ZANNOO 40
Wala Teŋ Na Toɔ̃ E A E Forifori Naaŋmen Nimitɔɔreŋ?
Ka bi-ma kaŋaŋ boɔrɔ ka o nare o bie ka o gaa sakuu, o maŋ so la a bie koɔ̃, a vɛŋ oŋ su bonsuurii naŋ soma a kyɛ e forifori meŋ. Lɛ maŋ vɛmeŋ ka a bie taa laafeeloŋ naŋ soma. Ka a bieŋ wa e forifori meŋ, a maŋ vɛmeŋ ka noba nyɛ ka a bie dɔgreba kaarɛɛ o zu velaa. Lɛ neŋ o zu la ka te Saa Jehoova naŋ taa nɔmmo yaga boɔrɔ ka te e forifori. Jehoova boɔrɔŋ ka te e forifori eŋgannoŋ poɔŋ, a kyɛ lɛ e forifori te yel-erre meŋ poɔŋ. Ka teneeŋ wa e forifori, lɛ maŋ soŋ teŋ yaga zaa, a kyɛ lɛ de emmo korɔ Jehoova meŋ.
1. Wala teŋ na baŋ e a e forifori eŋgannoŋ poɔŋ?
Jehoova yelko teŋ ka: ‘Aseŋ ka yɛ e forifori.’ (1 Piita 1:16) Wala ka lɛ wuli? Lɛ wuleeŋ ka aseŋ ka te e forifori eŋgannoŋ poɔŋ, a kyɛ lɛ e forifori te yel-erre meŋ poɔŋ. Azuŋ, aseŋ ka te maŋ so koɔ̃ bebiri zaa, a pɛgi te bonsuurii, a maale te die ka o soma, a kyɛ pɛgi te moto bee te lɔɔre ka o veɛlɛ. Te na baŋ soŋeŋ ka ba maale te Lammozie na. Ka teneeŋ e forifori eŋgannoŋ poɔŋ, lɛ na vɛmeŋ ka te de emmo korɔ Jehoova.—2 Korinti 6:3, 4.
2. Bo gyogri mine la aŋ seŋ ka te bare a toɔ̃ e forifori?
A Baabole ko teŋ kawane ka, “yɛ vɛŋ ka te pɛgi te menne a yi eŋgannoŋ ane [vooroŋ poɔ] dɛgre zaa eŋɛŋ.” (2 Korinti 7:1) Lɛ wuleeŋ ka aseŋ ka te tage te menne yi yelzaa naŋ na toɔ̃ sãã te eŋdaa ane te teɛroŋ. Aseŋ ka yɛlɛ na teŋ maŋ teɛrɛ meŋ pɛlɛ Jehoova poɔ, azuŋ, ka teɛroŋ faareŋ wa kpɛ te teɛroŋ poɔ, aseŋ ka te lonni wieoŋ a iraa baare. (Yieme 104:34) Aseŋ ka te mɔɔ te mɔɔbo zaa a maŋ yele yɛlɛ naŋ soma.—Kanne Kolosi 3:8.
Bo yɛlɛ mine la a na baŋ sãã te eŋdaa ane te zemmo? Boma mine bebeŋ a na toɔ̃ sãã te eŋdaa na. Azuŋ, a ba seŋ ka te nyuuro sigaari, wii, bee a lerɛ tɔbɔ, bee a ɔɔrɔ betel nut, bee coca leaves, ane tẽẽkpeɛne dɔkta naŋ ba ko te sori ka te nyuuro. Ka teneeŋ tage te menne yi a boma ŋa eŋɛŋ, lɛ na wuliŋ ka te de la nyɔvore na teŋ taa na tegroŋ yaga zaa. Ka teneeŋ boɔrɔ ka te e forifori eŋgannoŋ poɔŋ, bo yɛlɛ aŋ ba seŋ ka te erɛ? Dɔbɔ mine bebeŋ, ka gaŋneŋ taa vɔlaaŋ wa kpɛ ba, ba maŋ de la ba nu a nɔnɔ ba dɔɔloŋ lɛɛŋ ka ba gaŋneŋ taa vɔlaa na wa mãã. Ka pɔgeba mine meŋ bebe, ka gaŋneŋ taa vɔlaaŋ wa kpɛ ba, ba maŋ toɔ̃ eɛ ba menne yɛlɛ mine lɛɛŋ ka ba gaŋneŋ taa vɔlaa na wa mãã. Noba mine meŋ maŋ kaarɛɛ pornography. Ka teneeŋ boɔrɔ ka te e forifori te yel-erre poɔŋ, aseŋ ka te tage te menne yi a yɛlɛ ŋa zaa poɔŋ. (Yieme 119:37; Efesu 5:5) Ka neɛ kaŋaŋ e a yɛlɛ ŋa ka a minloo, a na baŋ eɛ kpeɛŋaa koo ka o bare, kyɛ Jehoova na baŋ soŋɛɛ o soba ka o baraa kpɛlɛŋkpɛlɛŋ.—Kanne Aizeeya 41:13.
