“Te Zemmo Ane Te Naaŋ Moɔloo Toma Lammo Yelsɛgree” Yelpeɛre Gane

Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane

MAY 6-12

BAABOLE POƆ YELNIMIZEERE YIEME 36-37

“Ta Vɛŋ Ka Neŋfaare E Ka Ho Suuri Iri”

w17.04 10 wɛl. 4

Boŋ Na Gaa Saŋa Na Naaŋmen Naaloŋ Naŋ Na Wa Piili Dire Naaŋ?

Sobuo ka neŋfaare nyɛrɛ kpeɛ̃o te zuŋ pampana ŋa? Vooroŋ soŋ da soŋɛɛ bitontona Pɔɔl oŋ da sɛge yɛlɛ naŋ na erɛ te saŋa ŋaŋ. O da sɛgɛɛŋ ka: “Zie na maaleŋ eɛ kpeɛŋaa yaga zaa . . . kyɛ neŋfaare ane daware noba naŋ na moɔ̃ la niŋe a erɛ yelfaare yaga zaa.” (2 Tim. 3:1-5, 13) Ho nyɛɛ a daŋyelbo ŋa naŋ nyɛrɛ eebo zenɛ ŋa bee? Te kpɛŋ zie zaa eɛ noba neŋfaare naŋ dɔgrɔ te yaga zaa. A neŋfaare mine maŋ de la sutoloŋ a dɔgrɔ ne te, ba mine meŋ ba maŋ nɔnɔ te yɛlɛ fẽẽ zaa, ka ba mine meŋ e zukpeɛne deme naŋ maŋ de toɔrɔ waneŋ te zuŋ. Ba mine yɛŋ, te maŋ baŋeŋ peɛlaaŋ ka ba eɛ neŋfaare. Kyɛ ba mine meŋ bebeŋ a e daware noba, a maŋ de lɛ na ba naŋ waa na sɔgle, a erɛ ba yɛlɛ aŋa sontuuribo. Ka teneeŋ gbaŋ e noba neŋfaare naŋ ba dɔgrɔ te, kyɛ sori kaŋa poɔŋ na, neŋfaare nyɛrɛɛ kpeɛ̃o te zuŋ. Ka teneeŋ wa woŋ yelfaare na ba naŋ erɛ noba mine na, a maŋ beɛrɛ teŋ yaga. Lɛ na neŋfaare naŋ dɔgrɔ bibiiri, neŋnyaane, ane noba naŋ koŋ baŋ zɔɔ deɛ ba menne na eɛ nembao yaga zaa. Neŋfaare maŋ erɛɛ ba yɛlɛ aŋa ba naŋ waa dunni, kyɛbee noba naŋ taa maleke-faare. (Gyi. 3:15) A yɛlɛ noɔ̃ zie la ka, Jehoova Yelbiri na wuli teŋ sori na Jehoova naŋ na tu a iri neŋfaare zaa bare.

w22.06 10 wɛl. 10

Jehoova Maŋ Ko La Noba Naŋ Dire Suuri Korɔ Ba Taaba Maaloo

Ka teneeŋ maŋ nyɔgrɔ yelfaare na te taaba naŋ erɛ te na eŋnɛ te sukyie pooreŋ, a na de la toɔrɔ waneŋ te menne zuŋ. Jehoova boɔrɔŋ ka te so te menne, azuŋ o boɔrɔŋ ka te maŋ iri yelzaa te taaba naŋ e te aŋ beɛrɛ te yi te sukyie poɔŋ. (Kanne Efesu 4:31, 32.) O eŋnɛ boŋ faŋa ka, “bare suuri a tage ho meŋɛ yi sutoloŋ poɔŋ.” (Yiem. 37:8) Yɛŋ be la a kawane ŋa poɔŋ yaga zaa. Ka neɛŋ e te yelfaa kaŋa ka te de a yɛlɛ eŋ te sukyie poɔŋ, a na baŋ eŋ teŋ baaloŋ kyɛbee a ko te teɛroŋ gyɛre. (Yeng. 14:30) Teɛre a yɛlɛ ŋa soŋ a nyɛ, te de ka neɛ kaŋa e boŋ yelkaŋa aŋ kpɛ bo yaga zaa, ka lɛ vɛŋ hoŋ de poison a nyu. Ho eɛ lɛ bonso ho teɛrɛɛŋ ka, ka hooŋ nyu a poison, neɛ naŋ e bo a yɛlɛ aŋ kpɛ bo na na kpiŋ. Yɛŋ be la a yɛlɛ ŋa poɔŋ bee? Lɛ neŋ o zu la, ka neɛŋ wa e te yelkaŋa ka a kpɛ te ka te de a yɛlɛ eŋ te sukyieŋ, tenee menne la aŋ na dɔɔnɔ. Kyɛ ka teneeŋ dire suuri korɔ te taaba, te korɛɛ te menne kyɔɔtaa kaŋa. (Yeng. 11:17) Te na taaɛ teɛroŋ yeni ane sukyirimaaroŋ, a na soŋ teŋ ka te naŋ nyɛrɛ nimitɔɔre gaabo Jehoova puoruu poɔŋ meŋ.

w03 12/1 13 wɛl. 20

“Vɛŋ Ka Ho Popeɛloŋ Zaa Be Jehoova Eŋɛŋ”

A Baabole yeleeŋ ka, “Noba naŋ sigri ba menne na zeŋ la a teŋgane ŋa zuŋ.” (Yieme 37:11a) Aŋ mine la “noba naŋ sigri ba menne na”? A yelbiri na ba naŋ leɛre waneŋ ka, “sigri” yi la yelbiri kaŋa pare naŋ la, “neɛ ba naŋ dɔgrɔ, neɛ naŋ sigri o meŋɛ, kyɛbee neɛ ba naŋ eŋ nyaaba.” Ɛɛ, a “noba naŋ sigri ba menne na” eɛ noba naŋ maŋ kyɛnlɛ Jehoova ka o wa sɛgre daŋkyagre na zaa ba naŋ tuoro na. A Baabole yeleeŋ ka, “Ba na wono la noɔ̃ yaga zaa emmaaroŋ gaalii poɔŋ.” (Yieme 37:11b) Haali pampana, ba taaɛ emmaaroŋ yaga zaa a siiloŋ poɔ paradiisi na poɔŋ saŋa na baŋ maŋ laŋna neŋ ba yɔɔmine a Krista lantaapuoruu poɔŋ na.

Baabole Poɔ Yelsonne

it-2 445

Taŋa, Taŋkpoŋ

Taŋbɛrɛ na baŋ are ko la bon naŋ are kpeɛŋaa, a bebe tegitegilɛ, a do saa meŋ yaga. Taŋbɛrɛ na baŋ are ko la bon naŋ are kpeɛŋaa a bebe tegitegilɛ. (Ai 54:10; Hab 3:6; de manne neŋ Ym 46:2.) A lɛ zuŋ ka a yieli yiele da yeli kyaare Jehoova sontuubu na ka a waa ŋa “tanne naŋ e bɛrɛ yaga.” (Ym 36:6) O da boɔrɔŋ ka o wuli ka sontuubu yɛlɛ na Jehoova naŋ sɛgre biŋ na maŋ areŋ kpeɛŋaakpeɛŋaa, a ba leɛrɛ. Taŋbɛrɛ na baŋ lɛ are ko la boma naŋ do saa yaga zaa, azuŋ a waa ŋa a yieli yiele da lɛ boɔrɔŋ ka o wuli ka, sontuubu yɛlɛ na Naaŋmen naŋ sɛgre biŋ na do la saa yaga zaa a gaŋ nensaaleba yɛlɛ zaa ba naŋ sɛgre biŋ. (De manne neŋ Ai 55:8, 9.) Saŋa na a maleke ayɔpoi soba naŋ da wa kyiri a ŋmanlee naŋ taa Naaŋmen suuri bare na, Yel-iriwulaa 16:20 yeleeŋ ka: “Tanne meŋ da ba lɛ bebe.” Lɛ wuleeŋ ka, boma zaa naŋ do saa aŋa tanne gba koŋ baŋ faa a menne a yi Naaŋmen sutoloŋ na poɔŋ.—De manne neŋ Jr 4:23-26.

MAY 13-19

BAABOLE POƆ YELNIMIZEERE YIEME 38-39

Lɛ Teŋ Na Toɔ̃ E Saŋa Na Te Zoma Naŋ Wa Dɔɔnɔ Te Yaga Zaa

w20.11 27 wɛl. 12-13

“Vɛŋ Ka Ho Nimie Kaara” Nendaare Kaŋa Yɛlɛ Dendenlɛ

Kanne 1 Gyɔɔn 3:19, 20. Gbɛɛ yaga, a maŋ wa ta la saŋa kaŋa ka te kaŋa zaa zoma dɔɔnɔ te. Aŋa mannoo poɔŋ, ka noba mineŋ wa zanne baŋ a yelmeŋɛ, a leɛteɛre yɛlɛ na mine baŋ da erɛ sɛre kyɛ wa baŋ a yelmeŋɛ na, a maŋ dɔɔnɛɛ ba zoma. Noba mine meŋ ka ba naŋ wa de suobu baare a kyɛ ŋmɛ gbɛ-faare mine, a maŋ vɛŋeŋ ka ba zoma dɔɔnɔ ba yaga zaa. A yɛlɛ ŋa na baŋ pɔgɛɛ te kaŋa zaa. (Uro. 3:23) Yelmeŋɛ la, te boɔrɔŋ ka te erɛ yɛlɛ naŋ soma, kyɛ “te zaa maŋ ŋmɛɛ gbɛɛ yaga zaa.” (Gyi. 3:2; Uro. 7:21-23) Te kaŋa zaa kyebe ka o zoma na dɔɔnoo ka o yelka o poɔ pɛlɛɛŋ neŋ lɛ na o zoma naŋ dɔɔnoo na. Kyɛ, sori kaŋa poɔŋ, te na baŋ yeliŋ ka ka te zomaŋ dɔɔnɔ te, a eɛ yɛlɛ naŋ soma. Bonso teŋ yeli lɛ? Ananso la ka, ka te zomaŋ dɔɔnɔ te a na soŋ teŋ ka te de gbɛɛ a leɛ sɛgre gbɛɛ na te naŋ ŋmɛ na, a lɛ eŋ te faŋa ka te nare te menne ka te daŋ koŋ lɛ ŋmɛ ana gbɛ-faare na zaa.—Hib. 12:12, 13.

