Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2023 Watch Tower Bible and Tract Society of Pennsylvania
MARCH 4-10
BAABOLE POƆ YELNIMIZEERE | YIEME 16-17
“Jehoova Zie La Maŋ Maŋ Nyɛrɛ Bonsoŋ Zaa A Yire”
w18.12 26 wɛl. 11
Baapaalba, Yɛ Na Baŋ Taaɛ Popeɛloŋ Yɛ Zemmo Poɔŋ
YƐ KAA IRI ZƆMEŊ-SONNE
Kanne Yieme 16:3. Deevid da baŋɛɛ lɛ oŋ na toɔ̃ e nyɛ zɔmeŋ-sonne. O da maŋ taaɛ “nimipɛle naŋ e kpoŋ” noba naŋ nɔnɔ Jehoova poɔŋ. A Baabole yeleeŋ ka a noba ŋa eɛ “neŋ-forifori.” Lɛ wuleeŋ ka ba eɛ noba naŋ taa gyog-sonne, a erɛ yɛlɛ meŋ naŋ tori. A yieli yiele kaŋa meŋ da taaɛ a teɛroŋ ŋa neŋ o zu a kyaare noba na oŋ da kaa iri ka ba e o zɔmenne na. O da sɛgɛɛŋ ka: “N neŋ noba naŋ zoro bo na eɛ zɔmenne, N neŋ noba naŋ tuuro ho yelbinnee meŋ eɛ zɔmenne.” (Yiem. 119:63) Aŋa lɛ te naŋ nyɛ yi a zannoo naŋ pare poɔŋ na, ho meŋ na baŋ nyɛɛ zɔmeŋ-sonne yaga noba naŋ zoro Jehoova, a lɛ sagra o nɔɛ poɔŋ. A noba ŋa na baŋ eɛ te taaba ane noba naŋ kore te.
w14 2/15 29 wɛl. 4
“Maŋ Kaara Lɛ Jehoova Naŋ Soma Aseŋ”
Deevid da yieleeŋ ka, “Jehoova la N kyɛŋ ba naŋ poŋ a ko ma, ane N ŋmanlee. Hooŋ la maŋ go N kyɛŋ boma ko ma. Ba mannɛɛ ziiri naŋ soma a ko ma.” (Yiem. 16:5, 6) Deevid niŋe da paalɛɛ “kyɛŋ” na oŋ da taa na. A “kyɛŋ” ŋa are ko la niiloŋ na o neŋ Jehoova naŋ taa, ane apoɔsori na oŋ taa ka o puoruu na. Aŋa Deevid, te meŋ na baŋ tuoree yelkpeɛne yaga, kyɛ te nyɛrɛɛ maaloo yaga meŋ yire Jehoova puoruu poɔŋ. Azuŋ, yɛ vɛŋ ka te nimipɛle maŋ be yelmeŋɛ puoruu eŋɛŋ. Wagre zaa aseŋ ka te maŋ “de nimipɛle meŋ kaara” Jehoova siiloŋ poɔ ŋmenpuoredie na.
w08 2/15 3 wɛl. 2-3
Vɛŋ Ka Jehoova Be Ho Nimitɔɔreŋ Wagre Zaa
Te zaa na baŋ zannɛɛ yɛlɛ yaga a yi noba na baŋ sɛge ba yɛlɛ eŋ a Baabole poɔŋ, ka noba yaga baŋ ba yɛlɛ na. A noba ŋa mine la, Aboraham, Saara, Moosis, Ruut, Deevid, Eesiter, bitontona Pɔɔl ane ba taaba. Kyɛ, te na baŋ lɛ zannɛɛ yɛlɛ yaga a yi noba na meŋ ba naŋ sɛge ba yɛlɛ eŋ a Baabole poɔŋ, kyɛ ka noba ba baŋ ba yɛlɛ yaga na. Ka teneeŋ maŋ teɛrɛ a Baabole poɔ yɛlɛ gɛrɛ tɔɔre, a na toɔ̃ soŋ teŋ ka te de a yieli yiele yelbie na tonɔ neŋ toma. O da sɛgɛɛŋ ka: “N de la Jehoova biŋ N nimitɔɔreŋ wagre zaa. Bonso o be la N nuduluŋ, N daŋ koŋ gbigri zaa.” (Yiem. 16:8) Wala ka a yieli yiele da boɔrɔ ka o wuli?
Gbɛɛ yaga, sogya maŋ de la o nuduluŋ a nyɔge o zɔɔzɔɔsoɔ na, a kyɛ de o gɔɔ a nyɔge o kuri-bonlɛgraa. Oŋ maŋ de o nuduluŋ a nyɔge a zɔɔzɔɔsoɔ na zuŋ, be ba maŋ lɛ taa gomeŋɛ. Kyɛ ka o zɔmeŋɛ kaŋaŋ wa be o nuduluŋ sɛŋ na, a zɔɔrɔ peɛloo, o maŋ taaɛ gomeŋɛ. Ka teneeŋ maŋ teɛrɛ Jehoova yɛlɛ wagre zaa, a moɔrɔ te moɔbo zaa a erɛ yɛlɛ o naŋ boɔrɔ, o na go teŋ. Azuŋ, yɛ vɛŋ ka te nyɛ lɛ a Baabole kannoo naŋ na toɔ̃ eŋ te sagediibu faŋa, ka lɛ vɛŋ ka te maŋ “de Jehoova biŋ [te] nimitɔɔreŋ wagre zaa.”—Byington.
Baabole Poɔ Yelsonne
it-2 714
Nimi-gyɛlee
Ka ba naŋ wa sɛge a Hiburu yelbiri ʼi·shohnʹ ane a Hiburu yelbiri ʽaʹyin (nimiri la lɛ) zaa lantaa, ka hooŋ na kannoo dendenlɛ a ba manne a pare, a tɛgɛ la, “nimiri dɔɔ-bile.” (Du 32:10; Ye 7:2) Lɛ neŋ o zu la, a yi Jeremaiya Laadimii 2:18, ba lɛ sɛgɛɛ a Hiburu yelbiri bath (pɔgeyalee la lɛ) ane a Hiburu yelbiri ʼi·shohnʹ lantaa. Ka hooŋ na kannoo dendenlɛ a ba wuli a pare, ho na kannoo ka, “nimiri pɔgeyalee.” Nimi-gyɛlee ka a yɛlɛ ama zaa wulo. A yi Yieme 17:8 ba de la a yelbie ama zaa lantaa a sɛge ana zie na (ʼi·shohnʹ bath-ʽaʹyin). Ka hooŋ na kanne a yɛlɛ dendenlɛ a ba manne a pare, ŋaaŋ hoŋ na kannoo, “dɔɔ-bile, pɔgeyalee nimiri.” (“nimi-gyɛlee,” NW). A yɛlɛ ŋa wulee lɛ na hoŋ na baŋ kaara neɛ niŋesogɔ a nyɛ ho meŋɛ o soba nimi-gyɛlɛŋ.
Nimiri eɛ baaloo yaga zaa, azuŋ, ka bonzaaŋ wa tɔ ho nimiri, ho maŋ baŋeŋ. Haali ka zukɔɔloŋ fẽẽ lɛ, kyɛbee tane uuruŋ fẽẽ lɛŋ kpɛ ho nimiri, kyɛ ho maŋ baŋeŋ wieoŋ lɛ. Nensaalaa nimiri taaɛ zie kaŋa naŋ maŋ waa ŋa kyaanaa (ona ka Nansaaleba boɔlɔ ka cornea), a zie ŋa la maŋ pɔge a nimi-gyɛlee. Azuŋ, a eɛ nimizeɛ ka te maŋ kaara a zie ŋa velaa zaa, ka lɛ vɛŋ ka o ta sãã. Ka a zie ŋaŋ sãã, kyɛbee ka baaloŋ sãã ana zie na, o soba koŋ lɛ nyɛrɛ soŋ, o soba na baŋ leɛ la zɔŋɔ. Saŋa kaŋa a Baabole maŋ de la a yelbiri “nimi-gyɛlee” a de wuli lɛ na aŋ seŋ ka te maŋ kaara bonkaŋa zu velaa zaa. Lɛ na a Baabole naŋ maŋ de “nimi-gyɛlee” toŋ neŋ toma vɛŋɛɛŋ teŋ baŋ lɛ a yɛlɛ naŋ e nimizeɛ aseŋ, ane lɛ na aŋ seŋ ka te mãã te menne a kaara bonkaŋa zu. Lɛ aŋ seŋ ka te maŋ de Naaŋmen bege na ka o waa a ko te. (Ye 7:2) A yi Duturoonomi 32:10, a Baabole wulee lɛ na Naaŋmen naŋ da kaara a Izerayɛl biiri zu aŋa lɛ na bi-saa naŋ maŋ kaara o biiri zu na. Be vɛŋɛɛŋ teŋ baŋ ka, Naaŋmen da go la a Izerayɛl paaloŋ na aŋa “nimi-gyɛlee.” Deevid da puore sɔrɛɛ Naaŋmen ka o maŋ go o, a lɛ kaara o zu aŋa o naŋ waa “nimi-gyɛlee.” (Ym 17:8) O da boɔrɔŋ ka Jehoova maŋ lonne wieoŋ a wa somoo saŋa na o dɔndɔnne naŋ maŋ wa iri zɔɔrɔ ne o na. (De manne neŋ Zk 2:8; beŋ baŋ de a Hiburu yelbiri ba·vathʹ ʽaʹyin, “nimi-gyɛlee” a toŋ neŋ toma na.)—Kanne NIMIRI.
MARCH 11-17
BAABOLE POƆ YELNIMIZEERE | YIEME 18
“Jehoova La . . . Neɛ Naŋ Maŋ Faa Ma”
w09 5/1 14 wɛl. 4-5
Yelmannee Naŋ Be A Baabole Poɔŋ —Ho Baŋ La A Tɛgɛ Soŋ?
