Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane
© 2023 Watch Tower Bible and Tract Society of Pennsylvania
JANUARY 1-7
BAABOLE POƆ YELNIMIZEERE | JOOB 32-33
Maŋ Diire Noba Naŋ Tuoro Yelkpeɛne Yaga Zaa Sukyie
it-1 710
Elaihu
Elaihu da ba wɛlɛ noba. O da ba derɛ pugibu naŋ ba seŋ neŋ meŋ korɔ neɛzaa. Elaihu da baŋɛɛŋ ka o waa la tɛne, aŋa lɛ na Gyoob meŋ naŋ da waa tɛne na. O da lɛ baŋɛɛŋ ka a Kpeɛ̃o Zaa Daana la maaloo. O da ba boɔrɔ ka o tu o yelyaga eŋɛŋ a vɛŋ ka dabeɛ̃ kpɛ Gyoob, kyɛ o da de la zɔmennoŋ gyogo yeli yɛlɛ ko Gyoob. O da maŋ boɔlɛɛ Gyoob yuori o yelyaga na poɔŋ, kyɛ Eelifaz, Biilidad ane Zoofer yɛŋ da ba e lɛ.—Joob 32:21, 22; 33:1, 6.
w14 6/15 25 wɛl. 8-10
Ho Taaɛ Teɛroŋ Na Jehoova Naŋ Taa Kyaare Nensaaleba Bambaaloŋ Na Bee?
Ka teneeŋ wa baŋ yelkpeɛne na te yɔɔdɔba neŋ te yɔɔpɔgeba naŋ tuoro, a maŋ vɛmeŋ teŋ taa nimibaaloŋ ko ba. Te yɔɔmine bebeŋ ka ba laafeeloŋ yɛlɛ ba paale, ba mine taaɛ dɔgreba naŋ ba puoro Jehoova. Ba mine meŋ tuoree teɛroŋ gyɛre yɛlɛ naŋ maŋ dɔɔnɔ ba yaga zaa. A yɛlɛ ama kaŋa zaa na baŋ pɔgɛɛ te meŋ. Sɛre ka a Izerayɛl biiri na gaa a Noɔre Emmo Teŋgane na, Jehoova da yelko baŋ ka ba teɛre ka ba meŋ da eɛ nandaaneba ane bambaalba Igyipiti paaloŋ poɔŋ. Azuŋ, a ba seŋ ka ba “wa vɛnɛ ka [ba] sukyie erɛ kpeɛne kyaara” ba yɔɔmine naŋ tuoro yelkpeɛne na. Jehoova da boɔrɔŋ ka ba maŋ yi nimibaaloŋ poɔŋ a sonnɔ nembaalba naŋ boɔrɔ sommo.—Dut. 15:7, 11; Liiv. 25:35-38.
A ba seŋ ka te dire te yɔɔmine ŋa sɛrɛɛ, kyɛbee a taa teɛroŋ faare a kyaara ba. Aseŋ ka te mɔɔ te mɔɔbo zaa a maŋ diire noba naŋ be awommo poɔŋ sukyie. (Joob 33:6, 7; Mat. 7:1) Te de a yelmannaa ŋa wuli a muni: Ka neɛŋ zɔŋ moto a gɛrɛ zie kaŋa ka o neŋ neɛ kaŋa te va taa, ba maŋ lonnee wieoŋ a de o gaaneŋ asibiti. Ka ba naŋ wa de o te ta a asibiti, a dɔktare maŋ peɛrɛɛ o soba a boɔrɔ ka ba baŋ ka ona la waaneŋ a accident bee? Ai, a dɔktare maŋ lonneŋ wieoŋ a mɔɔrɔ ka ba soŋ o soba ka o nyɛ laafeɛ. Lɛ neŋ o zu la, ka te yɔɔ kaŋaŋ wa tuoro yelkpeɛne ka lɛ vɛŋ ka o soba bale, aseŋ ka te maŋ mɔɔrɔ te mɔɔbo zaa ka te soŋ o soba ka o neŋ Jehoova niiloŋ leɛ e kpeɛŋaa.—Kanne 1 Tɛsalonika 5:14.
Ka teneeŋ maŋ mãã te menne a teɛre yɛlɛ na te yɔɔ naŋ tuoro na yɛlɛ gaa tɔɔre, a na vɛmeŋ ka te taa teɛroŋ yuo a kyaare bambaaloŋ na oŋ taa na. Aŋa mannoo poɔŋ, hooŋ leɛteɛre te yɔɔpɔgeba mine naŋ tuoro dɔgroŋ yaga zaa ba booree poɔŋ yuomo yaga, ka hooŋ kaa te yɔɔpɔgeba ŋa soŋ zaa a na waa ŋa ba naŋ e bambaalba a ba taa kpeɛ̃o zaa. Kyɛ ho ba nyɛ ka ba eɛ noba naŋ taa sagediibu naŋ e kpeɛŋaa ane nyaa bee? Ka hooŋ wa nyɛ bi-ma kaŋa naŋ taa biiri kyɛ ka o serɛ ba puoro Jehoova, kyɛ oŋ maŋ mɔɔ a de o biiri na waneŋ a lammore. Ho ba nyɛ ka a pɔge ŋa sereŋ wuleeŋ ka o taaɛ sagediibu ane sukyirikpagu bee? Te taaɛ baapaalba meŋ naŋ are a yelmeŋɛ poɔŋ kpeɛŋaakpeɛŋaa, aneazaa ka zɔmeŋ-faare naŋ be ba sakuuri pooreŋ maŋ bɛnlɛ baŋ ka ba erɛ yɛlɛ naŋ ba soma. Ho ba nyɛ ka ba meŋ taaɛ sagediibu naŋ e kpeɛŋaa bee? Ka teneeŋ maŋ teɛre yɛlɛ gaa tɔɔre, te na wa nyɛŋ ka, aneazaa ka te yɔɔmine ŋa eɛ bambaalba kyɛ ba eɛ noba naŋ “paale neŋ sagediibu,” aŋa ba taaba naŋ be te poɔŋ a ba tuoro ba yelkpeɛne na taa.—Gyi. 2:5.
w20.03 23 wɛl. 17-18
Bo Saŋa La Aŋ Maŋ Soma Ka Te Yeli Yɛlɛ?
Elaihu la a dɔbɔ banaare soba naŋ da wa puore Gyoob. O da eɛ Aboraham dɔgrɔ na kaŋa. O da mãã la o meŋɛ a kyɛllɛ yɛlɛ na Gyoob ane o zɔmenne bata na naŋ da yele na. O naŋ da mãã o meŋɛ a kyɛllɛ yɛlɛ na o taaba naŋ taa ka ba yeli na da somooŋ oŋ yi nimimaaroŋ poɔŋ a ko Gyoob kawane naŋ soma yaga zaa. A kawane da soŋɛɛ Gyoob oŋ leɛre o teɛroŋ. (Joob 33:1, 6, 17) Elaihu da boɔrɔŋ ka o de gyeremɛ korɔ Jehoova, o da ba boɔrɔ ka o de gyeremɛ korɔ o meŋɛ kyɛbee neŋyuo kaŋa. (Joob 32:21, 22; 37:23, 24) Elaihu ewuli soŋ ŋa vɛŋɛɛŋ teŋ baŋ ka, saŋa kaŋa, aseŋ ka te maŋ pɔge te nɔɛ a kyɛ kyɛllɛ wono yɛlɛ te taaba naŋ yele soŋ zaa. (Gyi. 1:19) O ewuli soŋ ŋa lɛ vɛŋɛɛŋ teŋ baŋ ka, ka teneeŋ wa ka te ko te taaba kawane, aseŋ ka te maŋ tere a kawane ka lɛ vɛŋ ka Jehoova nyɛ gyeremɛ. A ba seŋ ka te maŋ tere a kawane ka lɛ na vɛŋ ka tenee menne nyɛrɛ a gyeremɛ.
Ka teneeŋ maŋ de a Baabole kawane tonɔ neŋ toma saŋa na teŋ wa yele yɛlɛ, ane sori na teŋ maŋ tu kyɛ yele yɛlɛ, a na wuliŋ ka te de la kyɔɔtaa na Naaŋmen naŋ ko te ka te maŋ yele yɛlɛ na tegroŋ. Vooroŋ soŋ da soŋ la Naa Soolomoŋ oŋ sɛge ka: “Yelbiri ba naŋ yeli wagre naŋ seŋ neŋ poɔŋ waa ŋa salema apulihi ba naŋ maale eŋ ware pɛrɛtɛ poɔŋ.” (Yeng. 25:11) Ka teneeŋ maŋ mãã te menne a kyɛlle woŋ yɛlɛ te taaba naŋ yele soŋ zaa, a maŋ teɛre yɛlɛ gaa tɔɔre sɛre kyɛ yele yɛlɛ, te yelbie na waa ŋa salema apulihi. A na somaŋ yaga a kyɛ veɛlɛ meŋ. Ka teneeŋ ba yeli yɛlɛ yaga gba, kyɛ te yelyaga na eŋɛɛ te taaba faŋa. Jehoova meŋ poɔ na pɛle ne teŋ yaga zaa. (Yeng. 23:15; Efe. 4:29) Te na baŋ tu la a sori ŋa poɔŋ a kyɛ wuli Naaŋmen ka te niŋe paalɛɛ kyɔɔtaa na oŋ ko te ka te maŋ yele yɛlɛ na.