Kyɛ, ka teneeŋ ba kaa soŋ, te zoma na baŋ dɔɔnɔ teŋ yaga zaa te gaali. Lɛ wuleeŋ ka, ka teneeŋ gbaŋ e noba naŋ e kaŋdabaŋkalɛ, ka Jehoova wuli ka o di la suuri ko te, kyɛ te zoma naŋ na dɔɔnɔ teŋ yaga zaa. A yɛlɛ ŋa ba soma fẽẽ zaa. (Yiem. 31:10; 38:3, 4) Bonso teŋ yeli lɛ? Hooŋ leɛ nyɛ te yɔɔpɔge kaŋa zemmo yɛlɛ a nyɛ. O eɛ neɛ zoma naŋ dɔɔnoo yaga zaa yelfaare mine o naŋ e saŋa kaŋa naŋ pare zuŋ. O yeleeŋ ka: “N wa teɛrɛɛŋ ka a ba seŋ ka N moɔrɔ N moɔbo zaa Jehoova puoro poɔŋ, bonso Jehoova nimitɔɔreŋ, N eɛ neɛ naŋ sereŋ moɔ fã.” Te yaga zie zaa baŋɛɛ lɛ a yɛlɛ ŋa naŋ beɛrɛ te yɔɔpɔge ŋa aseŋ. A eɛ nimizeɛ yaga zaa ka te kaara te menne soŋ a ta wa terɛ sori ka te zoma maaleŋ dɔɔnɔ te yaga zaa te gaali. Leɛteɛre a yɛlɛ ŋa nyɛ, nyɛ lɛ na Setaana poɔ naŋ na pɛle yaga zaa ka te enne kyoɔre ka te bare te menne, aneazaa ka Jehoova eŋɛ ba kyoɔre te eŋɛŋ.—De manne neŋ 2 Korinti 2:5-7, 11.

w02 11/15 20 wɛl. 1-2

Wala Teŋ Na Toɔ̃ E A Erɛ Yɛlɛ Naŋ Soma Te Bebiri Zaa Zemmo Poɔŋ Jehoova Nimitɔɔreŋ?

TE NYƆVORE bebie eɛ fẽẽ lɛ, a maŋ pare wa gaa wieoŋ. A yieli yiele Deevid da teɛrɛɛ lɛ na nyɔvore naŋ e ŋmaa yɛlɛ, ka lɛ vɛŋ oŋ da puore sɔre Naaŋmen a yelka: “Oo Jehoova, soŋ ma ka N baŋ lɛ na N baaroo naŋ na waa, a soŋ ma ka N baŋ N bebie naŋ kyɛre, ka lɛ vɛŋ ka N toɔ̃ baŋ lɛ N nyɔvore naŋ e ŋmaa seŋ. Yelmeŋɛ zaa, ho vɛŋɛɛŋ ka N bebie e fẽẽ lɛ; lɛ na N nyɔvore naŋ e wogi seŋ na ba e bonzaa ho nimitɔɔreŋ.” Deevid da boɔrɔŋ ka Naaŋmen somoo ka o maŋ tu o yel-eree ane o yelyaga eŋɛŋ a erɛ yɛlɛ naŋ pɛlɛ Naaŋmen poɔ bebiri zaa. Deevid da dɛlɛɛ Naaŋmen kpɛlɛŋkpɛlɛŋ, azuŋ o da yeleeŋ ka: “Hooŋ la teɛretɔ zaa maŋ taa.” (Yieme 39:4, 5, 7) Jehoova da kyɛlle woŋ la Deevid puoro na. Jehoova da vɛŋɛɛŋ ka o nimiri gaŋ a kaara Deevid yel-eree zaa, o da ko oŋ saŋyɔɔ naŋ seŋ neŋ meŋ.

Yelmeŋɛ la, te zaa maŋ taaɛ toma yaga ka te toŋ te bebiri zaa zemmo poɔŋ. Ka teneeŋ ba kaa soŋ, te naŋ maŋ taa yɛlɛ yaga ka te e na zuŋ, a na maŋ waa ŋa teŋ taa toma ka te toŋ wagre zaa. Lɛ na vɛŋeŋ ka bebie maŋ para gɛrɛ wieoŋ lɛ. Lɛ meŋ na baŋ eɛ yɛlɛ naŋ na baŋ dɔɔnɔ te. Bonso te maŋ taaɛ toma yaga ka te toŋ, kyɛ te ba maŋ taa wagre yaga ka te toŋ a toma baare. Ka lɛ ho meŋ taaɛ teɛroŋ na Deevid naŋ da taa na bee? Ho meŋ boɔrɔŋ ka ho maŋ erɛ yɛlɛ naŋ na vɛŋ ka Naaŋmen poɔ pɛle neŋ bo ho bebiri zaa zemmo poɔŋ bee? Aseŋ ka te baŋ peɛlaaŋ ka, Jehoova kaarɛɛ yɛlɛ zaa te naŋ erɛ bebiri zaa, a maŋ mãã o meŋɛ a peɛre te kaŋa zaa poteɛrɛ meŋ. Gyoob da eɛ dɔɔ naŋ zoro Naaŋmen. Yuomo 3,600 mine naŋ pare, o da yeleeŋ ka Jehoova nyɛrɛɛ o soe zaa, a maŋ sɔrɔ o gbɛ-deree meŋ zaa. Azuŋ Gyoob da soorɛɛŋ ka: “Ka onaŋ wa soore ma yɛlɛ, wala maŋ na toɔ̃ yeli a de iri a noɔre?” (Joob 31:4-6, 14) Ka teneeŋ maŋ de Jehoova puoruu yɛlɛ de weɛ te zemmo poɔŋ, a sagra o nɔɛ, a de te wagre tonɔ neŋ toma soŋ, te meŋ na wa eɛ noba naŋ na erɛ yɛlɛ naŋ pɛlɛ Naaŋmen poɔ te bebiri zaa zemmo poɔŋ. Yɛ vɛŋ ka te mãã te menne a zanne a yɛlɛ ama gaa tɔɔre fẽẽ.

w21.10 15 wɛl. 4

Lɛ Hoŋ Na Toɔ̃ E Ka Ho Neŋ Jehoova Niiloŋ Na Leɛ E Kpeɛŋaa

Maŋ puoro sɔrɔ Jehoova wagre zaa. Ho Saa na baŋɛɛ lɛ na ho zoma naŋ dɔɔnɔ bo aseŋ. O baŋɛɛŋ meŋ ka lɛ vɛŋɛɛŋ aŋ e kpeɛŋaa ko bo ka ho maŋ puoro sɔroo. (Uro. 8:26) Aneazaa, aseŋ ka te “kpimare puoroo eŋɛŋ.” Maŋ yelko Jehoova ka ho boɔrɔŋ ka ho ne o nyɔge zɔmennoŋ naŋ e kpeɛŋaa. (Uro. 12:12) Andrej yeleeŋ ka: “N zoma da maŋ dɔɔnɔ maŋ yaga zaa, ka vi meŋ da maŋ erɛ ma. Kyɛ, ka maaŋ wa puore sɔre Naaŋmen, a lɛ teɛrɛ na maŋ ŋmaa bareŋ. A maŋ vɛŋeŋ maŋ taa teɛroŋ yeni.” Ka hooŋ ba baŋ yɛlɛ na aŋ seŋ ka ho puore sɔre, ho na baŋ kannɛɛ Naa Deevid puore sɔroo naŋ be Yieme 51 ane 65 na. O da yelee yɛlɛ na baŋ sɛge eŋ be na puore sɔroo poɔŋ, saŋa na oŋ da e kaŋdabaŋkalɛ a yi yelfaare na oŋ da e na.

Baabole Poɔ Yelsonne

w22.09 13 wɛl. 16

Wuli Ka Ho Eɛ Neɛ Naŋ Waa Dɛlebo

Ka teneeŋ boɔrɔ ka te taaba dɛle te, a fɛrɛɛŋ ka te taa meŋɛ bantaabo gyogo. A gyogo ŋa na toɔ̃ soŋ teŋ ka te baŋ yɛlɛ naŋ seŋ ka te yeli saŋa na neɛ kaŋa naŋ wa bɛnlɛ te ka te manne yelsɔglaa kaŋa koo. (Kanne Yeng Yelibie 10:19.) Ka teneeŋ wa de intanɛt dama diibu ziiri meŋ tonɔ neŋ toma, a na fɛreŋ yaga zaa ka te taa meŋɛ bantaabo gyogo. Ka teneeŋ ba kaara soŋ, a yi babammo poɔŋ, te na baŋ de la yelsɔglɔ mine eŋ a intanɛt dama diibu ziiri ŋaŋ ka noba kanne a baŋ a yɛlɛ. Ka teneeŋ wa de yelzaa eŋ a intanɛt dama diibu ziiri ŋaŋ, te ba maŋ lɛ so kpeɛ̃o a kyaare lɛ noba naŋ na toɔ̃ de a yɛlɛ toŋ neŋ toma, kyɛbee saammo na aŋ na baŋ de waneŋ te taaba zuŋ. Ka noba naŋ ba nɔnɔ Jehoova puorebiiriŋ wa boɔrɔ ka ba bɛnle te ka te manne te yɔɔdɔba ane te yɔɔpɔgeba yɛlɛ a ko ba, ka lɛ vɛŋ ka ba te nyɔge ba dɔgre, meŋɛ bantaabo gyogo na soŋ teŋ ka te pɔge te nɔɛ. A yi tenne na baŋ de ba nuure dɔgle te puoruu toma na pooreŋ, kyɛbee a ba ko te sori ka te tonɔ te puoruu toma na pooreŋ, ka polisiriŋ wa nyɔge te a peɛrɛ te yɛlɛ, ana somaŋ ka te taa a meŋɛ bantaabo gyogo ŋa. A yi a yɛlɛ ama poɔŋ, ho na baŋ de la a Baabole sowuli ŋa tonɔ neŋ toma, ‘de bon a pɔge ho noɔre.’ (Yiem. 39:1) Ka te neŋ te booree deme, te zɔmenne, te yɔɔdɔba ane yɔɔpɔgeba, kyɛbee neɛzaaŋ wa laŋ erɛ yɛlɛ, aseŋ ka te wuli ka te eɛ noba naŋ waa dɛlebo. Ka teneeŋ boɔrɔ ka te e noba naŋ waa dɛlebo yɛŋ, a fɛrɛɛŋ ka te taa meŋɛ bantaabo gyogo.