Wagre mineŋ a Baabole maŋ de la Jehoova manne neŋ boma mine naŋ ba voorɔ. Boma na mine a Baabole naŋ maŋ de Jehoova manne neŋ la “Izerayɛl Pie,” “pi-kuurii,” ane ‘nyɔge zi-kpeɛŋaa.’ (2 Saamiuel 23:3; Yieme 18:2; Duturoonomi 32:4) Bo yitaa la be a yɛlɛ ŋa poɔŋ? Aŋa lɛ pie naŋ maŋ are kpeɛŋaa, a ba gbigre na, lɛ meŋ la ka Jehoova Naaŋmen e Zie teŋ na baŋ toɔ̃ zo gaa bɔ sɔglezie.
Ka hooŋ kaa a Yieme gane poɔŋ, gbɛɛ yaga ba maŋ de la yelmannee mine a de bigre neŋ Jehoova gyogri naŋ e tɛɛtɛɛ na. Aŋa mannoo poɔŋ, Yieme 84:11 yeleeŋ ka, Jehoova “eɛ ŋmenaa ane kuri-bonlɛgraa.” Bon nanso a Baabole naŋ yeli lɛ la ka, Jehoova zie ka kyaanee, nyɔvore, faŋa, ane gomeŋɛ a yi. Kyɛ a Baabole lɛ yeleeŋ a yi Yieme 121:5 ka, “Jehoova la maaroŋ naŋ be ho nuduluŋ.” Aŋa lɛ na zie kaŋa maaroŋ naŋ be naŋ maŋ go te yi ŋmenaa tuluŋ eŋɛŋ na, Jehoova maŋ go la noba naŋ puoruu na yi toɔrɔ eŋɛŋ. O maŋ go baŋ a ko ba maaroŋ o “nu” kyɛbee o “begɛ” na puliŋ.—Aizeeya 51:16; Yieme 17:8; 36:7.
it-2 1161 wɛl. 7
Kɔkɔre
Naaŋmen maŋ kyɛllɛ wonee o puorebiiri kɔkɔre. Noba naŋ puoro Naaŋmen vooroŋ ane yelmeŋɛ poɔŋ na baŋ koŋ boɔlɛɛ Naaŋmen, ba na toɔ̃ taaɛ sagediibu ka Naaŋmen na kyɛlle woŋee ba kɔkɔre meŋ. Kɔkɔre zaa ba naŋ de a kono boɔlɔ Naaŋmen, kyɛ o maŋ kyɛllɛ wonoŋ. Kyɛ lɛ yoŋ naane, saŋa kaŋa ka neɛŋ ba yuo o noɔre a koŋ boɔle Naaŋmen, a kyɛ kono boɔloo o sukyiri poɔŋ, Naaŋmen naŋ baŋ nensaalaa sukyiri na zuŋ, o maŋ “kyɛlle woŋeeŋ” o soba sɔrebo na. (Ym 66:19; 86:6; 116:1; 1Sa 1:13; Ni 2:4) Ka nobaŋ wa be awommo poɔŋ a koŋ boɔle Naaŋmen, o maŋ kyɛlle woŋeŋ. Ka nobaŋ wa boɔrɔ ka ba iri zɔɔ neŋ Naaŋmen, kyɛbee a e o puorebiiri nimikuonii, Naaŋmen maŋ kyɛllɛ wonee yɛlɛ na zaa ba naŋ yele na. O baŋɛɛ ba poteɛrɛ meŋ zaa.—Mn 21:17; Ym 55:18, 19; 69:33; 94:9-11; Jr 23:25.
w22.04 3 wɛl. 1
Yɛlɛ Naŋ Na Toɔ̃ Soŋ Bo Ka Ho Are Ho Teɛroŋ Gyɛre Noɔreŋ
2. Maŋ leɛteɛre yɛlɛ naŋ e saŋa kaŋa naŋ pare. Ka hooŋ leɛteɛre gaa puore, ho na baŋ teɛrɛɛ saŋa kaŋa Jehoova naŋ soŋ bo hoŋ toɔ̃ are yelkpeɛne mine noɔreŋ bee? Ka teneeŋ maŋ leɛteɛre lɛ na Jehoova naŋ soŋ te ane o puorebiiri mine saŋa kaŋa naŋ pare na, a na toɔ̃ eŋ teŋ faŋa, a kyɛ soŋ te ka te maaleŋ dɛloo yaga zaa. (Yiem. 18:17-19) A lantaapuoruu neŋkpoŋ kaŋa baŋ boɔlɔ Joshua yeleeŋ ka, “Ka maaŋ wa puore sɔre yelkaŋa yi Jehoova zieŋ ka o iri a puoro noɔre, N maŋ sɛgɛɛ a yɛlɛ biŋ. A yɛlɛ ŋa maŋ soŋ maŋ maŋ leɛteɛre saŋa na maŋ puore sɔre Jehoova ka o e yelkaŋa ko ma, ka Jehoova sereŋ e ana yɛlɛ na neŋ o zu a ko ma.” Yelmeŋɛ la, ka teneeŋ maŋ leɛteɛre yɛlɛ na Jehoova naŋ e ko te saŋa kaŋa naŋ pare na, a na ko teŋ faŋ-paalaa ka te toɔ̃ are te teɛroŋ gyɛre noɔreŋ.
Baabole Poɔ Yelsonne
it-1 432 wɛl. 2
Kyerib
A paalonne naŋ da ŋmaa gyeere a Izerayɛl paaloŋ a puoro baga na da maŋ mɛ la bonmeɛree mine naŋ taa begɛ. A bonmeɛree ŋa maŋ eŋnɛɛ dabeɛ̃ yaga, a lɛ are ko yɛlɛ meŋ naŋ ba soma fẽẽ zaa. Noba mine maŋ yeliŋ ka, a kyeribihi na baŋ da maale na da waa ŋa a bagmaaleba bonmeɛree na. Kyɛ a yɛlɛ ŋa ba e yelmeŋɛ. A Gyuumine takoreŋ saŋa yɛlɛ mine noba zaa naŋ sagedi wuleeŋ ka, a kyeribihi ŋa da taa la nensaalaa waaloŋ. (A Baabole ba yeli yelzaa kyaare a yɛlɛ ŋa.) Noba naŋ maale a kyeribihi ŋa da mãã la ba menne a maalaa velaa zaa. A kyeribihi ŋa are ko la malekere naŋ veɛlɛ yaga, a taa gyeremɛ yaga zaa. Ba da maalaaŋ aŋ “waa ŋa lɛ na” Jehoova meŋɛ naŋ wuli Moosis na meŋɛmeŋɛ. (Yi 25:9) Bitontona Pɔɔl da bigraaŋ ka a eɛ “kyeribihi naŋ taa gyeremɛ yaga . . . a kyigi pɔge a faaloŋ pɔgebo bonpɔgraa na.” (Hi 9:5) A kyeribihi ŋa eɛ malekere naŋ maŋ tonɔ toma Jehoova nimitɔɔreŋ. A Baabole yeleeŋ ka: “N na iree N meŋɛ a wuli bo beŋ, ka N ne bo yeli yɛlɛ a yi a daga bonpɔgraa na zuŋ. N na vɛŋeŋ ka ho baŋ yɛlɛ na zaa naŋ seŋ ka ho de ko a Izerayɛl biiri ka ba tuuro na, a yi a kyeribihi ayi naŋ be a sieree daga zuŋ na kpakyagaŋ.” (Yi 25:22; So 7:89) Azuŋ, saŋa kaŋa a Baabole maŋ yeliŋ ka Jehoova ‘zeŋɛɛŋ [kyɛbee, a be] a kyeribihi kpakyagaŋ.’ (1Sa 4:4; 2Sa 6:2; 2Nm 19:15; 1Tu 13:6; Ym 80:1; 99:1; Ai 37:16) Sori kaŋa poɔŋ, a kyeribihi ŋa are ko la “bon naŋ waa ŋa toriko,” ka Jehoova maŋ zɔŋ. (1Tu 28:18) A kyeribihi begɛ na maŋ terɛɛ gomeŋɛ, a maŋ lɛ vɛŋ aŋ toɔ̃ zo gaa zie kaŋa wieoŋ. Azuŋ, saŋa na Deevid naŋ da wa sɛgrɛ o yieloŋ naŋ e sɛg-weeraa na, o da wulee lɛ na Jehoova naŋ lonne wieoŋ a wa somoo, aŋa neɛ naŋ ‘zɔŋ kyerib, a ɛgrɛ gɛrɛ’ kyɛbee “neɛ naŋ zeŋ maleke begɛ zuŋ.”—2Sa 22:11; Ym 18:10.
MARCH 18-24
BAABOLE POƆ YELNIMIZEERE | YIEME 19-21
“A Sazu Mannɛɛ Naaŋmen Gyeremɛ Yɛlɛ”
w04 1/1 8 wɛl. 1-2
Yɛ Vɛŋ Ka Te Zaa Manna Jehoova Gyeremɛ Yɛlɛ
GYEESI bidɔɔ Deevid da eɛ bibile naŋ be Bɛtelɛhɛm teŋɛ. Beŋ oŋ da e pekyeenɛ a baa. Ka onaŋ wa kyeeŋ o saa peere na a gaaneŋ zie kaŋa a te bebe o yoŋ sɛŋ, zisoɔree saŋa o da maŋ gbol kaa la sazu, a kaara a ŋmarbie naŋ maŋ yi na. Nɔkpeɛne zaa kyebe ka a yɛlɛ ama la da be o teɛroŋ poɔŋ saŋa na Naaŋmen vooroŋ soŋ naŋ da somoo oŋ sɛge yieloŋ kaŋa naŋ noma yaga zaa. A yieloŋ la be Yieme 19 na. O da sɛgɛɛŋ ka: “A sazu mannɛɛ Naaŋmen gyeremɛ yɛlɛ; a sagama naŋ be sazuŋ mannɛɛ o nuure toma yɛlɛ. Kyɛ te woŋee ba yɛlɛ a te ta a tendaa lombori zaa, ba duoro meŋ taɛ a tendaa lombori zaa.”—Yieme 19:1, 4.
