba zanne a Baabole, a na somaŋ ka o ta wa manna yɛlɛ na zaa oŋ zanne na korɔ ba. Ka onaŋ e lɛ, o dɔgreba na koŋ woŋ a muni velaa, azuŋ, ba koŋ lɛ boɔrɔ ka ba zanne a Baabole. Azuŋ, wuli ho Baabole zannezanna na ka o manne yɛlɛ na oŋ zanna na ko ba ŋmaaŋmaa lɛ. Lɛ na yuo la sori koo ka o lɛ manne a yɛlɛ mine ko ba bebiri kaŋa. (Kol. 4:6) Aminekaŋaŋ, o na baŋ yelko la o dɔgreba na ka ba gaa jw.org a te kanne yɛlɛ naŋ bebe. Lɛ na vɛŋeŋ ka o dɔgreba na zanne Jehoova Sieree Deme yɛlɛ lɛ zaa ba naŋ boɔrɔ.

17. Wala hoŋ na baŋ e a soŋ ho Baabole zannezanna na ka o iri soorebie na noba naŋ na baŋ sooroo a kyaare Jehoova Sieree Deme na nɔɛ ko ba? (Kaa a foto.)

¹⁷ Ho na baŋ de la yɛlɛ naŋ be “Yɛlɛ Noba Naŋ Maŋ Soorɔ Yaga A Kyaare Jehoova Sieree Deme” naŋ be jw.org, a soŋ ho Baabole zannezanna na ka o nare o meŋɛ a kyaare lɛ oŋ na iri yɛlɛ noɔre saŋa na o dɔgreba, kyɛbee o tontoŋtaaba naŋ wa sooroo soorebie mine na. (2 Tim. 2:24, 25) Ka a zannooŋ wa baare, maŋ vɛŋ ka ho neŋ o soba di dama a kyaare “Noba Mine Maŋ Yeleŋ Ka” zie naŋ be a Nyɛ Zeŋ Laafeɛ Tegitegilɛ! gane na poɔŋ. Somoo ka o nare o meŋɛ a kyaare lɛ oŋ na toɔ̃ yi o sukyiri poɔŋ a manne o sagediibu yɛlɛ ko noba. Ka hooŋ wa nyɛ ka aseŋ ka ho somoo ka o leɛre yɛlɛ mine fẽẽ a kyaare lɛ na oŋ boɔrɔ ka o manne o sagediibu yɛlɛ ko noba na, mɔɔ a de sommo naŋ seŋ neŋ koo. Lɛ eebo na somooŋ ka o maŋ de nyaa a manna o sagediibu yɛlɛ korɔ noba.

18. Wala hoŋ na baŋ e a soŋ ho Baabole zannezanna ka o wa leɛ naaŋ moɔlɔ naŋ ba de suobu? (Matio 10:27)

¹⁸ Yezu da eŋɛɛ o potuuribo na faŋa ka ba moɔlɔ a duorisoŋ korɔ noba. (Kanne Matio 10:27.) Ka ho Baabole zannezannaŋ nare o meŋɛ wieoŋ a piili manna o sagediibu yɛlɛ korɔ noba, a na somooŋ ka o dɛle Jehoova. Wala hoŋ na toɔ̃ e soŋ ho Baabole zannezanna na ka o piili tonɔ a naaŋ moɔloo toma? Ka ba naŋ wa moɔle ka a lantaapuoruu noba na toŋɛɛ naaŋ moɔloo naŋ e o yoŋ, eŋ ho Baabole zannezanna faŋa ka o teɛre yɛlɛ oŋ na baŋ e a wa seŋ neŋ ka o piili tonɔ a naaŋ moɔloo toma. Vɛŋ ka o baŋ ka a maŋ eɛ mɔlɔ ko noba yaga ka ba piili a naaŋ moɔloo toma, saŋa na teŋ wa tonɔ naaŋ moɔloo toma naŋ e o yoŋ. Ka onaŋ boɔrɔ, o na baŋ de la o meŋɛ eŋ a daagbuli poɔ lammo sakuubiiri toma na poɔŋ. Ka onaŋ e lɛ, a na somooŋ ka o maŋ manne o sagediibu yɛlɛ ko noba velaa zaa.