ZANNE YƐLƐ YAGA POƆ
A zannoo ŋa na soŋ boŋ ka ho wa nyɛ ka, ka hooŋ e forifori eŋgannoŋ poɔŋ, lɛ wuleeŋ ka ho eŋnɛɛ Jehoova. Ho na lɛ zanne nyɛɛ lɛ hoŋ na toɔ̃ e a zɔɔtoɔ̃ gyog-faare naŋ be ho eŋɛŋ kɔɔre.
3. Ka teneeŋ e forifori eŋgannoŋ poɔŋ, lɛ wuleeŋ ka te eŋnɛɛ Jehoova
Bege na Jehoova naŋ da ko a takoreŋ saŋa Izerayɛl biiri na vɛŋɛɛŋ teŋ baŋ ka Jehoova boɔrɔŋ ka te maŋ e forifori eŋgannoŋ poɔŋ. Kanne Yiibu 19:10 ane 30:17-19, a kyɛ gyieli a soorebie naŋ tu na yɛlɛ:
Bo yɛlɛŋ be a sɛgre ŋa poɔŋ a wuli ka Jehoova boɔrɔŋ ka te e forifori eŋgannoŋ poɔŋ?
Bo yɛlɛ mineŋ na baŋ soŋ bo ka ho maŋ e forifori eŋgannoŋ poɔŋ wagre zaa?
A ba e mɔlɔ ka te e forifori eŋgannoŋ poɔŋ. Zie zaa teŋ be, ka te eɛ bondaaneba bee nandaaneba, kyɛ te na baŋ eɛ forifori eŋgannoŋ poɔŋ. Ŋmɛ a VIDIO, a kyɛ gyieli a soorebiri naŋ tu na yɛlɛ.
Ka noba na teŋ maŋ moɔlɔ a duorisoŋ korɔ naŋ wa nyɛ ka te boma na teŋ taa na eɛ forifori, bonso ka lɛ na vɛŋ ka ba de gyeremɛ naŋ e kpoŋ a korɔ Jehoova?
4. Ho na toɔ̃ barɛɛ gyog-faare naŋ minli bo
Ka teneeŋ erɛ yelfaare mine ka a minli te, Jehoova na toɔ̃ soŋ teŋ ka te bare a eebo
Ka hooŋ nyuuro sigaari, wii, kyɛbee tẽẽkpeɛne dɔkta naŋ ba ko bo sori ka ho nyuuro, aminekaŋaŋ, ho meŋɛ baŋɛɛŋ ka a ba e mɔlɔ ka ho baraa. Boŋ na baŋ soŋ bo? Soore ho meŋɛ ka, ‘A yɛlɛ ŋa maŋ erɛ ŋa sonnɔ maŋ, bee a sããna maŋ?’ Kanne Matio 22:37-39, a kyɛ gyieli a yɛlɛ ŋa a nyɛ lɛ sigaari bee wii nyuubu, kyɛbee tẽẽkpeɛne nyuubu naŋ na toɔ̃ sãã . . .
te neŋ Jehoova niiloŋ.
o soba booree deme ane noba naŋ peɛloo.
Ka yelfaa kaŋa eeboŋ minli bo, mãã ho meŋɛ a teɛre yɛlɛ na mine hoŋ na toɔ̃ e a bare a yɛlɛ eebo.a Ŋmɛ a VIDIO.