Boma na Jehoova naŋ maale biŋ sazuŋ ka a yɛlɛ e seɛlee yaga zaa na koŋ baŋ yeli yɛlɛ, a koŋ baŋ sɛge yɛlɛ meŋ. Kyɛ bebiri la bebiri zaa, ane zisoɔree la zisoɔree zaa, a maŋ mannɛɛ Jehoova gyeremɛ yɛlɛ. Wagre zaa, Naaŋmen bonmaalee na maŋ mannɛɛ o gyeremɛ yɛlɛ. Ka teneeŋ wa nyɛ lɛ na Naaŋmen bonmaalee naŋ dire sieree koroo a te ta a “tendaa lombori zaa,” ka nensaaleba zaa na baŋ nyɛ na, a maŋ vɛmeŋ teŋ taa sigrimennoŋ gyogo. Kyɛ, sieree na Naaŋmen bonmaalee naŋ dire a koroo na yoŋ ba seŋ. Nensaaleba naŋ puoro Naaŋmen yelmennoŋ poɔŋ seŋ ka ba de ba kɔkɔɛ a poɔ, a meŋ manna Jehoova gyeremɛ yɛlɛ. Naaŋmen vooroŋ soŋ da soŋɛɛ yieli yiele kaŋa oŋ sɛge a yɛlɛ ama kyaare yɛlɛ naŋ seŋ ka noba naŋ puoro Jehoova yelmennoŋ poɔŋ naŋ seŋ ka ba erɛ. O da sɛgɛɛŋ ka: “De emmo naŋ seŋ neŋ korɔ Jehoova o gyeremɛ ane o faŋa zuŋ. De emmo naŋ seŋ neŋ korɔ Jehoova gyeremɛ na o yuori naŋ taa na zuŋ.” (Yieme 96:7, 8) Noba neŋ Jehoova niiloŋ naŋ e kpeɛŋaa poɔ maŋ pɛleŋ ka ba de a yɛlɛ ama tonɔ neŋ toma. Kyɛ, ka ba naŋ yeli ka te manna Jehoova gyeremɛ yɛlɛ, wala ka lɛ wuli?
w04 6/1 11 wɛl. 8-10
Naaŋmen Bonmaalee Mannɛɛ O Gyeremɛ Yɛlɛ!
Deevid da lɛ wulee Jehoova bonmaalee na mine yɛlɛ naŋ e nɔmãã yaga. O da yeleeŋ ka: “O biŋee tɛnte ko a ŋmenaa sazuŋ [a sazu na teŋ na baŋ de te nimie nyɛ la lɛ], o waa ŋa pɔgderɛ naŋ yi o kultaa die poɔ a waana; o maŋ taaɛ popeɛloŋ aŋa dɔɔ naŋ taa faŋa naŋ zoro o zoobu. O maŋ yi la a sazu lombori baaraa kaŋa, a gyeere lɛɛŋ a te ta o lombo-zaala kaŋa meŋ baaraa; bonzaa kyebe a ba maŋ nyɛ o toloŋ na.”—Yieme 19:4-6.
Ka hooŋ de a ŋmenaa manne neŋ a ŋmarbie mine naŋ bebe na, ho na nyɛŋ ka a ŋmenaa eɛ fẽẽ lɛ. Kyɛ, ŋmenaa eɛ ŋmarbiri kaŋa naŋ e o yoŋ, o eɛ kpoŋ a gaŋ boma na zaa naŋ gyeeroo na. Yelpeɛre kaŋa wuleeŋ ka, ka hooŋ de a ŋmenaa tegroŋ manne boma na zaa naŋ be te solar system na tegroŋ, a ŋmenaa eɛ tegroŋ gaŋ a boma ŋa zaa aŋa kɔɔ poɔ gbɛre lezaanaare neŋ pie neŋ awae. [Nansaalee kɔkɔre poɔŋ, ka ba naŋ yelka solar system a tɛgɛ la a ŋmenaa ane boma na zaa naŋ gyeerɛ a ŋmenaa na. A boma ŋa zaa la lantaa e a solar system.] Ŋmenaa taaɛ kpeɛ̃o kaŋa o naŋ de tagra a tendaa mara o meŋɛ. Lɛŋ vɛŋ ka a tendaa toɔ̃ gyeerɛ a ŋmenaa. Ŋmenaa neŋ a tendaa tɔɔre e ŋa maalere turi lezaanaare neŋ pie neŋ ata [kyɛbee kilometare turi kɔɔ lezaayi neŋ pie]. A ŋmenaa tagrɛɛ a tendaa velaa zaa, azuŋ, a tendaa koŋ baŋ faa te le ziyuo kaŋa, kyɛbee ka a tendaa zo te kpɛ a ŋmenaa poɔ a di o zaa a baare. Kpeɛ̃o na naŋ maŋ puri ŋmenaa poɔŋ na fẽẽ lɛ yoŋ la maŋ toɔ̃ ta a tendaa zu, kyɛ ana kpeɛ̃o na la maŋ soŋ ka nyɔvore toɔ̃ be a tendaa zuŋ.
A yieli yiele da de la yɛlɛ na ŋmenaa naŋ maŋ erɛ na manne neŋ yɛlɛ mine. O de la ŋmenaa a de manne neŋ “dɔɔ naŋ taa faŋa” naŋ maŋ zo a yi sapare sɛŋ a gaa saniŋe sɛŋ, kyɛ ka zieŋ wa soɔ oŋ leɛ te gaŋ o “tɛnte” poɔŋ. Ka ŋmenaaŋ wa kyɛŋ a te sigi saniŋe sɛŋ, neɛ naŋ be a tendaa zuŋ maŋ nyɛŋ ka a waa ŋa o naŋ kpɛ te gaŋ o “tɛnte” poɔŋ ka o pɛnne. Kyɛ ka zieŋ wa nyaa beguo saŋa, a ŋmenaa maŋ te puriŋ a nyegrɛ o zaa aŋa “pɔgderɛ naŋ yi o kultaa die poɔ a waana.” Deevid da eɛ pekyeenɛ, azuŋ o da baŋɛɛ lɛ na zie naŋ maŋ mãã zisoɔree saŋa. (Munpiilee 31:40) O maŋ teɛrɛɛ lɛ na meŋ ŋmenaa naŋ maŋ wa puri a vɛŋ ka o eŋɛ ane a tendaa zaa tole na. Azuŋ, a pɛlɛɛŋ ka ŋmenaa ba maŋ bale a yi o “sokyɛŋ” na oŋ maŋ kyɛŋ a yi sapare sɛŋ te ta saniŋe sɛŋ na. Kyɛ a ŋmenaa waa ŋa “dɔɔ naŋ taa faŋa,” a maŋ lɛ nare o meŋɛ a lɛ kyɛŋ ana “sokyɛŋ” na neŋ o zu.
g95 11/8 7 wɛl. 3
Te Wagre Ŋa Poɔŋ, Noba Ba Taa Neɛ Naŋ Maale Boma Aŋ Veɛlɛ Yaga Zaa Na Yɛlɛ
Ka teneeŋ taa nimipa naŋ e zuluŋ a ko bonveɛle na zaa naŋ ŋmaa gyeere te na, a na soŋ teŋ ka te baŋ Neɛ naŋ maale te na velaa zaa. Bonso o nuure toma la ŋmaa gyeere te. Saŋa kaŋa, Yezu da yelko la o potuuribo na ka ba mãã ba menne a leɛ kaa a flaaware naŋ da bulo Galili teŋɛ na. O da yeleeŋ ka: “Yɛ zanne yelkaŋa yi moɔ poɔ bon-puuro eŋɛŋ, ane lɛ a naŋ maŋ baa; a ba tonɔ toma, kyɛbee a wuoro bonsuurii; kyɛ maaŋ yele korɔ yɛ, haali Soolomoŋ ne o naaloŋ veɛloŋ zaa daŋ ba veɛlɛ seŋ a boma ŋa.” (Matio 6:28, 29) Flaaware ba e boma naŋ e tegrɛ yaga, kyɛ lɛ na Naaŋmen naŋ mãã o meŋɛ a maalaa aŋ veɛlɛ yaga zaa na vɛŋɛɛŋ teŋ baŋ ka Naaŋmen taaɛ te yɛlɛŋ, a maŋ e siri ka o ko te boma na zaa yɛlɛ naŋ ferɛ te.
Baabole Poɔ Yelsonne
it-1 1073
Hiburu Kɔkɔre
A yi Hiburu kɔkɔre poɔŋ, ba na toɔ̃ yelee yelyenaa kaŋa soe ayi mine poɔŋ. [Nansaalee kɔkɔre poɔŋ ba maŋ boɔlɛɛ a yɛlɛ ŋa ka synthetic kyɛbee formal constructive parallelism.] Ka ba naŋ wa yeli yɛlɛ lɛ, a yiiloŋ yɛlɛ na baŋ yeli na maŋ wulee a dɛndɛŋ yɛlɛ na baŋ yeli na pare, kyɛbee tɛɛtɛɛ naŋ be a dɛndɛŋ yɛlɛ ane a yiiloŋ yɛlɛ na kpakyagaŋ. Kyɛ lɛ yoŋ naane, ka ba naŋ wa tu ana sori ŋa poɔŋ a yeli yɛlɛ, a yiiloŋ yɛlɛ na baŋ wulee a dɛndɛŋ yɛlɛ na pare gaa tɔɔre, kyɛbee a wuli yelyuo kaŋa a kyaare a dɛndɛŋ yɛlɛ na. Te na baŋ nyɛɛ a yɛlɛ ŋa a yi yɛlɛ naŋ be Yieme 19:7-9 na poɔŋ:
Jehoova bege na paalɛɛŋ,
a maŋ vɛŋ hoŋ nyɛ faŋ-paalaa.
Yɛlɛ na Jehoova naŋ maŋ leɛteɛre te na taa la dɛlebo,
a maŋ vɛŋ ka neɛ naŋ ba baŋ yɛlɛ yaga nimiri e yɛmbaŋna.