Baabole Poɔ Yelsonne
w13 1/15 19 wɛl. 10
Naŋ Tagra Peɛlɛ Jehoova
Lɛ neŋ o zu la, a ba e faa ka te maale te menne a veɛlɛ soŋ zaa. Kyɛ, a ba seŋ ka te maŋ mɔɔrɔ te mɔɔbo zaa ka te iri yɛlɛ zaa naŋ wuli ka te yuomo nyɛrɛɛ nimitɔɔre gaabo bare. Yɛlɛ naŋ wuli ka te yuomo nyɛrɛɛ nimitɔɔre gaabo na baŋ wuliŋ ka te eɛ noba naŋ kyile, a seŋ neŋ gyeremɛ, a veɛlɛ meŋ. Aŋa mannoo poɔŋ, a Baabole yeleeŋ ka: “Zukɔɔloŋ naŋ pɛle eɛ nazupili naŋ veɛlɛ yaga saŋa na hoŋ wa nyɛ o sontuubu sori poɔŋ.” (Yeng. 16:31) A teɛroŋ ŋa ka Jehoova taa kyaare te, aseŋ ka te meŋ taa a teɛroŋ ŋa kyaare te menne. (Kanne 1 Piita 3:3, 4.) Azuŋ, leɛteɛre a yɛlɛ ŋa nyɛ, a na somaŋ ka te gaa asibiti ka ba te wɛre te eŋgane zie kaŋa a maaloo ka o leɛ soma soŋ zaa, kyɛbee ka te vɛŋ ka ba ko te teenɛɛ teŋ na nyuuro ka lɛ vɛŋ ka te veɛlɛ yaga zaa bee? Lɛ zaa te yuomo naŋ nyɛ nimitɔɔre gaabo aseŋ, kyɛbee lɛ zaa te laafeeloŋ yɛlɛ naŋ waa, ka teneeŋ taa “Jehoova popeɛloŋ” na, a na vɛmeŋ ka te e noba naŋ sereŋ veɛlɛ yaga. (Niih. 8:10) A donpaalaa poɔŋ yoŋ la teŋ na taa laafeeloŋ naŋ paale, a kyɛ leɛ veɛlɛ aŋa te baapaaloŋ saŋa. (Joob 33:25; Aiz. 33:24) Kyɛ sɛre ka ana saŋa na ta, aseŋ ka te de yɛŋ tonɔ neŋ toma a kyɛ taa sagediibu naŋ e kpeɛŋaa. Lɛ na soŋ teŋ ka te naŋ tagra peɛlɛ Jehoova, a mɔɔrɔ te mɔɔbo zaa a yi yɛlɛ zaa poɔŋ te naŋ be.—1 Tim. 4:8.
JANUARY 8-14
BAABOLE POƆ YELNIMIZEERE | JOOB 34-35
Saŋa Na Zemmo Naŋ Wa E Kpeɛŋaa Yaga Zaa
wp19.1 8 wɛl. 2
Wala Ka Naaŋmen Waa?
Naaŋmen maŋ erɛɛ yɛlɛ naŋ tori wagre zaa. A Baabole yeleeŋ ka: “A yelmeŋɛ Naaŋmen daŋ koŋ baŋ e yelfaa zaa, a Kpeɛ̃o Zaa Daana koŋ toɔ̃ e yɛlɛ naŋ ba soma!” (Joob 34:10) Naaŋmen sɛrɛɛdiibu maŋ toriŋ. A yieloŋ yiele da yeleeŋ a kyaare Jehoova ka: “Ho na di la a noba sɛrɛɛ sori naŋ seŋ neŋ poɔŋ.” (Yieme 67:4) “Jehoova maŋ nyɛrɛɛ sukyiri poɔŋ,” azuŋ, neɛzaa kyebe a na baŋ de o bampuori-kombampoɔ yɛlɛ a de bɛnle neŋ Jehoova. Naaŋmen maŋ peɛrɛɛ yɛlɛ a te baŋ a yɛlɛ yelmeŋɛ zaa sɛre kyɛ dire o sɛrɛɛ. Azuŋ, o sɛrɛɛdiibu zaa maŋ toriŋ. (1 Saamiuel 16:7) Lɛ yoŋ naane, daŋkyagre yɛlɛ zaa noba naŋ erɛ, ane yelfaare zaa noba naŋ erɛ ka Jehoova nyɛrɛ. Naaŋmen eŋɛɛ noɔre ka, o na iree “neŋfaare . . . bare a teŋɛzuŋ.”—Yeng Yelibie 2:22.
w17.04 10 wɛl. 5
Bo Yɛlɛ Ka Naaŋmen Naaloŋ Na Na Iri Bare?
Bo yɛlɛ ka Jehoova na e? Pampana ŋa, Jehoova yuo la sori ko neŋfaare zaa ka ba leɛre ba eebo. (Aiz. 55:7) Jehoova naŋ ba de o sɛrɛɛdiibu baaraa soba waneŋ neŋfaare zuŋ. Kyɛ lɛ zaa naŋ la, Jehoova na sãã la a donfaa ŋa. Noba mine naŋ moɔ̃ la niŋe a erɛ yɛlɛ naŋ ba soma, boŋ na pɔge ba a dɔgroŋ kpoŋ saŋa? Jehoova eŋɛɛ noɔre ka o na iree neŋfaare zaa bare a teŋɛzuŋ kpɛlɛŋkpɛlɛŋ. (Kanne Yieme 37:10.) Aminekaŋaŋ, neŋfaare na baŋ teɛreŋ ka ba na toɔ̃ faa la ba menne yi a sɛrɛɛdiibu ŋa poɔŋ. Ba mine maŋ mɔɔŋ a de ba yelfaare na sɔgle. Saŋa kaŋa, a maŋ waa ŋa ba naŋ deɛ ba menne yi neŋ toɔrɔ naŋ seŋ ka a wa ba zuŋ na. (Joob 21:7, 9) Kyɛ, a Baabole yeleeŋ ka: “Naaŋmen nimie be la nensaalaa soe eŋɛŋ, O maŋ nyɛrɛɛ o gbɛ-deree zaa. Ligroŋ kyɛbee dasuoluŋ naŋ e ligroŋ yaga kyebe ka neŋfaare na baŋ de ba menne te sɔgle o poɔŋ.” (Joob 34:21, 22) Neɛzaa kyebe a na baŋ de yɛlɛ sɔgle Jehoova Naaŋmen. Daware daana meŋ zaa kyebe a na baŋ tu o daware yɛlɛ eŋɛŋ a bɛnle Jehoova. Ka neɛŋ be ligroŋ poɔŋ a tonɔ toŋfaare kyɛ Naaŋmen maŋ nyɛɛ o soba. Ka neɛŋ be zi-zuluŋ kaŋa naŋ e ligroŋ yaga zaa poɔŋ a tonɔ toŋfaare, kyɛ Naaŋmen na baŋ nyɛɛ yɛlɛ na oŋ erɛ na. Hammagedon puoreŋ, te na gaa la zie na neŋfaare naŋ be kyɛ te koŋ nyɛ ba. Ba zaa ka Jehoova na iri bare kpɛlɛŋkpɛlɛŋ.—Yiem. 37:12-15.
w21.05 7 wɛl. 19-20
Ka Lɛ Yezu Na Vɛmeŋ Ka Ho Ŋmɛ Gbɛre Bee?
A yɛlɛ ŋa taa pɔgrɛɛ noba zenɛ ŋa bee? Ɛɛ. Zenɛ ŋa, teŋ ba maŋ derɛ te menne eŋnɛ a donɛɛ politics yɛlɛ poɔŋ na zuŋ, a maŋ vɛmeŋ ka noba mine taa teɛroŋ naŋ ba soma a kyaare te. Ba maŋ kaarɛɛ soriŋ ka, ka vooteŋ saŋaŋ wa ta, aseŋ ka te meŋ gaa te voote. Kyɛ, teneeŋ yɛŋ baŋɛɛŋ ka Jehoova nimitɔɔreŋ, ka teneeŋ kaa iri nensaalaa ka o e te naa, lɛ wuleeŋ ka te zagrɛɛ Jehoova bare. (1 Saa. 8:4-7) Noba mine meŋ maŋ teɛreŋ ka aseŋ ka te mɛ sakue ane asibitiri, a lɛ de boma tɔrɔ korɔ noba zaala zaala. Kyɛ ka ba naŋ wa nyɛ ka te ba erɛ a yɛlɛ ama kaŋa zaa, a kyɛ de te teɛroŋ zaa eŋ a naaŋ moɔloo toma poɔŋ, a maŋ vɛmeŋ baŋ taa teɛroŋ naŋ ba soma a kyaare te.
Wala teŋ na baŋ e ka a yɛlɛ ŋa taa ta wa pɔgrɔ te? (Kanne Matio 7:21-23.) Aseŋ ka te mɔɔrɔ te mɔɔbo zaa a tonɔ toma na Yezu naŋ de eŋ te nuureŋ na. (Mat. 28:19, 20) A ba seŋ ka te vɛŋ ka a donɛɛ politics yɛlɛ ane ba zeŋ laafeɛ yɛlɛ tage te teɛroŋ yi toma na aŋ seŋ ka te tonɔ na eŋɛŋ. Te nɔnɛɛ noba, a maŋ boɔrɔ ka te sonnɔ ba saŋa na baŋ wa be awonnaa poɔŋ. Kyɛ te baŋɛɛŋ ka sori naŋ soma yaga zaa teŋ na baŋ tu a soŋ ba la, teŋ na wulo ba Naaŋmen Naaloŋ na yɛlɛ, a kyɛ lɛ soŋ ba ka ba neŋ Jehoova taa niiloŋ naŋ e kpeɛŋaa.
