Jehoova Vɛŋɛɛŋ Teŋ Baŋ Peɛlaaŋ Ka Paradiisi Na Waŋ

1. Bo duoro la ka a daŋyele Aizeeya da korɔ a Izerayɛl biiri?

A DAŊYELE Aizeeya yeleeŋ ka Jehoova eɛ “a yelmeŋɛ Naaŋmen.” A yelbiri “yelmeŋɛ” ba naŋ leɛre tɛgɛ la “ameena.” (Aiz. 65:16) “Ameena” tɛgɛ la ka, “ka lɛ nyɛ eebo,” bee “ka a waa lɛ.” Ka ba naŋ wa de a yelbiri “ameena” toŋ ne toma a Baabole poɔŋ a kyaare Jehoova bee Yezu, a maŋ eɛ sieree a wuli ka yelkaŋa na nyɛ eebo meŋɛmeŋɛ. Azuŋ duoro Aizeeya naŋ da yele korɔ a Izerayɛl biiri la ka: Yelzaa Jehoova naŋ yel biŋ na nyɛ la eebo. Noɔre zaa meŋ Jehoova naŋ maŋ eŋ maŋ nyɛɛ eebo.

2. Ananso la wala teŋ na baŋ sage Jehoova nɔ-eŋnee zaa naŋ kyaare te nendaare kaŋa di? Bo soorebie teŋ na nyɛ a noɔre iribo?

² Ka lɛ te na baŋ sagediŋ ka nɔɛ na zaa Jehoova naŋ eŋ kyaare te nendaare kaŋa meŋ na na nyɛɛ eebo bee? Aizeeya naŋ da kpi aŋ kyɛre fẽẽ ka yuomo 800 ta ka a bitontona Pɔɔl da wuli ananso Naaŋmen nɔ-eŋnee zaa naŋ maŋ nyɛ eebo. Pɔɔl da yeleeŋ ka: “Naaŋmen koŋ baŋ ŋma zirii.” (Hib. 6:18) Ka bulnimiriŋ bulo koɔ̃ naŋ noma, o koŋ baŋ lɛ buli koɔ̃ yaaroŋ meŋ, lɛ meŋ la ka yelmennoŋ yi Jehoova zie, azuŋ o koŋ baŋ ŋma zirii. Azuŋ te na baŋ sagɛɛ yelzaa Jehoova naŋ yel a di ane nɔ-eŋnee zaa o naŋ eŋ ko te a kyaare nendaare kaŋa. A zannoo ŋa poɔŋ te na nyɛɛ a soorebie ŋa zaa nɔɛ iribo: Boŋ ka Jehoova eŋ noɔre ka o na ko teŋ nendaare kaŋa? Ka wala ka Jehoova vɛŋ teŋ baŋ peɛlaaŋ ka o nɔ-eŋee na nyɛɛ eebo?

BO YƐLƐ KA JEHOOVA EŊ TE NOƆRE?

3. (a) Bo noɔre emmo yɛlɛ la noma korɔ Naaŋmen puorebiiri zaa? (Yel-iriwulaa 21:​3, 4) (b) Wala ka noba mine maŋ yel ka teneeŋ wa manne a noɔre emmo ŋa yɛlɛ ko ba?

³ A noɔre emmo na teŋ waana ka te yel o yɛlɛ na, Naaŋmen puorebiiri zaa naŋ be a donɛɛ lombori zaa nɔŋ la o yɛlɛ. (Kanne Yel-iriwulaa 21:​3, 4.) Jehoova eŋɛɛ noɔre ka saŋa kaŋa waanaŋ, “kũũ koŋ la kyebe, woore, konni, ane kpɛlle ŋmeɛbo koŋ la bebe.” Te yaga zie zaa maŋ kannɛɛ a sɛgre ŋa a dii noba sukyie ka teneeŋ wa gaa a naaŋ moɔloo, a maŋ wuli ba lɛ zemmo naŋ na waa a dompaalaa poɔŋ. Wala ka noba maŋ yel ka teneeŋ wa manne a noɔre emmo yɛlɛ ŋa ko ba? Aminekaŋaŋ ba na yeleŋ ka, “Yɛ yɛlɛ ŋa nomaŋ zuo, kyɛ N ba sagedi ka a na nyɛɛ eebo.”

