ZANNOO 13
Lɛ Na Zirii Puoruu Naŋ Dɛgrɛ Naaŋmen Yuori
Ka Naaŋmeneŋ waa nɔmmo yɛŋ, bonso ka ŋmenpuoreba yelka ba nɔŋ la Naaŋmen kyɛ maŋ dɛgrɛ o yuori? A yɛlɛ ŋmaaŋmaa la ka, ba e la zirii puoruu deme, azuŋ baŋ dɛgrɛ Naaŋmen yuori lɛ. Sobuo ka zirii puoruu dɛgrɛ Naaŋmen yuori? Wala ka Naaŋmen teɛre kyaare lɛ ba naŋ dɛgrɛ o yuori na? Wala oŋ na e kyaare a yɛlɛ ŋa?
1. Sobuo ka zirii puoruu deme de ba wuluu a dɛgrɛ Naaŋmen yuori?
Zirii puoruu de la a “yelmeŋɛ naŋ kyaare Naaŋmen a tɛge neŋ zirii.” (Urom 1:25) Aŋa mannoo poɔŋ, zirii puoruu ba wulo ba puorebiiri Naaŋmen yuori na. Kyɛ, a Baabole yelka aseŋ ka te de Naaŋmen yuori tonɔ neŋ toma. (Urom 10:13, 14) Ŋmenpuore wedeɛreba mine maŋ yelka, ka yelfaa zaaŋ wa e, Naaŋmen boɔbo zuŋ ka a yelbalaa e. Kyɛ a yɛlɛ ŋa eɛ zirii. Naaŋmen naaneŋ maŋ vɛŋ ka yelfaare pɔgrɔ te. (Kanne Gyimisi 1:13.) A posaanee la ka, zirii puoruu wuluu na vɛŋɛɛŋ aŋ e tuo ko noba ka ba nɔŋ Naaŋmen.
2. Sobuo ka zirii puoruu de ba eebo a dɛgrɛ Naaŋmen yuori?
Zirii puoruu deme ba nɔnɔ nensaaleba aŋa lɛ Naaŋmen naŋ nɔŋ nensaaleba na. A Baabole yelka zirii puoruu “yelbebe gboŋ do te ta la a saluoni.” (Yel-iriwulaa 18:5) Yuoŋ kɔɔre yaga la ŋa, ka zirii puoruu de ba menne eŋ a donɛɛ naaloŋ diibu yɛlɛ poɔŋ, a are zɔɔre puoreŋ, ka ba eebo vɛŋ bee baŋ tere sori ka noba yaga zaa te naŋ koŋ toɔ̃ sɔre a kpikpi. A zirii puoruu wedeɛreba mine maŋ boɔrɔŋ ka ba taa zemmo naŋ noma yaga zaa, azuŋ ba maŋ ferɛɛ ba puorebiiri na, baŋ korɔ ba libie yaga. Ba eebo ŋa wuleeŋ ka ba gba ba baŋ Naaŋmen fẽẽ zaa, azuŋ ba ba taa sori ka ba are Naaŋmen gbɛbɔgriŋ.—Kanne 1 Gyɔɔn 4:8.
3. Bo teɛroŋ ka Naaŋmen taa kyaare zirii puoruu?
Ka lɛ zirii puoruu yel-erre maŋ vɛmeŋ ka ho suuri ire bee? Bo teɛroŋ ka Naaŋmen taa kyaare zirii puoruu? Naaŋmen nɔnɔ la nensaaleba, kyɛ lɛ na zirii puoruu nembɛrɛ naŋ dɛgrɛ o yuori na, a kyɛ dɔgrɔ ba puorebiiri na meŋ maŋ vɛmeŋ ka o suuri iri yaga zaa. O eŋɛɛ noɔre ka o na sãã la zirii puoruu kpɛlɛŋkpɛlɛŋ, “ka neɛzaa koŋ la nyɛ o.” (Yel-iriwulaa 18:21) A koŋ kɔɔre, zirii puoruu zaa ka Naaŋmen na sãã kpɛlɛŋkpɛlɛŋ.—Yel-iriwulaa 18:8.
ZANNE YƐLƐ YAGA POƆ
Zanne nyɛ teɛroŋ na Naaŋmen naŋ taa kyaare zirii puoruu. Zanne yɛlɛ yaga zirii puoruu naŋ e, a kyɛ lɛ zanne nyɛ bon naŋso aŋ ba seŋ ka ho vɛŋ ka ba eebo pigi bo sori ka ho zanne baŋ Jehoova yɛlɛ soŋ.
4. Puoruu zaa naane ka Naaŋmen maŋ sage
Noba yaga sagedieŋ ka, puoruu zaa eɛ soe tɛɛtɛɛ naŋ gɛrɛ Naaŋmen zie. Kyɛ a yɛlɛ ŋa eɛ yelmeŋɛ bee? Kanne Matio 7:13, 14, a kyɛ gyieli a soorebiri naŋ tu na yɛlɛ:
Bo yɛlɛ ka a Baabole yel kyaare sori na naŋ gɛrɛ nyɔvore poɔ na?
Ŋmɛ a VIDIO, a kyɛ gyieli a soorebiri naŋ tu na yɛlɛ.
Ka lɛ a Baabole wuleeŋ ka puoruu zaa pɛlɛɛ Naaŋmen poɔ bee?
5. Zirii puoruu ba wulo Naaŋmen nɔmmo na
Zirii puoruu dɛgɛɛ Naaŋmen yuori soe yaga poɔŋ. A so faa kaŋa ba naŋ tu kyɛ dɛgrɛ Naaŋmen yuori la, lɛ na ba naŋ de ba menne te laŋ zɔɔzɔɔ yɛlɛ poɔŋ na. Ka hooŋ boɔrɔ ka ho nyɛ a sieree kaŋa, ŋmɛ a VIDIO. A kyɛ gyieli a soorebie naŋ tu na yɛlɛ.