Baabole Poɔ Yelsonne
w17.04 29 wɛl. 3
Ho Meŋɛ Deterebo Gyogo Na Maŋ De La Pugibu Korɔ Jehoova
Elaihu da soorɛɛŋ ka: “Ka hooŋ e sontuuro, boŋ hoŋ na de ko [Naaŋmen]; boŋ oŋ na nyɛ yi ho zieŋ?” (Joob 35:7) A Baabole zie zaa ba wuli ka Jehoova da yelee Elaihu nimiri yɛlɛ koo saŋa na oŋ da soore a soorebie ŋa. Elaihu da boɔrɔŋ ka o wuli ka mɔɔbo na zaa teŋ mɔɔrɔ Jehoova puoruu poɔŋ na ba taa tɔnɔ zaa bee? Ai. O da boɔrɔŋ ka o wuli ka, ka teneeŋ puoro Jehoova kyɛbee ka teneeŋ zagre ka te puoroo, kyɛ Jehoova naŋ eɛ Naaŋmen. Jehoova paalɛɛŋ sori zaa poɔŋ. Te koŋ baŋ vɛŋ ka o e bondaana, kyɛbee a vɛŋ ka o maaleŋ taa kpeɛ̃o yaga. Kyɛ, aseŋ ka te baŋ ka, bonsoŋ, yelbaŋ, ane faŋa zaa te na taa eɛ kyɔɔtaa naŋ yi Naaŋmen zie. Naaŋmen boɔrɔŋ ka te de a boma ŋa tonɔ neŋ toma soŋ.
JANUARY 15-21
BAABOLE POƆ YELNIMIZEERE | JOOB 36-37
Bon Nanso Hoŋ Na Baŋ Sagedi Peɛlaaŋ Ka Naaŋmen Na Ko Teŋ Nyɔvore Naŋ Ba Taa Baaraa
w15 10/1 13 wɛl. 1-2
Te Sereŋ Na Toɔ̃ Baŋɛɛ Naaŋmen?
NAAŊMEN EƐ NEƐ NAŊ BEBE TEGITEGILƐ: A Baabole yeleeŋ ka, Naaŋmen bebeŋ “a yi wagre naŋ ba taa baaroo a gɛrɛ wagre naŋ ba taa baaroo.” (Yieme 90:2) Lɛ wuleeŋ ka, Naaŋmen ba taa piilee, o daaŋ koŋ taa baaraa meŋ zaa. Nensaaleba koŋ toɔ̃ de ba teɛroŋ ‘baŋ yuomo na Naaŋmen naŋ di na pare zaa te baare.’—Joob 36:26.
Maaloo hoŋ na baŋ nyɛ: Naaŋmen eŋɛɛ noɔre ka, ka teneeŋ bamoo soŋ, o na ko teŋ nyɔvore naŋ ba taa baaraa. (Gyn. 17:3) Teɛre a yɛlɛ ŋa soŋ a nyɛ: Ka Naaŋmen meŋɛŋ ba taa nyɔvore naŋ ba taa baaraa, o na toɔ̃ ko teŋ nyɔvore naŋ ba taa baaraa bee? Te na baŋ dɛlɛɛ noɔre na oŋ eŋ na bee? “A Naa naŋ bebe tegitegilɛ” yoŋ la na toɔ̃ vɛŋ ka a yɛlɛ ŋa nyɛ eebo.—1 Timoti 1:17.
w20.05 22 wɛl 6
Wulo Nimipa A Korɔ Kyɔɔtaare Na Naaŋmen Naŋ Ko Te Na
Koɔ̃. Lɛ na a teŋgane naŋ e tɔɔre neŋ ŋmenaa na la vɛŋ ka koɔ̃ toɔ̃ bebe. Ka a donɛɛ da tage peɛle a ŋmenaa fẽẽ lɛ, a koɔ̃ zaaŋ da naŋ kpa a nyunne, ka lɛ vɛŋ ka a teŋgane waa ŋa pi-kpɔgree naŋ tuli yaga zaa a gaŋ. Ka a teŋganeŋ da sɛre gaa puore fẽẽ lɛ a yi a ŋmenaa zieŋ, a koɔ̃ zaa na leɛ la blɔk, ka lɛ vɛŋ ka a teŋgane leɛ blɔk. Kyɛ zie na Jehoova naŋ maale a teŋgane biŋ na la vɛŋ ka koɔ̃ maŋ toɔ̃ leɛ uluŋ a do sazu te leɛ saa a mi ko nensaaleba. A yɛlɛ ŋa eɛ yel na kaŋa naŋ vɛŋ ka nyɔvore be a teŋgane zuŋ. Ka ŋmenaaŋ wa yuo yaga zaa eŋ a mama, a koɔ̃ naŋ be a mama poɔŋ na maŋ tuliŋ a leɛ uluŋ a do sazu a te leɛ zuŋzugri. Yuoni zaa, ŋmenaa tuluŋ maŋ vɛmeŋ ka koɔ̃ naŋ ta ŋa 120,000 cubic miles (kyɛbee 500,000 cu km) leɛ uluŋ do sazu. A koɔ̃ maŋ be la a saluoni poɔŋ aŋa bebie pie sɛre kyɛ leɛ mi aŋa saa bee sinoo a ko nensaaleba. A saa koɔ̃ maŋ lɛ zoŋ te kpɛ a mama poore kyɛbee koɔ̃ne mine meŋ pooreŋ. Ka ŋmenaa lɛ yuo eŋ a koɔ̃, a maŋ lɛ do la sazu te leɛ zuŋzugri a lɛ mi aŋa saa. Lɛ na Jehoova naŋ sɛgre a yɛlɛ ŋa aŋ kyɛnɛ soŋ zaa na vɛŋɛɛŋ teŋ baŋ ka o eɛ neɛ naŋ taa yɛŋ neŋ kpeɛ̃o.—Joob 36:27, 28; Ikil. 1:7.
w22.10 28 wɛl. 16
Vɛŋ Ka Ho Kristaaloŋ Teɛretɔ Na Maaleŋ E Kpeɛŋaa
A nyɔvore naŋ ba taa baaroo teɛretɔ na eɛ kyɔɔtaa naŋ e tegroŋ yaga zaa a yi Naaŋmen zie. Te zaa taaɛ teɛretɔ ka nendaare kaŋa naŋ soma yaga gaŋ la te nimitɔɔreŋ waana. Te baŋɛɛŋ peɛlaaŋ ka a na nyɛ la eebo. A teɛretɔ ŋa waa ŋa bon naŋ nyɔge te taa, a maŋ soŋ te teŋ toɔ̃ are pigrinyɛ ane dɔgroŋ noɔreŋ, a toɔ̃ tuore kũũ yɛlɛ meŋ neŋ nyaa. Te teɛretɔ na lɛ waa ŋa kpogli, o maŋ go la te teɛroŋ, a soŋ te teŋ zagre yelfaare bare a kyɛ kpimare yɛlɛ naŋ soma. Teɛretɔ na a Baabole naŋ korɔ te na maŋ soŋ teŋ teŋ toɔ̃ tage peɛle Naaŋmen. A lɛ wuleeŋ meŋ ka Naaŋmen taaɛ nɔmmo naŋ e zuluŋ yaga ko te. Ka teneeŋ vɛŋ ka teɛretɔ na teŋ taa na maaleŋ e kpeɛŋaa, te na nyɛɛ maaloo yaga.
Baabole Poɔ Yelsonne
it-1 492
Duoro Moɔloo
Takoreŋ saŋa na, ba da maŋ tu la soe yaga a kyɛ moɔle duoro ko noba. Gbɛɛ yaga, ba da maŋ toŋɛɛ noba baŋ de duoro kyɛbee duorisaamma te moɔle ko noba. (2Sa 3:17, 19; Jb 37:20) Noba naŋ tuuro sori ane noba naŋ maŋ tu sori te koɔre boma maŋ de la duoro gaaneŋ zitɔba a te moɔle ko noba. Ka ba naŋ wa ta teŋbɛrɛ mine a are ka ba di bondirii, kyɛbee a nyu koɔ̃ bee a da bontaree mine, ba maŋ moɔlɛɛ a duoro ko ana teŋɛ na noba. Ka ba naŋ ta ziiri mine sokyɛneba naŋ bebe yaga, ba da maŋ moɔlɛɛ a duoro ko ba meŋ. Zie na a Palisitaŋ teŋɛ naŋ da be na da somaŋ yaga, be da peɛlɛɛ Asia, Africa, ane Europe. Azuŋ, sokyɛneba yaga da maŋ tuuree be ka ba te koɔre boma, ba mine da maŋ yi la be a gaa zitɔba a na te koɔre boma. Lɛ zuŋ a da maŋ eɛ mɔlɔ ko noba naŋ be a Palisitaŋ teŋɛ na ka ba kyɛlle woŋ duoro naŋ yire paalonne mine pooreŋ. Ka neɛŋ gaa a teŋkpɛŋ daa, a da maŋ eɛ mɔlɔ ka o woŋ o teŋɛ na duoro ane duorisaamma naŋ yire paaloŋ yobo mine meŋ.