4. (a) Saŋa na Jehoova naŋ da eŋ noɔre kyaare Paradiisi na, bo yɛlɛ la oŋ da baŋ ka a na eŋ? (b) Bo yɛlɛ la ka Jehoova e a wuli ka te na baŋ sagɛɛ o nɔ-eŋnee na di?

⁴ Yelmeŋɛ la, saŋa na Jehoova naŋ da de o vooroŋ soŋ ko bitontona Gyɔɔn oŋ sɛgrɛ a noɔre emmo ŋa a kyaare lɛ zemmo naŋ na waa Paradiisi poɔŋ na, o da baŋɛɛŋ ka zenɛ ŋa te meŋ na mannɛɛ a teɛretɔ ŋa yɛlɛ ko noba a Naaŋ moɔloo poɔŋ. Jehoova meŋ da baŋɛɛŋ ka a na eɛ kpeɛŋaa ko noba mine meŋ ka ba sagedi ka a yɛlɛ ŋa na nyɛɛ eebo nendaare kaŋa. (Aiz. 42:9; 60:2; 2 Kor. 4:​3, 4) Wala teŋ na baŋ e soŋ noba ka ba baŋ ka maaloo na zaa Yel-iriwulaa 21:​3, 4 naŋ yel na na nyɛɛ eebo? Ka wala teŋ meŋ na baŋ e a eŋ te sagediibu faŋa a kyaare Jehoova ane o nɔ-eŋnee? Jehoova wulee sieree yaga naŋ wuli ka te na baŋ sagɛɛ o nɔ-eŋnee zaa di. A sieree mine la bo?

JEHOOVA VƐŊƐƐŊ KA O NƆ-EŊNEE ZAA NA NYƐƐ EEBO

5. Bo sɛgre la wuli te ananso teŋ na baŋ sage Naaŋmen nɔ-eŋnee naŋ kyaare Paradiisi na di, ka wala oŋ yel?

⁵ A sɛgre naŋ tɔnne na poɔŋ, te nyɛɛ ananso teŋ na baŋ sage Jehoova nɔ-eŋnee naŋ kyaare Paradiisi na di. Be kannɛɛŋ ka: “Ka a soba na naŋ da zeŋ a nakogi zu da yeli, ‘Nyɛ, N erɛ la ka a yɛlɛ zaa na leɛ yelpaalaa.’ O da la yelee la: ‘Sɛge a yeli ŋa, bonso a yelbie ama taa la dɛloo kyɛ waa yelmeŋɛ.’ Lɛ la ka O da yeli ko ma, ‘A e baarɛɛ la! Maa la a Alefa ane a Omega, a piiluu ane a baaroo.’”— Yel. 21:​5, 6a.

6. Ananso la wala ka yelbie naŋ be Yel-iriwulaa 21:​5, 6 na eŋ te sagediibu faŋa a kyaare Naaŋmen nɔ-eŋnaa na?

⁶ Ananso la wala ka a Baabole sɛgre ŋa eŋ te sagediibu faŋa a kyaare Naaŋmen nɔ-eŋnaa na? “A sɛgre ŋa poɔŋ, yɛlɛ na Jehoova naŋ yel na, te na baŋ deaŋ manne neŋ gane o naŋ sign aŋ e sieree ka lɛ zaa naŋ la o na paalɛɛ o nɔ-eŋnaa na.”b Yɛlɛ na Naaŋmen naŋ eŋ noɔre ka o na eŋ na be la Yel-iriwulaa 21:​3, 4. Kyɛ a yi o wɛlbo 5 ane 6 na poɔŋ, Jehoova yelee yɛlɛ mine naŋ e sieree ka noɔre na o naŋ eŋ na o na vɛŋeŋ ka a nyɛ eebo meŋɛmeŋɛ. Yɛ vɛŋ ka te peɛre O yelbie ŋa naŋ e sieree ko te na yɛlɛ gaa tɔɔre.