Kanne Filipae 4:13, a kyɛ gyieli a soorebiri naŋ tu na yɛlɛ:
Sobuo ka Baabole zannoo, puoro, ane a lantaapuoruu lammore na toɔ̃ soŋ neɛ ka o zɔɔtoɔ̃ a gyog-faare ŋa?
5. Boŋ na toɔ̃ soŋ bo ka ho iri teɛroŋ faare yi ho teɛroŋ poɔŋ, a kyɛ lɛ soŋ bo ka ho bare gyog-faare meŋ?
Kanne Kolosi 3:5, a kyɛ gyieli a soorebie naŋ tu na yɛlɛ:
Noba mine maŋ kaarɛɛ pornography, ka ba mine meŋ maŋ tu fone zuŋ bee komputa zuŋ kyɛ de sɛŋsɛŋ fotori neŋ vidiori toɔlɔ korɔ noba, kyɛ lɛ yoŋ naane, ka gaŋneŋ taa vɔlaaŋ wa kpɛ dɔba mine, ba maŋ de la ba nu nɔŋ ba dɔɔloŋ lɛɛŋ ka a gaŋneŋ taa vɔlaa wa mãã. Ka gaŋneŋ taa vɔlaaŋ wa kpɛ pɔgeba mine meŋ ba maŋ e la ba menne yɛlɛ mine lɛɛŋ ka ba gaŋneŋ taa vɔlaa na wa mãã. Sobuo ka a sɛgre ŋa vɛŋ teŋ baŋ ka a yɛlɛ ŋa ba soma Jehoova nimitɔɔreŋ?
Jehoova yeleeŋ ka o boɔrɔŋ ka te e forifori te gyogri zaa poɔŋ. Ho teɛre ka a yɛlɛ ŋa seŋ nɛɛŋ bee? Bonso hoŋ yel lɛ?
Kaa a vidio ŋa a nyɛ lɛ hoŋ na toɔ̃ e a iri teɛroŋ faare yi ho teɛroŋ poɔŋ. Ŋmɛ a VIDIO.
Yezu da de la yelmannaa kaŋa wuli lɛ naŋ seŋ ka te e ka lɛ vɛŋ ka te toɔ̃ e forifori te gyogri zaa poɔŋ. Kanne Matio 5:29, 30, a kyɛ gyieli a soorebiri naŋ tu na yɛlɛ:
Yelmeŋɛ la, Yezu da ba wulo ka aseŋ ka te pere te menne, kyɛ o da boɔrɔŋ ka o wuli ka aseŋ ka te de gbɛre a e yelkaŋa. Bo gbɛre aŋ seŋ ka neɛ de ka lɛ vɛŋ ka o toɔ̃ iri teɛroŋ faare yi o teɛroŋ poɔŋ?b
Jehoova niŋe paalɛɛ mɔɔbo na zaa hoŋ mɔɔrɔ ka ho iri teɛroŋ faare yi ho teɛroŋ poɔŋ na. Kanne Yieme 103:13, 14, a kyɛ gyieli a soorebiri ŋa yɛlɛ:
Ka neɛŋ mɔɔrɔ o mɔɔbo zaa ka o bare yelfaa kaŋa naŋ minloo, sobuo ka a sɛgre ŋa na toɔ̃ soŋ o soba ka o naŋ moɔ̃ niŋe mɔɔrɔ o mɔɔbo zaa?
Ta vɛŋ ka ho eŋɛ kyoɔre ka hooŋ ŋmɛ gbɛre le!
Aminekaŋaŋ, ho na teɛreŋ ka, ‘A ba taa nimiri, N ture koŋ baŋ bare a yelfaa ŋa.’ Kyɛ, hooŋ leɛteɛre a yɛlɛ ŋa nyɛ: Ka neɛŋ zoro zogaŋtaa zoobu a te ŋmɛ gbɛre a le, lɛ ba wuli ka o soba koŋ baŋ lɛ iri tɔnne a zogaŋtaa zoobu. Aseŋ ka o soba lɛ te piili a zoro waana bee? Ai. Lɛ neŋ o zu la, ka hooŋ erɛ yelfaa kaŋa ka a wa minli bo, lɛ ba wuli ka ho koŋ baŋ bare lɛ eebo. Lɛ ba wuli ka mɔɔbo na zaa hoŋ mɔɔrɔ na meŋ eɛ zaala. Neɛzaa na toɔ̃ ŋmɛɛ gbɛre a le, kyɛ ka teneeŋ wa le, aseŋ ka te iri wieoŋ a maaleŋ are kpeɛŋaa. Ta vɛŋ ka ho eŋɛ kyoɔre! Ka hooŋ erɛ yelfaare mine ka a minli bo, Jehoova na toɔ̃ soŋ boŋ ka ho bare lɛ eebo.
