7. Naaŋmen Naaloŋ na taa la bege naŋ soma yaga zaa

Gɔmenantere naŋ maŋ boɔrɔ ka ba soŋ ba noba a kyɛ go ba na zuŋ, ba maŋ biŋee bege a ko ba. Naaŋmen Naaloŋ na meŋ taaɛ bege. Aseŋ ka a Naaloŋ biiri zaa tuuro a bege ŋa. Kanne 1 Korinti 6:9-11, a kyɛ gyieli a soorebie naŋ tu na yɛlɛ:

• Ka neɛzaaŋ de Naaŋmen Naaloŋ bege na tonɔ neŋ toma, ho teɛre ka wala ka a donɛɛ ŋa na waa?a

• Jehoova kaarɛɛ soriŋ ka neɛzaa naŋ be a Naaloŋ puliŋ tuuro a Naaloŋ bege. Ho teɛre ka lɛ seŋ nɛɛŋ bee? Bonso hoŋ yel lɛ?

• Bo siereeŋ bebe a wuli ka noba naŋ da ba tuuro a bege ŋa na toɔ̃ leɛrɛɛ ba eebo?​—Kaa o wɛlbo 11.

A maŋ eɛ kpeɛŋaa ko noba yaga ka ba yele gaŋneŋ taa yɛlɛ. Kyɛ, ka a Baaboleŋ wa yele gaŋneŋ taa yɛlɛ, o maŋ yelee a yɛlɛ aŋ pɛle. Kyɛ gyeremɛ soriŋ ka a Baabole maŋ tu kyɛ yele a yɛlɛ. Yɛlɛ na a Baabole naŋ yel kyaare gaŋneŋ taa yɛlɛ na na toɔ̃ soŋ teŋ, bonso, Jehoova la vɛŋ baŋ sɛge a Baabole, onaŋ maale te meŋ, azuŋ o baŋɛɛ yɛlɛ naŋ soma ko te. Jehoova boɔrɔŋ ka o wuli te lɛ teŋ na toɔ̃ erɛ yɛlɛ te zemmo poɔŋ ka lɛ vɛŋ ka te taa popeɛloŋ, a kyɛ lɛ nyɛ nyɔvore naŋ ba taa baaraa meŋ.

1. Bo teɛroŋ ka Jehoova taa kyaare gaŋneŋ taa yɛlɛ?

Gaŋneŋ taa eɛ kyɔɔtaa Jehoova naŋ de ko dɔɔ neŋ pɔge naŋ kultaa. O ko baŋ a kyɔɔtaa ŋa ka lɛ na vɛŋ ka ba taa popeɛloŋ. Gaŋneŋ taa maŋ soŋɛɛ dɔɔ neŋ pɔge baŋ dɔge biiri, kyɛ lɛ yoŋ naane, gaŋneŋ taa eɛ sori kaŋa dɔɔ neŋ pɔge naŋ maŋ tu kyɛ wulo taa nɔmmo sori naŋ seŋ neŋ poɔŋ. A lɛ zuŋ ka Naaŋmen Yelbiri na yelka: “Nyagina neŋ ho baapaaloŋ saŋa pɔge.” (Yeng Yelibie 5:18, 19) Jehoova boɔrɔŋ ka Kristabie zaa e yelmeŋɛ soba ko o kultatɔ, Jehoova ba boɔrɔ ka kultaa deme tonɔ moɔrɔ toma, bee peɛ̃mo toma.​—Kanne Hiburu 13:4.

