Ka hooŋ gaa a donɛɛ lombori zaa, noba yaga taaɛ teɛroŋ yobo a kyaare dããkpeɛne nyuubu. Ka noba mine neŋ ba zɔmenneŋ wa laŋ, a maŋ e la vuo ko ba baŋ maŋ de nyu dããkpeɛne. Kyɛ, noba mine ba nyuuro dããkpeɛne togitogi. Noba mine meŋ maŋ nyu la dããkpeɛne lɛɛŋ a te bugi. Bo ka a Baabole yel kyaare dããkpeɛne nyuubu?

1. A eɛ faa ka neɛ nyu dããkpeɛne bee?

A Baabole ba yelka dããkpeɛne nyuubu eɛ faa. Kyɛ, a Baabole yeleeŋ ka Naaŋmen ko teŋ kyɔɔtaare yaga, a kyɔɔtaa kaŋa la dããkpeɛne. A Baabole yeleeŋ ka, Naaŋmen ko teŋ “waiŋ naŋ maŋ korɔ nensaalaa sukyiri popɛle.” (Yieme 104:14, 15) Ka hooŋ kaa a Baabole poɔŋ, dɔbɔ ane pɔgeba na mine naŋ da puoro Jehoova yelmennoŋ poɔŋ na da nyuuree dããkpeɛne.​—1 Timoti 5:23.

2. Ka neɛŋ boɔrɔ ka o nyu dããkpeɛne, bo Baabole kawaneŋ na toɔ̃ soŋ o soba?

Jehoova ba boɔrɔ ka te nyuuro dããkpeɛne yaga zaa te gaali, bee a e dããnyukuolibo. (Galesiya 5:21) Naaŋmen Yelbiri na yeleeŋ ka: “Ta laŋna waiŋ nyu gaalii deme poɔŋ.” (Yeng Yelibie 23:20) Azuŋ, ka neɛ kaŋaŋ boɔrɔ ka o nyu dããkpeɛne noba poɔŋ, bee ka o yoŋ la nyuuro a dããkpeɛne, a ba seŋ ka o nyu a dããkpeɛne ka lɛ vɛŋ ka o koŋ baŋ lɛ teɛre yɛlɛ soŋ. Kyɛbee, ka o nyu dããkpeɛne ka lɛ vɛŋ ka o yele yɛlɛ naŋ ba seŋ ka o yele, bee a erɛ yɛlɛ basabasa. A ba seŋ ka te nyu dããkpeɛne lɛɛŋ ka baaloŋ te kpɛ te. Ka teneeŋ koŋ baŋ nyɔge te menne a kyaare dããkpeɛne nyuubu, aseŋ ka te baraa kpɛlɛŋkpɛlɛŋ.

3. Ka noba mineŋ de gbɛre ka ba koŋ nyu dããkpeɛne, wala teŋ na toɔ̃ e a wuli gyeremɛ ko ba gbɛre na baŋ de na?

A be la neɛzaa zieŋ ka o de gbɛre ka o na nyu la dããkpeɛne, bee ka o koŋ nyu dããkpeɛne. Ka neɛ kaŋaŋ de gbɛre ka o na nyu la dããkpeɛne fẽẽ, a ba seŋ ka te dire o soba sɛrɛɛ. Ka neɛ kaŋaŋ meŋ ba boɔrɔ ka o nyu dããkpeɛne togitogi, a ba seŋ ka te feroo ka o nyu dããkpeɛne. (Urom 14:10) Ka te dããkpeɛne nyuubuŋ na toɔ̃ vɛŋ ka toɔrɔ wa noba mine zuŋ, lɛ yɛŋ, a ba seŋ ka te nyuuraa. (Kanne Urom 14:21.) A Baabole ko teŋ kawane ka, “ta boɔrɔ [ho] meŋɛ maaloo, kyɛ boɔrɔ [ho] tɔsoba maaloo.”​—Kanne 1 Korinti 10:23, 24.

ZANNE YƐLƐ YAGA POƆ

4. Boŋ na toɔ̃ soŋ bo ka ho de gbɛre a kyaare dããkpeɛne nyuubu?

Bo teɛroŋ ka Yezu da taa kyaare dããkpeɛne nyuubu? Kanne nyɛ a dɛndɛŋ toŋseɛlee na Yezu naŋ da toŋ na. Kanne Gyɔɔn 2:1-11, a kyɛ gyieli a soorebie ŋa yɛlɛ:

• Sobuo ka a toŋseɛlee ŋa Yezu naŋ da toŋ na vɛŋ teŋ baŋ teɛroŋ na oŋ taa kyaare dããkpeɛne? Bo teɛroŋ ka noba naŋ da nyu a dããkpeɛne na meŋ da taa kyaare dããkpeɛne?

