Wala Hoŋ Na Toɔ̃ E Ka Popeɛloŋ Be Ho Booree Poɔŋ?​—Kyɛlee 1

Ka dɔɔ neŋ pɔgɔŋ wa kulo taa, ba maŋ taaɛ popeɛloŋ yaga zaa ana bebiri na, a maŋ e la ba boɔbo ka a popeɛloŋ na baŋ taa ba kultaa bebiri na bebe lɛɛŋ a gɛrɛ wagre naŋ ba taa baaraa. Yelmeŋɛ la, kultaa deme na toɔ̃ taaɛ popeɛloŋ tegitegilɛ. Kristabiiri naŋ kultaa aŋ kɔɔre a de Baabole kawane tonɔ neŋ toma ba zemmo poɔŋ na toɔ̃ di la sieree ka, kultaa deme na toɔ̃ taaɛ popeɛloŋ tegitegilɛ.

1. Bo kawane ka a Baabole ko sereba?

Jehoova kaa iree serɛ ka o e a booree zusoba. (Kanne Efesu 5:​23.) Jehoova boɔrɔŋ ka a serɛ maŋ de gbɛɛ naŋ na soŋ a booree deme. A Baabole ko la sereba kawane ka: “Yɛ nɔŋ yɛ pɔgeba.” (Efesu 5:25) Wala ka serɛ na toɔ̃ erɛ a wuli ka o nɔŋ la o pɔge? Serɛ naŋ nɔŋ o pɔge yaga zaa maŋ wulee o pɔge nimimaaroŋ saŋa na baŋ be dieŋ ane saŋa na baŋ wa be noba poɔŋ. O maŋ go la o pɔge na a yi yelzaa naŋ na toɔ̃ peroo. O maŋ lɛ mɔɔ la o mɔɔbo zaa a kaara o zieŋ soŋ zaa, o maŋ kooŋ boma na yɛlɛ naŋ fɛroo, a kyɛ maŋ lɛ vɛŋ ka o poɔ meŋ pɛlɛ. (1 Timoti 5:8) Kyɛ, a yelnimizeɛ meŋɛ la ŋa, o maŋ mɔɔ la o mɔɔbo zaa a soŋ o pɔge na ka o neŋ Jehoova niiloŋ e kpeɛŋaa. (Matio 4:4) Aŋa mannoo poɔŋ, o neŋ o pɔge maŋ laŋ puoreŋ, a kyɛ kanne a Baabole meŋ. Ka serɛŋ wulo o pɔge nɔmmo a kyɛ kaara o zieŋ soŋ zaa, a maŋ vɛmeŋ ka a serɛ neŋ Jehoova niiloŋ na maaleŋ e kpeɛŋaa yaga zaa.​—Kanne 1 Piita 3:7.

2. Bo kawane ka a Baabole ko pɔgeba?

Naaŋmen Yelbiri na yelka, “pɔge meŋ eŋnɛ a o serɛ.” (Efesu 5:33) Wala ka pɔge na toɔ̃ e a wuli ka o eŋnɛɛ o serɛ? Pɔge naŋ eŋnɛ o serɛ maŋ teɛrɛɛ gyog-sonne na o serɛ naŋ taa na yɛlɛ gaa tɔɔre. O niŋe maŋ paalɛɛ mɔɔbo na zaa o serɛ naŋ mɔɔrɔ ka o kaara o zu ane a biiri zu na. Ka o serɛŋ wa de gbɛre kaŋa, pɔge naŋ eŋnɛ o serɛ maŋ soŋɛɛ o serɛ na ka gbɛre na oŋ de na na toɔ̃ nyɛ maaloo. Ka a serɛ puoree Jehoova bee ka o ba puoro Jehoova, kyɛ pɔge naŋ eŋnɛ o serɛ maŋ de la kɔkɔbaaloŋ a yele yɛlɛ koroo. O koŋ sage yel o serɛ na yelfaare ko neŋyobo meŋ.