2. Boŋ la sɛŋsɛŋ toma, bee peɛ̃mo toma?

A Baabole yelko teŋ ka, “banaŋ naŋ tonɔ peɛ̃mo toma . . . koŋ kpɛ a Naaŋmen Naaloŋ.” (1 Korinti 6:9, 10) Saŋa na a Baabole sɛgsɛgreba naŋ da sɛgrɛ a yɛlɛ ŋa na, Giriki kɔkɔre baŋ da de sɛgaa. Azuŋ, ba da de la a Giriki yelbiri naŋ la por·neiʹa a de wuli neŋ peɛ̃mo toma tɛgɛ. A yelbiri por·neiʹa na baŋ wulee yɛlɛ ata mine, a na la (1) dɔɔ neŋ pɔge naŋ ba kultaa kyɛ gana neŋ taa,a (2) dɔɔ neŋ dɔɔ naŋ gaŋneŋ taa, bee pɔge neŋ pɔge naŋ gaŋneŋ taa, ane (3) dɔɔ naŋ gaŋneŋ duŋo, bee pɔge naŋ tere sori ka duŋo gaŋnoo. Ka teneeŋ “tage [te] menne yi peɛ̃mo toma poɔ,” a maŋ vɛmeŋ ka Jehoova poɔ pɛle, a kyɛ lɛ soŋ te yaga zaa.​—1 Tɛsalonika 4:3.

ZANNE YƐLƐ YAGA POƆ

3. Yɛ zagre peɛ̃mo toma

Dɔɔ kaŋa baŋ boɔlɔ Gyoosef da puoree Jehoova yelmennoŋ poɔŋ, a da wa ta la saŋa kaŋa ka pɔge kaŋa da boɔrɔ ka o neŋ Gyoosef gaŋneŋ taa. Kanne Munpiilee 39:1-12, a kyɛ gyieli a soorebie ŋa yɛlɛ:

• Boŋ da soŋ Gyoosef oŋ zagre peɛ̃mo toma?—Kaa o wɛlbo 9.

• Ho teɛre ka gbɛre na Gyoosef naŋ da de na somaŋ bee? Bonso hoŋ yel lɛ?

VIDIO: Yɛ Zagre Peɛ̃mo Toma (5:06)

Jehoova boɔrɔŋ ka te zaa zagre peɛ̃mo toma. Kanne 1 Korinti 6:18, a kyɛ gyieli a soorebie naŋ tu na yɛlɛ:

• Bo yɛlɛ mine la na baŋ vɛŋ ka neɛ toŋ peɛ̃mo toma?

• Wala hoŋ na toɔ̃ e a zagre peɛ̃mo toma?

4. Ho na toɔ̃ arɛɛ pigrinyɛ noɔreŋ

VIDIO: Baabole Kannoo Na Toɔ̃ Soŋ Boŋ Ka Ho Are Pigrinyɛ Noɔreŋ (3:02)

• A vidio poɔŋ, saŋa na te yɔɔdɔɔ na naŋ wa nyɛ ka yɛlɛ na mine oŋ da teɛrɛ a kyɛ erɛ na na toɔ̃ vɛmeŋ ka o yi o pɔge puoreŋ na, wala oŋ da e?

Saŋa kaŋa a maŋ eɛ kpeɛŋaa ko Kristabiiri naŋ puoro Jehoova yelmennoŋ poɔŋ ka ba iri teɛroŋ faare yi ba teɛroŋ poɔŋ. Boŋ na toɔ̃ soŋ bo ka ho iri peɛ̃mo toma teɛrɛ zaa yi ho teɛroŋ poɔŋ? Kanne Filipae 4:8, a kyɛ gyieli a soorebie naŋ tu na yɛlɛ:

• Bo yɛlɛ aŋ seŋ ka te maŋ teɛrɛ?

• Sobuo ka Baabole kannoo ane teŋ na moɔ̃ niŋe tonɔ toma Jehoova puoruu poɔŋ na toɔ̃ soŋ te ka te are pigrinyɛ noɔreŋ?

5. Ka teneeŋ de Jehoova bege na tonɔ neŋ toma, tenee menneŋ na nyɛ a tɔnɔ

VIDIO: Bipɔlee Naŋ Kɔŋ Yɛŋ (9:31)

• Bo yɛlɛ ka a bipɔlee ŋa da e ka lɛ vɛŋ oŋ te kpɛ a pigrinyɛ ŋa poɔ?​—Kaa Yeng Yelibie 7:8, 9.