Jehoova yelbinnee toreeŋ,
a maŋ vɛmeŋ ka neɛ sukyiri taa popeɛloŋ;
Jehoova bege eɛ forifori,
a maŋ vɛmeŋ ka neɛ nimie kyããne.
Jehoova zoobu pɛgeyieŋ,
a bebe tegitegilɛ.
Jehoova sɛrɛɛ ŋmaabo eɛ yelmeŋɛ;
a zaa maŋ eɛ sontuubu.
Ka hooŋ kaa a sɛgre soŋ, ho na nyɛŋ ka a yiiloŋ yɛlɛ na maŋ kpeeree a dɛndɛŋ yɛlɛ na noɔre. Ka hooŋ kaa a sɛgre zaa velaa zaa, ho na nyɛŋ ka ba maŋ poŋ la yelyenaa kaŋa eŋ ziiri ayi, a tu soe ayi poɔŋ a yeli ana yelyenaa na baare. Aŋa mannoo poɔŋ, a sɛgre yeleeŋ ka Jehoova “bege na paalɛɛŋ,” kyɛ wala teŋ e baŋ ka Jehoova “bege na paalɛɛŋ”? Ananso la ka, Jehoova bege na ‘maŋ vɛŋeŋ hoŋ nyɛ faŋ-paalaa.’ Wala teŋ lɛ e baŋ ka “yɛlɛ na Jehoova naŋ maŋ leɛteɛre te na taa la dɛlebo”? Ananso la ka, a maŋ vɛŋeŋ “ka neɛ naŋ ba baŋ yɛlɛ yaga nimiri e yɛmbaŋna.” A sori ŋa baŋ maŋ tu a yele yɛlɛ aŋ tuuro taa velaa zaa na waa ŋa neɛ naŋ yeli yɛlɛ, ka neŋ-yuo kaŋa meŋ te deɛ yɛlɛ na oŋ yeli na a kpeeri a noɔre. Lɛ na baŋ maŋ tu a yele a yɛlɛ na maŋ vɛŋeŋ ka a yɛlɛ tuuro taa velaa zaa, a lɛ e mɔlɔ ko a kannekanna ka o baŋ a pare velaa. A yɛlɛ maŋ eɛ yelyenaa kyɛ baŋ poŋaa eŋ ziiri ayi aŋ tuuro taa. A lɛ zuŋ baŋ boɔlɔ a yɛlɛ ŋa Nansaalee kɔkɔre poɔŋ ka formal kyɛbee constructive parallelism.
MARCH 25-31
BAABOLE POƆ YELNIMIZEERE | YIEME 22
Bo Ka A Baabole Daŋyeli Kyaare Yezu Kũũ Na?
w11 8/15 15 wɛl. 16
Ba Da Nyɛɛ A Mɛzaaya!
A na waa ŋa Naaŋmen naŋ zagre a Mɛzaaya bare. (Kanne Yieme 22:1.) A daŋyelbo ŋa da nyɛɛ eebo. A Baabole yeleeŋ ka: “Saŋa na aware naŋ tɔre awae naŋ wa ta na, [aŋa ŋmenaa gbelmaata saŋa] Yezu da de la kɔkɔkpeɛŋaa a yelka: ‘Eʹli, Eʹli, laʹma sa·bach·thaʹni?’ a yɛlɛ ŋa pare la ka: ‘N Naaŋmen, N Naaŋmen, bonso hoŋ gyɛ ma bare?’” (Marko 15:34) Lɛ ba wuli ka Yezu ba lɛ taa sagediibu o sazu Saa na eŋɛŋ. Kyɛ, Naaŋmen da iree O gomeŋɛ zaa yi Yezu eŋɛŋ, a tere sori ka Yezu dɔndɔnne na a nyɔgoo, a dɔgroo lɛ zaa ba naŋ boɔrɔ. Lɛ da vɛŋɛɛŋ baŋ pigri Yezu yelmennoŋ na nyɛ a te ta a baaraa. Yezu naŋ da ŋmɛ kpɛlle a yeli a yɛlɛ ŋa da vɛŋɛɛŋ ka yɛlɛ naŋ be Yieme 22:1 na nyɛ eebo.
w11 8/15 15 wɛl. 13
Ba Da Nyɛɛ A Mɛzaaya!
Deevid da daŋyeleeŋ ka noba na yelee yelfaare kyaara a Mɛzaaya. (Kanne Yieme 22:7, 8.) Saŋa na baŋ da kpa Yezu a dɔgɛɛ daa zuŋ o dire dɔgɛɛ na, noba da yelee yelfaare kyaaroo. Matio da sɛgɛɛŋ ka: “Noba naŋ da para gɛrɛ na da yelee yelfaare kyaaroo, a pine ba zuri a yele ka: ‘Hooŋ naaneŋ yelka ho na daa la a ŋmenpuoredie lɔɔ a kyɛ de bebie ata a leɛ mɛ o na, faa ho meŋɛ! Ka hooŋ wa waa Naaŋmen bidɔɔ, sigi a dɔgɛɛ daa zuŋ!’” Lɛ neŋ o zu la, a ŋmenpuore wedeɛreba ane a sɛgsɛgreba ane a nembɛrɛ da piili erooŋ laara, a yele ka: “O toɔ̃ faa la o taaba; kyɛ o koŋ baŋ faa o meŋɛ yɛŋ! O eɛ Izerayɛl paaloŋ Naa; vɛŋ ka o sigi a dɔgɛɛ daa zuŋ, te na sagoo la di. O de la o meŋɛ a dɛle Naaŋmen; vɛŋ ka O faa o pampana, ka Onaŋ boɔrɔ o yɛlɛ yɛŋ, bonso o yeleeŋ ka, ‘N waa la Naaŋmen Bidɔɔ.’” (Mat. 27:39-43) Kyɛ, Yezu da di la kannyiri a are a yɛlɛ ama zaa noɔreŋ. Nyɛ ewuli soŋ o naŋ e ko te seŋ lɛ!
w11 8/15 15 wɛl. 14
Ba Da Nyɛɛ A Mɛzaaya!
Ba na lɔɔ la bie a Mɛzaaya bonsuurii zuŋ. A yieli yiele da sɛgɛɛŋ ka: “Ba da poŋ la N bonsuurii ko taa, a da lɔɔ bie ka ba de N bonsuurii.” (Yiem. 22:18) A yɛlɛ ŋa neŋ o zu la da nyɛ eebo. A Baabole yeleeŋ ka, saŋa na “[a Urom sogyare] naŋ da wa kpa [Yezu] a daa zuŋ baare na, ba da lɔɔ la bie a de o bonsuurii na poŋ ko taa.”—Mat. 27:35; kanne Gyɔɔn 19:23, 24.
Baabole Poɔ Yelsonne
w06 11/1 29 wɛl. 7
Lɛ Teŋ Na Baŋ E A De Wuli Ka Te Taaɛ Gyeremɛ A Ko Te Lammore Naŋ E Forifori Na
Soe yaga bebeŋ teŋ na baŋ tu a de wuli ka te taaɛ gyeremɛ ko te lammore na. A sori kaŋa la ŋa, aseŋ ka te maŋ moɔ a bebe saŋa na teŋ wa yiele te Puoruu yiele na. A yiele ŋa kpoŋ zie zaa maŋ eɛ puoro yelbie, azuŋ aseŋ ka te maŋ de gyeremɛ naŋ e zuluŋ a de kyeɛrɛ a yiele ŋa. Bitontona Pɔɔl da de la yɛlɛ naŋ be Yieme 22 na manne neŋ Yezu yɛlɛ ka: “N na mannɛɛ ho yuori yɛlɛ a ko N yɔɔmine; a lantaapuoruu poɔŋ maŋ na de yieloŋ pugibo.” (Hiburu 2:12) Azuŋ, aseŋ ka te maŋ moɔ a bɔ zeŋ ziiri zeŋ sɛre ka a dakogizusoba yelka te iri yieli a yiele. Ka teneeŋ wa kyeɛrɛ a yiele meŋ, aseŋ ka te maŋ de te teɛroŋ eŋ a yiele yelbie eŋɛŋ. Yɛ vɛŋ ka te zaa moɔ a taa poteɛrɛ na a yieloŋ yiele naŋ da maŋ de yiele yiele na. O da sɛgɛɛŋ ka: “N na pugee Jehoova neŋ N sukyiri zaa, noba naŋ erɛ yɛlɛ naŋ tori ane a lantaapuoruu poɔŋ maŋ na e lɛ.” (Yieme 111:1) Yelmeŋɛ la, teŋ na maŋ yiele yiele a pugiro Jehoova eɛ yelkaŋa zuŋ aŋ seŋ ka te maŋ moɔ a wa a lammozie wieoŋ, a lɛ bebe te ta a lammo baaroo saŋa.
w03 9/1 20 wɛl. 1
Pugiro Jehoova A “Lantaapuoruu Noba Poɔŋ”
Aŋa lɛ a naŋ da waa takoreŋ saŋa na, zenɛ ŋa meŋ soyuo bebeŋ a ko te kaŋa zaa ka te manne te sagediibu yɛlɛ a “lantaapuoruu noba poɔŋ.” Sori na kaŋa naŋ yuo ko te zaa la teŋ na maŋ iri soorebie na baŋ maŋ soore a lantaapuoruu noba a lammo saŋa na nɔɛ. Daŋ ta wa teɛrɛ ka ho nɔɛ iribo na koŋ baŋ soŋ neɛzaa. Aŋa mannoo poɔŋ, ka hooŋ iri yɛlɛ noɔre, a wuli lɛ teŋ na baŋ tage te menne yi yɛlɛ mine poɔŋ, a na baŋ eŋɛɛ ho yɔɔmine faŋa ka ba moɔrɔ ba moɔbo zaa ka ba de Baabole sowuli tonɔ neŋ toma. Ka ba naŋ ba yeli Baabole sɛgre kaŋa yɛlɛ a kannoo poɔŋ, kyɛ ka ho wuli a sɛgre pare velaa, a na baŋ soŋɛɛ ho taaba yaga. Kyɛbee ka hooŋ wuli yɛlɛ mine ho meŋɛ naŋ peɛre nyɛ ho meŋɛ boma zannoo poɔŋ, a na baŋ eŋɛɛ ho yɔɔmine faŋa ka ba meŋ maŋ moɔrɔ ka ba zanna a Baabole.