MAY 20-26

BAABOLE POƆ YELNIMIZEERE YIEME 40-41

Bonso Aŋ Seŋ Ka Te Sonnɔ Te Taaba?

w18.08 22 wɛl. 16-18

Noba Naŋ Yuoro Ba Nuure A Terɛ Boma Maŋ Taaɛ Popeɛloŋ

Yelmeŋɛ zaa, noba naŋ yuoro ba nu a terɛ boma ba maŋ zeŋ kyɛnlɛ ka noba na baŋ sonnɔ na meŋ leɛ e yelkaŋa a yɔɔ sane. A yɛlɛ ŋaŋ da be Yezu teɛroŋ poɔŋ saŋa na oŋ da yelka: “Ka yɛneeŋ wa maale tigri, yɛ toŋboɔle nandaaneba, gbɛrɛɛ, noba naŋ koŋ baŋ kyɛŋ velaa ane zɔnne; lɛ na vɛŋeŋ ka yɛ taa popeɛloŋ, bonso ba ba taa bonzaa a na de yɔɔ yɛ sane.” (Luk. 14:13, 14) Vooroŋ soŋ da soŋɛɛ Baabole sɛgsɛgrɛ kaŋa oŋ sɛge ka: “Neɛ naŋ yuoro o nu terɛ boma na nyɛɛ maaloo.” A Baabole sɛgsɛgrɛ kaŋa meŋ da sɛgɛɛŋ ka: “Neɛzaa naŋ wulo nembaalba nimimaaroŋ na taaɛ popeɛloŋ.” (Yeng. 22:9; Yiem. 41:1) Ɛɛ, bon nanso teŋ maŋ yuoro te nu a sonnɔ noba la ka, ka teneeŋ wa nyɛ noba na te naŋ sonnɔ na naŋ nyɛrɛ nimitɔɔre gaabo, a maŋ vɛŋeŋ teŋ taa popeɛloŋ yaga.

Saŋa na bitontona Pɔɔl naŋ da manne Yezu yelbie na oŋ da yelka “neɛ naŋ terɛ taaɛ popeɛloŋ yaga a gaŋ neɛ naŋ derɛ” na, o da ba boɔrɔ ka o wuli ka te maŋ derɛ bontaree yoŋ korɔ te taaba. Kyɛ, o da lɛ boɔrɔŋ ka o wuli ka aseŋ ka te maŋ eŋnɛ te taaba faŋa, a wulo ba sori, a sonnɔ ba saŋa na baŋ wa boɔrɔ sommo. (Tom. 20:31-35) A tuuro Pɔɔl yelbie ane o yel-eree eŋɛŋ, o eɛ ewuli soŋ a ko te a kyaare lɛ aŋ seŋ ka te de te wagre, te faŋa, te teɛroŋ, ane te nɔmmo a sonnɔ te taaba.

Yelpeɛreba mine naŋ peɛrɛ nensaaleba laŋ zemmo yɛlɛ wa nyɛɛŋ ka noba naŋ maŋ yuoro ba nu a terɛ boma maŋ taaɛ popeɛloŋ. Gane kaŋa ba naŋ sɛge wuleeŋ ka, “ka noba mineŋ wa yi nimimaaroŋ poɔŋ a e yelsoŋ kaŋa ko ba taaba, a maŋ vɛŋeŋ baŋ taa popeɛloŋ yaga zaa.” A yelpeɛreba ŋa yeleeŋ ka “teŋ na sonnɔ te taaba eɛ yelnimizeɛ kaŋa naŋ maŋ vɛŋ teŋ taa zemmo ananso, a lɛ baŋ meŋ ka te zemmo taaɛ tɔnɔ, bonso te erɛɛ yelkaŋa a sonnɔ te taaba.” Azuŋ, ba gaaɛ nimitɔɔre a yelka, ka nobaŋ maŋ de ba menne tere a tonɔ korɔ ba taaba, a na vɛŋeŋ ka ba taa laafeeloŋ naŋ soma ane popeɛloŋ. A yɛlɛ ŋa ba e seɛlee a ko noba na naŋ sagedi ka a Baabole eɛ Jehoova Yelbiri na, bonso Jehoova la yi nɔmmo poɔŋ a maale nensaaleba.—2 Tim. 3:16, 17.

w15 12/15 24 wɛl. 7

Jehoova Na Soŋ Boŋ

Ka teneeŋ wa beɛrɛ, te na baŋ puore sɔrɛɛ Naaŋmen ka o dii te sukyie, a ko te yɛŋ, a kyɛ soŋ te meŋ, aŋa lɛ na Jehoova puorebiiri mine naŋ da e saŋa kaŋa naŋ pare na. Naa Deevid da sɛgɛɛŋ ka: “Neɛzaa naŋ wulo nembaalba nimimaaroŋ na taaɛ popeɛloŋ; ka toɔrɔ bebiriŋ wa wa, Jehoova na faa la o soba yi o poɔŋ. Jehoova na kaarɛɛ o zu, a koo nyɔvore.” (Yiem. 41:1, 2) Deevid saŋa na, te baŋɛɛŋ ka noba naŋ da wulo nimimaaroŋ korɔ ba taaba da ba zeŋ a teŋɛzuŋ tegitegilɛ. Azuŋ, yɛlɛ na Deevid naŋ yeli na ba wuli ka noba naŋ wulo ba taaba nimimaaroŋ na zeŋeŋ tegitegilɛ soseɛlee kaŋa poɔŋ, ka lɛ wuli ka ba eɛ noba naŋ taa nyɔvore naŋ ba taa baaraa. Kyɛ yɛlɛ na vooroŋ soŋ naŋ da soŋ Deevid oŋ yeli na vɛŋɛɛŋ teŋ baŋ ka, Naaŋmen na soŋɛɛ neɛzaa naŋ maŋ yi yelmeŋɛ nɔmmo poɔŋ a wulo o taaba nimimaaroŋ. Sobuoŋ? Deevid meŋɛ da wulee a muni ka: “Jehoova na somooŋ saŋa na oŋ beɛrɛ a gaŋ gado zuŋ na; a yi o baaloŋ na saŋa, o na leɛrɛɛ o gado na kpɛlɛŋkpɛlɛŋ.” (Yiem. 41:3) Ɛɛ, neɛzaa naŋ wulo nembaala nimimaaroŋ na toɔ̃ sagediŋ peɛlaaŋ ka, Naaŋmen nyɛrɛɛ yɛlɛ na o soba naŋ erɛ na, a lɛ baŋ yelmennoŋ na oŋ dire na. Lɛ na Naaŋmen naŋ maale te eŋdaa ka o maŋ leɛ saŋ o meŋɛ saŋa na teŋ wa beɛrɛ na na toɔ̃ soŋɛɛ o soba ka o nyɛ laafeɛ.

w17.09 12 wɛl. 17

Tɔglɔ Jehoova Nimimaaroŋ Na

Te naŋ baŋ ka nimimaaroŋ eɛ gyogo naŋ na toɔ̃ soŋ te zuŋ naane aŋ seŋ ka te moɔrɔ ka te taa a gyogo ŋa. Jehoova zie la ka nɔmmo ane nimimaaroŋ a yi. Azuŋ, yelnimizeɛ na kaŋa zuŋ aŋ seŋ ka te moɔrɔ ka te taa a gyogo ŋa la ka, te boɔrɔŋ ka te tɔglɔ Jehoova Naaŋmen, a lɛ derɛ gyeremɛ naŋ e kpoŋ yaga zaa koroo. (Yeng. 14:31) Jehoova eɛ ewuli soŋ yaga a ko te a kyaare lɛ na oŋ maŋ wulo noba nimimaaroŋ na. Azuŋ, yɛ vɛŋ ka te moɔ te moɔbo zaa a tɔglɔ Jehoova, a vɛŋ ka nɔmmo na te naŋ taa ko te yɔɔmine na e kpeɛŋaa. Aseŋ ka te lɛ moɔ te moɔbo zaa a wulo te taaba nimimaaroŋ, ka lɛ vɛŋ ka te ne ba niiloŋ na e kpeɛŋaa.—Gal. 6:10; 1 Gyn. 4:16.

Baabole Poɔ Yelsonne

it-2 16

Jehoova

A Baabole poɔ yelnimizeɛ zaa kyaarɛɛ apoɔsori na Jehoova naŋ taa ka o dire naaŋ a kaara bonvore zaa zu na. A yɛlɛ ŋa vɛŋɛɛŋ teŋ baŋ Jehoova Naaŋmen poboɔbo naŋ de weɛ a e nimizeɛ yaga zaa na: ona la ka o pɛge o yuori na ka o e forifori. Ka Naaŋmeneŋ na toɔ̃ pɛge o yuori na ka o e forifori yɛŋ, aseŋ ka o iri dɛgre zaa naŋ dɔgle o yuori zuŋ na bare. Kyɛ lɛ yoŋ naane, a lɛ fɛrɛɛŋ meŋ ka bonvore zaa naŋ taa yɛŋ a be sazuŋ ane teŋganeŋ de Naaŋmen yuori na ka o eɛ tegroŋ, a e forifori yaga zaa meŋ. Ka ba naŋ wa toɔ̃ e lɛ, lɛ wuleeŋ ka ba sagɛɛŋ a kyɛ taa gyeremɛ naŋ e zuluŋ a ko arezie na Jehoova naŋ taa ka o dire naaŋ a kaara bonvore zaa zu na. Lɛ na vɛŋeŋ ka ba boɔrɔ ka ba puoro Jehoova, a de popeɛloŋ meŋ a erɛ yɛlɛ o naŋ boɔrɔ, bonso ba taaɛ nɔmmo ko Jehoova. Puoro na Deevid naŋ da puore sɔre Jehoova baŋ sɛgaa eŋ Yieme 40:5-10 wulee a gyogo ŋa, ane sori na Naaŋmen naŋ na tu a pɛge o yuori na ka o e forifori. (Kanne Hi 10:5-10 a nyɛ lɛ na a bitontona Pɔɔl naŋ de yɛlɛ naŋ be a yieme gane ŋa poɔŋ manne neŋ Yezu Krista yɛlɛ.)