VƐŊ KA HO BAABOLE ZANNEZANNA NA BAŊ KA HO SAGOOŊ DI

19. Wala ka Yezu e a de wuli ka o sagɛɛ o potuuribo na di? Wala teŋ meŋ na baŋ e a de wuli ka te tɔglɛɛ Yezu?

¹⁹ Sɛre ka Yezu na do sazu na, o da vɛŋɛɛŋ ka o potuuribo na baŋ ka bebiri kaŋa, o ne ba na lɛ nyɛɛ taa. Ba da ba baŋ ka Yezu da boɔrɔŋ ka o wuli ka ba meŋ na do la sazu a te poɔ o eŋɛŋ. Kyɛ, Yezu da ba de o teɛroŋ eŋ yɛlɛ na baŋ ba baŋ na eŋɛŋ. O da de la o teɛroŋ eŋ lɛ na baŋ boɔrɔ ka ba dire yelmennoŋ koroo na eŋɛŋ. (Gyn. 14:1-5, 8) O da baŋɛɛŋ ka a na de la wagre sɛre kyɛ ka ba wa woŋ yɛlɛ mine muni velaa, aŋa teɛretɔ na baŋ taa ka ba na gaaɛ sazu a te poɔ o eŋɛŋ na. (Gyn. 16:12) Te meŋ na baŋ de la te yel-eree wuli ka te taaɛ sagediibu ka te Baabole zannezanna boɔrɔŋ ka o erɛ yɛlɛ naŋ pɛlɛ Jehoova poɔ.

20. Wala ka te yɔɔpɔge kaŋa naŋ be Malawi e a de wuli ka o sagɛɛ o Baabole zannezanna na di?

²⁰ Aseŋ ka te taa sagediibu ka te Baabole zannezanna boɔrɔŋ ka o erɛ yɛlɛ naŋ soma. Te de te yɔɔpɔge Kyifundo naŋ be Malawi paaloŋ yɛlɛ ŋa wuli neŋ a muni. O neŋ Katolik pɔge kaŋa baŋ boɔlɔ Alinafe da piili zannɛɛ a Nyɛ Zeŋ Laafeɛ Tegitegilɛ! gane na. Saŋa na baŋ da zanne o zannoo 14 baare na, Kyifundo da soorɛɛ Alinafe ka o wuli teɛroŋ na oŋ taa kyaare noba naŋ maŋ tu bonmeɛree eŋɛŋ a de puoruu korɔ Naaŋmen na yɛlɛ. Alinafe suuri da ireeŋ oŋ yelka, “A be la N zieŋ ka N de ana gbɛre na ko N meŋɛ!” Kyifundo da teɛrɛɛŋ ka Alinafe koŋ lɛ sage ka ba tɔnne a Baabole zannoo. Kyɛ, o da di la kannyiri ka o neŋ Alinafe naŋ zanna a Baabole. O da taaɛ teɛretɔ ka bebiri kaŋa, Alinafe na wa nyɛŋ ka a ba seŋ ka o maŋ tu bonmeɛree eŋɛŋ a de puoruu korɔ Naaŋmen. Kyuuri awala mine puoriŋ, Kyifundo da soorɛɛ Alinafe soorebiri kaŋa naŋ be zannoo 34. A soorebiri da soorɛɛŋ ka: “A yi saŋa na hoŋ piili zanna a Baabole ane a yelmeŋɛ Naaŋmen Jehoova yɛlɛ na, bo tɔnɔ hoŋ nyɛ?” Ŋaaŋ ka Alinafe da iri a noɔre: “O da mannɛɛ yelsonne yaga zaa o naŋ zanne. Yel na kaŋa oŋ da yeli la ka, Jehoova Sieree Deme ba maŋ erɛ yɛlɛ a Baabole naŋ yelka a ba soma.” A puoriŋ, Alinafe da ba maŋ lɛ tuuro bonmeɛree eŋɛŋ a derɛ puoruu korɔ Naaŋmen. A da ba kɔɔre kyɛ oŋ de suobu.

21. Wala teŋ na baŋ e a de soŋ te Baabole zannezanna ka o de gbɛre a puoro Jehoova?

²¹ Yelmeŋɛ la, Jehoova la maŋ vɛŋ ka a “boma baara.” Kyɛ, te meŋ na baŋ eɛ yelkaŋa a soŋ te Baabole zannezanna ka o nyɛ nimitɔɔre gaabo. (1 Kor. 3:7) Aseŋ ka te wuluu yɛlɛ Naaŋmen naŋ boɔrɔ ka o erɛ. Kyɛ lɛ yoŋ naane, aseŋ ka te somoo ka o taa nɔmmo naŋ e zuluŋ ko Jehoova. Te na baŋ somooŋ ka o e leɛroo o zemmo poɔŋ a de Jehoova yɛlɛ de weɛ. Lɛ na wuliŋ ka o nɔŋɛɛ Jehoova. Aseŋ ka te wuluu ka o dɛle Jehoova saŋa na oŋ wa tuoro yelkpeɛne. Ka teneeŋ vɛŋ ka o baŋ ka te sagooŋ di, a na emooŋ faŋa ka o de Jehoova bege tonɔ neŋ toma, a lɛ de nyaa meŋ puoro neŋ Jehoova.