JANUARY 22-28
BAABOLE POƆ YELNIMIZEERE | JOOB 38-39
Ho Maŋ Bɔ La Wagre A Kaara Naaŋmen Bonmaalee Soŋ Zaa Bee?
w21.08 9 wɛl. 7
Ho Eɛ Siri Ka Ho Kyɛnlɛ Jehoova?
Saŋa na a Baabole naŋ wa wulo sori na Jehoova naŋ tu kyɛ maale a teŋgane na, a Baabole yeleeŋ ka Naaŋmen da ‘mannɛɛ o binziiri,’ a “biŋ o pare,” ane “o pare kuurii.” (Joob 38:5, 6) Jehoova da bɔ la wagre a leɛ kaa boma na zaa oŋ maale na soŋ zaa. (Mun. 1:10, 12) Ŋmaa foto ho teɛroŋ poɔŋ a nyɛ lɛ Jehoova malekere na poore naŋ da pɛle seŋ saŋa na baŋ da nyɛ Jehoova naŋ maala boma fẽẽfẽẽ fẽẽfẽẽ na. A wa ta la saŋa kaŋa ka a malekere zaa da piili “ŋmeɛrɛ ba nuure.” (Joob 38:7) Bo yɛlɛ teŋ na baŋ zanne yi a yɛlɛ ama poɔŋ? Jehoova de la yuomo turituri yaga a de maale neŋ boma zaa. Saŋa na Jehoova naŋ wa maale a boma baare na, o da mãã la o meŋɛ a leɛ kaa boma na zaa oŋ maale na a yelka a “somaŋ yaga zaa.”—Mun. 1:31.
w20.08 14 wɛl. 2
A Kũũ Leɛ Iruu Wulee Naaŋmen Nɔmmo, Yɛŋ Ane Kannyiri
A dɛndɛŋ soba, Jehoova da maalɛɛ neɛ kaŋa naŋ wa e o tontoŋtɔ. O Bidɔɔ dɛndɛŋ zie la ka o tu “kyɛ maale boma zaa.” O da lɛ tu la o zie kyɛ maale malekere turituri meŋ. (Kol. 1:16) Yezu poɔ zaaŋ da pɛle neŋ apoɔsori na oŋ da nyɛ ka o neŋ o Saa laŋ toŋ toma na. (Yeng. 8:30) A malekere meŋ zaa da taaɛ popɛle Naaŋmen bonmaalee eŋɛŋ. Ba zaaŋ da bebe a de ba nimie nyɛ lɛ na Jehoova neŋ o Tontoŋ Neŋkpoŋ Yezu naŋ da maala a sazu neŋ a teŋgane. Wala ka a malekere da e ba yɛlɛ? Ba da “piili ŋmeɛrɛ ba nuure” saŋa na baŋ wa nyɛ a teŋgane na. Saŋa na zaa Jehoova naŋ wa maale bonkaŋa baare, a malekere da maŋ ŋmeɛrɛɛ ba nuure. A baaraa zaa, saŋa na a malekere naŋ wa nyɛ nensaaleba na Jehoova naŋ maale na, ba da de la popeɛloŋ naŋ e kpoŋ a ŋmeɛrɛ ba nuure. (Joob 38:7; Yeng. 8:31) A boma ŋa zaa Jehoova naŋ maale na wulee o nɔmmo ane o yɛŋ.—Yiem. 104:24; Uro. 1:20.
Ka Hooŋ Kaara Jehoova Bonmaalee Ho Na Baŋ Zannɛɛ Yɛlɛ Yaga A Kyaaroo
Aseŋ ka te dɛle Jehoova. Jehoova da soŋɛɛ Gyoob oŋ maaleŋ dɛle O yaga zaa. (Joob 32:2; 40:6-8) Gyoob ane Naaŋmen dama diibu na poɔŋ, Naaŋmen da yelee O bonmaalee na mine yɛlɛ yaga zaa a koo. A mine la ŋmarbie, saluoni, ane saa nyegroo yɛlɛ. Jehoova da yelee dunni meŋ yɛlɛ aŋa mɔnaabo ane wiri. (Joob 38:32-35; 39:9, 19, 20) A yɛlɛ ŋa zaa ba wulo Naaŋmen faŋa yoŋ, a maŋ lɛ wulee o nɔmmo ane lɛ o naŋ taa yɛŋ seŋ. Gyoob ane Naaŋmen dama diibu na da somooŋ oŋ maaleŋ dɛle Naaŋmen yaga zaa. (Joob 42:1-6) Azuŋ ka teneeŋ meŋ zanne Naaŋmen bonmaalee yɛlɛ, a na baŋ soŋ teŋ ka te wa nyɛ ka, Jehoova taa la yɛŋ ane faŋa yaga zaa a gaŋ te. A kyɛ la wa nyɛ ka, o na baŋ vɛmeŋ ka te yelwonii zaa baare, o na eɛ lɛ meŋ. Ana yɛlɛ ŋa zaa na baŋ soŋ teŋ ka te maaleŋ dɛle Jehoova yaga zaa.
Baabole Poɔ Yelsonne
it-2 222
Beg-terɛ
Jehoova la a Beg-terɛ. Jehoova la Neɛ naŋ seŋ ka o korɔ te bege a aŋdonɛɛ zaa poɔŋ. Jehoova maalɛɛ boma mine naŋ ba voorɔ, a biŋ bege ko a boma ŋa aŋ tuuraa soŋ zaa. (Jb 38:4-38; Ym 104:5-19) Dunni meŋ taaɛ bege a naŋ tuuro. (Jb 39:1-30) Jehoova la maale nensaalaa meŋ, azuŋ aseŋ ka nensaaleba tuuro bege na o naŋ biŋ na. Nensaaleba na toɔ̃ taa la gyog-soŋ, a taa yɛŋ naŋ e zuluŋ, a teɛre yɛlɛ gaa tɔɔre, a kyɛ erɛ yɛlɛ naŋ na toɔ̃ vɛŋ ka ba neŋ Naaŋmen niiloŋ e kpeɛŋaa. Azuŋ a fɛrɛɛŋ ka nensaaleba tuuro bege na Jehoova naŋ biŋ a kyaare gyog-soŋ na. (Ur 12:1; 1Ko 2:14-16) Kyɛ lɛ yoŋ naane, a fɛrɛɛŋ ka a malekere meŋ tuuro bege na Jehoova naŋ biŋ na.—Ym 103:20; 2Pi 2:4, 11.
Neɛzaa kyebe a na baŋ sãã bege na Jehoova naŋ biŋ a kyɛ koŋ nyɛ toɔrɔ. (Jr 33:20, 21) A yi aŋdonɛɛ zaa poɔŋ, bege na Jehoova naŋ biŋ ko o bonmaalee naŋ ba vooroŋ na maŋ tonɛɛ toma wagre zaa, a kyɛ be dɛlebo meŋ. Science noba naŋ baŋ a bege ŋa zuŋ na, ba na toɔ̃ wulee zie na kyuu, planets ane ziiri ŋmarbie mine naŋ seŋ ka a be, ka a tori soŋ zaa. Ka neɛŋ e tokpeɛne a zagre ka o de bege na Jehoova naŋ biŋ ko a boma ŋa na tonɔ neŋ toma, o soba maŋ tuoree toɔrɔ tɔntɔbaalɛ. Lɛ neŋ o zu la, aseŋ ka te tuoro bege na Jehoova naŋ biŋ a kyaare gyog-soŋ na. Ka neɛŋ baŋ perɛ kyɛ sãã a bege ŋa kpirelee, o soba na tuoree toɔrɔ yaga. Ka a toɔrɔŋ ba wa o soba zuŋ tɔntɔbaalɛ, kyɛ a baaraa zaa o soba na nyɛɛ a toɔrɔ. A Baabole yeleeŋ ka, “Naaŋmen ba e neɛ baŋ na toɔ̃ e la. Bon na zaa ho naŋ bore, ona hoŋ na kyɛ.”—Ga 6:7; 1Ti 5:24.
JANUARY 29–FEBRUARY 4
BAABOLE POƆ YELNIMIZEERE | JOOB 40-42
Yɛlɛ Teŋ Na Baŋ Zanne Yi Gyoob Yɛlɛ Na Poɔŋ
w10 10/15 3-4 wɛl. 4-6
“Nembuoŋ Baŋ Jehoova Teɛroŋ?”
Ka teneeŋ wa teɛrɛ Jehoova toma yɛlɛ gɛrɛ tɔɔre, aseŋ ka te kaara soŋ a ta maŋ de te teɛroŋ ane te menne bege a dire neŋ Naaŋmen sɛrɛɛ. Yɛlɛ naŋ be Yieme 50:21 na wulee a yɛlɛ ŋa. Be yelka: “Ho da teɛrɛɛŋ ka N na waa ŋa lɛ na hoŋ waa na.” Yuomo 175 naŋ pare, dɔɔ kaŋa naŋ baŋ a Baabole yaga zaa da yeleeŋ ka: “Nensaaleba maŋ teɛreŋ ka a eɛ yelsoŋ ka ba dire Naaŋmen sɛrɛɛ, ka nensaalebaŋ wa tuuro bege mine a teɛre ka a bege somaŋ, a maŋ vɛmeŋ baŋ teɛre ka a eɛ ferebo ka Naaŋmen meŋ tuuro ana bege na.”