• Yeng Yelibie 7:23, 26 vɛŋɛɛŋ teŋ baŋ ka, peɛ̃mo toma na toɔ̃ de la toɔrɔ naŋ e kpoŋ waneŋ te zuŋ. Ka teneeŋ tage te menne yi peɛ̃mo toma poɔŋ, bo toɔrɔŋ koŋ pɔge te?

• Ka teneeŋ e forifori, sobuo ka lɛ na toɔ̃ vɛŋ ka te taa zeŋ laafeɛ tegitegilɛ?

Noba mine maŋ teɛreŋ ka, bege na Jehoova naŋ biŋ a kyaare dɔɔ neŋ dɔɔ gaŋneŋ taa, ane pɔge neŋ pɔge gaŋneŋ taa na ba wulo nɔmmo. Kyɛ, Jehoova eɛ nɔmmo Naaŋmen, azuŋ, o boɔrɔŋ ka neɛzaa taa zeŋ laafeɛ tegitegilɛ. Sɛre teŋ na nyɛ a zeŋ laafeɛ ŋa, aseŋ ka te de bege na oŋ biŋ na tonɔ neŋ toma. Kanne 1 Korinti 6:9-11, a kyɛ gyieli a soorebiri naŋ tu na yɛlɛ:

• Naaŋmen nimitɔɔreŋ, dɔɔ neŋ dɔɔ gaŋneŋ taa vɔlaa, ane pɔge neŋ pɔge gaŋneŋ taa vɔlaa yoŋ la ba soma bee?

Aseŋ ka te zaa leɛre te eebo sɛre kyɛ na baŋ pɛle Naaŋmen poɔ. Ka teneeŋ leɛre te eebo te na nyɛɛ tɔnɔ kaŋa bee? Kanne Yieme 19:8, 11, a kyɛ gyieli a soorebie naŋ tu na yɛlɛ:

• Wala hoŋ teɛre, bege na Jehoova naŋ biŋ a kyaare peɛ̃mo toma na seŋ nɛɛŋ bee? Bonso hoŋ yel lɛ?

A ZANNOO YELNIMIZEERE

Gaŋneŋ taa eɛ kyɔɔtaa Jehoova naŋ de ko dɔɔ neŋ pɔge naŋ kultaa, ka lɛ na vɛŋ ka ba taa popeɛloŋ.

Bo Hoŋ Zanne

• Bo yɛlɛ ka neɛ na erɛ ka ba yelka o soba tonɛɛ peɛ̃mo toma?

• Boŋ na toɔ̃ soŋ te ka te tage te menne yi peɛ̃mo toma poɔŋ?

• Ka teneeŋ de Jehoova bege na tonɔ neŋ toma, bo tɔnɔ teŋ na nyɛ?

YƐLƐ MINE NAŊ LƐ BEBE

Bonso ka Naaŋmen boɔrɔ ka dɔɔ neŋ pɔge kultaa sɛre kyɛ laŋ kpeɛrɛ? Kanne a yɛlɛ ŋa a nyɛ a noɔre iribo.

“Bo Ka A Baabole Yel Kyaare Dɔɔ Neŋ Pɔge Naŋ Laŋ Kpeɛrɛ A Kyɛ Ba Kultaa Yɛlɛ?” (Intanɛt zu gane)

Yɛlɛ na a Baabole naŋ yel kyaare dɔɔ neŋ dɔɔ gaŋneŋ taa ane pɔge neŋ pɔge gaŋneŋ taa na wuleeŋ ka Naaŋmen ba nɔnɔ noba bee? Kanne a nyɛ a noɔre iribo.