MAY 27–JUNE 2

BAABOLE POƆ YELNIMIZEERE YIEME 42-44

Ho Nyɛrɛɛ Tɔnɔ Yaga Zaa Yire Wuluu Na Jehoova Naŋ Maŋ Korɔ Te Na Poɔŋ Bee?

w06 6/1 9 wɛl. 4

Yelnimizeere Naŋ Be A Yieme Yiiloŋ Gane Poɔŋ

42:4, 5, 11; 43:3-5. Ka yɛlɛ mine naŋ gaŋ te faŋaŋ wa e, a yi wagre fẽẽ kaŋa poɔŋ, a na baŋ wɛli teŋ yi a Krista lantaapuoruu poɔŋ. Ka lɛŋ wa e, ka teneeŋ maŋ leɛteɛre popeɛloŋ na teŋ da maŋ taa saŋa na te neŋ te yɔɔmine naŋ da laŋna saŋa kaŋa naŋ pare na, a na toɔ̃ dii la te sukyie. Yelmeŋɛ la, a piilee saŋa ka teneeŋ wa teɛrɛ a yɛlɛ ama, a na baŋ vɛŋeŋ ka te teɛre ka te eɛ te yoŋ. Kyɛ a eɛ yelkaŋa naŋ na baŋ teɛre te ka Naaŋmen la te zo-lirizie, a fɛrɛɛŋ meŋ ka te dire kannyiri a kyɛnloo ka o wa ko te pɛnnoo.

w12 1/15 15 wɛl. 2

Lɛ Hoŋ Na Toɔ̃ E Ka Boma Zannoo Noma Korɔ Bo A Kyɛ Sonnɔ Bo Meŋ

PUORO: A dɛndɛŋ yɛlɛ naŋ seŋ ka ho maŋ e la ka, ho puore sɔre Jehoova. (Yiem. 42:8) Bonso teŋ yeli lɛ? Ananso la ka, teŋ na zanna Naaŋmen Yelbiri na poɔ la puoruu na teŋ de korɔ Naaŋmen na. Azuŋ, aseŋ ka te maŋ puore sɔre Jehoova ka o ko te teɛroŋ naŋ soma, ane o vooroŋ soŋ na ka te toɔ̃ zanne a boma velaa zaa. (Luk. 11:13) Te yɔɔpɔge Barbara de la yuomo yaga toŋ misinaare toma, o yeleeŋ ka: “Ka maaŋ wa boɔrɔ ka N kanne kyɛbee a zanne a Baabole, N maŋ daŋ puoreŋ sɛre kyɛ erɛ lɛ. Ka maaŋ wa e lɛ baare, N maŋ nyɛŋ ka Jehoova be la N zieŋ, a lɛ vɛŋ maŋ baŋ ka o poɔ pɛle neŋ la yɛlɛ na maŋ erɛ na.” Ka teneeŋ maŋ puore sɔre Jehoova sɛre kyɛ piili zanna boma, a maŋ yuo la te teɛroŋ ane te sukyie ka te sage a Baabole poɔ wuluu na teŋ waana ka te zanne na.

w16.09 5 wɛl. 11-12

“Ta Wa Vɛnɛ Ka Ho Eŋɛ Kyoɔrɔ”

Wuluu na teŋ maŋ nyɛrɛ te Kristabiiri lammore, te lammobilii, te lammobɛrɛ, ane te puoruu sakuuri na maŋ eŋnɛ teŋ faŋa yaga zaa. A wuluu ŋa maŋ soŋ teŋ teŋ taa poteɛrɛ naŋ soma, a de yɛlɛ biŋ te nimitɔɔreŋ Jehoova puoruu poɔŋ, a toɔ̃ tonɔ te Kristabiiri ferebo toma velaa zaa. (Yiem. 119:32) Ka lɛ ho maŋ moɔrɛɛ ho moɔbo zaa ka ho toɔ̃ nyɛ faŋa emmo yi a wuluu ama zaa poɔŋ bee?

Jehoova da soŋɛɛ a Izerayɛl biiri baŋ zɔɔtoɔ̃ Amelɛk ane Etopiya noba. O da lɛ ko la Niihemaiya ane o tontoŋtaaba na faŋa baŋ leɛ mɛ Gyɛruzɛlɛm daŋkyime na. Lɛ neŋ o zu la, Naaŋmen na toɔ̃ ko teŋ faŋa ka te are kpeɛŋaa saŋa na noba naŋ wa dɔgrɔ te, saŋa na teŋ wa tuoro eŋkyere yɛlɛ, kyɛbee saŋa na noba naŋ wa zagre ka ba kyɛlle woŋ duoro na teŋ moɔlɔ a naaŋ moɔloo poɔŋ na. (1 Pit. 5:10) Yelmeŋɛ la, te ba kaara soriŋ ka Jehoova tu soseɛlee kaŋa poɔŋ e a yɛlɛ ŋa ko te. Kyɛ aseŋ ka te meŋ de gbɛre a e yelkaŋa. Aseŋ ka te maŋ kanna Naaŋmen Yelbiri, a maŋ nare te menne a gɛrɛ a daagbuli poɔ lammore na zaa. Aseŋ ka te maŋ bɔ wagre a zanna boma te menneŋ, a erɛ te booree zannoo meŋ. A lɛ fɛrɛɛŋ ka te maŋ tu puoro eŋɛŋ a wuli ka te dɛlɛɛ Jehoova kpɛlɛŋkpɛlɛŋ. Azuŋ, a ba seŋ ka te maŋ tere sori ka te yelboɔree, ane te yel-eree pigi sori na Jehoova naŋ maŋ tu a eŋnɛ te faŋa, a kyɛ diire te sukyie na. Ka hooŋ wa nyɛ ka ho eŋɛ kyoɔrɔŋ a yi a yɛlɛ ama kaŋa zaa poɔŋ, puore sɔre Naaŋmen ka o soŋ bo. Ho na nyɛɛ lɛ Naaŋmen vooroŋ soŋ naŋ na ko bo ‘faŋa, a boɔbo ane a kpeɛ̃o ka ho de toŋ neŋ toma.’ (Fil. 2:13) Kyɛ, ka teneeŋ wa nyɛ ka te yɔɔmine eŋɛ kyoɔrɛɛ, wala teŋ na baŋ e a de soŋ ba?

Baabole Poɔ Yelsonne

it-1 1242

Mɔbaa

A yi a Baabole poɔŋ, saŋa kaŋa ba maŋ de la mɔbaare manne neŋ yɛlɛ mine. Saŋa na Gyoob naŋ da tuore yelkpeɛne yaga zaa ka lɛ vɛŋ oŋ dire woore na, o da yeleeŋ ka o wa leɛ la “mɔbaare yɔɔ.” (Jb 30:29) A Izerayɛl biiri da gaa la zɔɔre kaŋa ka ba dɔndɔnne te zɔɔtoɔ̃ ba a eŋ ba nyaaba yaga. Azuŋ, a yieli yiele da teɛrɛɛ lɛ na mɔbaare naŋ maŋ te lantaa a ɔɔrɔ noba naŋ kpikpi gaŋ na nɛne na yɛlɛ a yelka: “Zie na mɔbaare naŋ kpeɛrɛ na hoŋ ŋmore te.” (Ym 44:19; de manne neŋ Ym 68:23) Saŋa na Baabilɔŋ noba naŋ da wa ŋmaa gyeere Gyɛruzɛlɛm yuoni 607 B.C.E. na, a da vɛŋɛɛŋ ka kɔŋkpoŋ le a teŋkpɛŋ poɔŋ. Lɛ da vɛŋɛɛŋ ka bi-mamine da erɛ ba menne biiri nimikuonii. Gyeremaiya da de la lɛ na o “noba” naŋ da erɛ ba menne biiri nimikuonii na manne neŋ lɛ na mɔbaare naŋ maŋ kaara a bilii na.—La 4:3, 10.

JUNE 3-9

BAABOLE POƆ YELNIMIZEERE YIEME 45-47

Yieloŋ Kaŋa Naŋ Manna A Naa Kultaa Na Yɛlɛ

w14 2/15 9-10 wɛl. 8-9

Vɛŋ Ka A Pe-Bile Kultaa Na Korɔ Bo Popeɛloŋ Yaga Zaa

Kanne Yieme 45:13, 14a. A Baabole yeleeŋ ka a pɔgpaalaa narɛɛ o meŋɛ ko a kultaa naŋ e tegroŋ yaga zaa na, azuŋ o “veɛlɛŋ yaga zaa te gaali.” A yi Yel-iriwulaa 21:2, ba de la a pɔgpaalaa ŋa manne neŋ teŋkpɛŋ kaŋa, ona la Gyɛruzɛlɛm Paalaa na. A sɛgre gaaɛ nimitɔɔre a yelka, o “su [la] bonveɛle a ko o serɛ.” A teŋkpɛŋ ŋa naŋ be sazuŋ na taaɛ “Naaŋmen gyeremɛ,” a nyegrɛ o zaa “aŋa kusi-nyegraa naŋ nyegrɛ yaga zaa, aŋa Gyasepa kuuri naŋ nyegrɛ a pɛle o zaa fanana.” (Yel. 21:10, 11) A Yel-iriwulaa gane na wulee lɛ na a Gyɛruzɛlɛm Paalaa ŋa naŋ veɛlɛ yaga zaa aseŋ. (Yel. 21:18-21) Yɛlɛ na a yieli yiele naŋ yelka a pɔgpaalaa ŋa “veɛlɛŋ yaga zaa te gaali” eɛ yelmeŋɛ yoŋ. A ba e te seɛlee meŋ, bonso sazuŋ baŋ na e a kultaa ŋa naŋ e tegroŋ yaga zaa na.

Nembuo baŋ de a pɔgpaalaa ŋa wa ko? Ba de oŋ wa ko a pɔgderɛ naŋ la a Mɛzaaya Naa na. Saŋa zaa baŋ nara a pɔge ŋa korɔ a Pɔgderɛ. Ba de la ‘a yelbiri naŋ waa ŋa koɔ̃ na a de pɛge ne o oŋ yi fanana.’ O eɛ “forifori, ka sããnaa zaa ba kye o eŋɛŋ.” (Efe. 5:26, 27) A pɔgpaalaa ŋa su la boma naŋ soma yaga, a seŋ neŋ a ko a kultaa naŋ e tegroŋ na. Ɛɛ, “ba de la salma maale neŋ o bonsuurii.” “Ka ba naŋ de o waana neŋ a naa zie, o na su la bonsuurii ba naŋ wuo aŋ veɛlɛ yaga zaa.” Bonso “ba ko oŋ sori ka o su bonsuurii naŋ soma, a nyegrɛ, a e forifori meŋ—a bonsuurii naŋ soma na are ko la a neŋforifori sontuubu yel-eree na.” Lɛ wuleeŋ ka ba narooŋ velaa zaa a ko a Pe-bile kultaa na.—Yel. 19:8.

w22.05 17 wɛl. 10-12

Yɛlɛ Yel-iriwulaa Gane Naŋ Yel Kyaare Ho Nendaare Kaŋa

Wala ka Jehoova na e saŋa na a paalonne noba naŋ wa ka ba zɔɔ ne te na? Jehoova yelko teŋ ka: “N sutoloŋ na na iriŋ yaga zaa.” (Izik. 38:18, 21-23) Yel-iriwulaa zuri 19 wuli teŋ yɛlɛ naŋ na e a puoreŋ. Jehoova na toŋɛɛ O Bidɔɔ na ka o wa zɔɔ faa O puorebiiri, a kyɛ zɔɔtoɔ̃ o dɔndɔnne meŋ zaa. Yezu neŋ a “sogyare naŋ be sazuŋ,” ba na la a malekere naŋ de yelmennoŋ puoro Jehoova na ane a 144,000 la na wa zɔɔ a zɔɔre ŋa. (Yel. 17:14; 19:11-15) Bo yɛlɛŋ na yi a zɔɔre ŋa poɔŋ wa? Ba na sãã la neŋfaare zaa, ane nensaaleba yelsɛgraa zaa naŋ zɔɔrɔ neŋ Jehoova kpɛlɛŋkpɛlɛŋ.—Kanne Yel-iriwulaa 19:19-21.