7. Nembuo yelyaga la be Yel-iriwulaa 21:5 na poɔŋ? Ka ananso la wala ka ana yelbie na e a yoŋ?

⁷ Ŋaa ka o wɛlbo 5 na piili: “Ka a soba na naŋ da zeŋ a nakogi zu da yel.” (Yel. 21:5a) A Yel-iriwulaa gane poɔŋ, gbɛre bota ka Jehoova yel yɛlɛ, azuŋ a yelbie ŋa eɛ Jehoova yelbie na mine o meŋɛ naŋ yel aŋ be a Yel-iriwulaa gane poɔŋ. Maleke naaneŋ da yel a yɛlɛ, Yezu meŋ naaneŋ da yel a yelbie ŋa, kyɛ Jehoova meŋɛ la da yel a yelbie ŋa! A yɛlɛ ŋa wuleeŋ ka yɛlɛ na oŋ da lɛ yel poɔ na siriŋ waa la yelmeŋɛ. Ananso la wala? Bonso Jehoova “ba ŋmaara zirii.” (Tit. 1:2) Lɛ wuleeŋ ka yɛlɛ naŋ be Yel-iriwulaa 21:​5, 6 siriŋ na nyɛɛ eebo meŋɛmeŋɛ.

“NYƐ, N ERƐ LA KA A YƐLƐ ZAA NA LEƐ YELPAALAA”

8. Bo yɛlɛ la ka Jehoova da yel a wuli ka o nɔ-eŋnaa na na nyɛɛ eebo? (Aizeeya 46:10)

⁸ Jehoova da la yeleeŋ ka “Nyɛ!” (Yel. 21:5) A yelbiri “nyɛ!” ba naŋ leɛre yi Giriki kɔkɔre poɔŋ na, ba deoŋ toŋ ne toma gbɛɛ yaga a Yel-iriwulaa gane poɔŋ. Gane kaŋa yeleeŋ ka, lɛ na ba naŋ sɛge ana yelbiri ŋa na wuleeŋ ka “ba boɔrɔŋ ka neɛ na naŋ kanna a yɛlɛ na maaleŋ kyɛlle yelbie naŋ na tu na velaa zaa.” Bo yɛlɛ ka Naaŋmen da la yel? O da lɛ yeleeŋ ka: “N erɛ la ka a yɛlɛ zaa na leɛ yelpaalaa.” Jehoova na vɛŋeŋ ka a yɛlɛ ŋa zaa nyɛ eebo nendaare kaŋa. Kyɛ Jehoova naŋ baŋ peɛlaaŋ ka o na eɛ a yɛlɛ ŋa zaa na zuŋ o da yelee a yɛlɛ aŋa a naŋ piili nyɛrɛ eebo.—Kanne Aizeeya 46:10.

9. (a) Bo ka a yelbie ŋa are ko, “N erɛ la ka a yɛlɛ zaa na leɛ yelpaalaa”? (b) Boŋ na pɔge a ‘sazu’ ane ‘teŋsare’ naŋ bebe pampana ŋa?

⁹ Jehoova da yeleeŋ ka: “N erɛ la ka a yɛlɛ zaa na leɛ yelpaalaa.” Wala ka lɛ wuli? A Baabole sɛgre ŋa wulee yɛlɛ ayi Jehoova naŋ na e. A dɛndɛŋ soba, O na sãã la a donfaa ŋa, a yiiloŋ soba O na de la a dompaalaa waneŋ. Boŋ ka Jehoova na daŋ sãã? Yel-iriwulaa 21:1 yeleeŋ ka: “N pãã da nyɛ la [sazu paalaa] ane teŋpaalaa.” “A dɛndɛŋ [sazu]” na are ko la a donɛɛ ŋa namine na Setaana ane a sefaare naŋ taa bɛnlɛ na. (Mat. 4:​8, 9; 1 Gyn. 5:19) Ka a Baaboleŋ wa yelka ‘teŋsare’ saŋa kaŋa a maŋ are ko la nensaaleba naŋ be a teŋsare zuŋ na. (Mun. 11:1; Yiem. 96:1) Azuŋ “a dɛndɛŋ [teŋsare]” na are ko la neŋfaare naŋ be a donɛɛ zuŋ zenɛ ŋa. Jehoova koŋ leɛ maale a ‘sazu’ ane ‘teŋsare’ naŋ bebe pampana ŋa naŋ are ko a donɛɛ zu namine, Setaana, a sefaare ane a neŋfaare na ka a leɛ soma; kyɛ o na sãã la a zaa kpɛlɛŋkpɛlɛŋ. A kyɛ de “[sazu] paalaa ane teŋpaalaa” waneŋ. Lɛ wuleeŋ ka na-paalaa na di la Naaŋ a kaara a donɛɛ zu zaa naŋ na paale neŋ nemmenne yoŋ.