“Dɔɔ Neŋ Dɔɔ Gaŋneŋ Taa Bee Pɔge Neŋ Pɔge Gaŋneŋ Taa Eɛ Yelfaa Bee?” (Intanɛt zu gane)

Bege na Naaŋmen naŋ biŋ a kyaare gaŋneŋ taa yɛlɛ na maŋ go teŋ. Sobuoŋ? Kanne a yɛlɛ ŋa a nyɛ a noɔre iribo.

“Ka Pɔgeŋ Nyɔge Dɔɔ Dɔɔloŋ Eŋ O Noɔreŋ A Mugrɔ Kyɛbee Ka Dɔɔŋ Mugrɔ Pɔge Pɔgeloŋ, Lɛ Wuleeŋ Ka Ba Gaŋnɛɛ Taa Bee?” (Intanɛt zu gane)

Kanne a yelzu “Ba Da Wulo Maŋ Gyeremɛ Yaga,” a nyɛ yɛlɛ naŋ da soŋ dɔɔ kaŋa naŋ da de o meŋɛ eŋ dɔɔ neŋ dɔɔ gaŋneŋ taa yɛlɛ poɔŋ, oŋ toɔ̃ leɛre o eebo, a leɛ erɛ yɛlɛ naŋ pɛlɛ Naaŋmen poɔ.

“A Baabole Soŋ Baŋ Baŋ Leɛre Ba Zemmo Yɛlɛ” (A Watchtower, April 1, 2011)

Yelmeŋɛ la, ho nɔŋɛɛ Jehoova yaga zaa, ho mɔɔrɛɛ ho mɔɔbo zaa meŋ ka ho erɛ yɛlɛ naŋ na pɛlɛ o poɔ yoŋ. Kyɛ, saŋa kaŋa, ho na baŋ ŋmɛɛ gbɛɛ. Gbɛ ŋmɛ mine bebeŋ a e nimizeɛ yaga zaa. (1 Korinti 6:9, 10) Ka hooŋ e yelfaa kaŋa naŋ e nimizeɛ, lɛ wuleeŋ ka Jehoova ba lɛ nɔnɔ bo bee? Ai. Jehoova eɛ siri ka o vɛŋ ko bo a kyɛ soŋ bo meŋ.

1. Bo yɛlɛ aŋ seŋ ka te e ka lɛ vɛŋ ka Jehoova di te yelbebe suuri ko te?

Te nɔŋ la Jehoova, azuŋ ka teneeŋ wa e yelfaa kaŋa naŋ e nimizeɛ, a maŋ dɔɔnɔ teŋ yaga zaa. Kyɛ noɔre na Jehoova naŋ eŋ ko o puorebiiri na maŋ toɔ̃ dii la ba sukyie. Jehoova yelka: “Haali ka yɛ toŋfaareŋ e gyimegyime, a na leɛ pɛleŋ aŋa sinoo.” (Aizeeya 1:​18) Ka teneeŋ yi te sukyie poɔŋ a e kaŋdabaŋkalɛ, Jehoova na vɛŋ ko teŋ kpɛlɛŋkpɛlɛŋ. Wala teŋ na baŋ e a wuli ka te e la kaŋdabaŋkalɛ? Aseŋ ka te vɛŋ ka faaloŋ na teŋ e Jehoova na yɛlɛ beɛrɛ te yaga zaa, lɛ na vɛmeŋ ka te bare a yelfaa eebo a kyɛ gaa Jehoova zie a te sɔre te yelbebe sudi. Aseŋ ka te lɛ mɔɔ te mɔɔbo zaa ka te leɛre teɛroŋ faare ane gyog-faare naŋ vɛŋ teŋ e a yelfaa na. Te na moɔ̃ la niŋe a de Jehoova bege naŋ e forifori na tonɔ neŋ toma meŋ.​—Kanne Aizeeya 55:6, 7.