Aseŋ ka te kaara soŋ a ta wa derɛ te menne teɛroŋ ane te poteɛrɛ a dire neŋ Jehoova sɛrɛɛ. Bonso ka a yɛlɛ ŋa e nimizeɛ yaga zaa? Tɔɔ, saŋa na teŋ zanna a Baabole na, te na baŋ wa nyɛɛ yɛlɛ mine Jehoova naŋ e aŋ ba tori te nimitɔɔreŋ. Aseŋ ka te baŋ ka, te naŋ e noba naŋ ba pɛgeyi na zuŋ, te koŋ toɔ̃ baŋ yɛlɛ mine pare zaa te baare. A yɛlɛ ŋa taa da pɔgɛɛ a takoreŋ saŋa Izerayɛl biiri na, ka lɛ vɛŋ baŋ da taa teɛroŋ naŋ ba soma a kyaare Jehoova. Nyɛ yɛlɛ Jehoova naŋ da yelko ba: “Yɛ na yeliŋ ka: ‘Jehoova sori la a ba tori.’ Oo Izerayɛl noba, yɛ kyɛlle woŋ N yɛlɛ ŋa! Maaŋ sori la a ba tori bee? Kyɛ yɛnee yɛŋ sori naane ba tori bee?”—Izik. 18:25.
Bo yɛlɛŋ na toɔ̃ soŋ te ka te ta wa derɛ te menne teɛroŋ dire neŋ Jehoova sɛrɛɛ? Aseŋ ka te baŋ ka, teɛroŋ na teŋ maŋ taa ba maŋ tori te baare, saŋa mine, a teɛroŋ ba maŋ soma fẽẽ zaa gba. A da fɛrɛɛŋ ka Gyoob zanne a yelnimizeɛ ŋa. Saŋa na Gyoob naŋ wa dire dɔgɛɛ na, o eŋɛ zaaŋ da kyoɔre, azuŋ o da de la o teɛroŋ zaa eŋ o meŋɛ eŋɛŋ. O da ba lɛ de o teɛroŋ eŋ yɛlɛ naŋ e nimizeɛ eŋɛŋ. Jehoova da yi la nɔmmo poɔŋ a kyɛ soŋ Gyoob oŋ leɛ de o teɛroŋ eŋ yɛlɛ naŋ e nimizeɛ eŋɛŋ. Jehoova da soorɛɛ Gyoob soorebie naŋ ta 70, kyɛ Gyoob da ba toɔ̃ iri kaŋa zaa noɔre. Lɛ na Jehoova naŋ da e na da vɛŋɛɛŋ ka Gyoob wa nyɛ ka o ba baŋ yelzaa pare te baare. Gyoob da yi la sigrimennoŋ poɔŋ a leɛre o teɛroŋ.—Kanne Joob 42:1-6.
w17.06 25 wɛl. 12
De Ho Teɛroŋ Zaa Eŋ A Yelnimizeɛ Eŋɛŋ
Gyoob da di la dɔgɛɛ yaga, azuŋ sori na Jehoova naŋ da tu kyɛ koo kawane na da somaŋ bee? Ɛɛ, a da somaŋ. Gyoob meŋɛ da ba teɛre ka a ba soma. Aneazaa ka Gyoob da di la dɔgɛɛ yaga, kyɛ o da lɛ piili yelee yɛlɛ naŋ wuli ka o taaɛ nimipa ko Jehoova. Gyoob gba da yeleeŋ ka: “N ba lɛ yeli yɛlɛ na zaa maŋ da yeli na, N leɛrɛɛ N eebo tane neŋ tampɛloŋ poɔŋ.” A kawane na Jehoova naŋ da yi nɔmmo poɔŋ a de ko Gyoob na da ko oŋ pɛnnoo a kyɛ tɔ o sukyiri meŋ. (Joob 42:1-6) Sɛre ka a yɛlɛ ŋa na e na, Elaihu naŋ da e baapaalaa da ko la Gyoob kawane naŋ somoo oŋ toɔ̃ leɛre o teɛroŋ. (Joob 32:5-10) Saŋa na Gyoob naŋ wa de Jehoova kawane toŋ neŋ toma a leɛre o teɛroŋ na, Jehoova da vɛŋɛɛŋ aŋ pɛle ko neɛzaa ka o poɔ pɛle neŋ la lɛ na Gyoob naŋ di yelmennoŋ saŋa na oŋ da tuoro yelkpeɛne na.—Joob 42:7, 8.
w22.06 25 wɛl. 17-18
“De Ho Teɛretɔ Zaa Eŋ Jehoova Eŋɛŋ”
Gyoob eɛ Jehoova puorebie na kaŋa naŋ da tare nyaa a kyɛ are kpeɛŋaa saŋa na oŋ da tuoro yelkpeɛne yaga zaa. A yi gane na bitontona Pɔɔl naŋ da sɛge te ko a Hiburu Kristabiiri na poɔŋ, o da mannɛɛ noba yaga naŋ da e a yɛlɛ ŋa neŋ a zu. O da yelka ba eɛ “nembeɛoŋ . . . naŋ e sieree deme.” (Hib. 12:1) A noba ŋa zaa da tuoree yelkpeɛne yaga, kyɛ ba da naŋ diree yelmennoŋ korɔ Jehoova. (Hib. 11:36-40) Ba kannyiri diibu neŋ ba tonkpeɛne na da eɛ zaala bee? Ai. Aneazaa ka ba da ba de ba nimie nyɛ Jehoova nɔ-ennee naŋ nyɛrɛ eebo ba nyɔvore zemmo poɔŋ, kyɛ ba da naŋ kyɛnɛ taaɛ teɛretɔ Jehoova eŋɛŋ. Baŋ da baŋ peɛlaaŋ ka ba taaɛ Jehoova maaloo zuŋ na, a da vɛŋɛɛŋ baŋ taa sagediibu ka Jehoova na paalɛɛ o nɔ-ennee zaa. (Hib. 11:4, 5) Ba ewuli soŋ ŋa na toɔ̃ soŋ teŋ ka te meŋ naŋ kyɛnɛ taa teɛretɔ Jehoova eŋɛŋ.
Zenɛ ŋa, te be la donɛɛ kaŋa poɔŋ yɛlɛ naŋ maaleŋ sããna yaga zaa. (2 Tim. 3:13) Setaana naŋ mɔɔrɛɛ o mɔɔbo zaa a derɛ pigrinyɛ waana neŋ Naaŋmen puorebiiri eŋɛŋ. Kyɛ, yelkpeɛne zaa teŋ na tuore, te zaa nare te menne ka te naŋ na diree yelmennoŋ korɔ Jehoova. A ba seŋ ka te zoro dabeɛ̃ bonso, “te de la te teɛretɔ eŋ a Naaŋmen vore eŋɛŋ.” (1 Tim. 4:10) Teɛre ka, maaloo na Naaŋmen naŋ ko Gyoob na wuleeŋ ka “Jehoova eɛ neɛ naŋ taa nimibaaloŋ ane nembaalonzoe yaga zaa.” (Gyi. 5:11) Yɛ vɛŋ ka te meŋ naŋ kyɛnɛ dire yelmennoŋ korɔ Jehoova, ka teneeŋ erɛ lɛ, te na baŋ taaɛ sagediibu ka o na ko la “noba na zaa naŋ moɔ̃ niŋe a boɔroo na saŋyɔɔ.”—Kanne Hiburu 11:6.
Baabole Poɔ Yelsonne
it-2 808
Seɛ
Aneazaa ka noba da erɛɛ Gyoob laara, kyɛ o da eɛ dɔɔ sontuuro naŋ nyɔge o yelmennoŋ kpeɛŋaa. A da wa ta la saŋa kaŋa ka Gyoob da ba lɛ taa teɛroŋ naŋ soma, azuŋ o da ŋmɛɛ gbɛre. Ba da ko oŋ kawane o gbɛ ŋmɛ na poɔŋ. Elaihu da yelko la Gyoob ka: “Dɔɔ buoŋ bebe a waa ŋa Gyoob, a maŋ de seɛ ba naŋ eroo aŋa koɔ̃ a nyuuro?” (Jb 34:7) Gyoob da de la o teɛroŋ zaa eŋ o meŋɛ dantorii a gaŋ Naaŋmen dantorii eŋɛŋ. O da lɛ de la o teɛroŋ eŋ o meŋɛ sontuubu a gaŋ Naaŋmen sontuubu eŋɛŋ. (Jb 35:2; 36:24) Saŋa na Gyoob “zɔmenne” bata naŋ da eroo laara na, o da teɛre ka ona la baŋ erɛ laara, kyɛ o da ba nyɛ ka Naaŋmen la baŋ erɛ laara. Lɛ na Gyoob naŋ da e na da waa ŋa neɛ naŋ de o meŋɛ tere, ka noba taa kaabanyɛ ne o a kyɛ eroo laara. A lɛ eebo meŋ da wuleeŋ ka o poɔ pɛle neŋ la lɛ, aŋa neɛ naŋ nyuuro koɔ̃ neŋ popeɛloŋ. A baaraa zaa, Naaŋmen da vɛŋɛɛŋ ka Gyoob baŋ ka o naane ka a noba da erɛ laara, kyɛ ona Naaŋmen la ka a noba da erɛ laara. (Jb 42:7) Lɛ neŋ o zu la, saŋa na a Izerayɛl biiri naŋ da yelka ba boɔrɛɛ naa na, Jehoova da yelko la daŋyele Saamiuel ka: “Hooŋ naane baŋ zagre, kyɛ mãã la baŋ zagre ka N e ba naa.” (1Sa 8:7) Yezu da yelko la o potuuribo na ka: “Noba na de yɛŋ tere ka ba dɔgre yɛ a kyɛ ko yɛ, N yuori zuŋ a paalonne noba zaa na kyiiri yɛŋ.” (Mt 24:9) Ka Kristabieŋ vɛŋ ka a yɛlɛ ŋa be o teɛroŋ poɔŋ, a na somooŋ ka o dire kannyiri saŋa na noba naŋ wa eroo laara. O kannyiri diibu na na vɛmeŋ ka o nyɛ kyɔɔta-kpoŋ.—Lk 6:22, 23.