3. Wala ka kultaa deme na toɔ̃ e ka ba kultaa na e kpeɛŋaa?

A Baabole yeleeŋ ka, ka dɔɔ neŋ pɔgeŋ wa kultaa, ‘ba bayi maŋ wa leɛ la eŋgan-yeni.’ (Matio 19:5) Wala ka lɛ wuli? A wuleeŋ ka a ba seŋ ka ba tere sori ka bonzaa waneŋ wɛltaa ba kpakyagaŋ. Azuŋ, aseŋ ka ba maŋ nyɛ wagre ko taa, a maŋ laŋ erɛ yɛlɛ meŋ. Aseŋ ka ba maŋ dire dama. A yi a dama diibu poɔŋ, aseŋ ka ba maŋ yel ba sukyiri poɔ yɛlɛ, ba teɛrɛ ane ba poteɛrɛ a ko taa. A yi Jehoova yoŋ puoreŋ, a ba seŋ ka a dɔɔ bee a pɔge vɛŋ ka neɛ kaŋa e tegroŋ yaga zaa koo a gaŋ o kultatɔ na. Aseŋ ka a dɔɔ bee a pɔge kaara soŋ, ka ba kaŋa zaa ta wa de o meŋɛ te mare neɛ kaŋa yaga zaa sori naŋ ba seŋ neŋ poɔŋ.

ZANNE YƐLƐ YAGA POƆ

4. Sereba​—yɛ nɔnɔ yɛ pɔgeba, a kaara ba zieŋ soŋ zaa

VIDIO: Serebɛ Yɛ Nɔŋ Yɛ Pɔgeba Aŋa Lɛ Yɛ Naŋ Nɔŋ Yɛmenne Enne (9:53)

• Bo yɛlɛ mine la ka serɛ na toɔ̃ e a wuli ka o nɔŋ la o pɔge a kyɛ lɛ wuli ka o kaarɛɛ o zieŋ meŋ?

Kanne Kolosi 3:12, a kyɛ gyieli a soorebiri ŋa yɛlɛ:

• Sobuo ka serɛ na toɔ̃ de a Baabole sɛgre ŋa toŋ neŋ toma o kultaa poɔŋ?

5. Pɔgeba​—yɛ nɔnɔ yɛ sereba, a kyɛ eŋnɛ ba meŋ

A Baabole ko la pɔgeba kawane ka, ba eŋnɛ ba sereba, haali ka a dɔɔŋ puoro Jehoova bee o ba puoro Jehoova. Kanne 1 Piita 3:1, 2, a kyɛ gyieli a soorebie naŋ tu na yɛlɛ:

• Ka hooŋ taa serɛ naŋ ba puoro Jehoova, nɔkpeɛne zaa kyebe ka, ho boɔrɔŋ ka ho somoo ka o wa puoro Jehoova. Azuŋ, a yɛlɛ ayi ŋa buo soba hoŋ teɛre ka a na toɔ̃ soŋɛɛ ho serɛ na, hoŋ na moɔlɔ a naaloŋ duorisoŋ koroo wagre zaa, kyɛbee hoŋ na taa gyog-soŋ a kyɛ wuloo gyeremɛ meŋ? Bonso hoŋ yel lɛ?

Ka dɔɔ neŋ o pɔgeŋ taa noɔreyeni, ba na toɔ̃ de la gbɛ-sonne. Kyɛ, saŋa kaŋa a pɔge neŋ a dɔɔ teɛroŋ ba maŋ kyaare taa. Ka lɛŋ wa e, a pɔge na toɔ̃ mãã la o meŋɛ a yi gyeremɛ poɔŋ a wuli o serɛ na teɛroŋ na o meŋ naŋ taa. Kyɛ, aseŋ ka a pɔge baŋ ka, Jehoova de la toma eŋ a dɔɔ nuureŋ ka o derɛ gbɛɛ naŋ na toɔ̃ soŋ a booree. Azuŋ, aseŋ ka a pɔge soŋ ka gbɛre na o serɛ naŋ de na toɔ̃ nyɛ maaloo. Ka a pɔgeŋ e lɛ, popeɛloŋ na be la a booree poɔŋ. Kanne 1 Piita 3:3-5, a kyɛ gyieli a soorebiri ŋa yɛlɛ:

• Ka pɔgeŋ eŋnɛ o serɛ, wala ka Jehoova maŋ teɛre?