2. Ka teneeŋ e yelfaa kaŋa naŋ e nimizeɛ, sobuo ka Jehoova maŋ tu a lantaapuoruu nembɛrɛ zieŋ kyɛ de sommo ko te?

Ka teneeŋ wa e yelfaa kaŋa naŋ e nimizeɛ, Jehoova yelko teŋ ka te “boɔle a puoruu laŋne nembɛrɛ.” (Kanne Gyimisi 5:14, 15.) A lantaapuoruu nembɛrɛ nɔŋɛɛ Jehoova ane ba Kristabitaaba zaa. Ba de la wulibo naŋ seŋ neŋ ko a lantaapuoruu nembɛrɛ, ka lɛ na vɛŋ ka ba de sommo naŋ seŋ neŋ a ko te saŋa na te neŋ Jehoova niiloŋ naŋ wa sãã na. Ba na toɔ̃ soŋ teŋ ka te leɛ maale te neŋ Jehoova niiloŋ na naŋ sãã na.​—Galesiya 6:1.

Ka teneeŋ wa e yelfaa kaŋa, wala ka a lantaapuoruu nembɛrɛ maŋ e a soŋ te? A lantaapuoruu nembɛrɛ bayi bee bata na de la a Baabole soŋ te ka te nyɛ lɛ gbɛre na te naŋ ŋmɛ na naŋ e nimizeɛ a seŋ. Ba na eŋ teŋ faŋa a kyɛ ko te sowuli meŋ naŋ na toɔ̃ soŋ te ka te tage te menne yi yelfaare eeboŋ. Ka neɛ kaŋaŋ wa e yelfaa kaŋa naŋ e nimizeɛ a kyɛ ba e kaŋdabaŋkalɛ, a lantaapuoruu nembɛrɛ maŋ iree o soba bare a lantaapuoruu poɔŋ. Ba maŋ eɛ lɛ ka o soba ta de o gyog-faare na wulo a lantaapuoruu noba.

ZANNE YƐLƐ YAGA POƆ

3. Ka teneeŋ kyiiri te yelfaare a na soŋ teŋ ka te maale te neŋ Jehoova niiloŋ na

Ka teneeŋ wa e yelfaa zaa, a maŋ beɛrɛɛ Jehoova, azuŋ, aseŋ ka te maŋ kyiiri te yelfaare ko Jehoova. Kanne Yieme 32:1-5, a kyɛ gyieli a soorebiri ŋa yɛlɛ:

• Bonso aŋ soma yaga zaa ka te maŋ kyiiri te yelfaare a ko Jehoova a gaŋ teŋ na de a sɔgle?

VIDIO: “Neɛ A Daana Naŋ Nɔŋ Toori La Ka O Maŋ Tage” (3:01)

• A vidio poɔŋ, wala ka a lantaapuoruu nembɛrɛ da e a soŋ Canon oŋ leɛ wa Jehoova zie?

Aseŋ ka te maŋ yi te poɔ zaa a yeli a yɛlɛ yelmeŋɛ zaa ko a lantaapuoruu nembɛrɛ, bonso ba boɔrɔŋ ka ba soŋ te. Kanne Gyimisi 5:16, a kyɛ gyieli a soorebiri ŋa yɛlɛ:

• Ka teneeŋ e yelfaa kaŋa naŋ e nimizeɛ yaga zaa a kyɛ yel a yɛlɛ yelmeŋɛ zaa ko a lantaapuoruu nembɛrɛ a maŋ e la mɔlɔ ko ba ka ba soŋ te. Ananso la wala?