• Yezu ba yelka dããkpeɛne nyuubu e la faa, azuŋ, ka neɛ kaŋaŋ de gbɛre ka o na nyu la dããkpeɛne, bo teɛroŋ aŋ seŋ ka Kristabie taa kyaare o soba?

A ba e faa ka Kristabie nyu dããkpeɛne, kyɛ wagre zaa naane aŋ seŋ ka o maŋ nyu dããkpeɛne. Kanne Yeng Yelibie 22:3, a kyɛ gyieli a yɛlɛ naŋ tutaa na a nyɛ ka a na somaŋ ka neɛ nyu dããkpeɛne ka o naŋ be a yɛlɛ ŋa poɔŋ bee:

• Saŋa na hoŋ zɔnnɔ moto, bee a mɔnnɔ lɔɔre, kyɛbee ka hooŋ de maŋsin kaŋa tonɔ toma.

• Saŋa na pɔge naŋ taa poɔ.

• Saŋa na dɔkta naŋ yelko bo ka ho ta nyuuro dããkpeɛne.

• Saŋa na hoŋ koŋ baŋ nyɔge ho meŋɛ a kyaare dããkpeɛne nyuubu.

• Saŋa na a paaloŋ bege naŋ ba tere sori ka ho nyu dããkpeɛne.

• Saŋa na ho neŋ neɛ kaŋa naŋ daaŋ e dããnyukuolo a kyɛ bare naŋ wa laŋ erɛ yɛlɛ.

Ka hooŋ erɛ paati kaŋa, bee ka ho kultaa zie la, a na somaŋ ka ho de dããkpeɛne waneŋ a zie bee? Ka hooŋ boɔrɔ ka ho de gbɛ-soŋ, ŋmɛ a VIDIO.

VIDIO: Aseŋ Ka N De Dããkpeɛne Waneŋ A Zie Bee? (2:41)

Kanne Urom 13:13 ane 1 Korinti 10:31, 32, a kyɛ gyieli a soorebiri naŋ tu na yɛlɛ:

• Sobuo ka a Baabole sɛgre ŋa na toɔ̃ soŋ bo ka ho de gbɛre naŋ na vɛŋ ka Jehoova poɔ pɛle?

5. Wala aŋ seŋ ka ho nyu dããkpeɛne a seŋ?

Ka hooŋ de gbɛre ka ho na nyu la dããkpeɛne, teɛre a yɛlɛ ŋa soŋ: Yelmeŋɛ la, Jehoova yeleeŋ ka a ba e faa ka te nyuuro dããkpeɛne, kyɛ Jehoova lɛ yeleeŋ ka a ba seŋ ka te nyuuro dããkpeɛne yaga zaa te gaali. Ananso la wala? Kanne Hozeeya 4:11, 18, a kyɛ gyieli a soorebiri naŋ tu na yɛlɛ:

• Ka neɛŋ nyu dããkpeɛne yaga zaa te gaali, boŋ na baŋ pɔgoo?

Ka teneeŋ ba boɔrɔ ka te nyu dããkpeɛne yaga zaa te gaali, bo aŋ seŋ ka te e? Aseŋ ka te baŋ te dããkpeɛne nyu ta zie. Kanne Yeng Yelibie 11:2, a kyɛ gyieli a soorebiri naŋ tu na yɛlɛ:

• Sɛre hoŋ na nyu dããkpeɛne, bonso aŋ na soma yaga zaa ka ho baŋ lɛ aŋ seŋ ka ho nyu a dããkpeɛne a seŋ?

6. Ka neɛŋ e dããnyukuolo, boŋ na toɔ̃ somoo ka o bare?

VIDIO: ‘N Zemmo Da Ba Lɛ Noma Korɔ Ma Fẽẽ Zaa’ (6:32)

• Ka Dmitry wa nyu dããkpeɛne zaa wala oŋ da maŋ erɛ o yɛlɛ?

• O da toɔ̃ barɛɛ a dããkpeɛne nyuubu tɔŋtɔbaalɛ bee?

• Boŋ da somoo oŋ toɔ̃ bare a dããnyukuoli?

Kanne 1 Korinti 6:10, 11, a kyɛ gyieli a soorebie ŋa yɛlɛ:

• Bonso ka dããnyukuoli ba soma fẽẽ zaa?

• Bo siereeŋ bebe a wuli ka neɛ naŋ e dããnyukuolo na toɔ̃ leɛreŋ?

