ZANNOO 55
Wala Hoŋ Na Toɔ̃ E A Soŋ Lantaapuoruu Na Hoŋ Be Na?
Ka hooŋ gaa a donɛɛ lombori zaa, noba turituri yaga naŋ be Jehoova Sieree Deme lantaapuoruu na poɔŋ de la popeɛloŋ a puoro Jehoova. Ba poɔ zaaŋ maŋ pɛle neŋ a wulibo ane a sowuli na baŋ maŋ korɔ ba na. Ba maŋ lɛ erɛɛ yɛlɛ yaga meŋ a de sonnɔ a lantaapuoruu. Bo teɛroŋ hoŋ taa kyaare a lantaapuoruu na poɔŋ hoŋ be na? Wala hoŋ na toɔ̃ e a soŋ a lantaapuoruu ka o nyɛrɛ nimitɔɔre gaabo?
1. Sobobo hoŋ na baŋ tu kyɛ de ho faŋa ane ho wagre sonnɔ a lantaapuoruu?
Te zaa na baŋ e la yelkaŋa a soŋ te lantaapuoruu na. Ka hooŋ leɛ kaa a lantaapuoruu poɔŋ, noba mine bebeŋ a e neŋnyaane, kyɛbee a beɛrɛ bee? Ho na baŋ soŋ baŋ ka ba gaa a lammore bee? Kyɛbee ka ho e yɛlɛ mine a soŋ ba, aŋa mannoo poɔŋ, ho na baŋ gaa te di la daa a wa ko ba, kyɛbee ka ho meele ba die a ko ba. (Kanne Gyimisi 1:27.) Te na baŋ de la te menne tere a soŋ ka ba meele a kyɛ leɛ maale te Lammozie na ka o leɛ soma soŋ zaa. Neɛzaa naaneŋ maŋ fere te sɛre kyɛ teŋ e a yɛlɛ ŋa. Nɔmmo te naŋ taa ko Naaŋmen ane te yɔɔmine zuŋ la so teŋ maŋ e te “menne siri” a de a sommo ŋa zaa korɔ ba.—Yieme 110:3.
Noba naŋ de suobu a e Jehoova Sieree Deme na baŋ soŋɛɛ a lantaapuoruu soe yaga poɔŋ. Te yɔɔdɔba naŋ kyili a Kristaaloŋ poɔŋ na baŋ wa e la a lantaapuoruu nembɛrɛ sonneba, wagre naŋ gɛrɛ poɔŋ na ba na toɔ̃ lɛ kaa iri baŋ ka ba e a lantaapuoruu nembɛrɛ. Te yɔɔdɔba ane te yɔɔpɔgeba naŋ de suobu na baŋ e la paaneere, a de ba wagre kpoŋ zie zaa tonɔ a naaŋ moɔloo toma. Jehoova Sieree Deme mine maŋ te soŋeŋ baŋ mɛ te puoruu ziiri na mine. Ka ba mine meŋ wa baŋ ka lantaapuoruu kaŋa be la zie kaŋa a boɔrɔ sommo yaga zaa, ba maŋ gaa la be a te soŋ ba.
2. Sobuo teŋ na baŋ de te bontaree sonnɔ a lantaapuoruu?
A Baabole yeleeŋ ka, “nana [Jehoova] ane ho boma.” (Yeng Yelibie 3:9) Te poɔ zaaŋ maŋ pɛle ka te de te libie ane te bontaree sonnɔ a lantaapuoruu ane a donɛɛ zaa naaŋ moɔloo toma na. (Kanne 2 Korinti 9:7.) Ba maŋ de la libie na mine teŋ maŋ ire na a te soŋ te yɔɔmine naŋ tuoro saammo bɛrɛ. Noba mine meŋ maŋ iree “bonkaŋa biŋ” a de sonnɔ a puoruu toma wagre zaa. (Kanne 1 Korinti 16:2.) Ka teneeŋ boɔrɔ ka te iri libie soŋ, te na baŋ de la a libie eŋ a libie dagre naŋ be a lammozieŋ na, kyɛbee ka te tu intanɛt zu kyɛ iri libie soŋ a toma. Te na toɔ̃ eɛ lɛ ka teneeŋ gaa donate.jw.org. Jehoova yuo la sori ko te ka te de te bontaree sonnɔ o puoruu toma na. Ka teneeŋ wa erɛ lɛ, lɛ na wuliŋ ka te nɔmooŋ.