APRIL 1-7
BAABOLE POƆ YELNIMIZEERE | YIEME 23-25
“Jehoova La N Kyeenɛ”
w11 5/1 31 wɛl. 3
“Jehoova La N Kyeenɛ”
Jehoova maŋ derɛɛ o peere na weɛ. Ka peereŋ ba taa kyeenɛ, a maŋ bɔreŋ. Lɛ neŋ o zu la, te meŋ boɔrɛɛ sowuli ka lɛ na toɔ̃ vɛŋ ka te erɛ yɛlɛ naŋ soma te zemmo poɔŋ. (Jeremaiya 10:23) Deevid da yeleeŋ a kyaare Jehoova ka, o maŋ de la o puorebiiri weɛ a gaaneŋ “moɔ naŋ soma” zieŋ, ane “pɛnnoo ziiri naŋ peɛle koɔ̃nɛɛ naŋ gaŋ bɔin noɔreŋ.” Jehoova maŋ lɛ de la o puorebiiri weɛ “a tuuro neŋ sontuubu soe.” (Wɛlbo 2, 3) Lɛ na Deevid naŋ de yɛlɛ na Jehoova naŋ maŋ erɛ korɔ te manne neŋ lɛ na pekyeenɛ naŋ maŋ kaara o peere zu na vɛŋɛɛŋ teŋ baŋ ka, te na baŋ dɛlɛɛ Naaŋmen. Ka teneeŋ maŋ de a Baabole poɔ yɛlɛ tonɔ neŋ toma, a tere sori ka Naaŋmen vooroŋ soŋ na wulo te sori, lɛ yɛŋ te na erɛɛ yɛlɛ naŋ wuli ka boma na teŋ taa na seŋ teŋ. Te na nyɛɛ pɛnnoo neŋ gomeŋɛ meŋ.
w11 5/1 31 wɛl. 4
“Jehoova La N Kyeenɛ”
Jehoova maŋ go la o peere na. Peere ba maŋ taa faŋa yaga, azuŋ ka neɛzaaŋ ba kyeenaa, a maŋ zoree dabeɛ̃. Jehoova yelko la o noba ka a ba seŋ ka ba zoro dabeɛ̃, haali ka ba naŋ ‘kyɛnɛ bɔg-zuluŋ naŋ e ligroŋ yaga zaa poɔŋ.’ Lɛ wuleeŋ ka, ka teneeŋ gbaŋ tuoro yelkpeɛne yaga zaa ka a waa ŋa te ba taa teɛretɔ zaa, kyɛ Jehoova na go teŋ. (Wɛlbo 4) Jehoova maŋ kaarɛɛ te zu velaa zaa, o maŋ narɛɛ o meŋɛ ka o wa soŋ te meŋ. O na baŋ ko la o puorebiiri yɛŋ ane faŋa naŋ na toɔ̃ soŋ ba ka ba are ba yelkpeɛne zaa noɔreŋ.—Filipae 4:13; Gyimisi 1:2-5.
w11 5/1 31 wɛl. 5
“Jehoova La N Kyeenɛ”
Jehoova maŋ korɛɛ o peere na bondirii. Peere maŋ kaarɛɛ soriŋ ka neɛ naŋ kyeenaa na ko a bondirii ka a di. Lɛ na Jehoova naŋ maale te na vɛŋeŋ te maŋ boɔrɔ ka te zanna o yɛlɛ, a puoruu meŋ. Naaŋmen na toɔ̃ soŋ teŋ ka te e lɛ meŋ. A yɛlɛ soŋ zie la ka, Jehoova eɛ Neɛ naŋ maŋ yuoro o nu yaga zaa. (Matio 5:3) Azuŋ, o maŋ ko la o puorebiiri bondirii yaga zaa ka ba di o tabule na zuŋ. (Wɛlbo 5) A Baabole ane gama na baŋ maŋ kaa a Baabole poɔŋ a maale na, aŋa a gane ŋa hoŋ kanna na eɛ sori kaŋa Jehoova naŋ maŋ tu a de Baabole poɔ wuluu a korɔ o puorebiiri. A Baabole poɔ wuluu ŋa maŋ soŋ teŋ teŋ baŋ bon nanso teŋ be a teŋɛzuŋ, ane poboɔbo na Naaŋmen naŋ taa ko te.
Baabole Poɔ Yelsonne
w11 2/15 24 wɛl. 1-3
De Ho Sukyiri Zaa Nɔnɔ Sontuubu
JEHOOVA maŋ tu la o Yelbiri ane o vooroŋ soŋ na eŋɛŋ a de o noba weɛ “a tuuro neŋ sontuubu soe.” (Yiem. 23:3) Te eɛ noba naŋ ba pɛgeyi, azuŋ saŋa kaŋa te maŋ bɔrɛɛ a sori ŋa zuŋ. Sɛre teŋ na leɛ wa kyɛnɛ a sori ŋa zuŋ na, aseŋ ka te moɔ te moɔbo zaa kyɛ toɔ̃ e lɛ. Boŋ na toɔ̃ soŋ te ka te e lɛ? Aŋa Yezu, aseŋ ka te maŋ nɔŋ ka te erɛ yɛlɛ naŋ soma.—Kanne Yieme 45:7.
Boŋ la a “sontuubu soe” ŋa? Sori eɛ zie noba naŋ maŋ tu a gaa zie kaŋa. Jehoova la neɛ naŋ maŋ biŋ a “soe” ŋa a tuuro lɛ na oŋ maŋ biŋ o sontuubu yɛlɛ na. A yi Hiburu ane Giriki kɔkɔɛ poɔŋ, a yelbiri “sontuubu” na baŋ wulee boŋ naŋ “tori.” Lɛ wuleeŋ ka o soba maŋ moɔrɛɛ o moɔbo zaa ka o de sowuli na Naaŋmen naŋ biŋ a kyaare gyog-soŋ na tonɔ neŋ toma. Jehoova la “sontuubu kpeɛbo zie,” azuŋ, o puorebiiri maŋ yi la popeɛloŋ poɔŋ a tere sori ka Jehoova wulo ba sori naŋ soma, a tori meŋ ka ba tuuro.—Jer. 50:7.
Ka teneeŋ de te sukyie zaa a moɔrɔ te moɔbo zaa ka te de Naaŋmen sontuubu yɛlɛ na tonɔ neŋ toma, lɛ yoŋ na baŋ vɛŋ ka te pɛlɛ o poɔ yaga zaa. (Dut. 32:4) Sɛre teŋ na toɔ̃ e lɛ na, aseŋ ka te moɔrɔ a maŋ zanna Jehoova Naaŋmen yɛlɛ a yi o Yelbiri a Baabole poɔŋ. Ka teneeŋ moɔ̃ niŋe a zanna Jehoova yɛlɛ, a tagra peɛloo bebiri zaa, a na vɛmeŋ ka te wa nɔŋ o sontuubu yɛlɛ na yaga. (Gyi. 4:8) Ka a naŋ wa fɛre ka te de gbɛɛ mine naŋ e nimizeɛ yaga zaa, aseŋ ka te maŋ tere sori ka Naaŋmen Yelbiri na wulo te sori.
APRIL 8-14
BAABOLE POƆ YELNIMIZEERE | YIEME 26-28
Yɛlɛ Naŋ Da Soŋ Deevid Oŋ Eŋ Faŋa A Dire Yelmennoŋ Korɔ Jehoova
w04 12/1 14 wɛl. 8-9
Kyɛnɛ A Yelmennoŋ Sori Na Zuŋ
Deevid da puore sɔrɛɛ Naaŋmen ka: “Oo Jehoova, peɛre ma velaa zaa, a e ma meŋ nyɛ; pɛge N teɛrɛ naŋ be N zuŋ ane N sukyiriŋ ka a yi fanana.” (Yieme 26:2) Nensaalaa haareŋbie maŋ be la o eŋgane poɔ meŋɛŋ. Haareŋbie na baŋ are ko la neɛ teɛrɛ ane o poteɛrɛ. Sukyiri meŋ na baŋ are ko la lɛ na o soba naŋ waa meŋɛmeŋɛ, o yelboɔree, o teɛrɛ, ane o yelbaŋ. Saŋa na Deevid naŋ da puore sɔre Jehoova ka o peɛroo a nyɛ na, o da boɔrɔŋ ka o wuli ka, Naaŋmen mãã o meŋɛ a peɛre o teɛrɛ ane o poteɛrɛ velaa zaa.