6. Ka hooŋ tuoro yelkpeɛne ho kultaa poɔŋ, ho na toɔ̃ arɛɛ a noɔreŋ

VIDIO: Lɛ Te Naŋ Na Toɔ̃ Vɛŋ Ka Te Kultaa E Kpeɛŋaa A Lɛ Noma Yaga (5:44)

• A vidio poɔŋ, bo yɛlɛŋ da wuli ka a kultaa deme da ba lɛ peɛle taa?

• Bo yɛlɛ baŋ da e ka lɛ vɛŋ ka ba kultaa na maaleŋ e kpeɛŋaa?

Kanne 1 Korinti 10:24 ane Kolosi 3:13. Ka yɛneeŋ wa kanne a sɛgre kaŋa zaa baare, yɛ gyieli a soorebiri ŋa yɛlɛ:

• Ka kultaa demeŋ de a Baabole kawane ŋa tonɔ neŋ toma ba kultaa poɔŋ, sobuo aŋ na toɔ̃ vɛŋ ka ba kultaa na e kpeɛŋaa?

A Baabole yeleeŋ ka, te vɛŋ ka te kanzaa noba emmo maŋ zuo o tɔsoba deni. Wala ka lɛ wuli? A wuleeŋ ka aseŋ ka te wulo te taaba nimimaaroŋ ane gyeremɛ. Kanne Urom 12:10, a kyɛ gyieli a soorebie naŋ tu na yɛlɛ:

• Aseŋ ka a serɛ bee a pɔge maŋ kyɛnlɛ ka o kultatɔ na daŋ de weɛ a wuloo emmo bee? Bonso hoŋ yel lɛ?

A ZANNOO YELNIMIZEERE

Ka serɛ neŋ pɔgeŋ nɔŋ taa, a eŋnɛ taa, a kyɛ de Baabole kawane tonɔ neŋ toma a kultaa poɔŋ, ba na taaɛ popeɛloŋ yaga zaa.

Bo Hoŋ Zanne

• Wala ka serɛ na toɔ̃ e a vɛŋ ka popeɛloŋ be a kultaa poɔŋ?

• Wala ka pɔge na toɔ̃ e a vɛŋ ka popeɛloŋ be a kultaa poɔŋ?

• Ka hooŋ kpɛ kultaa poɔ, bo Baabole kawane la na toɔ̃ soŋ bo ka ho kultaa na maaleŋ e kpeɛŋaa?

YƐLƐ MINE NAŊ LƐ BEBE

Kanne a gane ŋa a nyɛ kawaŋ sonne naŋ na toɔ̃ soŋ bo ka popeɛloŋ be ho booree poɔŋ.

Ho Booree Deme Na Toɔ̃ Taaɛ Popeɛloŋ (gambile)

Kaa a yieloŋ vidio ŋa a nyɛ maaloo hoŋ na nyɛ ka hooŋ de Naaŋmen kawane tonɔ neŋ toma ho kultaa poɔŋ.

N Nɔnɔ Boŋ Yaga (4:26)

Kanne a yɛlɛ ŋa a nyɛ lɛ pɔge naŋ na toɔ̃ e a wuli ka o sigree o meŋɛ ko arezie na o serɛ naŋ taa aŋa a booree zusoba na.

“Pɔgeba, Bonso Aŋ Seŋ Ka Yɛ Sigri Yɛ Menne Ko Yɛ Sereba Zudaaloŋ Na?” (A Watchtower, May 15, 2010)

Kultaa deme mine da tuoree yelkpeɛne naŋ e nimizeɛ yaga zaa ba kultaa na poɔŋ, ba gba da barɛɛ taa. Boŋ da soŋ ba baŋ leɛ toɔ̃ sɛgre a yelkpeɛne zaa? Kaa a vidio ŋa a nyɛ a noɔre iribo.

Naaŋmen Da Soŋ Teŋ Teŋ Leɛ Sɛgre Te Kultaa Na Oŋ Are Kpeɛŋaa (5:14)