ZANNE YƐLƐ YAGA POƆ
Ho na zanne nyɛɛ yɛlɛ na mine hoŋ na baŋ e a soŋ a lantaapuoruu.
3. Te na baŋ de la te libie ane te bontaree soŋ a lantaapuoruu
Jehoova neŋ Yezu nɔŋ la noba naŋ maŋ yi ba poɔ zaa a terɛ boma. Aŋa mannoo poɔŋ, saŋa na Yezu naŋ da nyɛ ko-pɔge kaŋa naŋ da ba taa bontaree yaga naŋ da mɔɔ kyɛ iri bonkaŋa ko Jehoova na, o da puguuŋ yaga zaa. Kanne Luka 21:1-4, a kyɛ gyieli a soorebie ŋa yɛlɛ:
Aseŋ ka te iri libie yaga a soŋ Jehoova puoruu toma sɛre kyɛ ka o poɔ pɛle bee?
Ka teneeŋ wa yi te poɔ zaa a iri libie soŋ a puoruu toma, wala ka Jehoova neŋ Yezu maŋ teɛre?
Ka hooŋ boɔrɔ ka ho baŋ toma na baŋ maŋ de libie na hoŋ iri tere na tonɔ neŋ, ŋmɛ a VIDIO. A kyɛ gyieli a soorebiri naŋ tu na yɛlɛ.
Sobuo baŋ maŋ tu kyɛ de libie na teŋ ire terɛ na sonnɔ a lantaapuoruu naŋ be a donɛɛ lombori zaa?
4. Te na baŋ de la te menne tere a soŋ a toma
Takoreŋ saŋa na, Jehoova puorebiiri da maŋ toŋɛɛ tonkpeɛne yaga kyɛ maale zie na baŋ maŋ laŋ a puoro Jehoova na oŋ soma soŋ zaa. Sobuo baŋ da maŋ tu kyɛ e lɛ? Ba da maŋ iree libie a de soŋ a toma, kyɛ libie yoŋ naane baŋ da maŋ iri. Kanne 2 Tungkori 34:9-11, a kyɛ gyieli a soorebiri naŋ tu na yɛlɛ:
Wala ka a Izerayɛl bie kaŋa zaa da maŋ e a de soŋ baŋ maale Jehoova die na?
Aŋa lɛ na a takoreŋ saŋa Izerayɛl biiri naŋ da maŋ e na, lɛ neŋ o zu ka Jehoova Sieree Deme meŋ maŋ erɛ zenɛ ŋa, ŋmɛ a VIDIO. A kyɛ gyieli a soorebie naŋ tu na yɛlɛ.
Bonso aŋ seŋ ka te maŋ maale te Lammozie na ka o e forifori a kyɛ maale bonzaa meŋ ka o soma?
Bo yɛlɛ mine hoŋ na baŋ e a de soŋ a toma?
5. Te yɔɔdɔba naŋ be a lantaapuoruu poɔŋ na toɔ̃ nyɛ la nimitɔɔre gaabo ka lɛ vɛŋ ka ba de toma mine eŋ ba nuureŋ
A Baabole eŋɛɛ dɔbɔ naŋ e Kristabiiri ka ba mɔɔrɔ ba mɔɔbo zaa a sonnɔ a lantaapuoruu. Kaa a vidio ŋa a nyɛ lɛ te yɔɔdɔɔ kaŋa naŋ e lɛ, ŋmɛ a VIDIO. A kyɛ gyieli a soorebiri naŋ tu na yɛlɛ.