FEBRUARY 5-11
BAABOLE POƆ YELNIMIZEERE | YIEME 1-4
Are Naaŋmen Naaloŋ Na Puoreŋ
w21.09 15 wɛl. 8
“N Na Gbigree A Paalonne Zaa”
Wala ka noba maŋ e ba yɛlɛ a kyaare duoro na teŋ moɔlɔ na? Ba kpɛŋ zie ba maŋ de poteɛre soŋ sage a duorisoŋ. (Kanne Yieme 2:1-3.) A paalonne noba suuri ireeŋ. Ba zagrɛɛŋ ka ba sigri ba menne ko neɛ na Jehoova naŋ kaa iri ka o e Naa na. Ba ba teɛre ka a Naaloŋ duoro teŋ moɔlɔ na eɛ “duorisoŋ.” A gɔmenantere mine gba de la ba nuure dɔgle a naaŋ moɔloo toma zuŋ. Aneazaa ka a paalonne ŋa kpɛŋ zie zaa namine yeleeŋ ka ba puoree Naaŋmen, kyɛ ba ba boɔrɔ ka ba bare ba kpeɛ̃o na, a kyɛ sigri ba menne eŋ Naaŋmen kpeɛ̃o na puliŋ. Aŋa lɛ na a namine naŋ da erɛ Yezu saŋa na, namine naŋ bebe zenɛ na maŋ iri zɔɔrɔ neŋ la Neɛ na Jehoova naŋ sɔ naaloŋ kãã na. Sobuoŋ? Ba maŋ eɛ lɛ saŋa na baŋ wa iri zɔɔrɔ neŋ noba naŋ are a Naaloŋ puoreŋ na.—Toma 4:25-28.
w16.04 29 wɛl. 11
Tage Ho Meŋɛ Yi A Donɛɛ Ŋa Naŋ Paale Neŋ Wɛltaa Na Yeltaree Poɔŋ
Bondaaŋ boma boɔbo. Ka teneeŋ kpimare te bontaree, a na baŋ eɛ kpeɛŋaa ko te ka te tage te menne yi a donɛɛ ŋa yeltaree poɔŋ, saŋa na teŋ wa tuoro pigrinyɛ. Te yɔɔpɔge Ruth naŋ be Malawi paaloŋ da nyɛɛ Jehoova Sieree Deme mine naŋ da e a yɛlɛ ŋa, saŋa na baŋ da dɔgrɔ ba yuoni 1970 poɔŋ na. O yeleeŋ ka: “A da eɛ kpeɛŋaa ko te yɔɔmine ŋa ka ba bare zeŋ laafeɛ na baŋ taa na. Ba da nyɔgɛɛ ba mine a gaaneŋ paaloŋ yuo kaŋa, kyɛ a puoreŋ ba da leɛ waɛŋ a wa de ba menne eŋ a politics yɛlɛ poɔŋ. Ba da vɛŋɛɛŋ baŋ leɛ gaa ba yie poore, bonso a da eɛ kpeɛŋaa ko ba ka ba bare zeŋ laafeɛ na baŋ taa a kyɛ te kpeɛrɛ kampu kaŋa poɔŋ.” Aneazaa ka Naaŋmen puorebiiri yaga zie zaa libi-yɛlɛ ba taa nimiri, ka ba mine maŋ toɔ̃ kɔŋ ba bontaree zaa, kyɛ ba naŋ moɔ̃ la niŋe a tagra ba menne yire a donɛɛ ŋa nadi yɛlɛ poɔŋ.—Hib. 10:34.
Baabole Poɔ Yelsonne
it-1 425
Bonpɛgre
Bonpɛgre eɛ boma aŋ maŋ pɔge wiit, kyi ane mui. Saŋa kaŋa a Baabole maŋ de la bonpɛgre are ko yɛlɛ mine. Kyɛ, a yɛlɛ ŋa lɛ vɛŋɛɛŋ teŋ baŋ sori na baŋ da maŋ tu kyɛ yeɛle boma takoreŋ saŋa na. Ka ba naŋ wa de a weɛ boma a iri a bonbie yi a bonpɛgre poɔŋ, a bonpɛgre da ba maŋ lɛ taa tɔnɔ zaa. Azuŋ, ba maŋ de la bonpɛgre are ko bon naŋ ba taa tegroŋ zaa, kyɛbee a ba taa tɔnɔ zaa, a e boma noba naŋ ba boɔrɔ. A na baŋ lɛ are ko la boma aŋ seŋ ka ba wɛle yi bonsonne eŋɛŋ a de lɔɔ bare.
A dɛndɛŋ soba, ba da maŋ vaɛ a boma, a iri a bonpɛgre yi a bonbie eŋɛŋ. A lɛ puoreŋ ba da maŋ yeɛlɛɛ a boma, ka saseɛ de a bonpɛgre gaa kyɛ bare a bonbie. (Kanne BOMA YEƐLOO.) A yelmannaa ŋa wulee sori na Jehoova Naaŋmen naŋ maŋ tu kyɛ iri nɔzagreba yi o puorebiiri poɔŋ, kyɛbee a iri neŋfaare, bee paalonne naŋ iri zɔɔrɔ ne o bare. (Jb 21:18; Ym 1:4; 35:5; Ai 17:13; 29:5; 41:15; Ho 13:3) Naaŋmen Naaloŋ na na sãã la o dɔndɔnne zaa, a ŋmore ba puropuro, ka lɛ vɛŋ ka a e mɔlɔ ka saseɛ de ba gaa aŋa bonpɛgre.—Da 2:35
Gbɛɛ yaga, ka ba naŋ wa iri a bonpɛgre a lagraa lantaa, ba da maŋ nyegaaŋ. Lɛ maŋ vɛmeŋ ka saseɛ ta lɛ de a bonpɛgre wa eŋ a bonbie na baŋ yeɛle na poɔŋ. Lɛ neŋ o zu la, Gyɔɔn naŋ da korɔ noba suobu da wulee saammo naŋ waana a zirii ŋmenpuore wedeɛreba na zuŋ. Yezu Krista la a Kayeɛlɛ, o na de la o wiit na te eŋ o bugo poɔŋ, ‘kyɛ nyege a bonpɛgre neŋ vũũ naŋ daŋ koŋ baŋ kpinni poɔŋ.’—Mt 3:7-12; Lk 3:17; kanne BOMA VAABO.
FEBRUARY 12-18
BAABOLE POƆ YELNIMIZEERE | YIEME 5-7
Ta Wa Vɛnɛ Ka Noba Yel-Eree Sããna Yelmennoŋ Na Hoŋ Dire Korɔ Jehoova Na
w21.03 15 wɛl. 7-8
Lɛ Hoŋ Na Toɔ̃ E Nyɛ Faŋa Emmo Yi A Baabole Poɔŋ
Naa Deevid da taaɛ bidɔɔ kaŋa baŋ boɔlɔ Aabisalom. O da iri zɔɔrɔ neŋ la o saa, a boɔrɔ ka o deɛ a naaloŋ yi o nuureŋ. Ho zɔmeŋɛ kaŋa kyɛbee ho booree neɛ kaŋa iri boŋ tere bee? Ka lɛ wa la, Deevid neŋ o bidɔɔ ŋa yɛlɛ na toɔ̃ eŋ boŋ faŋa yaga.—2 Saa. 15:5-14, 31; 18:6-14.