Hooŋ leɛ ŋmaa foto ho teɛroŋ poɔ a nyɛ lɛ na Naaŋmen puorebiiri naŋ na taa popeɛloŋ saŋa na baŋ na wa sãã Naaŋmen dɔndɔnne zaa baare kpɛlɛŋkpɛlɛŋ na. A lɛ saŋa na, ba na taaɛ popeɛloŋ yaga zaa. Yelmeŋɛ la, saŋa na baŋ na wa sãã Baabilɔŋ Kpoŋ na, malekere naŋ be sazuŋ na kyeerɛŋ neŋ popeɛloŋ. Kyɛ, yelkaŋa lɛ bebeŋ a na vɛŋ ka a malekere maaleŋ taa popeɛloŋ yaga zaa. (Yel. 19:1-3) Ana yɛlɛ na la a Yel-iriwulaa gane na baaraa yɛlɛ, ona la a “Pe-bile kultaa na.”—Yel. 19:6-9.

Bo saŋa ka a kultaa ŋa na nyɛ eebo? Sɛre ka Hammagedon zɔɔre na na piili na, a noba 144,000 zaa na be la sazuŋ. Kyɛ a lɛ saŋa na naane ka a Pe-bile kultaa na na nyɛ eebo. (Kanne Yel-iriwulaa 21:1, 2.) A kultaa ŋa na nyɛɛ eebo Hammagedon zɔɔre na puoreŋ. A saŋa baŋ na zɔɔ a zɔɔre baare a sãã Naaŋmen dɔndɔnne zaa kpɛlɛŋkpɛlɛŋ na.—Yiem. 45:3, 4, 13-17.

it-2 1169

Zɔɔre

Saŋa na a zɔɔre ŋa naŋ na wa baare na, emmaaroŋ na be la a teŋgane ŋa zuŋ yuomo turi. A yɛlɛ na a yieli yiele naŋ da yiele a yelka, “[Jehoova] na vɛmeŋ ka zɔɔre baare a tendaa lombori zaa. O na kɔɔrɛɛ ba tama ane ba kpama zaa; O na nyege la ba zɔɔre torikori zaa neŋ vũũ,” da nyɛɛ eebo saŋa na Naaŋmen naŋ da sãã a Izerayɛl paaloŋ dɔndɔnne zɔɔzɔɔ boma zaa na. Lɛ da vɛŋɛɛŋ ka emmaaroŋ be a Izerayɛl paaloŋ poɔŋ. Saŋa na Krista naŋ na wa zɔɔtoɔ̃ Hammagedon zɔɔre na saŋa na, a tendaa zaaŋ na paale neŋ emmaaroŋ meŋɛmeŋɛ. (Ym 46:8-10) Noba naŋ na nyɛ apoɔsori ka ba nyɛ nyɔvore naŋ ba taa baaraa “na kuree ba zɔɔzɔɔsɔre ka a leɛ koɔbo kue, a kure ba kpama ka a leɛ sɔre baŋ maŋ de ŋmaara danuuri . . . ba koŋ lɛ zanne zɔɔre meŋ zaa.” Ana nyɛɛ eebo “bonso sogya-muno daana Jehoova noɔre yelbie la ama.”—Ai 2:4; Mai 4:3, 4.

Baabole Poɔ Yelsonne

w17.04 11 wɛl. 9

Boŋ Na Gaa Saŋa Na Naaŋmen Naaloŋ Naŋ Na Wa Piili Dire Naaŋ?

Boŋ na wa leɛre a nensaaleba yelsɛgree naŋ ba taa yelmeŋɛ na gbɛbɔgriŋ? Ka lɛ ba na sɛgrɛɛ a teŋɛzu yɛlɛ velaa zaa Hammagedon zɔɔre na puoreŋ bee? A Baabole yelko teŋ ka: “Aŋa lɛ na oŋ eŋ noɔre na, te kyɛnlɛɛ sazu paala ane teŋgaŋ-paalaa, beŋ ka sontuuribo na zeŋ na.” (2 Pit. 3:13) A sazu ane a teŋgaŋ-koroo are ko la gɔmenante noba naŋ ba dire yelmennoŋ, ane a nensaaleba laŋ zemmo yelsɛgraa naŋ be ba kpeɛ̃o puliŋ na. A zaa koŋ lɛ bebe. Boŋ na wa leɛre a gbɛbɔgriŋ? A yelbie “sazu paala ane teŋgaŋ-paalaa” wuleeŋ ka gɔmenante paalaa kaŋa na bebeŋ. Ana gɔmenante na na kaarɛɛ a teŋgane ane nensaaleba laŋ zemmo yelsɛgraa na velaa zaa. Ka Yezu Kristaŋ wa piili dire o Naaloŋ na, o na sɛgrɛɛ yɛlɛ velaa zaa ka a tuuro taa velaa zaa aŋa lɛ na Jehoova gyogo naŋ wuli na. (1 Kor. 14:33) Azuŋ, a yi a “teŋgaŋ-paalaa” poɔŋ, ba na sɛgrɛɛ yɛlɛ velaa zaa. Ba na kaa iree dɔbɔ naŋ e yelmeŋɛ deme ka ba kaara a teŋɛzu yeltaree zu velaa zaa. (Yiem. 45:16) Krista ane a 144,000 la na maŋ de sowuli korɔ a dɔbɔ ŋa. Hooŋ leɛ ŋmaa foto ho teɛroŋ poɔŋ, a nyɛ a nensaaleba yelsɛgree ŋa zaa naŋ ba dire yelmennoŋ na naŋ pare wa gaa, kyɛ ka yelsɛgraa bonyeni naŋ taa noɔreyeni ane yelmennoŋ bebe tegitegilɛ.

JUNE 10-16

BAABOLE POƆ YELNIMIZEERE YIEME 48-50

Bidɔgreba—Yɛ Soŋ Yɛ Booree Deme Ka Ba Taa Sagediibu Naŋ E Kpeɛŋaa Jehoova Lantaapuoruu Na Eŋɛŋ

w22.03 22 wɛl. 11

Yelmeŋɛ Puoruu Maŋ Vɛŋeŋ Teŋ Maaleŋ Taa Popeɛloŋ

Ka teneeŋ wa zanna Naaŋmen Yelbiri na a de wulo te biiri meŋ, a eɛ puoruu te naŋ de korɔ Jehoova. A Pɛnnoo Bebiri na Jehoova naŋ da de ko a Izerayɛl biiri na da maŋ eɛ soyuo ko ba ka ba bare ba bebiri zaa yeltaree eebo, a kyɛ zeŋ dieŋ a zanne boma ka lɛ vɛŋ ka ba neŋ Jehoova niiloŋ e kpeɛŋaa. (Yiib. 31:16, 17) A Izerayɛl biiri naŋ da puoro Jehoova yelmennoŋ poɔŋ na da maŋ wulee ba biiri Jehoova yɛlɛ, ane lɛ o yɛlɛ naŋ soma aseŋ. A somaŋ yaga zaa ka te meŋ maŋ bɔ wagre a kanna, a kyɛ lɛ zanna Naaŋmen Yelbiri na. A yɛlɛ ŋa poɔ la puoruu na teŋ de korɔ Jehoova na poɔŋ, a maŋ soŋ teŋ teŋ tage peɛle Jehoova yaga meŋ. (Yiem. 73:28) Ka teneeŋ maŋ laŋ zanna a Baabole aŋa booree deme, a na vɛŋeŋ ka te soŋ te bibiiri na ka ba neŋ ba sazu Saa naŋ taa nɔmmo na niiloŋ e kpeɛŋaa yaga.—Kanne Yieme 48:13.

w11 3/15 19 wɛl. 5-7

Ho Taaɛ Ananso Ka Ho Kyillɛ

A Baabole yeleeŋ ka: “Kyɛŋ gyili Zaayɔŋ zaa; gyili o zaa wa tuore; sɔre o ziduorii. Vɛŋ ka ho sukyiri be o daŋkyime na baŋ mɛ a de go o na. Peɛre o ziduorii naŋ e kpeɛne na yɛlɛ, ka lɛ vɛŋ ka ho toɔ̃ manne a yɛlɛ a ko dɔge-tutaa naŋ waana.” (Yiem. 48:12, 13) A yieli yiele da eŋɛɛ a Izerayɛl biiri faŋa ka ba maŋ mãã ba menne a kaa Gyɛruzɛlɛm velaa zaa. Hooŋ leɛ ŋmaa a yɛlɛ ŋa foto ho teɛroŋ poɔŋ, a nyɛ a Izerayɛl booree naŋ maŋ tu sori a gaa a teŋkpɛŋ naŋ e forifori ŋa ka ba te di a yuoni zaa tige na. Ka ba naŋ wa nyɛ a teŋkpɛŋ naŋ e forifori ane a ŋmenpuoredie naŋ veɛlɛ yaga zaa, a maŋ tɔ la ba sukyie a e yɛlɛ baŋ koŋ baŋ inni. A maŋ eŋ baŋ faŋa baŋ “manne a yɛlɛ a ko dɔge-tutaa naŋ waana.”

Leɛteɛre a Siiba pɔgenaa na yɛlɛ. Saŋa na oŋ da woŋ ka Soolomoŋ taaɛ yɛŋ naŋ e zuluŋ, a lɛ dire naaloŋ kaara a Izerayɛl biiri zu velaa na, o da ba sage a yɛlɛ di te baare. Boŋ da somoo oŋ wa sagedi ka yɛlɛ na oŋ woŋ na sereŋ eɛ yelmeŋɛ? O da yeleeŋ ka, “N da ba sage duoro na maŋ da wono na, ŋaaŋ yɛŋ maaŋ meŋɛ waɛŋ a de N meŋɛ nimie a nyɛ.” (2 Tun. 9:6) Yelmeŋɛ la, bon na te naŋ de te ‘menne nimie’ nyɛ na baŋ tɔ la te sukyie yaga zaa.

