Suobu Deebo Eɛ Yɛlɛ Naŋ Soma Yaga!

Yezu yeleeŋ ka aseŋ ka Kristabiiri zaa de suobu. (Kanne Matio 28:19, 20.) Kyɛ, bo la suobu deebo? Bo yɛlɛ aŋ seŋ ka neɛ e a toɔ̃ de suobu?

1. Boŋ la suobu deebo?

A yelbiri “suobu” yi la a Giriki yelbiri tɛgɛ naŋ la “de muŋli” koɔ̃ poɔŋ. Saŋa na Yezu naŋ da wa derɛ suobu na, ba da de la o eŋɛ zaa muŋli a Gyɔɔdan Baa koɔ̃ na poɔŋ, a lɛ puoreŋ o pãã da wa yi la a “koɔ̃ poɔ.” (Marko 1:9, 10) Lɛ neŋ o zu la, ka ba naŋ korɔ yelmeŋɛ Kristabiiri suobu, ba maŋ de la ba eŋɛ zaa muŋli a koɔ̃ poɔ.

2. Ka neɛŋ wa de suobu, wala ka lɛ wuli?

Ka neɛŋ wa de suobu, a wuleeŋ ka o de la o nyɔvore ko Jehoova Naaŋmen. Sobuo ka neɛ maŋ tu kyɛ de o meŋɛ ko Jehoova? Sɛre ka o soba na de suobu na, o soba yoŋ maŋ daŋ puore ko la Jehoova, a yelko Jehoova ka o boɔrɔŋ ka o puoruu a gɛrɛ wagre naŋ ba taa baaraa. O soba maŋ eŋɛɛ noɔre ka Jehoova yoŋ la oŋ na puoro, a kyɛ lɛ eŋ noɔre meŋ ka yɛlɛ naŋ na e nimizeɛ yaga zaa ko o soba la oŋ na erɛ yɛlɛ Naaŋmen naŋ boɔrɔ o zemmo poɔŋ. O soba maŋ yi la o meŋɛ boɔbo poɔŋ a “zagre o meŋɛ yɛlɛ bare . . . kyɛ tuuro” Yezu wulibo na, a kyɛ tɔglɔ o ewuli soŋ na meŋ. (Matio 16:24) Ka neɛŋ de o meŋɛ ko Jehoova a de suobu, a maŋ yuo la sori ko o soba ka o neŋ Jehoova wa taa niiloŋ naŋ e kpeɛŋaa, a kyɛ lɛ vɛŋ ka o neŋ o taa Kristabitaaba meŋ taa niiloŋ naŋ e kpeɛŋaa.

3. Bo yɛlɛ aŋ seŋ ka neɛ erɛ sɛre kyɛ na baŋ de suobu?

Sɛre hoŋ na baŋ de suobu na, aseŋ ka ho zanne Jehoova yɛlɛ soŋ, a kyɛ taa sagediibu meŋ naŋ e kpeɛŋaa o eŋɛŋ. (Kanne Hiburu 11:6.) Saŋa na hoŋ zanna Jehoova yɛlɛ na, ho sagediibu na maaleŋ e la kpeɛŋaa, ka nɔmmo na meŋ hoŋ taa koo na meŋ maaleŋ e kpeɛŋaa. Lɛ na vɛmeŋ ka ho boɔrɔ ka ho manna o yɛlɛ a korɔ noba, a kyɛ de o bege meŋ tonɔ neŋ toma ho zemmo poɔŋ. (2 Timoti 4:2; 1 Gyɔɔn 5:3) Ka neɛŋ sereŋ “erɛ yɛlɛ naŋ seŋ lɛ Jehoova naŋ boɔrɔ, a sereŋ boɔrɔ ka o pɛle o poɔ,” lɛ yɛŋ o soba na baŋ de la o nyɔvore ko Jehoova a de suobu.​—Kolosi 1:9, 10.a

ZANNE YƐLƐ YAGA POƆ

4. Te na baŋ zannɛɛ yelkaŋa yi Yezu suobu deebo na poɔŋ

Kanne Matio 3:13-17 a zanne yɛlɛ yaga a kyaare Yezu suobu deebo na, a kyɛ gyieli a soorebie naŋ tu ŋa yɛlɛ:

• Yezu da e la bilɛɛ saŋa na oŋ de suobu na bee?

• Sobuo baŋ da tu kyɛ ko o a suobu? Ba da de la a koɔ̃ mire mire o bee?