(1) Puore. Saŋa na a yɛlɛ naŋ be ho teɛroŋ poɔŋ na, puore sɔre Jehoova a yeli yɛlɛ na zaa naŋ dɔɔnɔ bo na koo. Vɛŋ ka o baŋ lɛ a yɛlɛ naŋ beɛrɛ bo seŋ. (Yiem. 6:6-9) Yeli a yɛlɛ meŋɛ ko Jehoova. Puore sɔre Jehoova ka o soŋ bo, ka ho toɔ̃ nyɛ Baabole sowuli naŋ na toɔ̃ soŋ bo ka ho are a yelkpeɛŋaa noɔre.
w20.07 8-9 wɛl. 3-4
Sagedi Peɛlaaŋ Ka Ho Taaɛ A Yelmeŋɛ
Yelmeŋɛ la, Naaŋmen puorebiiri maŋ tɔglɛɛ Krista a wulo nɔmmo korɔ taa. Kyɛ a ba seŋ ka te sagediibu are ana yɛlɛ ŋa eŋɛŋ yoŋ. Ananso la wala? Te de ka te Kristabitɔ kaŋa, kyɛbee a lantaapuoruu neŋkpoŋ kaŋa, kyɛbee paaneɛ kaŋa eɛ yelfaa kaŋa naŋ e nimizeɛ yaga zaa. Kyɛbee te de ka te yɔɔdɔɔ kaŋa kyɛbee te yɔɔpɔge kaŋa e teŋ yelkaŋa naŋ kpɛ te haali. Kyɛbee te yɔɔ kaŋa leɛ la nɔzagra a piili yele ka teneeŋ naaneŋ taa a yelmeŋɛ. Ka a yɛlɛ ŋa taaŋ wa e, ho na ŋmɛɛ gbɛre a bare Jehoova puoruu bee? Bo yɛlɛ teŋ na baŋ zanne yi a yɛlɛ ŋa poɔŋ? A ba seŋ ka te de te sagediibu are noba yel-eree eŋɛŋ. Aseŋ ka te vɛŋ ka te neŋ Jehoova niiloŋ na e kpeɛŋaa yaga zaa. Lɛ na vɛmeŋ ka te sagediibu meŋ e kpeɛŋaa. Yelmeŋɛ la, aseŋ ka te maŋ teɛre yɛlɛ, a gyɛre yɛlɛ te sukyie pooreŋ meŋ kyɛ sage yelkaŋa di. Kyɛ, aseŋ ka te maŋ peɛre te baŋ a yɛlɛ yelmeŋɛ zaa, a kyɛ teɛre yɛlɛ gaa tɔɔre sɛre kyɛ sage a yɛlɛ di. Azuŋ a eɛ nimizeɛ ka hooŋ meŋɛ peɛre baŋ ka, Jehoova yɛlɛ naŋ be a Baabole poɔŋ na eɛ yelmeŋɛ.—Uro. 12:2.
Yezu yeleeŋ ka, noba mine na de la “popeɛloŋ” sage de a yelmeŋɛ. Kyɛ ka ba naŋ wa tuore yelkpeɛne, ba sagediibu na baareŋ. (Kanne Matio 13:3-6, 20, 21.) Aminekaŋaŋ, a ba wa ba teɛroŋ poɔŋ ka, ka ba naŋ e Yezu potuuribo ba na tuoree dɔgɛɛ ane yelkpeɛne. (Mat. 16:24) Kyɛbee ba teɛrɛɛŋ ka, ka ba naŋ e Kristabiiri, yelzaa koŋ dɔɔnɔ ba ba zemmo poɔŋ, ba na nyɛrɛ maaloo yoŋ a koŋ tuoro yelkpeɛne. Te be la Setaana donɛɛ poɔŋ, azuŋ te na tuoree yelkpeɛne. Yɛlɛ meŋ na baŋ leɛreŋ te zemmo poɔŋ, ka lɛ vɛŋ ka popeɛloŋ na teŋ da taa na sigi teŋɛ.—Yiem. 6:6; Ikil. 9:11.
Baabole Poɔ Yelsonne
it-1 995
Yaa
A yi Urom 3:13, bitontona Pɔɔl da de la yɛlɛ naŋ be Yieme 5:9 toŋ neŋ toma. O da de la neŋfaare ane daware noba kɔkɔɛ poore manne neŋ “yaa naŋ yuo gaŋ.” Aŋa lɛ na noba naŋ maŋ wore kũũni ane boma naŋ sãã lɔɔ eŋ yaa naŋ yuo gaŋ poɔŋ na, neŋfaare meŋ kɔkɔɛ poore maŋ yuoŋ, baŋ yele yɛlɛ naŋ waana neŋ kũũ ane saammo.—De manne neŋ Mt 15:18-20.
FEBRUARY 19-25
BAABOLE POƆ YELNIMIZEERE | YIEME 8-10
“Oo Jehoova, N Na Pugiboŋ”!
w21.08 3 wɛl. 6
De Arezie Na Hoŋ Taa Jehoova Booree Poɔŋ Na Tegroŋ Yaga Zaa
Jehoova da mãã la o meŋɛ a maale a teŋgane ko te. Sɛre ka Jehoova na maale a dɛndɛŋ nensaalaa na, o da mãã la o meŋɛ a nare a teŋgane ko nensaaleba. (Joob 38:4-6; Jer. 10:12) Jehoova maŋ teɛrɛɛ yɛlɛ gɛrɛ tɔɔre, a kyɛ yuoro o nu meŋ yaga zaa. Azuŋ o da maalɛɛ bonsonne yaga eŋ a teŋgane zuŋ. A boma ŋa maŋ korɔ teŋ popeɛloŋ. (Yiem. 104:14, 15, 24) A da maŋ wa ta la saŋa kaŋa ka Jehoova leɛ kaa boma na zaa oŋ maale na a “nyɛ ka a somaŋ yaga.” (Mun. 1:10, 12, 31) Jehoova da wuleeŋ ka o taaɛ emmo a ko nensaaleba, saŋa na oŋ da kaa iri nensaaleba ka ba taa “kpeɛ̃o” boma na zaa oŋ maale biŋ a teŋgane na zuŋ. (Yiem. 8:6) A eɛ Naaŋmen poboɔbo ka nensaaleba naŋ pɛgeyi taa popeɛloŋ, a kaara boma na zaa oŋ maale na zu tegitegilɛ. Ho maŋ puoree Jehoova bareka neŋ a noɔre emmo ŋa naŋ soma yaga zaa o naŋ ko bo na bee?
w20.05 23 wɛl. 10
Ho Taaɛ Nimipa Ko Kyɔɔtaare Na Naaŋmen Naŋ Ko Bo Na Bee?
Naaŋmen ko teŋ apoɔsori ka te maŋ yele yɛlɛ. Sori na kaŋa teŋ na baŋ tu kyɛ wuli nimipa ko a kyɔɔtaa ŋa la ka, te soŋ noba ka ba wa baŋ bon nanso teŋ ba sagedi ka boma mine la leɛre a menne lɛɛŋ ka boma zaa wa bebe. (Yiem. 9:1; 1 Pit. 3:15) Noba naŋ maŋ wulo ka boma mine la leɛre a menne lɛɛŋ a wa leɛ nensaaleba maŋ boɔrɔŋ ka te sagedi ka, a donɛɛ ane bonzaa naŋ be a donɛɛ poɔŋ la maale a menne a wa bebe. Te na toɔ̃ soŋ baŋ ka ba wa baŋ te sazu Saa na, ka teneeŋ de a Baabole poɔ yɛlɛ ane yelnimizeere na mine teŋ zanne yi a zannoo ŋa poɔŋ na wuli ba. Noba na zaa naŋ boɔrɔ ka ba baŋ a yelmeŋɛ na wa sagediŋ ka, Jehoova la maale a sazu ane a teŋgane.—Yiem. 102:25; Aiz. 40:25, 26.
w22.04 7 wɛl. 13
Ho Eɛ “Ewuli Soŋ . . . Ho Yelyaga Yeluu Poɔŋ”?
Maŋ yi ho sukyiri zaa poɔŋ kyeɛrɛ yiele. Saŋa na teŋ wa kyeɛrɛ te puoruu yiele na, aseŋ ka a maŋ e te boɔbo ka te de pugibu korɔ Jehoova. Te yɔɔpɔge kaŋa baŋ boɔlɔ Sara da teɛre ka o ba e neɛ naŋ baŋ yiele kyeɛbo soŋ zaa. Kyɛ, o maŋ boɔrɔŋ ka o tu yiele kyeɛbo eŋɛŋ a de pugibu korɔ Jehoova. Azuŋ, o maŋ mɔɔŋ kyɛ zanne a yiele soŋ zaa saŋa na oŋ wa be yiriŋ. O maŋ zannɛɛ a yiele aŋa lɛ na oŋ maŋ zanne a lammo yɛlɛ na. O maŋ yielee a yiele gbɛɛ yaga a mɔɔrɔ ka o nyɛ lɛ a yiele yelbie neŋ a zannoo yelzu naŋ kyaare taa. O yeleeŋ ka: “A yɛlɛ ŋa soŋ maŋ yaga, N ba maŋ de N teɛroŋ eŋ lɛ na maŋ baŋ yiele kyeɛbo eŋɛŋ, kyɛ N maŋ de la N teɛroŋ eŋ a yiele yelbie eŋɛŋ.”