A yi a Donɛɛ Zaa Zɔɔre ayi soba na poɔŋ, boŋ ka a kyɛkyere da e a soŋ a zɔɔre?
Wala hoŋ teɛre kyaare lɛ a kyɛkyere naŋ da e a soŋ a zɔɔre na?
Kanne Gyɔɔn 13:34, 35 ane 17:16. A kyɛ gyieli a soorebie naŋ tu na yɛlɛ:
Ka ŋmenpuorebaŋ wa de ba menne laŋ a donɛɛ zɔɔre poɔŋ, wala ka Jehoova maŋ teɛre?
Zirii puoruu la vɛŋ ka yelfaare yaga zaa erɛ a donɛɛ ŋa poɔŋ. Bo sieree hoŋ nyɛ kyaare zirii puoruu aŋ wuli ka ba ba tɔglɔ Naaŋmen nɔmmo na?
Zirii puoruu ba tɔglɔ Naaŋmen nɔmmo na
6. Naaŋmen boɔrɔŋ ka o soŋ noba ka ba zo yi zirii puoruu poɔŋ
Kanne Yel-iriwulaa 18:4,a a kyɛ gyieli a soorebiri naŋ tu na yɛlɛ:
Ho naŋ baŋ ka Naaŋmen boɔrɔŋ ka o soŋ noba na zirii puoruu naŋ bɛnlɛ na, wala ka lɛ vɛŋ hoŋ teɛre?
7. Moɔ̃ nimiri zanna a yelmeŋɛ Naaŋmen yɛlɛ
Aseŋ ka ho vɛŋ ka zirii puoruu yelfaare na sãã teɛroŋ na hoŋ taa kyaare Naaŋmen na bee? Te de ka bidɔɔ kaŋa zagrɛɛŋ ka o tu kawan-sonne na o saa naŋ koroo na. Ka lɛ vɛŋ oŋ yi a saa dieŋ a gaa te erɛ yɛlɛ naŋ ba soma. O saa poɔ ba pɛle neŋ yelfaare na o bidɔɔ naŋ erɛ na. Bonso aŋ ba seŋ ka te paana a bi-saa ka onaŋ vɛŋ ka o bidɔɔ na erɛ yelfaare?
Ka lɛ zirii puoruu naŋ ba erɛ yɛlɛ naŋ tori na zuŋ, a na somaŋ ka te paana Naaŋmen a kyɛ zagre ka te zanna o yɛlɛ bee?
NOBA MINE MAŊ YELEŊ KA: “N ba boɔrɔ Naaŋmen yɛlɛ, bonso ŋmenpuoreba la vɛŋ ka yelfaare yaga zaa erɛ a donɛɛ zuŋ.”
Lɛ hoŋ meŋ teɛre bee?
Bonso aŋ ba seŋ ka te vɛŋ ka yelfaare na zirii puoruu naŋ erɛ na sãã teɛroŋ na teŋ taa kyaare Jehoova na?
A ZANNOO YELNIMIZEERE
Zirii puoruu wuluu ane yelfaare na baŋ erɛ na dɛgrɛɛ Naaŋmen yuori. Naaŋmen na sãã la zirii puoruu zaa.
Bo Hoŋ Zanne
Bo teɛroŋ hoŋ taa kyaare zirii puoruu wuluu ane lɛ ba naŋ maŋ erɛ ba yɛlɛ na?
Bo teɛroŋ ka Jehoova taa kyaare zirii puoruu?
Boŋ ka Naaŋmen na de e zirii puoruu?
YƐLƐ MINE NAŊ LƐ BEBE
Zanne nyɛ yɛlɛ ayi mine puoruu yaga naŋ erɛ aŋ ba pɛlɛ Naaŋmen poɔ.
“Puoruu Zaa Eɛ Bonyeni Bee? A Zaaŋ Pɛlɛ Naaŋmen Poɔ?” (Intanɛt zu gane)
Bonso ka Jehoova boɔrɔ ka te maŋ lantaa a de puoruu koroo?
“Ka Lɛ A Fɛrɛɛŋ Ka Te De Te Menne Te Laŋ Puoruu Kaŋa Poɔŋ Bee?” (Intanɛt zu gane)
Ŋmenpuore wedeɛrɛ kaŋa poɔ da ba pɛle neŋ lɛ yɛlɛ naŋ kyɛnɛ o puoruu poɔŋ na. Kyɛ lɛ da ba pigoo sori ka o zanne baŋ Naaŋmen yɛlɛ soŋ.
“Bon Naŋso Ka Ŋmenpuore Wedeɛrɛ Kaŋa Da Bare O Kyɛkye” (Awake!, February 2015)
Yuomo yaga la ŋa ka zirii puoruu ŋmaara zirii naŋ wuli ka Naaŋmen ba taa te yɛlɛŋ, a kyɛ lɛ wuli ka o e la potuo soba meŋ. Zirii puoruu ŋma la zirii ata mine, zanne baŋ a yelmeŋɛ.
“Zirii Mine Naŋ Vɛŋ Ka Noba Maŋ Teɛre Ka Naaŋmen Ba Nɔnɔ Te” (A Watchtower, November 1, 2013)
a Ka hooŋ wa boɔrɔ ka ho baŋ bon naŋso a Yel-iriwulaa gane naŋ de zirii puoruu manne neŋ pɔge kaŋa ba naŋ boɔlɔ Baabilɔŋ Kpoŋ, yuo gaa a Yɛlɛ Mine Ba Naŋ Wuli A Muni 1 soba na.