Wala hoŋ na toɔ̃ e soŋ ho biiri ka ba de ba ‘menne nimie’ nyɛ tonkpeɛne na Jehoova lantaapuoruu naŋ tonɔ na? Ka Jehoova Sieree Deme Bɛɛtil tomazie na kaŋaŋ peɛle zie na yɛ naŋ kpeɛrɛ na, yɛ moɔ a gaa be a te nyɛ lɛ be naŋ waa. Aŋa mannoo poɔŋ, zie na Mandy ane Bethany naŋ da kpeɛrɛ neŋ Bɛɛtil tɔɔre da e ŋa maalere 900 (kyɛbee kilometare 1,500), kyɛ saŋa na baŋ da naŋ e bibilii a baara na, ba dɔgreba da maŋ sɛgrɛɛ yɛlɛ a de ba gaaneŋ a Bɛɛtil tomazie naŋ be ba paaloŋ na baŋ te nyɛ lɛ be naŋ waa. Mandy ane Bethany yeleeŋ ka: “Sɛre teŋ na gaa a Bɛɛtil tomazie a te nyɛ lɛ be naŋ waa na, te da maŋ teɛreŋ ka neŋnyaane yoŋ la be Bɛɛtil, ka noba naŋ bebe na meŋ yɛlɛ e tuo yaga. Kyɛ, saŋa na teŋ wa gaa be na, te nyɛɛ baapaalba naŋ tonɔ tonkpeɛne yaga a korɔ Jehoova, a taa popeɛloŋ meŋ. Te wa nyɛɛŋ ka Jehoova lantaapuoruu eɛ kpoŋ yaga zaa a gaŋ lɛ na teŋ da teɛre na. Ka teneeŋ wa gaa Bɛɛtil ka te gaa te nyɛ lɛ na be naŋ waa, a maŋ eŋ teŋ faŋa yaga.” Lɛ na Mandy ane Bethany naŋ de ba menne nimie a nyɛ tonkpeɛne na Naaŋmen lantaapuoruu naŋ tonɔ na eŋ baŋ faŋa baŋ piili tonɔ a paaneɛ toma. A puoreŋ, ba toŋboɔle baŋ ka ba wa tonɔ Bɛɛtiliŋ wagre fẽẽ kaŋa poɔŋ.

w12 8/15 12 wɛl. 5

Yɛ Erɛ Yɛ Yɛlɛ Aŋa A Naaloŋ Biiri

Maŋ zanna te takoreŋ yɛlɛ. Ka neɛŋ boɔrɔ ka o be gɔmenante kaŋa puliŋ, aseŋ ka o zanne yelkaŋa kyaare ana gɔmenante na takoreŋ yɛlɛ. Lɛ neŋ o zu la, noba na zaa naŋ boɔrɔ ka ba be Naaŋmen Naaloŋ puliŋ ka a Naaloŋ dire naaŋ a kaara ba zu na seŋ ka ba meŋ zanne a Naaloŋ takoreŋ yɛlɛ. Koora bidɔbɔ naŋ da bebe takoreŋ saŋa Izerayɛl paaloŋ poɔŋ na eɛ ewuli soŋ a ko te. Ka ba naŋ wa nyɛ Gyɛruzɛlɛm ane a ŋmenpuoredie, a leɛteɛre a teŋkpɛŋ ŋa takoreŋ yɛlɛ, a maŋ ko baŋ popeɛloŋ yaga zaa. A kubo ane a tɛne na baŋ da de mɛ a teŋkpɛŋ na naaneŋ da vɛŋ ka a zie veɛlɛ yaga zaa. Kyɛ bon na a teŋkpɛŋ ane a ŋmenpuoredie naŋ are ko na la da vɛŋ baŋ taa popeɛloŋ yaga. Gyɛruzɛlɛm da la “a Nakpɛŋ teŋkpɛŋ.” A Naa ŋa la Jehoova. Gyɛruzɛlɛm ka a Izerayɛl biiri zaa da maŋ wa lantaa a de puoruu korɔ Jehoova. Beŋ baŋ da maŋ wulo a noba Jehoova Bege na. Ka Naa kaŋaŋ wa dire naaŋ a kaara a Izerayɛl biiri, Gyɛruzɛlɛm teŋkpɛŋ na poɔŋ ka o nakogi maŋ be. O da maŋ diree naaŋ a kaara ba zu a wulo ba Jehoova yelmeŋɛ nɔmmo na. (Kanne Yieme 48:1, 2, 9, 12, 13.) Ka ho meŋ? Ka lɛ ho maŋ boɔrɔŋ ka ho zanne a kyɛ leɛteɛre Jehoova lantaapuoruu kyɛlee naŋ be a teŋɛzuŋ na takoreŋ yɛlɛ bee? Ka hooŋ zanne Jehoova lantaapuoruu na yɛlɛ, ane sori na Jehoova naŋ tuuro a sonnɔ o puorebiiri zenɛ na, a na soŋ boŋ ka ho wa nyɛ ka Naaŋmen Naaloŋ sereŋ bebeŋ meŋɛmeŋɛ. A na eŋ boŋ faŋa ka ho maaleŋ taa a boɔbo yaga zaa ka ho moɔlɔ a Naaloŋ duorisoŋ korɔ noba yaga.—Jer. 9:24; Luk. 4:43.

Baabole Poɔ Yelsonne

it-2 805

Bondaaloŋ

A Izerayɛl paaloŋ da eɛ teŋɛ bondaaŋ boma naŋ bebe yaga zaa. Azuŋ, ba da maŋ taaɛ bondirii ane dãã yaga. (1Nm 4:20; Ik 5:18, 19) A bondaaŋ boma ŋa da vɛŋɛɛŋ baŋ tage ba menne yi yelkpeɛne na baŋ na tuoro ka ba naŋ da e nandaaneba. (Ye 10:15; Ik 7:12) Yelmeŋɛ la, a da eɛ Jehoova boɔbo ka a Izerayɛl biiri maŋ tonɔ tonkpeɛne a nyɛ bondaaŋ boma, a di a boma meŋ woŋ noɔ̃ (de manne neŋ Ye 6:6-11; 20:13; 24:33, 34). Kyɛ, Jehoova da kpãã baŋ a yelko ba ka ba kaara soŋ, ka ba bondaaŋ boma na baŋ taa na ta wa vɛnɛ ka ba inne Neɛ naŋ ko ba a bondaaŋ boma na yɛlɛ, kyɛbee ka ba leɛ dɛle ba bondaaŋ boma na. (Du 8:7-17; Ym 49:6-9; Ye 11:4; 18:10, 11; Jr 9:23, 24) Jehoova da leɛteɛrɛɛ a Izerayɛl biiri ka bondaaŋ boma koŋ bebe tegitegilɛ. (Ye 23:4, 5) O da lɛ vɛŋɛɛŋ baŋ baŋ ka ba koŋ toɔ̃ de ba bondaaŋ boma na meŋ yɔɔdeɛ ba menne ka lɛ vɛŋ ka ba koŋ kpi. (Ym 49:6, 7) Bondaaŋ boma ba taa tɔnɔ zaa a ko kũũ (Ym 49:16, 17; Ik 5:15). Jehoova da vɛŋɛɛŋ baŋ baŋ ka, ka ba naŋ de ba bondaaŋ boma na tegroŋ yaga zaa, a na vɛŋeŋ ka ba faara ba taaba. Lɛ eebo na vɛŋeŋ ka Jehoova poɔ sãã ne ba yaga. (Ye 28:20; de manne neŋ Jr 5:26-28; 17:9-11.) Ba da lɛ nyɛɛ faŋa emmo ka ba maŋ de ba “bonnanɛɛ eŋnɛ Jehoova.”—Ye 3:9.

JUNE 17-23

BAABOLE POƆ YELNIMIZEERE YIEME 51-53

Yɛlɛ Naŋ Na Toɔ̃ Soŋ Bo Ka Ho Ta Wa Ŋmeɛrɛ Gbɛɛ Naŋ E Nimizeɛ Yaga Zaa

w19.01 15 wɛl. 4-5

Wala Hoŋ Na Toɔ̃ E Go Ho Sukyiri?

A yi Yeng Yelibie 4:23, a yelbiri “sukyiri” are ko la “neɛ na te naŋ waa te pooreŋ” kyɛbee “a nensaal-sɔglaa na.” (Kanne Yieme 51:6.) A yi yɛlɛ mine meŋ poɔŋ, a yelbiri “sukyiri” na baŋ wulee yɛlɛ te naŋ teɛrɛ, te poteɛrɛ, te poboɔbo yɛlɛ, ane te vɔlaa. Sukyiri wulee neɛ na te naŋ sereŋ waa meŋɛmeŋɛ te pooreŋ. O ba wuli lɛ na teŋ maŋ erɛ te yɛlɛ yeŋeŋ ka noba nyɛrɛ na.