Baabole Poɔ Yelsonne
it-1 832
Nubiri
A yi yelmannaa poɔŋ, saŋa kaŋa a Baabole maŋ yeliŋ ka Naaŋmen de la o “nubiri bee nubie” toŋ neŋ toma mine. Aŋa mannoo poɔŋ, a Baabole yeleeŋ ka Naaŋmen de la o nubiri sɛge a Bege Pie na eŋ kutala zuŋ. (Yi 31:18; Du 9:10) A Baabole lɛ yeleeŋ ka Naaŋmen de la o nubiri toŋ toŋseɛlɛ, a kyɛ maale a sazu meŋ. (Yi 8:18, 19; Ym 8:3). Naaŋmen “nubie” na oŋ de maale boma zaa na are ko la o vooroŋ soŋ na, kyɛbee o kpeɛ̃o na. Bonso teŋ yeli lɛ? Ananso la ka, saŋa na Munpiilee gane naŋ wa manna sori na Naaŋmen naŋ tu kyɛ maale boma na, o yeleeŋ ka Naaŋmen kpeɛ̃o da yuoɔrɛɛ a koɔ̃ne zuriŋ. (Hiburu kɔkɔre poɔŋ, ba maŋ yeliŋ ka ruʹach, “vooroŋ” la lɛ). (Mn 1:2) A Krista Giriki Sɛgre na meŋ soŋ teŋ teŋ baŋ bon na Naaŋmen nubiri naŋ are ko. Saŋa na Matio naŋ wa sɛgre Yezu zemmo yɛlɛ na, o da sɛgɛɛŋ ka Yezu da maŋ tu la ‘Naaŋmen vooroŋ soŋ’ na eŋɛŋ kyɛ digi maleke-faare bare. Kyɛ Luka yɛŋ da sɛgɛɛŋ ka, “Naaŋmen nubiri” eŋɛŋ ka Yezu da maŋ tu kyɛ digi a maleke-faare bare.—Mt 12:28; Lk 11:20.
FEBRUARY 26–MARCH 3
BAABOLE POƆ YELNIMIZEERE | YIEME 11-15
Ho Na Baŋ Nyɛɛ Ho Meŋɛ A Donpaalaa Poɔŋ Bee?
w06 5/15 18 wɛl. 3
Yelnimizeere Naŋ Be A Yieme Dɛndɛŋ Gane Poɔŋ
11:3—Boŋ la a daŋkyiŋ-pare na ba naŋ sãã na? A daŋkyiŋ-pare ŋa are ko la yɛlɛ naŋ maŋ vɛŋ ka nensaaleba taa zeŋ laafeɛ. A boma ama la bege, yelsɛgree, ane dantorii. Ka nobaŋ wa sãã a yɛlɛ ama, ba koŋ baŋ taa zeŋ laafeɛ, dantorii meŋ na baareŋ. Ka lɛŋ wa nyɛrɛ eebo, a na fɛreŋ ka “sontuuro” dɛle Naaŋmen kpɛlɛŋkpɛlɛŋ.—Yieme 11:4-7.
wp16.4 11
Kpaŋkpaŋkpeɛ̃o Toma Na Baŋ Baareŋ A Donɛɛ Ŋa Poɔŋ Bee?
A Baabole eŋɛɛ noɔre ka a koŋ kɔɔre, Naaŋmen na iree kpaŋkpaŋkpeɛ̃o toma yi a donɛɛ poɔŋ. A donɛɛ ŋa naŋ paale neŋ kpaŋkpaŋkpeɛ̃o toma na tuoree Naaŋmen “sɛrɛɛdiibu bebiri ane bebiri na baŋ na wa sãã a neŋfaare zaa” na. (2 Piita 3:5-7) Noba naŋ nɔŋ kpaŋkpaŋkpeɛ̃o yɛlɛ koŋ lɛ bebe a dɔgrɔ ba taaba. Wala teŋ e baŋ ka Naaŋmen na de la gbɛre a iri kpaŋkpaŋkpeɛ̃o yɛlɛ zaa bare?
A Baabole yeleeŋ ka, Naaŋmen “kyiiree neɛzaa naŋ nɔŋ kpaŋkpaŋkpeɛ̃o toma.” (Yieme 11:5) Neɛ naŋ maale te nɔŋ la emmaaroŋ ane dantorii. (Yieme 33:5; 37:28) Azuŋ, o koŋ zeŋ kaara ka kpaŋkpaŋkpeɛ̃o toma nyɛrɛ nimitɔɔre gaabo tegitegilɛ.
w17.08 6 wɛl. 15
Ho Na Sage Yi La Ho Poɔ Zaa A Di Kannyiri Kyɛnlɛ?
Bonso ka Deevid da boɔrɔ ka o yi o poɔ zaa a di kannyiri kyɛnlɛ? Deevid meŋɛ da iree a yɛlɛ noɔre ko te a yi yieloŋ na oŋ da sɛge a soore gbɛre bonaare ka: ‘Wala aŋ na kɔɔre seŋ?’ Ŋaaŋ ka Deevid da yeli: “Maaŋ yɛŋ na dɛlɛɛ ho yelmeŋɛ nɔmmo na; N sukyiri na taaɛ popeɛloŋ ho faabo toma na eŋɛŋ. N na kyɛɛ yiele ko Jehoova, bonso o ko maŋ kyɔɔtaa naŋ e kpoŋ.” (Yiem. 13:5, 6) Deevid da dɛlɛɛ Jehoova yelmeŋɛ nɔmmo na. O da taaɛ teɛretɔ Jehoova faabo toma na eŋɛŋ, o da maŋ leɛteɛrɛɛ lɛ na Jehoova naŋ koo maaloo yaga zaa o zemmo poɔŋ. Deevid da baŋɛɛŋ ka a na somaŋ yaga zaa ka o di kannyiri a kyɛnlɛ Jehoova.
kr 236 wɛl. 16
A Naaloŋ Na Vɛmeŋ Ka Naaŋmen Boɔbo Nyɛ Eebo A Teŋɛzuŋ
Gomeŋɛ. A baaraa zaa, a sukyiridii yɛlɛ naŋ be Aizeeya 11:6-9 na nyɛɛ eebo meŋɛmeŋɛ. Zie zaa dɔbɔ, pɔgeba, ane bibiiri naŋ na gaa a teŋɛzuŋ, ba na te taaɛ zeŋ laafeɛ neŋ gomeŋɛ beŋ. Nensaalaa zaa kyɛbee duŋo zaa koŋ e yelzaa naŋ na pere o tɔsoba. Hooŋ leɛ ŋmaa a yɛlɛ ŋa foto ho teɛroŋ poɔŋ, a nyɛ a teŋɛzu naŋ waa ho yiri, ka hooŋ boɔrɔ, ho na baŋ gaa la baa zaa, dampo zaa, kyɛbee mane zaa poɔ a te duu koɔ̃. Ho na baŋ do la taŋa zaa meŋ hoŋ boɔrɔ zu, a yɔ kpɛ moɔ zaa poɔŋ, kyɛ yelfaa zaa koŋ pɔge bo. Ka zieŋ wa soɔ bo beŋ, kyɛ dabeɛ̃ koŋ erɛ bo. Yɛlɛ naŋ be Iziikiel 34:25 na nyɛɛ eebo. Ka a yɛlɛ ŋaŋ wa nyɛ eebo, Naaŋmen puorebiiri na “taa [la] zeŋ laafeɛ a wɛgyɛŋ poɔŋ, a maŋ gaŋ gbiri a tuuri meŋ pooreŋ.”
Baabole Poɔ Yelsonne
w13 9/15 19 wɛl. 12
Ho Leɛrɛɛ Ho Teɛroŋ Kpɛlɛŋkpɛlɛŋ?
A yɛlɛ nembao zie la ka, noba yaga naŋ be a donɛɛ poɔŋ maŋ erɛɛ ba yɛlɛ aŋa lɛ na Pɔɔl naŋ da yeli na. Ba maŋ teɛre ka, ka neɛŋ are kpeɛŋaa ka noba de bege ane sowuli tonɔ neŋ toma, a wuleeŋ ka o soba ba nɔnɔ noba. Ba mine maŋ teɛreŋ ka o soba erɛɛ o yɛlɛ aŋa takoreŋ saŋa neɛ. Wulwulibo yaga ane bidɔgreba mine maŋ terɛɛ sori ka noba erɛ lɛ zaa ba naŋ boɔrɔ, a kyɛ lɛ wulo ka noba na baŋ taaɛ teɛroŋ zaa ba naŋ boɔrɔ. Bana yɛŋ zieŋ yelzaa ba pɛgeyi, azuŋ yelzaa kyebe a e yelmeŋɛ te baare. Haali noba naŋ e ŋmenpuoreba maŋ teɛreŋ ka lɛ zaa ba naŋ boɔrɔ ba na toɔ̃ eŋ. Ba maŋ teɛreŋ ka a ba e ferebo ka ba sagra Naaŋmen nɔɛ kyɛbee a tuuro o bege. (Yiem. 14:1) A teɛroŋ ŋa na baŋ nyɛɛ kpeɛ̃o yelmeŋɛ Kristabiiri zuŋ. A teɛroŋ ŋa taa ka Kristabiiri mine taa kyaare lɛ na Jehoova naŋ sɛgre yɛlɛ o lantaapuoruu na poɔŋ. Azuŋ, ba ba maŋ yi ba poɔ zaa a derɛ sowuli na a lantaapuoruu naŋ korɔ ba na tonɔ neŋ toma. Ka ba mineŋ wa nyɛ yɛlɛ mine naŋ ba kyɛnɛ soŋ aŋa lɛ na baŋ boɔrɔ, ba maŋ piili ŋmoonɔŋ. Ka ba naŋ wa yi a Baabole poɔŋ a ko ba kawane a kyaare yɛlɛ naŋ seŋ ka ba de pɛlɛ ba niŋe, lɛ aŋ seŋ ka ba de intanɛt tonɔ neŋ toma, kyɛbee lɛ a naŋ ba soma ka ba gaa sakuu gaa tɔɔre, ba maŋ piili derɛɛ taawae.