Yezu suobu deebo puoreŋ oŋ da piili tonɔ a toŋ nimizeɛ na Naaŋmen naŋ de koo ka o toŋ na. Kanne Luka 3:21-23 ane Gyɔɔn 6:38, a kyɛ gyieli a soorebiri naŋ tu na yɛlɛ:

• Saŋa na Yezu naŋ wa de suobu baare na, bo toma oŋ da tonɔ nimizeɛ̃ o zemmo poɔŋ?

5. Ho meŋ na toɔ̃ de la suobu

A piilee saŋa na, meŋɛ deterebo ane suobu deebo na baŋ e la yelkpeɛŋaa ko bo yaga. Kyɛ, ka hooŋ moɔ̃ nimiri ho na baŋ wa taaɛ sagediibu ka ho na baŋ de la a gbɛre ŋa naŋ e nimizeɛ ŋa. Ka hooŋ boɔrɔ ka ho nyɛ sori noba mine naŋ tu kyɛ e lɛ, ŋmɛ a VIDIO.

VIDIO: Lɛ Hoŋ Na Toɔ̃ E Ka Ho Neŋ Jehoova Niiloŋ E Kpeɛŋaa (1:11)

Kanne Gyɔɔn 17:3 ane Gyimisi 1:5, a kyɛ gyieli a soorebiri naŋ tu na yɛlɛ:

• Boŋ na baŋ soŋ neɛ ka o nare o meŋɛ ko suobu deebo?

1. A. Meŋɛ deterebo e la puoro neɛ naŋ maŋ puore a yelko Naaŋmen ka, o boɔrɔŋ ka o puoroo a gɛrɛ wagre naŋ ba taa baaraa

2. B. Te suobu deebo saŋa, te maŋ wulee neɛzaa naŋ bebe ka te de la te meŋɛ ko Naaŋmen

6. Ka teneeŋ wa de suobu, te maŋ wa poɔ la Jehoova booree na poɔŋ

Ka teneeŋ wa de suobu, te maŋ wa poɔ la te booree deme naŋ be a donɛɛ lombori zaa a taa noɔreyeni na poɔŋ. Aneazaa ka te ba yi ziyeni ka te yeltaree meŋ ba yitaa, kyɛ te zaa taa la sagediibu bonyeni, a kyɛ lɛ tuuro bege bonyeni meŋ. Kanne Yieme 25:14 ane 1 Piita 2:17, a kyɛ gyieli a soorebie naŋ tu na yɛlɛ:

• Sobuo ka suobu deebo maŋ soŋ neɛ ka o neŋ Jehoova niiloŋ na e kpeɛŋaa? Sobuo aŋ maŋ lɛ soŋ o soba ka o neŋ Jehoova puorebiiri meŋ niiloŋ e kpeɛŋaa?

A ZANNOO YELNIMIZEERE

Yezu yeleeŋ ka aseŋ ka Kristabie zaa de suobu. Kyɛ, sɛre ka neɛ na baŋ de suobu, aseŋ ka o taa sagediibu Jehoova eŋɛŋ, a de O bege meŋ tonɔ toma, a kyɛ de o meŋɛ ko Jehoova.

Bo Hoŋ Zanne

• Bo la suobu deebo? Bonso aŋ e nimizeɛ ka te de suobu?

• Ka neɛŋ de o meŋɛ ko Jehoova a de suobu, wala ka lɛ wuli?

• Bo yɛlɛ aŋ seŋ ka neɛ erɛ sɛre kyɛ na baŋ de o meŋɛ ko Naaŋmen a de suobu?

YƐLƐ MINE NAŊ LƐ BEBE

Kanne nyɛ bon naŋ la suobu deebo ane bon naŋ ba e suobu deebo.

“Boŋ La Suobu Deebo?” (Intanɛt zu gane)

Kanne nyɛ yɛlɛ neɛ naŋ seŋ ka o e a toɔ̃ nyɛ nimitɔɔre gaabo te de suobu.

“Ka Neɛŋ Taa Nɔmmo Ane Nimipa A Ko Jehoova, Lɛ Na Toɔ̃ Somooŋ Ka O De Suobu” (A Watchtower, March 2020)

Kanne nyɛ yɛlɛ naŋ da soŋ dɔɔ kaŋa oŋ de gbɛre ka o na de la suobu.

“Ba Da Boɔrɔŋ Ka N Meŋɛ Zanne Baŋ A Yelmeŋɛ” (A Watchtower, February 1, 2013)

Kanne nyɛ lɛ suobu deebo naŋ soma a seŋ, ane lɛ hoŋ na toɔ̃ e a nare ho meŋɛ a ko suobu deebo.

“Aseŋ Ka N De Suobu Bee?” (Soorebie Baapaalba Naŋ Maŋ Soorɔ​—Yɛlɛ Naŋ Na Toɔ̃ Soŋ Ba, Volume 2, zuri 37)