Deevid da lɛ puore sɔrɛɛ Naaŋmen ka o pɛge o haareŋbie ane o sukyiri ka a yi fanana. Sobuo ka Jehoova maŋ tu a pɛge lɛ na teŋ waa te pooreŋ na teŋ yi fanana? Deevid da lɛ yieleeŋ ka: “N na pugee Jehoova, onaŋ ko ma kawane. Haali zisoɔree saŋa, N sukyiri teɛrɛ maŋ korɔ maŋ dɛnnoo.” (Yieme 16:7) Wala ka a yɛlɛ ŋa wuli? A wuleeŋ ka Deevid da terɛɛ sori ka Jehoova kawane na kpɛ o sukyiri, o da nyɔgɛɛ a kawane eŋ o sukyiriŋ meŋ. Lɛ da soŋɛɛ Deevid oŋ leɛre o teɛrɛ ane o poteɛrɛ naŋ ba soma na. Te na baŋ nyɛɛ kawane yi Naaŋmen Yelbiri na poɔŋ, Naaŋmen gbɛbɔgi-areba zieŋ ane o lantaapuoruu na zieŋ. Ka teneeŋ maŋ tere sori ka a kawane na baŋ korɔ te na maŋ kpɛ te sukyieŋ, ka te nyɔge a kawane eŋ te sukyieŋ, te meŋ na baŋ eɛ lɛ na Deevid naŋ da e na. Ka teneeŋ maŋ puoro sɔrɔ Jehoova wagre zaa ka o pɛge te ka te yi fanana, a na soŋ teŋ ka te naŋ kyɛnɛ a yelmennoŋ sori zuŋ.
w04 12/1 15 wɛl. 12-13
Kyɛnɛ A Yelmennoŋ Sori Na Zuŋ
Deevid da lɛ wulee yelkaŋa naŋ somoo oŋ toɔ̃ nyɔge o yelmennoŋ na kpeɛŋaa. O da yeleeŋ ka: “N ba laŋna neŋ noba naŋ e zirii deme, N maŋ tagɛɛ N meŋɛ yi noba naŋ de lɛ na ba naŋ waa a sɔgle. N kyiiree neŋfaare lammozie, N zagrɛɛŋ ka N neŋ neŋfaare laŋ erɛ yɛlɛ.” (Yieme 26:4, 5) Deevid da ba zenɛ neŋfaare poɔŋ. O da kyiiree zɔmeŋ faare meŋ.
Ka te meŋ? Te maŋ zagreŋ ka te tere sori ka noba naŋ ba yele yelmeŋɛ yele yɛlɛ korɔ te a tuuro TV zu, vidiori, fotori, intanɛt zu ziiri, kyɛbee ziyobo mine poɔŋ bee? Te maŋ tagɛɛ te menne yi noba naŋ de lɛ na ba naŋ waa na sɔgle poɔŋ bee? Noba mine naŋ be te sakuuŋ kyɛbee te tomazie na baŋ erɛɛ ba yɛlɛ aŋa ba naŋ boɔrɔ ka te ne ba e zɔmenne, kyɛ ba sukyie poɔŋ, ba na baŋ taaɛ poboɔbo mine. Ka lɛ te boɔrɔŋ ka te neŋ noba naŋ ba kyɛnɛ Naaŋmen yelmeŋɛ na poɔŋ nyɔge zɔmennoŋ naŋ e kpeɛŋaa bee? Noba naŋ e nɔzagreba na baŋ yeliŋ ka ba yiree ba sukyie pooreŋ a yele yelmeŋɛ korɔ te. Kyɛ ba boɔbo zaa la ka ba tage te yi Jehoova zieŋ. Te de ka noba mine be la a Krista lantaapuoruu poɔŋ a erɛ ba yɛlɛ aŋa bampuori-kombampoɔ noba, wala aŋ seŋ ka te e? Ba maŋ de la lɛ na ba naŋ waa meŋɛmeŋɛ a sɔgle, azuŋ ho koŋ toɔ̃ baŋ lɛ na ba naŋ waa meŋɛmeŋɛ. Jayson naŋ e a lantaapuoruu nembɛrɛ sonnɔ kaŋa da taaɛ a zɔmenne ŋa taa o baapaaloŋ saŋa. O yeleeŋ a kyaare ba ka: “Bebiri kaŋa, ba kaŋa da yelko maŋ ka: ‘Yɛlɛ na zaa te naŋ erɛ pampana na yɛlɛ ba fɛre, bonso ka a donpaalaaŋ wa, te zaaŋ na kpi. Ka teneeŋ wa kpi meŋ, te koŋ baŋ ka yelkaŋa erɛŋ.’ A yɛlɛ ŋa da vɛŋɛɛŋ maŋ teɛre yɛlɛ gaa tɔɔre. N ba boɔrɔ ka N kpi saŋa na a donpaalaa naŋ wa wa.” Jayson da de la yɛŋ toŋ neŋ toma a tage o meŋɛ yi a zɔmenne ŋa taa zieŋ. Bitontona Pɔɔl kpãã teŋ ka, “Yɛ ta vɛŋ ka ba bɛnle yɛ. Zɔmeŋ faare tuubu maŋ sãã la gyog-sonne.” (1 Korinti 15:33) Azuŋ a eɛ nimizeɛ yaga zaa ka te tage te menne yi zɔmeŋ faare eŋɛŋ.
w04 12/1 16 wɛl. 17-18
Kyɛnɛ A Yelmennoŋ Sori Na Zuŋ
A ŋmenpuoredie ane a sareka irizie na baŋ da maŋ ire sarekare na, da eɛ zie a Izerayɛl biiri zaa naŋ da maŋ wa lantaa a puoro Jehoova. Deevid da wulee lɛ na o nimipɛle naŋ be a zie ŋaŋ. Azuŋ o da puore sɔrɛɛ Naaŋmen ka: “Jehoova, N nɔŋɛɛ die na hoŋ kpeɛrɛ na, zie na ho gyeremɛ naŋ be na.”—Yieme 26:8.
Te meŋ maŋ nɔŋeŋ ka te gaa laŋ neŋ te yɔɔmine ka te ne ba zaa laŋ zanna Jehoova yɛlɛ bee? A Baabole poɔ wuluu na ba naŋ maŋ de korɔ te a Lammoziiri na vɛŋɛɛŋ ka a ziiri ŋa e zie noba naŋ maŋ wa lantaa a de puoruu korɔ Jehoova te gbandige na poɔŋ. Kyɛ lɛ yoŋ naane, yuoni zaa te maŋ gaaɛ te lammobɛrɛ, gbandige lammore, ane te bebi-yenaa lammore naŋ e a yoŋ na. A lammore ŋa zieŋ, ba maŋ “leɛteɛre” teŋ Jehoova yɛlɛ. Ka teneeŋ ‘nɔŋaa yaga zaa,’ a na vɛmeŋ ka te maŋ taa eŋnyagroŋ ka te gɛrɛ a lammore. Ka teneeŋ wa gaa a lammozie, aseŋ ka te maŋ kyɛllɛ wono a yɛlɛ velaa zaa. (Yieme 119:167) Ka teneeŋ wa poɔ te yɔɔmine naŋ taa te neŋ poteɛre soŋ, a moɔrɔ ka ba sonnɔ te ka te nyɔge te yelmennoŋ kpeɛŋaa poɔŋ, a maŋ korɔ teŋ pɛnnoo yaga zaa.—Hiburu 10:24, 25.
Baabole Poɔ Yelsonne
w06 7/15 28 wɛl. 15
Jehoova Maŋ Faa La Noba Na Ba Naŋ Dɔgrɔ Na
A yieli yiele Deevid da yieleeŋ ka: “Haali ka N saa ane N maŋ zagre ma bare, kyɛ Jehoova yɛŋ koŋ gyɛ ma bare.” (Yieme 27:10) Nyɛ lɛ a naŋ diire sukyiri aseŋ, ka te baŋ ka nɔmmo na Jehoova naŋ taa ko te na eɛ zuluŋ yaga gaŋ nɔmmo na te dɔgreba naŋ taa ko te na. Ka te dɔgrebaŋ dɔgrɔ te, a zagre te bare, kyɛbee a gyɛ te bare, kyɛ Jehoova yɛŋ naŋ na moɔ̃ la niŋe a kaara te zu velaa zaa. (Urom 8:38, 39) Teɛre baŋ ka noba na Naaŋmen naŋ nɔŋ la oŋ maŋ tage waneŋ o meŋɛ zie. (Gyɔɔn 3:16; 6:44) Lɛ zaa ho taaba naŋ erɛ bo, kyɛ baŋ peɛlaaŋ ka, ho sazu Saa na yɛŋ nɔnɛɛ ho yɛlɛ.
APRIL 15-21
BAABOLE POƆ YELNIMIZEERE | YIEME 29-31
Dɛnnoo Eɛ Sori Kaŋa Naaŋmen Naŋ Maŋ Tu A Wuli Te O Nɔmmo
it-1 802 wɛl. 3
Nimisogɔ
Ka ba naŋ yelka neɛ de la o ‘nimisogɔ a sɔgle,’ a na baŋ wulee yɛlɛ tɛɛtɛɛ. Ka a Baaboleŋ wa yelka Jehoova Naaŋmen de la o nimisogɔ a sɔgle neɛ kaŋa, a wuleeŋ ka o iree o maaloo ane o kpeɛ̃o yi o soba eŋɛŋ. Lɛ ka Jehoova maŋ e saŋa na neɛ kaŋa, bee noba mine naŋ wa e tokpeɛne na. Aŋa lɛ na Jehoova naŋ da e a Izerayɛl paaloŋ noba na. (Jb 34:29; Ym 30:5-8; Ai 54:8; 59:2) Saŋa kaŋa meŋ ka a Baaboleŋ wa yelka Jehoova de la o nimisogɔ sɔgle, a na baŋ wuliŋ ka, o ba tu o yel-eree bee o yelyaga eŋɛŋ a vɛŋ ka noba baŋ yɛlɛ na o naŋ boɔrɔ, bonso o di la kannyiri a kyɛnlɛ ka wagre naŋ seŋ neŋ ta. (Ym 13:1-3) Deevid da puore sɔrɛɛŋ ka, “Iri ho nimisogɔ yi N yelfaare eŋɛŋ.” Yɛlɛ na oŋ puore sɔre na wuleeŋ ka, o boɔrɔŋ ka Naaŋmen di o gbɛ-ŋmɛ suuri koo, kyɛbee a iraa bare.—Ym 51:9; de manne neŋ Ym 10:11.