NOBA MINE MAŊ YELEŊ KA: “N minleeŋ. N koŋ toɔ̃ bare.”
Ka neɛŋ e yelfaa kaŋa a minli, bo sɛgre hoŋ na toɔ̃ de soŋ o soba ka o baŋ ka Jehoova na toɔ̃ somooŋ ka o bare a yelbalaa eebo?
A ZANNOO YELNIMIZEERE
Ka teneeŋ tage te menne yi yɛlɛ naŋ sããna te eŋgama, ane te teɛroŋ eŋɛŋ, a kyɛ tage te menne yi gyog-faare meŋ eŋɛŋ, Jehoova poɔ maŋ pɛleŋ yaga.
Bo Hoŋ Zanne
Bonso aŋ e nimizeɛ yaga zaa ka te e forifori?
Wala hoŋ na toɔ̃ e a e forifori eŋgannoŋ poɔŋ?
Wala hoŋ na toɔ̃ e a iri teɛroŋ faare yi ho teɛroŋ poɔŋ, a kyɛ bare gyog-faare meŋ?
YƐLƐ MINE NAŊ LƐ BEBE
Kaa a vidio ŋa a nyɛ yɛlɛ mine hoŋ na toɔ̃ e a e forifori eŋgannoŋ poɔŋ haali ka hooŋ ba taa bontaree yaga.
Ho boɔrɔŋ ka ho bare sigaari nyuubu bee? Kanne a yɛlɛ ŋa a nyɛ yɛlɛ naŋ seŋ ka ho e a toɔ̃ bare sigaari nyuubu.
“Wala Maŋ Na Toɔ̃ E A Bare Sigaari Nyuubu?” (Awake!, May 2010)
Pornography kaabo na toɔ̃ perɛɛ neɛ bee? Kanne a gane ŋa a nyɛ a noɔre iribo.
Dɔɔ kaŋa da kaa la pornography lɛɛŋ aŋ te minloo, kanne a gane ŋa a nyɛ lɛ oŋ e a toɔ̃ bare pornography kaabo.
“N Da Mɔɔ Faaŋɛɛŋ Gbɛɛ Yaga A Kyɛ Toɔ̃ Bare Kpɛlɛŋkpɛlɛŋ” (A Watchtower No. 4 2016)
a Ka hooŋ kaa a Yɛlɛ Mine Naŋ Lɛ Bebe zie na, ho na nyɛɛ a yelzu ŋa “Wala Maŋ Na Toɔ̃ E A Bare Sigaari Nyuubu,” a yɛlɛ ŋa na toɔ̃ soŋ boŋ ka ho baŋ yɛlɛ naŋ seŋ ka ho e a toɔ̃ bare sigaari nyuubu kpɛlɛŋkpɛlɛŋ.
b Ka gaŋneŋ taa vɔlaaŋ wa kpɛ dɔbɔ mine, ba maŋ de la ba nu bɔɔle ba dɔɔloŋ lɛɛŋ ka a gaŋneŋ taa vɔlaa wa mãã, lɛ neŋ o zu ka pɔgeba mine meŋ maŋ e, ka hooŋ boɔrɔ ka ho nyɛ yɛlɛ naŋ na toɔ̃ soŋ bo ka ho bare a yelfaa ŋa, kanne a yɛlɛ ŋa “Ka Maaŋ Minli Ka N Maŋ Nɔnɔ N Dɔɔloŋ Bee A Erɛ N Pɔgeloŋ Yɛlɛ Mine Naŋ Na Vɛŋ Ka N Eŋɛ Mãã, Wala Maŋ Na Toɔ̃ E Bare Lɛ?” a yɛlɛ ŋa be la a gane ŋa, Soorebie Baapaalba Naŋ Maŋ Soorɔ—Yɛlɛ Naŋ Na Toɔ̃ Soŋ Ba, Volume 1, zuri 25.