ZANNOO 58
Naŋ Dire Yelmennoŋ Korɔ Jehoova
Yelmeŋɛ Kristabiiri eɛ siri ka ba koŋ vɛŋ ka yelzaa bee bonzaa vɛŋ ka ba bare Jehoova puoruu. Te baŋɛɛŋ ka lɛ hoŋ meŋ teɛre. Ka hooŋ dire yelmennoŋ korɔ Jehoova, o poɔ maŋ pɛleŋ yaga zaa. (Kanne 1 Tungkori 28:9.) Bo yɛlɛ teŋ na baŋ tuore ka lɛ vɛŋ ka a e kpeɛŋaa ko te ka te dire yelmennoŋ korɔ Jehoova? Boŋ na toɔ̃ soŋ te ka te are a yelkpeɛne ŋa noɔreŋ?
1. Bo yɛlɛ ka noba mine na baŋ e a vɛŋ ka a e kpeɛŋaa ko te ka te dire yelmennoŋ korɔ Jehoova?
Noba mine maŋ boɔrɔŋ ka ba e yɛlɛ naŋ na vɛŋ ka te bare Jehoova puoruu. Nemboboŋ na sage e lɛ? Noba mine naŋ zagre Jehoova puoruu maŋ ŋmaarɛɛ zirii a kyaara Naaŋmen lantaapuoruu na, ba maŋ erɛɛ lɛ a boɔrɔ ka ba sãã te sagediibu. Te boɔlɛɛ a noba ŋa ka noba naŋ zagre Jehoova puoruu bee nɔzagreba. Kyɛ lɛ yoŋ naane, ŋmenpuore wedeɛreba mine meŋ maŋ ŋmaarɛɛ zirii a dɔglɔ te. Ba maŋ eɛ lɛ a na vɛŋ ka noba sagediibu naŋ ba e kpeɛŋaa bare Jehoova puoruu. A ba soma fẽẽ zaa ka te neŋ noba naŋ ba nɔŋ a yelmeŋɛ ŋmeɛrɛ nɔkpeɛne, kyɛbee ka te kanna ba gama, bee yɛlɛ ba naŋ sɛge eŋ intanɛt zuŋ. A ba seŋ ka te gɛrɛ intanɛt zu ziiri ba naŋ maale, bee a kaara ba vidiori. Noba naŋ de biŋ ba nimitɔɔreŋ ka ba na vɛmeŋ ka te bare Jehoova puoruu na, Yezu da yelee yelkaŋa a kyaare ba, o da yelka: “Yɛ bare ba; ba waa la zɔnne naŋ tagra ba zɔntaaba. Kyɛ ka zɔŋ wa tagra o zɔŋ tɔ, ba zaa na laŋ le la bogi poɔ.”—Matio 15:14.
2. Bo gbɛɛ la aŋ seŋ ka te de te zemmo poɔŋ ka lɛ vɛŋ ka te toɔ̃ dire yelmennoŋ korɔ Jehoova?
Te naŋ nɔŋ Jehoova zuŋ, te boɔrɔŋ ka te tage te menne a yi zirii puoruu eŋɛŋ kpɛlɛŋkpɛlɛŋ. Azuŋ, aseŋ ka te kaa soŋ a ta wa tonɔ toma mine neŋ zirii puoruu naŋ taa niiloŋ. Lɛ meŋ la aŋ ba seŋ ka te de te menne te poɔ yelsɛgraa zaa, bee yel-eroo zaa neŋ zirii puoruu naŋ laŋ niiloŋ. Jehoova kpãã teŋ peɛlaaŋ ka: “N noba, yɛ wa yi [Baabilɔŋ Kpoŋ] poɔ.”—Yel-iriwulaa 18:2, 4.
ZANNE YƐLƐ YAGA POƆ
Ho na zanne nyɛɛ lɛ hoŋ na toɔ̃ are kpeɛŋaa saŋa na noba mine naŋ boɔrɔ ka ba sãã yelmennoŋ na hoŋ dire korɔ Jehoova na. Ho na lɛ zanne nyɛŋ ka, ka hooŋ zo yi Baabilɔŋ Kpoŋ poɔ, lɛ wuleeŋ ka ho diree yelmennoŋ korɔ Jehoova.
3. Go ho meŋɛ a yi zirii wulwulibo eŋɛŋ
Ka noba mineŋ yel yelfaare a kyaare Jehoova lantaapuoruu na ka te woŋ, wala aŋ seŋ ka te e? Kanne Yeng Yelibie 14:15, a kyɛ gyieli a soorebiri ŋa yɛlɛ:
Bonso aŋ ba seŋ ka te sage yelzaa te naŋ woŋ a di?
Kanne 2 Gyɔɔn 9-11, a kyɛ gyieli a soorebie ŋa yɛlɛ:
Ka neɛ kaŋa naŋ yele yelfaare kyaara Jehoova lantaapuoruuŋ boɔrɔ ka te ne o di dama, wala aŋ seŋ ka te e?
Yelmeŋɛ la, te koŋ sage gaa ka te ne neɛ kaŋa naŋ yele Jehoova lantaapuoruu na yelfaare di dama, kyɛ yenee teŋ na baŋ nyɛ ba wuluu na?
Ka teneeŋ kyɛllɛ wono yelfaare na noba naŋ maŋ yele a kyaara Jehoova ane o lantaapuoruu na, wala ka Jehoova maŋ teɛre?