w07 3/1 19 wɛl. 1
Te Poɔ Pɛlɛɛŋ Ka Te Kyɛnlɛ Jehoova
Te na baŋ de la maaloo na teŋ na baŋ nyɛ yi Jehoova dɛnnoo poɔŋ na manne neŋ lɛ na tewɔnee naŋ maŋ bere na. A Baabole yeleeŋ a kyaare dɛnnoo na Naaŋmen naŋ korɔ te na ka: “Noba na baŋ de a wuluu ŋa tɔ ko ba, maŋ wɔŋ la emmaaroŋ wɔmɔ naŋ waa sontuubu.” (Hiburu 12:11) A maŋ de la wagre sɛre kyɛ ka tewɔnee toɔ̃ bere, lɛ neŋ o zu la, a maŋ de la wagre sɛre kyɛ teŋ na baŋ leɛre te gyogri a de wuluu na Naaŋmen naŋ korɔ te na meŋ tonɔ neŋ toma. Aŋa mannoo poɔŋ, te na baŋ eɛ yɛlɛ mine naŋ ba seŋ neŋ, ka lɛ vɛŋ ka te kɔŋ apoɔsoe mine te naŋ taa a lantaapuoruu poɔŋ. Ka lɛŋ wa e, a na somaŋ ka te yi te sukyie zaa poɔŋ a kyɛnlɛ Naaŋmen. Lɛ eebo na vɛmeŋ ka te enne ta kyoɔre, kyɛbee ka te bale. Ka a yɛlɛ ŋa taaŋ wa pɔge te, yɛlɛ na vooroŋ soŋ naŋ da soŋ Deevid oŋ sɛge na na toɔ̃ eŋ teŋ faŋa. O da sɛgɛɛŋ ka: “Bonso wagre fẽẽ lɛ teŋ maŋ be [Naaŋmen] suuri puliŋ, kyɛ o maaloo maŋ bebeŋ te zemmo zaa poɔŋ. Zisoɔree saŋa, konni na baŋ waŋ, kyɛ beguo saŋa, te na kyeerɛŋ neŋ popeɛloŋ.” (Yieme 30:5) Ka teneeŋ moɔ̃ niŋe a kyɛnlɛ Jehoova, a de kawane na te naŋ nyɛrɛ yire O Yelbiri ane o lantaapuoruu na zieŋ tonɔ neŋ toma, te meŋ wagre na taŋ ka te ‘kyeerɛ neŋ popeɛloŋ.’
w21.10 6 wɛl. 18
Bo Yɛlɛŋ Maŋ Wuli Ka Neɛ Sereŋ E La Kaŋdabaŋkalɛ?
Ka ba naŋ iri neɛ bare a lantaapuoruu poɔŋ, wala oŋ na toɔ̃ e a de wuli ka o sereŋ eɛ kaŋdabaŋkalɛ? O soba seŋ ka o maŋ moɔrɔ o moɔbo zaa a waana a lammore zaa, a de kawane na a lantaapuoruu nembɛrɛ naŋ koo ka o maŋ puoro wagre zaa, a zanna a Baabole meŋ na tonɔ neŋ toma. Aseŋ ka o moɔ a tage o meŋɛ yi yɛlɛ na zaa naŋ na vɛŋ ka o lɛ te e ana yelfaa na. Ka o naŋ moɔ̃ niŋe a leɛ maale o neŋ Jehoova niiloŋ na, o soba na baŋ taaɛ sagediibu ka, Jehoova na di la suuri koo kpɛlɛŋkpɛlɛŋ. A lantaapuoruu nembɛrɛ na lɛ de la o soba wa poɔ a lantaapuoruu poɔŋ. Ka neɛŋ wa e yelfaa kaŋa naŋ e nimizeɛ, a lantaapuoruu nembɛrɛ maŋ kaa la yɛlɛ na zaa naŋ vɛŋ ka o soba te e ana yelfaa na, sɛre kyɛ ŋmaara o sɛrɛɛ.
Baabole Poɔ Yelsonne
w06 5/15 19 wɛl. 13
Yelnimizeere Naŋ Be A Yieme Dɛndɛŋ Gane Poɔŋ
31:23—Sobuo ka neɛ naŋ erɛ taŋkaŋyɛlɛ maŋ nyɛ saŋyɔɔ naŋ e kpoŋ? A saŋyɔɔ ŋa eɛ totage. Ka neɛŋ e sontuuro a ba baŋ perɛ a kyɛ ŋmɛ gbɛre, o soba na baŋ nyɛɛ dɛnnoo yi Jehoova zieŋ. Kyɛ neɛ naŋ erɛ taŋkanyɛlɛ ba maŋ leɛre yi yelfaare na oŋ erɛ na poɔŋ. Azuŋ, o soba maŋ nyɛɛ totage naŋ e kpoŋ yaga.—Yeng Yelibie 11:31; 1 Piita 4:18.
APRIL 22-28
BAABOLE POƆ YELNIMIZEERE | YIEME 32-33
Bonso Aŋ E Nimizeɛ Ka Te Kyiiri Yelfaa Kaŋa Naŋ E Nimizeɛ Te Naŋ E?
w93 3/15 9 wɛl. 7
Jehoova Nembaalonzoe Na Maŋ Faa Teŋ Yi Eŋkyoɔre Gaali Poɔŋ
Ka teneeŋ wa nyɛ ka te sãã la Naaŋmen bege na nimizeɛ̃, a na baŋ eɛ kpeɛŋaa ko te ka te kyiiri a yelfaa na teŋ e na. A na baŋ eɛ kpeɛŋaa ka te kyiiri a yelfaa teŋ e na ko Jehoova gba. Ka teneeŋ wa e lɛ, bo yɛlɛŋ na baŋ pɔge te? A yi Yieme 32 poɔŋ, Deevid meŋɛ da yeleeŋ ka: “Saŋa na maŋ da taŋ N noɔre na [a zagre ka o kyiiri o yelfaare na], N kɔbɔ zaa da moorɔŋ bonso wagre zaa N da maŋ pɛnɛŋ. Bonso ŋmenaa ane zisoɔree zaa, [Jehoova] nu da maŋ eɛ tegroŋ N zuŋ. N faŋa meŋ da nyunnoŋ aŋa koɔ̃ naŋ nyunno kpankyaanee saŋa.” (Wɛlbo 3, 4) Saŋa na Deevid naŋ da moɔrɔ o moɔbo zaa ka o pɔge yelfaa na oŋ e na, a ko lɛ na o zoma naŋ da dɔɔnoo na, a da vɛŋɛɛŋ oŋ di dɔgɛɛ yaga. O posããnaa na da vɛŋɛɛŋ ka o faŋa sigi teŋɛ, ka lɛ vɛŋ oŋ leɛ waa ŋa teɛ naŋ ko, a ba taa maaroŋ zaa naŋ na koo nyɔvore. A waa ŋa yelfaa na Deevid naŋ da e na da vɛŋɛɛŋ oŋ ba lɛ taa teɛroŋ yeni, ka baaloŋ meŋ da kpɛ o. Lɛ zaa naŋ la, te baŋɛɛŋ ka o da ba lɛ taa popeɛloŋ. Ka te kaŋa zaaŋ daŋ wa tuore a yɛlɛ ama taa, wala aŋ seŋ ka te e?
cl 262 wɛl. 8
Naaŋmen Naŋ E ‘Siri Ka O Di Suuri’
Deevid da leɛrɛɛ o eebo a yelka: “A baaraa zaa N da kyiiree N yelfaare ko bo; N da ba pɔge N faaloŋ. . . . Hoŋ di N yelfaare meŋ suuri ko ma.” (Yieme 32:5) A Hiburu yelbiri na ba naŋ leɛre waneŋ ka ‘di suuri’ na baŋ wulee neɛ naŋ “zɛge boŋ” kyɛbee “a iri bonkaŋa bare.” Lɛ na baŋ de o toŋ neŋ toma a zie ŋaŋ na wulee neɛ naŋ iri “bege sããmmo, yelfaa kaŋa, kyɛbee gbɛ-ŋmɛ” a bare. Azuŋ, sori kaŋa poɔŋ na, Jehoova da zɛgɛɛ Deevid yelfaare na bare, a iraa bare kpɛlɛŋkpɛlɛŋ. Lɛ da vɛŋɛɛŋ ka Deevid nyɛ pɛnnoo yi tuobu na oŋ da tuo gore na eŋɛŋ. (Yieme 32:3) Te meŋ na baŋ taaɛ sagediibu ka, Naaŋmen na iree te yelfaare zaa bare, a lɛ tu Yezu yɔɔdeɛbo sareka na eŋɛŋ a di te yelfaare zaa suuri ko te.—Matio 20:28.
w01 6/1 30 wɛl. 1
Yelfaare Kyiiroo Naŋ Maŋ Vɛŋ Teŋ Nyɛ Sammo
Saŋa na Deevid naŋ da kyiiri o yelfaare na, o da ba lɛ zeŋ teɛrɛ ka o ba taa tɔnɔ zaa. Yɛlɛ na oŋ sɛge eŋ a yieme gane na poɔŋ vɛŋɛɛŋ teŋ baŋ ka saŋa na oŋ wa kyiiri yelfaa na oŋ da e na, o da nyɛɛ pɛnnoo. A da lɛ somooŋ oŋ moɔ̃ niŋe puoro Naaŋmen yelmennoŋ poɔŋ. Ho na baŋ nyɛɛ a yɛlɛ ŋa a yi yɛlɛ na oŋ sɛge eŋ Yieme 32 poɔŋ na. O wɛlbo 1 na kannɛɛŋ ka: “Neɛ na sããmmo ba naŋ vɛŋ ko taaɛ popeɛloŋ, neɛ na yelfaare ba naŋ pɔge.” Ka teneeŋ e yelfaa kaŋa naŋ e nimizeɛ yaga zaa gba, a kyɛ yi te sukyie zaa pooreŋ a e kaŋdabaŋkalɛ a leɛre te eebo, te na baŋ leɛ taaɛ popeɛloŋ. Sori na kaŋa teŋ na baŋ tu a de wuli ka te yi la te sukyie zaa pooreŋ a e kaŋdabaŋkalɛ la ka, te sage ka te sereŋ eɛ yelfaa aŋa lɛ na Deevid naŋ da e na. (2 Saamiuel 12:13) Deevid da ba boɔrɔ ka o wuli ka o taaɛ ananso ka o e a yelfaa na oŋ e na Jehoova nimitɔɔreŋ. O da ba piili yele ka noba mine la vɛŋ oŋ e a yelfaa. O wɛlbo 5 na yeleeŋ ka: “A baaraa zaa N da kyiiree N yelfaare ko bo; N da ba pɔge N faaloŋ. N da yeleeŋ ka: ‘N na kyiiree N yelfaare ko Jehoova.’ Hoŋ di N yelfaare meŋ suuri ko ma.” Ka neɛŋ yi o sukyiri zaa poɔŋ a kyiiri o yelfaare, a maŋ ko la o soba pɛnnoo. O soba zoma ba maŋ lɛ dɔɔnoo a kyaare yelfaare na oŋ e saŋa kaŋa naŋ pare na.