4. Jehoova maŋ wulee nembaalonzoe korɔ yelfa-erebɛ

Ka neɛŋ wa e yelfaa kaŋa naŋ e nimizeɛ, a kyɛ lɛ zagre ka o de Jehoova bege na meŋ tonɔ neŋ toma, lɛ yɛŋ aseŋ ka ba iri o soba bare a lantaapuoruu poɔŋ. Ka ba naŋ wa iroo bare a lantaapuoruu poɔŋ, te ne o koŋ baŋ lɛ laŋ e yɛlɛ. Kanne 1 Korinti 5:6, 11 a kyɛ gyieli a soorebiri ŋa yɛlɛ:

• Ka hooŋ de bilɛ fẽẽ lɛ eŋ paanuu zɔŋ poɔŋ, a maŋ vɛmeŋ ka a zɔŋ zaa pi. Azuŋ, ka te neŋ neɛ kaŋa ba naŋ iri bare a lantaapuoruu poɔŋ wa laŋ erɛ yɛlɛ, bo toɔrɔ aŋ na baŋ de wa eŋ a lantaapuoruu?

5. Ka teneeŋ e kaŋdabaŋkalɛ, Jehoova na vɛŋ ko teŋ

Yezu da de la yelmannaa kaŋa a wuli lɛ Jehoova naŋ maŋ teɛre saŋa na neɛ kaŋa naŋ e kaŋdabaŋkalɛ a leɛ wa o zie na. Kanne Luka 15:1-7, a kyɛ gyieli a soorebiri ŋa yɛlɛ:

• Bo ka a yɛlɛ ŋa wuli bo a kyaare Jehoova?

Kanne Iziikiel 33:11, a kyɛ gyieli a soorebiri ŋa yɛlɛ:

• Bo gbɛre naŋ e nimizeɛ la aŋ seŋ ka te de a wuli ka te e la kaŋdabaŋkalɛ?

A ZANNOO YELNIMIZEERE

Ka teneeŋ e yelfaa kaŋa naŋ e nimizeɛ a kyɛ yi te poɔ zaa a e kaŋdabaŋkalɛ, a bare a yelfaa eebo, Jehoova na vɛŋ ko teŋ.

Bo Hoŋ Zanne

• Bonso aŋ soma yaga zaa ka te kyiiri te yelfaare ko Jehoova?

• Bo yɛlɛ aŋ seŋ ka ho e ka Jehoova di ho yelbebe suuri a ko bo?

• Ka teneeŋ e yelfaa kaŋa naŋ e nimizeɛ yaga zaa, bonso aŋ seŋ ka te gaa a lantaapuoruu nembɛrɛ zie ka ba soŋ te?

YƐLƐ MINE NAŊ LƐ BEBE

Aizeeya 1:18 wuleeŋ ka Jehoova e la nembaalonzoe soba. Kaa a vidio ŋa a nyɛ lɛ dɔɔ kaŋa naŋ wa nyɛ ka a yɛlɛ ŋa sereŋ e la yelmeŋɛ.

Daŋ Ta Wa Bonnɔ Jehoova Nembaalonzoe Na Zaa (5:02)

Sobuo ka a lantaapuoruu nembɛrɛ maŋ tu a moɔrɔ ka ba soŋ noba naŋ e yelfaa naŋ e nimizeɛ?

“Lɛ A Lantaapuoruu Nembɛrɛ Naŋ Maŋ Wuli Nɔmmo Ane Nimimaaroŋ Ko Neɛ Naŋ E Yelfaa?” (A Watchtower, August 2024)

Kanne a nyɛ sori na baŋ maŋ tu a wuli nɔmmo ane nimibaaloŋ ko noba naŋ e yelfaare a kyɛ ba e kaŋdabaŋkalɛ.

“Lɛ A Nembɛrɛ Naŋ Na Baŋ Soŋ Noba Na Ba Naŋ Iri Bare A Lantaapuoruu Poɔŋ” (A Watchtower, August 2024)

Kanne a yɛlɛ ŋa, “N Wa Nyɛɛŋ Ka Aseŋ Ka N Leɛ Wa Jehoova Zie,” a nyɛ bon naŋ da soŋ dɔɔ kaŋa oŋ leɛ wa Jehoova zie.

“A Baabole Soŋ Baŋ Baŋ Leɛre Ba Zemmo Yɛlɛ” (A Watchtower, April 1, 2012)