4. Naŋ dire yelmennoŋ korɔ Naaŋmen saŋa na ho yɔɔ kaŋa naŋ e yelfaa kaŋa na
Ka teneeŋ wa baŋ ka te yɔɔ kaŋa naŋ be a lantaapuoruu poɔŋ e la yelfaa kaŋa naŋ e nimizeɛ, wala aŋ seŋ ka te e? Te na baŋ nyɛɛ sowuli a kyaare lɛ aŋ seŋ ka te e a yi Bege na Naaŋmen naŋ da ko a takoreŋ saŋa Izerayɛl biiri na. Kanne Liivai 5:1.
Aŋa lɛ a Baabole sɛgre ŋa naŋ wuli na, ka teneeŋ wa baŋ ka te yɔɔ kaŋa e la yelfaa naŋ e nimizeɛ aseŋ ka te yeli yɛlɛ na teŋ baŋ na ko a lantaapuoruu nembɛrɛ. Kyɛ sɛre teŋ na e lɛ na, a na somaŋ ka te yelko te yɔɔ na naŋ e a yelfaa na ka o gaa te kyiiri o yelfaare ko a lantaapuoruu nembɛrɛ. Ka teneeŋ e lɛ, a wuleeŋ ka te taa la nimimaaroŋ ko o soba. Ka o naŋ zagre ka o e lɛ, te naŋ dire yelmennoŋ korɔ Jehoova zuŋ, te na yelee yɛlɛ na zaa te naŋ baŋ a kyaare a yelfaa na oŋ e na ko a lantaapuoruu nembɛrɛ. Ka neɛŋ e lɛ, sobuo ka lɛ wuli ka o soba nɔŋ la . . .
Jehoova Naaŋmen?
o yɔɔ naŋ e a yelfaa na?
o yɔɔmine naŋ be a lantaapuoruu poɔŋ?
Ka hooŋ nyɛ ka ho yɔɔ kaŋa gɛrɛŋ ka o kpɛ toɔrɔ poɔ, mɔɔ kyɛ somoo!
5. Tage ho meŋɛ yi Baabilɔŋ Kpoŋ eŋɛŋ kpɛlɛŋkpɛlɛŋ
Kanne Luka 4:8 ane Yel-iriwulaa 18:4, 5, a kyɛ iri a soorebie ŋa nɔɛ:
N iree N yuori yi puoruu na maŋ da be na gama poɔŋ bee?
N de la N meŋɛ te poɔ yelsɛgraa kaŋa neŋ zirii puoruu naŋ taa niiloŋ bee?
Toma na maŋ tonɔ na de la sommo korɔ zirii puoruu sori kaŋa poɔŋ bee?
Aseŋ ka N bare yɛlɛ mine eebo N zemmo poɔŋ ka lɛ vɛŋ ka N toɔ̃ tage N meŋɛ yi zirii puoruu poɔŋ bee?
Ka maaŋ iri a soorebie ŋa kaŋa zaa noɔre ka ɛɛ, bo leɛroo la aŋ seŋ ka N e?
Lɛ zaa naŋ la, mɔɔ kyɛ de gbɛre naŋ na vɛŋ ka ho taa zoma naŋ soma, a kyɛ lɛ wuli ka ho diree yelmennoŋ korɔ Jehoova meŋ.
Ka puoruu kaŋaŋ yelka ho iri libie tere ka ba de te soŋ nembaalba, wala hoŋ na e?
NOBA MINE MAŊ YELEŊ KA: “Ka maaŋ baŋ yelfaare na noba naŋ zagre Jehoova puoruu naŋ maŋ yele a kyaara Jehoova Sieree Deme na, a na soŋ maŋ ka N wuli ba ka yɛlɛ na baŋ maŋ yele na e la zirii.”
A somaŋ ka te teɛrɛ lɛ bee? Bonso hoŋ yel lɛ?
A ZANNOO YELNIMIZEERE
Ka teneeŋ boɔrɔ ka te naŋ dire yelmennoŋ korɔ Jehoova. Aseŋ ka te tage te menne yi noba naŋ boɔrɔ ka ba bɛnle te eŋɛŋ kpɛlɛŋkpɛlɛŋ.
Bo Hoŋ Zanne
Bonso aŋ ba seŋ ka te kyɛllɛ nɔzagreba yɛlɛ?
Ka teneeŋ wa baŋ ka te yɔɔ kaŋa eɛ yelfaa kaŋa naŋ e nimizeɛ, wala aŋ seŋ ka te e
A Baabole yeleeŋ ka te zo yi zirii puoruu poɔŋ, wala teŋ na baŋ e a de a Baabole kpããmo ŋa toŋ neŋ toma?
YƐLƐ MINE NAŊ LƐ BEBE
Ka noba mineŋ wa yele yelfaare a kyaara Jehoova Sieree Deme, wala aŋ seŋ ka ho e? Kanne a yɛlɛ ŋa a nyɛ a noɔre iribo.
Wala hoŋ na toɔ̃ e baŋ ka yelsɛgraa kaŋa, bee yel-erre mine de la sommo korɔ Baabilɔŋ Kpoŋ? Kanne a yɛlɛ ŋa a nyɛ a noɔre iribo.
Wala ka noba mine naŋ zagre Jehoova puoruu maŋ erɛ a boɔrɔ ka ba sãã te sagediibu?
Dɔɔ kaŋa da e la Shinto puoruu wedeɛrɛ, kanne o zemmo yɛlɛ yelzu naŋ la “N Biiloŋ Saŋa Zaa Maŋ Boɔrɔ Naaŋmen,” a nyɛ bon naŋso oŋ tage o meŋɛ yi zirii puoruu eŋɛŋ kpɛlɛŋkpɛlɛŋ.
“A Baabole Soŋ Baŋ Baŋ Leɛre Ba Zemmo Yɛlɛ” (A Watchtower, July 1, 2011)