2. Boŋ ka a Baabole wuli te a kyaare Jehoova?

A Baabole yelka, a ŋmemɛ na zaa nensaaleba naŋ puoro na poɔŋ, Jehoova yoŋ la a yelmeŋɛ Naaŋmen. Ananso la wala? A ananso e la yaga. Jehoova la kpeɛ̃o zaa daana, ona yoŋ la “Sazu Baaraa Zaa Daana donɛɛ zaa eŋɛŋ.” (Kanne Yieme 83:​18.) Ona la “a Kpeɛ̃o Zaa Daana,” lɛ wuleeŋ ka o taa la faŋa a na toɔ̃ e lɛ zaa o naŋ boɔrɔ. Ona la “maale boma zaa”​—a maale sazu ane a donɛɛ ane bonvoɛ zaa naŋ be a teŋɛzuŋ. (Yel-iriwulaa 4:​8, 11) Nensaaleba taa la piilee, kyɛ Naaŋmen yɛŋ ba taa piilee. O bebeŋ lɛɛŋ gɛrɛ tegitegilɛ.​—Yieme 90:2.

Jehoova yoŋ aŋ seŋ ka te puoro, bonso ona la te Maala. (Yel-iriwulaa 4:​11) Lɛ wuleeŋ ka aseŋ ka te nɔnoo, a de puoruu korɔ o yoŋ. A ba seŋ ka te tu bonmeɛraa kaŋa eŋɛŋ, bee foto kaŋa eŋɛŋ kyɛ de puoruu a koroo.​—Kanne Aizeeya 42:8.

Aseŋ ka te puoruu na “pɛgiyi, a . . . seŋ neŋ deɛbo” a ko Jehoova. (Urom 12:1) Lɛ wuleeŋ ka aseŋ ka te tuuro bege na oŋ biŋ na. Aŋa mannoo poɔŋ, noba naŋ nɔŋ Jehoova maŋ tuuree bege na oŋ biŋ a kyaare kultaa na. Ba maŋ tagɛɛ ba menne a yi yelzaa naŋ ba soma eŋɛŋ, aŋa sigaari nyuubu, tẽẽfaare ane dããkpeɛne nyu te gaali eŋɛŋ.a