Kanne Matio 5:30, a kyɛ gyieli a soorebiri naŋ tu na yɛlɛ:

• Yezu boɔrɔŋ ka o wuli ka, aseŋ ka te mɔɔ a kyɛ iri yelzaa naŋ na vɛŋ ka te erɛ yɛlɛ Jehoova naŋ ba boɔrɔ bare te zemmo poɔŋ. Ka hooŋ maŋ nyuuro dããkpeɛne yaga zaa te gaali, boŋ na toɔ̃ soŋ bo ka ho bare dããkpeɛne nyuubu?a

Kanne 1 Korinti 15:33, a kyɛ gyieli a soorebiri ŋa yɛlɛ:

• Ka hooŋ nyɔge dããnyukuoliba zɔmennoŋ, boŋ na baŋ yi a poɔ wa?

A ZANNOO YELNIMIZEERE

Dããkpeɛne e la kyɔɔtaa Jehoova naŋ de ko te ka lɛ na vɛŋ ka te taa popeɛloŋ, kyɛ o ba boɔrɔ ka te nyuuro dããkpeɛne te gaali bee a e dããnyukuolibo.

Bo Hoŋ Zanne

• Bo ka a Baabole yel kyaare dããkpeɛne nyuubu?

• Ka teneeŋ nyuuro dããkpeɛne yaga zaa te gaali, boŋ na baŋ yi a poɔŋ wa?

• Ka neɛŋ de gbɛre ka o na nyu la dããkpeɛne, bee o koŋ nyu dããkpeɛne, wala teŋ na baŋ e wuli gyeremɛ ko gbɛre na oŋ de na?

YƐLƐ MINE NAŊ LƐ BEBE

Boŋ na toɔ̃ soŋ baapaalba ka ba de gbɛ-sonne a kyaare dããkpeɛne nyuubu? Kaa a vidio ŋa a nyɛ a noɔre iribo.

Teɛre Yɛlɛ Gaa Tɔɔre Sɛre Kyɛ Nyuuro Dããkpeɛne (2:31)

Ho e la neɛ naŋ maŋ nyuuro dããkpeɛne yaga zaa te gaali bee? Ho boɔrɔŋ ka ho nyɛ yɛlɛ naŋ na toɔ̃ soŋ bo ka ho bare dããkpeɛne nyuubu bee? Kanne a yɛlɛ ŋa a nyɛ a noɔre iribo.

“Kaara Ho Dããkpeɛne Nyuubu Zieŋ Soŋ” (A Watchtower, January 1, 2010)

Sɛre ka noba mine na nyu dããkpeɛne na, ba maŋ de la a dãã-nyu boma ŋmɛ taa a kyɛ sɔre maaloo a ko neɛ kaŋa bee yelkaŋa. Aseŋ ka Kristabiiri meŋ erɛ a yɛlɛ ŋa bee?

“Soorebie Naŋ Yi Noba Naŋ Kanna Te Gama Na Zie” (A Watchtower, February 15, 2007)

Kanne a yɛlɛ ŋa yelzu naŋ la “N Da Eɛ Neɛ Naŋ Nyuuro Dããkpeɛne Yaga Zaa Te Gaali,” a nyɛ bon naŋ da toɔ̃ soŋ dɔɔ kaŋa oŋ bare dããnyukuoli.

“A Baabole Soŋ Baŋ Baŋ Leɛre Ba Zemmo Yɛlɛ” (A Watchtower, May 1, 2012)

Bonsuurii ane meŋɛ maaloo eɛ yɛlɛ naŋ ferɛ noba yaga zaa. Yelmeŋɛ la, neɛzaa taaɛ lɛ na oŋ boɔrɔ ka o maŋ su boma a kyɛ maale o meŋɛ. Kyɛ, soorebiri naŋ bebe la ŋa, te na baŋ su la bonsuurii na teŋ boɔrɔ a kyɛ naŋ maale te menne sori naŋ na vɛŋ ka Jehoova poɔ pɛle bee? Ɛɛ. Vɛŋ ka te nyɛ lɛ Baabole kawane naŋ na toɔ̃ soŋ te ka te e lɛ.