Yɛ vɛŋ ka te de te laafeeloŋ yɛlɛ manne neŋ lɛ te naŋ sereŋ waa te sukyie pooreŋ meŋɛmeŋɛ. A dɛndɛŋ soba, ka teneeŋ boɔrɔ ka te taa laafeeloŋ naŋ soma, aseŋ ka te maŋ dire bondi-sonne, a kyɛ dɛnnɛ te kɔbɔ meŋ wagre zaa. Lɛ neŋ o zu la, ka teneeŋ boɔrɔ ka te e noba naŋ are kpeɛŋaa Jehoova puoruu poɔŋ, aseŋ ka te maŋ moɔ̃ niŋe a zanna a Baabole, a lɛ puoro sɔrɔ Jehoova meŋ. A fɛrɛɛŋ ka te wulo sagediibu meŋ Jehoova eŋɛŋ. Wala teŋ na baŋ e a de wuli ka te wulee sagediibu Jehoova eŋɛŋ? Ka teneeŋ maŋ de yɛlɛ na teŋ zanna na tonɔ neŋ toma, a manna te sagediibu yɛlɛ meŋ korɔ noba, lɛ wuleeŋ ka te wulee sagediibu Jehoova eŋɛŋ. (Uro. 10:8-10; Gyi. 2:26) A yiiloŋ soba, ka teneeŋ leɛ kaa te eŋdaa, aminekaŋaŋ te na teɛreŋ ka te eɛ noba naŋ taa laafeeloŋ naŋ paale. Kyɛ ka teneeŋ ba kaa soŋ, te na baŋ eɛ noba naŋ beɛrɛ te pooreŋ. Lɛ neŋ o zu la, ka teneeŋ leɛ kaa yɛlɛ na teŋ maŋ erɛ Jehoova puoruu poɔŋ bebiri zaa na, a na baŋ vɛŋeŋ ka te teɛre ka te taaɛ sagediibu naŋ e kpeɛŋaa. Kyɛ, ka teneeŋ ba kaara soŋ, vɔlfaare na baŋ be la te eŋɛŋ a nyɛrɛ nimitɔɔre gaabo. (1 Kor. 10:12; Gyi. 1:14, 15) Aseŋ ka te baŋ ka Setaana boɔrɔŋ ka te taa o teɛroŋ na. Sobuo oŋ maŋ boɔrɔ ka o tu a vɛŋ ka te taa o teɛroŋ na? Wala teŋ na baŋ e a go te menne?

w15 6/15 14 wɛl. 5-6

Te Na Baŋ Eɛ Noba Naŋ E Forifori

Sori na kaŋa naŋ e nimizeɛ teŋ na baŋ tu a de wuli ka te boɔrɔŋ ka Jehoova soŋ te ka te zɔɔtoɔ̃ teɛroŋ faare la teŋ na maŋ puoro sɔrɔ Jehoova. Ka teneeŋ maŋ tu puore sɔroo eŋɛŋ a tagra peɛlɛ Jehoova, o meŋ na tagra peɛlɛ teŋ. O na yi la o poɔ zaa a ko te o vooroŋ soŋ na. A vooroŋ soŋ na eŋ teŋ faŋa ka te iri teɛroŋ faare bare te teɛroŋ poɔŋ a toɔ̃ e forifori. Azuŋ, yɛ vɛŋ ka te maŋ puoro sɔrɔ Naaŋmen nimizeɛ̃ a vɛŋ ka o baŋ ka, te boɔrɔŋ ka te maŋ pɛlɛ o poɔ a yi yɛlɛ na teŋ maŋ teɛrɛ te sukyie pooreŋ na. (Yiem. 19:14) A na somaŋ yaga zaa ka te maŋ puore sɔre Jehoova ka o peɛre te a nyɛ ka “so-faa,” kyɛbee vɔlfaa, bee teɛroŋ faa kaŋa be la te eŋɛŋ, a na baŋ vɛŋ ka te e yelfaa kaŋa bee? (Yiem. 139:23, 24) Ka lɛ te maŋ puore sɔrɛɛ Jehoova ka o soŋ te ka te nyɔge te sagediibu kpeɛŋaa saŋa na teŋ wa tuoro pigrinyɛ bee?—Mat. 6:13.

Lɛ na ba naŋ guoli te, kyɛbee lɛ na teŋ da maŋ erɛ te yɛlɛ saŋa kaŋa naŋ pare na toɔ̃ vɛŋeŋ ka te maŋ boɔrɔ ka te erɛ yɛlɛ Jehoova naŋ yelka a ba soma. Kyɛ aneazaa, Jehoova na toɔ̃ soŋ teŋ ka te leɛre te eebo a erɛ yɛlɛ naŋ pɛlɛ o poɔ. Naa Deevid meŋɛ da baŋɛɛ a yɛlɛ ŋa. Saŋa na o neŋ Batisiiba naŋ da sãã kultaa na, o da puore sɔrɛɛ Jehoova a yelka: “Maale sukyiri naŋ pɛgeyi eŋ ma, a de vooroŋ naŋ e paalaa eŋ ma, vooroŋ naŋ are kpeɛŋaa.” (Yiem. 51:10, 12) Te naŋ e noba naŋ ba pɛgeyi na zuŋ, a maŋ eɛ kpeɛŋaa yaga ka te zagre yelfaare bare. Kyɛ Jehoova na baŋ ko teŋ o vooroŋ soŋ na, ka o soŋ te ka te maŋ sagra o nɔɛ. Haali ka teneeŋ e noba naŋ taa vɔlfaare ka a be te enne kɔɔre, ka lɛ vɛŋ ka a e kpeɛŋaa ko te ka te teɛrɛ yɛlɛ naŋ e forifori. Kyɛ Jehoova na toɔ̃ soŋ teŋ ka te tuuro o bege na, a lɛ zagre a vɔlfaare ŋa zaa bare. Jehoova na toɔ̃ soŋ teŋ ka te tage te menne yi vɔlfaa naŋ na baŋ nyɛ kpeɛ̃o te zuŋ yaga zaa eŋɛŋ.—Yiem. 119:133.

Baabole Poɔ Yelsonne

it-1 644

Deoge

O da eɛ Iidom neɛ naŋ da e Naa Sɔɔl pekyeeneba zukaareba na kaŋa. (1Sa 21:7; 22:9) Deoge da eɛ zukaara naŋ da taa arezi-kpoŋ Naa Sɔɔl tontonneba na poɔŋ. Aneazaa ka o da eɛ Iidom neɛ, kyɛ o da leɛ tuuree a Izerayɛl biiri. ‘Ba da vɛŋɛɛŋ oŋ be Jehoova nimitɔɔreŋ’ Nɔɔb teŋɛ na poɔŋ. Aminekaŋaŋ, o da eŋɛɛ noɔre ko Jehoova, kyɛbee o da eɛ yɛlɛ mine ka lɛ vɛŋ oŋ ba lɛ e forifori, kyɛbee kɔŋkɔnne baaloŋ la da vɛŋ oŋ da be Jehoova nimitɔɔreŋ Nɔɔb teŋɛ naŋ. Saŋa na Deoge naŋ da be Nɔɔb teŋɛ na, o da nyɛɛ Ŋmenpuore Wedeɛrekpoŋ Ahiimɛlɛk naŋ de boroboro ane Golaiyat zɔɔzɔɔsoɔ na ko Deevid. A puoreŋ, saŋa na Sɔɔl naŋ da wa yele yɛlɛ korɔ o tontonneba a yelka ba irooŋ tere na, Deoge da mannɛɛ yɛlɛ na zaa oŋ da nyɛ Nɔɔb teŋɛ na a ko Sɔɔl. Sɔɔl da boɔlɛɛ a ŋmenpuore wedeɛrekpoŋ ane a ŋmenpuore wedeɛreba zaa naŋ da be Nɔɔb teŋɛ na, a soore Ahiimɛlɛk a yɛlɛ ŋa. A puoreŋ, Sɔɔl da ko la noɔre ka o tontonneba na ko a ŋmenpuore wedeɛreba zaa. Saŋa na a tontonneba naŋ da zagre na, Deoge yɛŋ da ireeŋ a e yɛlɛ na Sɔɔl naŋ yelka o e na. O da lonnee wieoŋ a ko ŋmenpuore wedeɛreba naŋ ta 85. Saŋa na oŋ wa e a potu-yɛlɛ ŋa bare na, o da gaa la Nɔɔb teŋɛ na a te sãã saammo yaga. O da te ko la noba na zaa naŋ da be a teŋɛŋ, bibiiri ane neŋnyaane zaa. O da ko la a dunni meŋ zaa.—1Sa 22:6-20.

Ka hooŋ kaa Yieme 52 piilee yɛlɛ na, Deevid da mannɛɛ Deoge yɛlɛ ka: “Ho zele direŋ aŋa kuribo ba naŋ saale oŋ dire yaga zaa, a maŋ nare ka o e yelfaa, a tonɔ daware toma. Ho nɔŋ la faaloŋ a gaŋ yɛlɛ naŋ soma, a nɔŋ zirii ŋmaabo a gaŋ hoŋ na yele yɛlɛ naŋ seŋ neŋ. Ho nɔŋ la yelzaa naŋ na baŋ pere ho tɔsoba, Oo hooŋ naŋ taa daware soba zele.”—Ym 52:2-4.

JUNE 24-30

BAABOLE POƆ YELNIMIZEERE YIEME 54-56

Naaŋmen Be La Ho Zieŋ

w06 8/1 22 wɛl. 10-11

E Yɛŋ Soba—Zoro Naaŋmen

Saŋa kaŋa, Deevid da zo gaa la Filiisitiya naa na baŋ boɔlɔ Akiis zie a te bɔ sɔglezie. A naa ŋa da be la Filiisitiya teŋɛ na baŋ boɔlɔ Gaat na. A teŋɛ ŋa ka Golaiyat da yi. (1 Saamiuel 21:10-15) A naa tontonneba da yeleeŋ ka Deevid eɛ ba teŋɛ na dɔndɔmɔ. Wala ka Deevid da e a yɛlɛ ŋa poɔŋ? O da puore sɔrɛɛ Jehoova a yeli yelzaa naŋ be o sukyiri poɔŋ a koo. (Yieme 56:1-4, 11-13) Aneazaa ka o da eɛ o yɛlɛ aŋa yaŋyaa ka lɛ vɛŋ oŋ toɔ̃ faa o meŋɛ yi a yɛlɛ ŋa poɔŋ, kyɛ Deevid da baŋɛɛŋ ka Jehoova la somoo oŋ toɔ̃ e lɛ a zo yi be. Lɛ na Deevid naŋ da de o sukyiri zaa a dɛle Jehoova a sagoo di kpɛlɛŋkpɛlɛŋ na wuleeŋ ka o zoree Naaŋmen.—Yieme 34:4-6, 9-11.