10. Boŋ ka Jehoova na e ka a leɛ e paalaa?

¹⁰ Sobuo ka Jehoova na tu kyɛ vɛŋ ka bonzaa leɛ e paalaa? (Yel. 21:5) Jehoova na vɛŋeŋ ka a teŋsare ŋa ane nensaaleba zaa pɛgeyi. Aŋa lɛ na Aizeeya naŋ da yel biŋ na, Jehoova na vɛŋeŋ ka a teŋsare zaa leɛ zi-velaa aŋa a Eeden gaadin. O na vɛŋeŋ ka te meŋ leɛ e paalaa, a saŋ te kaŋa la kaŋa zaa baaloŋ kpɛlɛŋkpɛlɛŋ. Gbɛrɛɛ, zɔnne, ane togbarehi na nyɛ la sammo, kũũni meŋ gba na leɛ-iri yi la kũũni poɔŋ a voorɔ.—Aiz. 25:8; 35:​1-7.

“A YELBIE AMA TAA LA DƐLOO KYƐ WAA YELMEŊƐ. . . . A E BAARƐƐ LA!”

11. Boŋ ka Jehoova da yelka Gyɔɔn e, ka ananso la wala?

¹¹ Bo yɛlɛ ka Naaŋmen lɛ yel a eŋ te sagediibu faŋa a kyaare o nɔ-eŋnaa na? Jehoova da yelko la Gyɔɔn: “Sɛge a yeli ŋa, bonso a yelbie ama taa la dɛloo kyɛ waa yelmeŋɛ.” (Yel. 21:5) Dayeni yoŋ naane ka Jehoova da yelka “sɛge.” O da wulee a ananso meŋ. O da yeleeŋ ka: “A yelbie ama taa la dɛloo kyɛ waa yelmeŋɛ.” Lɛ wuleeŋ ka Naaŋmen yelbie na taa la dɛloo. Te poɔ pɛlɛɛŋ Gyɔɔn meŋ naŋ da kyɛlle woŋ a “sɛge.” Bonso te na baŋ kannɛɛ Naaŋmen nɔ-eŋnaa naŋ kyaare Paradiisi na yɛlɛ, a teɛre a yɛlɛ gaa tɔɔre a nyɛ maaloo na teŋ na nyɛ nendaare kaŋa.

12. Ananso la wala ka Jehoova da yelka: “A e baarɛɛ la!”

¹² Naaŋmen da lɛ yeleeŋ ka, “A e baarɛɛ la!” (Yel. 21:6) Ananso la wala ka Jehoova yelka a nɔ-eŋnaa naŋ kyaare a Paradiisi na na nyɛɛ eebo? O na baŋ toɔ̃ yelee lɛ bonso yelzaa kyebe a na pigi sori ka o nɔ-eŋnaa ta nyɛ eebo. Jehoova da lɛ yelee yelkaŋa naŋ na eŋ te sagediibu faŋa ka o nɔ-eŋnaa na nyɛɛ eebo. Wala oŋ da lɛ yel?