1. Bo Baabole kawane la na toɔ̃ soŋ te ka te baŋ bonsuurii naŋ seŋ ka te su ane lɛ aŋ seŋ ka te maale te menne?

A Baabole yeleeŋ ka, aseŋ ka te “maŋ su boma naŋ seŋ ne kyɛ su peɛmɛ bee salema boma naŋ soma a seŋ ne,” a Baabole lɛ yeleeŋ ka, te maŋ maale te menne a e forifori aŋa noba “naŋ eŋnɛ Naaŋmen.” (1 Timoti 2:9, 10) Vɛŋ ka te nyɛ yɛlɛ anaare mine teŋ na baŋ zanne yi a Baabole kawane ŋa poɔŋ: (1) Aseŋ ka te “maŋ su boma naŋ seŋ ne.” Ka hooŋ gaa te lantaapuoruu lammore na, ho na nyɛŋ ka te zaa maŋ su la boma tɛɛtɛɛ, kyɛ boma na teŋ maŋ su na ane lɛ na teŋ maŋ maale te zuri na maŋ wuliŋ ka te taa la gyeremɛ a ko Naaŋmen na teŋ puoro na. (2) Aseŋ ka te maŋ su “boma naŋ soma,” lɛ wuleeŋ ka a ba seŋ ka te su boma naŋ na iri te eŋgama ziiri mine bare ka noba nyɛ ka gaŋneŋ taa vɔlaa kpɛ ba. A ba seŋ ka te su boma naŋ na tagra noba teɛroŋ waana te eŋɛŋ. (3) Aseŋ ka te maŋ su boma naŋ wuli ka te taaɛ ‘teɛroŋ naŋ tori,’ lɛ wuleeŋ ka te koŋ boɔrɔ ka te maŋ sɛ style paalaa zaa bee a da bonsuurii paalba zaa naŋ wa ka noba yele a yɛlɛ. (4) Aseŋ ka lɛ na teŋ maŋ maale te menne na wuli ka te “eŋnɛɛ Naaŋmen,” ka teneeŋ e lɛ neɛzaa naŋ na nyɛ te na baŋ ka te puoree a yelmeŋɛ Naaŋmen.​—1 Korinti 10:31.

2. Ka teneeŋ wa ka te maale te menne, bonso aŋ seŋ ka te teɛre te Kristabitaaba yɛlɛ?

Yelmeŋɛ la, te kaŋa zaa taaɛ sori ka te su bonzaa te naŋ boɔrɔ. Kyɛ, aseŋ ka te soore te menne ka, ‘N bonsuurii ŋa na toɔ̃ vɛmeŋ ka neɛ kaŋa ŋmɛ gbɛre bee?’ Aseŋ ka te mɔɔ te mɔɔbo zaa a ta wa erɛ yelzaa naŋ na dɔŋ te yɔɔmine, kyɛ, aseŋ ka te “kanzaa maŋ erɛ yɛlɛ naŋ na pɛle te tɔsoba poɔ, . . . ka te teɛ ba ka ba baara.”​—Kanne Urom 15:1, 2.

3. Sobuo ka te bonsuurii na toɔ̃ soŋ noba mine ka ba boɔrɔ ka ba wa puoro Jehoova?

Yelmeŋɛ la, zie zaa te naŋ gɛrɛ aseŋ ka te maŋ su boma naŋ soma. Kyɛ, ka teneeŋ wa gɛrɛ a lantaapuoruu lammore ane a naaŋ moɔloo, aseŋ ka te su boma naŋ soma yaga zaa. Ananso la wala? Ananso la ka, ka teneeŋ ba su boma naŋ soma, te na tagɛɛ noba teɛroŋ a yi duorisoŋ na teŋ moɔlɔ na eŋɛŋ. Kyɛ, ka te bonsuuriiŋ soma, a na vɛmeŋ ka noba boɔrɔ ka ba wa zanne Jehoova yɛlɛ. A na lɛ vɛmeŋ ka “Naaŋmen a te Faara wuluu taa kyɛl-wommu.”​—Tiitu 2:10.

ZANNE YƐLƐ YAGA POƆ

4. Ka teneeŋ su boma naŋ soma, lɛ wuleeŋ ka te taaɛ gyeremɛ ko Jehoova

Bonso aŋ e nimizeɛ yaga zaa ka te su boma naŋ soma? Kanne Yieme 47:2, a kyɛ gyieli a soorebie naŋ tu na yɛlɛ:

• Te arɛɛ Jehoova gbɛbɔgriŋ a tonɔ o toma. Azuŋ, bo boma hoŋ teɛre ka aseŋ ka te maŋ su?

• Ho teɛre ka a e la nimizeɛ yaga zaa ka te maŋ teɛre yɛlɛ gaa tɔɔre saŋa na teŋ boɔrɔ ka te su boma gaa a lantaapuoruu lammore ane a naaŋ moɔloo bee? Bonso hoŋ yel lɛ?

5. Boŋ na toɔ̃ soŋ te ka te maŋ kaa iri bonsuurii naŋ soma a su a kyɛ lɛ maale te menne meŋ soŋ?

Ŋmɛ a VIDIO.