Aŋa Deevid te meŋ na baŋ wuliŋ ka te zoree Naaŋmen ka teneeŋ dɛle noɔre na oŋ eŋ ka o na soŋ teŋ ka te are te yelkpeɛne noɔreŋ na. Deevid da yeleeŋ ka: “De ho sokyɛnee zaa eŋ Jehoova nuuriŋ; dɛle ona yoŋ, o na arɛɛ ho gbɛbɔgriŋ a e yɛlɛ ko bo.” (Yieme 37:5) Lɛ ba wuli ka ka teneeŋ wa tuoro yelkpeɛne, aseŋ ka te bare yelzaa eŋ Jehoova nuuriŋ, a kyɛ zeŋ taŋ te nɔɛ a kyɛnlɛ ka Jehoova sɛgre a yelkpeɛŋaa ko te. Deevid da ba puore sɔre Naaŋmen ka o somoo a kyɛ te zeŋ taŋ o noɔre. O da de la yɛŋ ane bammo na Jehoova naŋ koo na toŋ neŋ toma, a toɔ̃ sɛgre yelkpeɛŋaa na oŋ da tuoro na. Kyɛ Deevid da baŋɛɛŋ ka nensaaleba moɔbo ba e yɛlɛ naŋ na toɔ̃ vɛŋ ka ba yɛlɛ kyɛnɛ soŋ zaa. Lɛ aŋ seŋ ka te meŋ maŋ teɛrɛ. Ka teneeŋ wa moɔ te moɔbo zaa baare, aseŋ ka te bare a yɛlɛ zaa eŋ Jehoova nuuriŋ. Saŋa kaŋa gba, yɛlɛ na aŋ seŋ ka te maŋ e la ka te bare yelzaa eŋ Jehoova nuuriŋ a dɛloo kpɛlɛŋkpɛlɛŋ. Ana saŋa la aŋ seŋ ka te maŋ zoro Jehoova na. Yɛlɛ na Deevid naŋ da yeli na na toɔ̃ dii la te sukyie. O da yeleeŋ ka: “Noba naŋ zoro Jehoova ne o maŋ nyɔgɛɛ zɔmennoŋ naŋ e kpeɛŋaa.”—Yieme 25:14.

cl 243 wɛl. 9

Bonzaa Kyebe A Na Baŋ “Wɛl Te Yi Naaŋmen Nɔmmo” Na Poɔŋ

Jehoova maŋ de la te kannyiri diibu na tegroŋ yaga zaa. (Matio 24:13) Leɛteɛre ka Setaana boɔrɔŋ ka ho leɛre ho puore ko Jehoova. Bebiri zaa ho naŋ dire yelmennoŋ korɔ Jehoova, a maŋ vɛŋeŋ hoŋ sonnɔ Jehoova oŋ ire Setaana soorebie na nɔɛ koroo. (Yeng Yelibie 27:11) Saŋa mine, a ba maŋ e mɔlɔ fẽẽ zaa ka te dire kannyiri. Te laafeeloŋ naŋ ba paale, te libi-yɛlɛ naŋ ba taa nimiri, yɛlɛ naŋ dɔɔnɔ te sukyie, ane yelkpeɛne mine na baŋ vɛŋeŋ ka yelkpeɛne na teŋ tuoro na maaleŋ nyɛrɛ nimitɔɔre gaabo yaga. Ka teneeŋ wa kaara yelkaŋa soriŋ kyɛ ka a ba nyɛrɛ eebo, a na baŋ kyoɔrɛɛ te enne. (Yeng Yelibie 13:12) Kyɛ ka teneeŋ wa moɔ a are kpeɛŋaa a di kannyiri a yelkpeɛne ŋa zaa poɔŋ, a maŋ vɛŋeŋ teŋ e neŋtegrɛ a ko Jehoova. A lɛ zuŋ ka Naa Deevid da puore sɔre Jehoova ka o de o nentaŋ eŋ o “wuoɔ” na poɔŋ. O da lɛ de la nyaa a yeli poɔ ka: “Ho ba sɛgaa eŋ ho gane poɔŋ bee?” (Yieme 56:8) Yelmeŋɛ la, nentaŋ na zaa te naŋ ŋmaara na eɛ tegroŋ yaga zaa ko Jehoova. O baŋɛɛ dɔgɛɛ na zaa te naŋ dire saŋa na teŋ are te yelkpeɛne noɔreŋ na. O baŋɛɛ yelmennoŋ na te naŋ dire na meŋ. Te nentaŋ ŋmaabo na eɛ tegroŋ yaga zaa o nimitɔɔreŋ.

w22.06 18 wɛl. 16-17

Lɛ Na Nɔmmo Naŋ Maŋ Soŋ Te Teŋ Zɔɔtoɔ̃ Dabeɛ̃

Setaana baŋɛɛŋ ka te zaa nɔŋ la nyɔvore. Azuŋ, o yeleeŋ ka te na de la bonzaa te naŋ taa, haali te neŋ Jehoova zɔmennoŋ na iri sareka ka lɛ vɛŋ ka te toɔ̃ taa nyɔvore. (Joob 2:4, 5) Nyɛ ziri-kpoŋ Setaana naŋ ŋma seŋ lɛ. Yelmeŋɛ la, Setaana la “taa kpeɛ̃o ka o de kũũ waneŋ.” O naŋ baŋ ka te zoree kũũ na zuŋ, saŋa kaŋa o maŋ boɔrɔŋ ka o tu be a tɔ dabeɛ̃ eŋ te ka te bare Jehoova. (Hib. 2:14, 15) Saŋa mine, Setaana maŋ tu la noba eŋɛŋ a kyɛ fuuro Jehoova puorebiiri ka, ka ba naŋ yelka ba naŋ na puoree Jehoova, lɛ yɛŋ ba na ko baŋ. Saŋa mine meŋ, Setaana na baŋ tu la baaloŋ kpeɛŋaa kaŋa naŋ kpɛ te eŋɛŋ, a moɔrɔ ka o vɛŋ ka te bare te sagediibu na. Dɔktare ane te booree deme naŋ ba puoro Jehoova na baŋ fɛrɛ teŋ ka te sage ka ba eŋ te zĩĩ. Kyɛ, te daŋ koŋ sage sãã bege na Naaŋmen naŋ biŋ na zaa. Kyɛbee, neɛ kaŋa na baŋ bɛnle teŋ a boɔrɔ ka te tu sori kaŋa naŋ na sãã a Baabole bege a saŋ te baaloŋ na.

Te kaŋa zaa ba boɔrɔ ka te kpi. Kyɛ te baŋɛɛŋ ka, ka teneeŋ kpi gba lɛ ba wuli ka Jehoova ba lɛ nɔnɔ te yɛlɛ. (Kanne Urom 8:37-39.) Ka Jehoova zɔmeŋɛ kaŋa zaaŋ wa kpi, o maŋ de la o soba eŋ o teɛroŋ poɔŋ. Azuŋ, a maŋ waa ŋa o soba aŋ naŋ voorɔ. (Luk. 20:37, 38) Jehoova eŋɛ nyagraŋ ka o seŋ ba zaa ka ba iri yi kũũni poɔŋ. (Joob 14:15) Jehoova yɔɔ la sane naŋ e kpoŋ yaga ka lɛ na vɛŋ ka te “na nyɛ nyɔvore naŋ ba taa baaraa.” (Gyn. 3:16) Te baŋɛɛŋ peɛlaaŋ ka Jehoova nɔŋɛɛ te yɛlɛ yaga zaa, a taa te yɛlɛŋ meŋ. Azuŋ, saŋa na teŋ wa beɛrɛ, kyɛbee ka nobaŋ wa de kũũ yɛlɛ a fuuro te, a saŋa naane aŋ seŋ ka te zagre Jehoova bare. Kyɛ, a saŋa la aŋ seŋ ka te gaa o zie a te bɔ sukyiridii, yɛŋ, ane faŋa. Lɛ neŋ o zu ka Valérie neŋ o serɛ da e.—Yiem. 41:3.

Baabole Poɔ Yelsonne

it-1 857-858

Neɛ Naŋ Baŋ Yɛlɛ Naŋ Na E Nendaare Kaŋa, Neɛ Naŋ Sɛgre Yɛlɛ Naŋ Na E Nendaare Kaŋa

Yɛlɛ na zaa Gyudase Ezekarɔte naŋ da e a te ta saŋa na oŋ da iri Yezu tere na da vɛŋɛɛŋ ka a Baabole daŋyelbo nyɛ eebo. Lɛ na a yɛlɛ zaa naŋ nyɛ eebo na wuleeŋ ka, Jehoova ane o Bidɔɔ na na toɔ̃ baŋɛɛ yɛlɛ naŋ na e nendaare kaŋa. (Ym 41:9; 55:12, 13; 109:8; Tm 1:16-20) Kyɛ, lɛ ba wuli ka Naaŋmen da sɛge biŋeeŋ ka Gyudase la neɛ naŋ na e a yɛlɛ. A Baabole daŋyelbo da wuleeŋ ka, neɛ kaŋa naŋ peɛle Yezu yaga zaa na irooŋ tere. Kyɛ a Baabole ba wuli neɛ na meŋɛ naŋ na e a yɛlɛ ŋa. Ane meŋ, ka Naaŋmeneŋ da sɛge biŋ ka Gyudase la na e a yɛlɛ ŋa, ane sowuli na oŋ biŋ a Baabole poɔŋ na koŋ kyaare taa. Sowuli na Naaŋmen naŋ da tu a bitontonee zie a de biŋ la ka: “Daŋ ta wa kyerɛ ho meŋɛ ka ho de ho nu dɔgle dɔɔ zaa zuŋ; ta wa derɛ ho nu poɔrɔ noba mine toŋfaare poɔ; naŋ kyɛnɛ taa gyogo naŋ e forifori.” (1Ti 5:22; de manne neŋ 3:6.) Yezu naŋ da boɔrɔ ka o de yɛŋ naŋ e zuluŋ toŋ neŋ toma, a lɛ kaa iri o bitontonee 12 na velaa zaa zuŋ, o da puoreeŋ a sɔre o Saa ana zisoɔree na zaa sɛre kyɛ derɛ ana gbɛre na. (Lk 6:12-16) Ka Naaŋmeneŋ da sɛge biŋ ka Gyudase la na iri Yezu tere, lɛ na wuliŋ ka sowuli na ane yɛlɛ na Naaŋmen naŋ sɛgre biŋ na ba kyaare taa. Lɛ eebo na lɛ wuliŋ ka Naaŋmen nu poɔ la toŋfaare na Gyudase naŋ toŋ na poɔŋ.

Azuŋ, sieree zaa wuleeŋ ka saŋa na Yezu naŋ wa iri Gyudase ka o e a bitontona kaŋa na, yelfaa zaa da ba kye Gyudase sukyiriŋ. Yelzaa meŋ da kyebe a wulo ka o na leɛ la daware soba. Kyɛ Gyudase da ‘iri buleeŋ aŋa teɛ nyaga naŋ taa zɛloŋ o eŋɛŋ,’ a sãã o sukyiri zaa. Lɛ da vɛŋɛɛŋ oŋ wɛle o meŋɛ yi, a zagre Naaŋmen sowuli tuubu a kyɛ te tuuro a Dɛɛvul sowuli. A da vɛŋɛɛŋ oŋ leɛ naŋnyige ane daware soba. (Hi 12:14, 15; Gyn 13:2; Tm 1:24, 25; Gyi 1:14, 15; kanne GYUDASE No. 4.) Gyudase da wɛlɛɛ o meŋɛ yaga zaa, azuŋ a wa ta la saŋa kaŋa ka Yezu kaa o sukyiriŋ a baŋ ka ona la neɛ naŋ na iroo tere.—Gyn 13:10, 11.