Baabole Poɔ Yelsonne
w06 5/15 20 wɛl. 1
Yelnimizeere Naŋ Be A Yieme Dɛndɛŋ Gane Poɔŋ
33:6—Boŋ la Jehoova noɔre “vooroŋ” na? A vooroŋ ŋa are ko la Naaŋmen kpeɛ̃o na oŋ maŋ de tonɔ neŋ toma, kyɛbee o vooroŋ soŋ na. A vooroŋ ŋa la oŋ de maale boma na zaa naŋ be sazuŋ na. (Munpiilee 1:1, 2) Aŋa lɛ na neɛ naŋ maŋ voore bare kpeɛŋaakpeɛŋaa ka a vooroŋ yi gaa na, a Baabole yeleeŋ ka Naaŋmen vooroŋ soŋ na waa ŋa o noɔre vooroŋ, bonso o na baŋ toŋ la o vooroŋ soŋ na ka o gaa zitɔɔre a te vɛŋ ka yɛlɛ o naŋ boɔrɔ nyɛ eebo.
APRIL 29–MAY 5
BAABOLE POƆ YELNIMIZEERE | YIEME 34-35
‘Pugiro Jehoova Wagre Zaa’
w07 3/1 22 wɛl. 11
Yɛ Vɛŋ Ka Te Zaa Laŋ Zɛge Jehoova Yuori Na Ka O Do
“N na pugee Jehoova wagre zaa; N na de la N nɔ-gbamɛ a pugiroo wagre zaa.” (Yieme 34:1) Deevid naŋ da zo kpɛ moɔ a sɔglɔ na zuŋ, o da ba taa bontaree yaga. Kyɛ aŋa lɛ na oŋ yeli a sɛgre ŋa poɔŋ na, o da ba yelka oŋ ba taa boma yaga zuŋ na, o koŋ de pugibo korɔ Jehoova. Deevid ewuli soŋ ŋa na toɔ̃ soŋ teŋ saŋa na teŋ wa tuoro yelkpeɛne. Ka sakuuŋ teŋ be, tomazieŋ, ka te be la te Kristabitaaba poɔŋ, kyɛbee a gyamaa poɔ naaŋ moɔloo poɔŋ, aseŋ ka te maŋ moɔrɔ ka te de pugibo korɔ Jehoova. Te taaɛ ananso yaga ka te erɛ lɛ. Aŋa mannoo poɔŋ, ka hooŋ leɛ kaa Jehoova bonmaalee velaa zaa, ho na baŋ zannɛɛ yɛlɛ yaga yi a poɔŋ. Hooŋ leɛ nyɛ toma na Jehoova naŋ de o lantaapuoruu kyɛlee naŋ be a teŋɛzuŋ na toŋ neŋ. Aneazaa ka noba naŋ derɛ a toma weɛ na eɛ noba naŋ ba pɛgeyi, kyɛ Jehoova de la a dɔbɔ ŋa naŋ e yelmeŋɛ deme na toŋ neŋ toma yaga zaa te saŋa ŋaŋ. A donɛɛ ŋa poɔŋ, ka noba mineŋ wa toŋ tonkpeɛne yaga, ba maŋ de baŋ baŋ waa ŋa baga a puoro ba. Kyɛ ka hooŋ de ba toma na manne neŋ Naaŋmen toma, ba buo soba la toŋ tonkpeɛne yaga? Ho ba nyɛ ka yɛlɛ na Deevid naŋ da sɛge na eɛ yelmeŋɛ? O da sɛgɛɛŋ ka: “Oo Jehoova, ŋmen zaa kyebe a waa ŋa hooŋ, toma zaa kyebe a waa ŋa ho toma na.”—Yieme 86:8.
w07 3/1 22 wɛl. 13
Yɛ Vɛŋ Ka Te Zaa Laŋ Zɛge Jehoova Yuori Na Ka O Do
“N na zɛgrɛɛ N meŋɛ Jehoova eŋɛŋ; Sigri meŋɛ deme na woŋaaŋ a kyillɛ neŋ popeɛloŋ.” (Yieme 34:2) A yi a sɛgre ŋa poɔŋ, Deevid da ba de yɛlɛ na oŋ toɔ̃ e na zɛgrɛ neŋ o meŋɛ. Aŋa mannoo poɔŋ, o da ba zɛgrɛ o meŋɛ oŋ da toɔ̃ bɛnle Gaat naa na. O da baŋɛɛŋ ka Jehoova la da go o saŋa na oŋ da be Gaat na. O da lɛ baŋɛɛŋ ka Jehoova sommoŋ meŋ la oŋ da toɔ̃ zo yi be. (Yeng Yelibie 21:1) Azuŋ, Deevid da ba de yɛlɛ oŋ toɔ̃ e zɛgrɛ neŋ o meŋɛ, kyɛ o da de la Jehoova yɛlɛ zɛgrɛ neŋ o meŋɛ. A lɛ zuŋ, noba naŋ da taa sigrimennoŋ gyogo da boɔrɔŋ ka ba tage peɛle Jehoova. Yezu meŋ da zɛgɛɛ Jehoova yuori na oŋ do, lɛ da vɛŋɛɛŋ ka noba naŋ sigri ba menne a sagra wulibo na wa Jehoova zie. Zenɛ ŋa meŋ, noba naŋ sigri ba menne a yi a donɛɛ lombori zaa wa poɔ la Kristabiiri na baŋ sɔ naaloŋ kãã na poɔŋ baŋ zaa laŋ puoro Jehoova. Yezu la a Kristabiiri ŋa baŋ sɔ naaloŋ kãã na Zusoba. (Kolosi 1:18) Ka a noba ŋaŋ wa nyɛ lɛ ba naŋ zɛgrɛ Naaŋmen yuori oŋ duoro na, a lɛ nyɛ lɛ na a vooroŋ soŋ naŋ sonnɔ noba baŋ maŋ wuli a Baabole poɔ yɛlɛ velaa zaa ka lɛ vɛŋ baŋ baŋ a pare na, a maŋ tɔ la ba sukyie yaga.—Gyɔɔn 6:44; Toma 16:14.
w07 3/1 23 wɛl. 15
Yɛ Vɛŋ Ka Te Zaa Laŋ Zɛge Jehoova Yuori Na Ka O Do
“N peɛrɛɛ yɛlɛ yi Jehoova zie, oŋ iri a noɔre ko ma. O faa maŋ yineŋ yɛlɛ na zaa naŋ eŋnɛ ma dabeɛ̃ poɔŋ.” (Yieme 34:4) A yɛlɛ ŋa da eɛ tegroŋ yaga zaa a koo. Azuŋ, o da gaaɛ nimitɔɔre a yelka: “Soba na naŋ e nembaala na boɔlɛɛŋ, ka Jehoova kyɛlle woŋ. O faa o la yi o toɔrɔ zaa poɔŋ.” (Yieme 34:6) Ka te neŋ te Kristabitaabaŋ wa laŋ erɛ yɛlɛ, te maŋ nyɛɛ soyuo ka te manne lɛ na Jehoova naŋ toɔ̃ soŋ te saŋa kaŋa naŋ pare teŋ toɔ̃ are te yelkpeɛne noɔreŋ na ko ba. A yɛlɛ ama taa na baŋ eŋɛɛ ba sagediibu faŋa, aŋa lɛ na Deevid yɛlɛ naŋ da eŋ noba naŋ sonnoo na faŋa na. A yi Deevid yɛlɛ ŋa poɔŋ, o taaba naŋ da “de ba teɛretɔ eŋ [Jehoova] eŋɛŋ na niŋe da kyaanɛɛ; vi koŋ kpɛ ba ka ba pɔge ba niŋesogɔ.” (Yieme 34:5) Aneazaa ka Deevid da zoro yiree Naa Sɔɔl zieŋ, kyɛ lɛ eebo da ba e vi yɛlɛ a koo. Deevid taaba naŋ da sonnoo na da baŋɛɛŋ ka Naaŋmen arɛɛ Deevid puoreŋ. Lɛ da vɛŋɛɛŋ ka ba niŋesogɔ da kyaane. Lɛ neŋ o zu la, nempaalba ane noba naŋ de yuomo yaga a puore Jehoova seŋ ka ba maŋ boɔrɔ sommo yire Jehoova zieŋ. Ka ba naŋ wa nyɛ lɛ na Jehoova naŋ sonnɔ ba na, a na vɛmeŋ ka ba niŋesogɔ kyaane, a eŋ ba faŋa ka ba naŋ moɔ̃ niŋe a dire yelmennoŋ korɔ Jehoova.
Baabole Poɔ Yelsonne
w06 5/15 20 wɛl. 2
Yelnimizeere Naŋ Be A Yieme Dɛndɛŋ Gane Poɔŋ
35:19—Yɛlɛ na Deevid naŋ da puore sɔre ka Naaŋmen ta wa terɛ sori ka o dɔndɔnne nyigroo na pare la boŋ? Ka Deevid dɔndɔnne naŋ nyigroo, lɛ wuleeŋ ka ba poɔ pɛle neŋ la lɛ na baŋ moɔrɔ ka ba e o yelfaa na. Azuŋ, Deevid da puoro sɔrɔŋ ka Jehoova ta wa terɛ sori ka lɛ nyɛrɛ eebo.