VIDIO: ‘Yɛ Erɛ Yelzaa Naaŋmen Puubu Eŋɛ’ (10:18)

Ka te bonsuurii na daaŋ e tuo, bee ka a daaŋ ba e tuo, kyɛ aseŋ ka te maŋ pɛgaa ka a e forifori. Aseŋ ka te bonsuurii na meŋ seŋ neŋ a ko zie na teŋ gɛrɛ na. Kanne 1 Korinti 10:24 ane 1 Timoti 2:9, 10. Ka yɛneeŋ wa kanne baare, yɛ gyieli a yɛlɛ ŋa, bonso aŋ ba seŋ ka te su boma naŋ . . .

• dɛgi bee boma naŋ ba seŋ neŋ a ko zie na teŋ gɛrɛ na?

• ŋmɛnne te yaga zaa, bee a iri te eŋgama lomboe ziiri mine bare, kyɛbee a vɛŋ ka noba taa gaŋneŋ taa vɔlaa a kyaare te?

Yelmeŋɛ la, Kristabiiri ba lɛ de a Moosis Bege na tonɔ neŋ toma, kyɛ a Moosis Bege na maŋ wuli teŋ teɛroŋ na Jehoova naŋ taa kyaare yɛlɛ mine. Kanne Duturoonomi 22:5, a kyɛ gyieli a soorebiri naŋ tu na yɛlɛ:

• Bonsuurii mine bebeŋ ka dɔɔŋ de a su, a maŋ vɛmeŋ oŋ waa ŋa pɔge. Ka a mine meŋ bebe ka pɔgeŋ de a su, o maŋ waa ŋa dɔɔ. Bonso aŋ ba seŋ ka te maŋ su a bonsuurii ŋa taa?

Kanne 1 Korinti 10:32, 33 ane 1 Gyɔɔn 2:15, 16, a kyɛ gyieli a soorebie naŋ tu na yɛlɛ:

• Ka teneeŋ wa suuro boma bee a maala te menne, aseŋ ka te kaara soŋ ka te bonsuurii na bee lɛ na teŋ maala te menne na ta vɛŋ ka noba naŋ be te gbandige naŋ ane a lantaapuoruu poɔŋ poɔ sãã. Ananso la wala?

• Zie na hoŋ be na, wala ka noba maŋ su boma a kyɛ maale ba menne?

• Ho teɛre ka ba bonsuurii ane lɛ na baŋ maŋ maale ba menne na seŋ nɛɛŋ a ko Kristabiiri bee? Bonso hoŋ yel lɛ?

A ZANNOO YELNIMIZEERE

Ka teneeŋ wa su boma naŋ soma a kyɛ maale te menne soŋ zaa, a maŋ wuliŋ ka te taaɛ gyeremɛ a ko Jehoova ane te taaba.

Bo Hoŋ Zanne

• Bonso ka te bonsuurii ane lɛ na teŋ maŋ maale te menne na yɛlɛ ferɛ Jehoova yaga zaa?

• Bo Baabole kawane la na baŋ soŋ te ka te de gbɛ-sonne a kyaare te bonsuurii?

• Te bonsuurii na baŋ vɛmeŋ ka noba boɔrɔ ka ba wa puoro Jehoova kyɛbee ka a pigi ba sori ka ba wa puoro Jehoova. Sobuoŋ?

YƐLƐ MINE NAŊ LƐ BEBE

Kanne a yɛlɛ ŋa a nyɛ yɛlɛ na ho bonsuurii naŋ wuli a kyaare bo.

“Wala Ka N Bonsuurii Wuli A Kyaare Ma?” (Intanɛt zu gane)

Sɛre hoŋ na drɔɔ boma mine bee a maale tattoo eŋ ho eŋdaaŋ na, aseŋ ka ho teɛre yɛlɛ mine gaa tɔɔre. Ananso la wala? Kanne a yɛlɛ ŋa a nyɛ a noɔre iribo.

“Bo Ka A Baabole Yel Kyaare Tattoo?” (Intanɛt zu gane)

Kanne a yɛlɛ ŋa a nyɛ Baabole kawane mine naŋ na toɔ̃ soŋ bo ka ho de gbɛ-sonne a kyaare ho bonsuurii yɛlɛ.

“Ho Bonsuurii De La Emmo Korɔ Naaŋmen Bee?” (A Watchtower, September 2016)

Boŋ da soŋ pɔge kaŋa oŋ leɛre teɛroŋ na oŋ da taa kyaare lɛ na noba naŋ maŋ su boma na? Kanne a yɛlɛ ŋa a nyɛ a noɔre iribo.

“Bonsuurii Yɛlɛ La Da Pigre Ma Sori” (Awake!, December 22, 2003)