A vidio poɔŋ, bo yɛlɛ ka te Yɔɔdɔɔ Ryan da erɛ a de sonnɔ a lantaapuoruu?
A Baabole wulee yɛlɛ na baŋ boɔrɔ yire neɛ naŋ boɔrɔ ka o e a lantaapuoruu nembɛrɛ sonnɔ kaŋa, kyɛbee a lantaapuoruu neŋkpoŋ kaŋa zieŋ. Kanne 1 Timoti 3:1-13, a kyɛ gyieli a soorebie ŋa yɛlɛ:
Bo yɛlɛ baŋ boɔrɔ yire te yɔɔdɔba naŋ boɔrɔ ka ba e a lantaapuoruu nembɛrɛ sonnɔ kaŋa, kyɛbee a lantaapuoruu neŋkpoŋ kaŋa zieŋ?
Bo yɛlɛ baŋ boɔrɔ yire o booree deme meŋ zieŋ?—Kaa o wɛlbo 4 ane 11.
Ka te yɔɔdɔbaŋ mɔɔ ba mɔɔbo zaa kyɛ toɔ̃ ta yɛlɛ na a Baabole naŋ wuli na, sobuo aŋ na toɔ̃ soŋ neɛzaa naŋ be a lantaapuoruu poɔŋ?
AMINEKAŊAŊ NEƐ KAŊA NA SOOREŊ KA: “Yeŋ ka Jehoova Sieree Deme maŋ nyɛ libie a de tonɔ ba toma na?”
Wala hoŋ na iri a noɔre ko o soba?
A ZANNOO YELNIMIZEERE
Ka teneeŋ de te wagre, te faŋa ane te bontaree sonnɔ a lantaapuoruu, Jehoova poɔ maŋ pɛleŋ yaga zaa.
Bo Hoŋ Zanne
Wala teŋ na baŋ e a de te wagre ane te faŋa sonnɔ a lantaapuoruu?
Wala teŋ na toɔ̃ e a de te bontaree sonnɔ a lantaapuoruu?
Bo yɛlɛ mine la hoŋ boɔrɔ ka ho e a soŋ a lantaapuoruu?
YƐLƐ MINE NAŊ LƐ BEBE
Naaŋmen boɔrɔŋ ka o puorebiiri naŋ yɔɔrɔ ba ziiri pie ziyeni bee? Kanne a yɛlɛ ŋa a nyɛ a noɔre iribo.
“Bo Ka A Baabole Yel Kyaare Ziiri Pie Ziyeni Yɔɔbo Yɛlɛ?” (Intanɛt zu gane)
A Baabole wuleeŋ toma na Kristabi-dɔba naŋ de suobu naŋ seŋ ka ba tonɔ. Kyɛ yɛlɛ mine zuŋ ka a naŋ wa fɛre ka Kristabi-pɔge naŋ de suobu toŋ a toma, wala aŋ seŋ ka o e?
Lɛ Teŋ Na Toɔ̃ E Baŋ Zudaaloŋ Yɛlɛ Naŋ Be A Lantaapuoruu Poɔŋ Na Soŋ” (A Watchtower, February 2021)
Kaa a vidio ŋa a nyɛ lɛ Jehoova Sieree Deme mine naŋ da taa nyaa naŋ da de yɛlɛ mine iri sareka a toɔ̃ de gama te ko ba Kristabitaaba.
Lɛ Ba Naŋ Da De Baabole Poɔ Gama Tɔre Ko Noba Congo Paaloŋ (4:25)
Bo tɛɛtɛɛ la be soe na teŋ maŋ tu a nyɛ te libie ane soe na puoruu mine naŋ maŋ tu kyɛ nyɛ ba libie na? Kanne a yɛlɛ ŋa a nyɛ a noɔre iribo.
“Yeŋ Ka Jehoova Sieree Deme Maŋ Nyɛ Libie A Tonɔ Ba Puoruu Toma Na?” (Intanɛt zu gane)