“MAA LA A ALEFA ANE A OMEGA”

13. Ananso la wala ka Jehoova yelka: “Maa la a Alefa ane a Omega”?

¹³ A zannoo ŋa piileeŋ, te nyɛɛŋ ka Jehoova meŋɛ da yelee yɛlɛ ko Gyɔɔn gbɛre bota o yelnyɛ na poɔŋ. (Yel. 1:8; 21:​5, 6; 22:13) Ana gbɛre bota ŋa zaa poɔŋ, Jehoova maŋ yeleŋ ka: “Maa la a Alefa ane a Omega.” Alefa eɛ a Giriki sɛgbie dɛndɛŋ soba, ka omega meŋ e a Giriki sɛgbie baaraa soba. Jehoova naŋ da yelka ona la “a Alefa ane a Omega” na, O da boɔrɔŋ ka te baŋ ka, ka o naŋ wa piili yelkaŋa o maŋ eɛ a yel te baare.

14. (a) Wuli saŋa na Jehoova naŋ da yelka “Alefa” ane saŋ na oŋ na yelka “Omega.” (b) Sobuo ka yɛlɛ naŋ be Munpiilee 2:​1-3 na wuli ka Jehoova poboɔbo na siriŋ na nyɛɛ eebo?

¹⁴ Saŋa na Jehoova naŋ da maale Adama ane Hawaa baare na, O da vɛŋɛɛŋ baŋ baŋ o poboɔbo o naŋ taa kyaare nensaaleba ane a teŋsare ŋa. A Baabole yeleeŋ ka: “Naaŋmen da maale baŋ, ka Naaŋmen yelko ba: ‘Yɛ dɔge biiri a ugi, a paali [a] teŋgane.’” (Mun. 1:28) Ana saŋa na a waa ŋa Jehoova naŋ da yelka, “Alefa.” O da wulee o poboɔbo o naŋ taa: Ka saŋa kaŋa waana la ka Adama ane Hawaa biiri naŋ pɛgeyi, a tuuro Jehoova noɔre na paale a teŋsare zu zaa, a leɛre a donɛɛ ŋa zaa ka o e paradiisi. Azuŋ nendaare kaŋa ka a yɛlɛ ŋa zaaŋ wa nyɛ eebo baare, a na waa ŋa Jehoova naŋ lɛ yelka “Omega.” Saŋa na Jehoova naŋ da maale “sagbama ane a teŋgbani . . . ane bon-gyamaa zaa naŋ be a poɔŋ” baare na, o da yelee yelkaŋa a wuli ka o poboɔbo na na nyɛɛ eebo. A be la Munpiilee 2:​1-3. (Kanne.) Jehoova da yeleeŋ ka a bebie ayɔpoi soba na eɛ nanee koo. Lɛ wuleeŋ ka, a bebie ayɔpoi na baaraa, Jehoova poboɔbo zaa o naŋ taa kyaare nensaaleba ane a teŋsare ŋa na nyɛɛ eebo.

15. Ananso la wala ka Setaana da na teɛrɛ ka o saaŋɛɛ Jehoova poboɔbo o naŋ taa kyaare a teŋsare na?

¹⁵ Saŋa na Adama ane Hawaa naŋ da zagre Jehoova noɔre na, ba da wa leɛ la yelbebe deme a de yelbebe ane kũũ dɔge neŋ ba biiri zaa. (Uro. 5:12) Azuŋ a da waa ŋa Setaana naŋ sãã Jehoova poboɔbo o naŋ taa ka o vɛŋ ka nensaaleba naŋ pɛgeyi a kyɛ tuuro o noɔre paale a teŋsare zu zaa. Ka lɛ Setaana toɔ̃ pigee Jehoova sori ka o poboɔbo na ta nyɛ eebo bee? Aminekaŋaŋ Setaana da teɛrɛŋ ka Jehoova poboɔbo na koŋ baŋ lɛ nyɛ eebo. Aminekaŋaŋ o da teɛrɛɛŋ ka Jehoova na ko la Adama ane Hawaa, a kyɛ lɛ maale kultaa deme naŋ pɛgeyi ka lɛ na vɛŋ ka O poboɔbo toɔ̃ nyɛ eebo. Kyɛ ka Naaŋmeneŋ da e lɛ, a Dɛɛvul da naaŋ baŋ yelka ziri-ŋmaara la O. Ananso la wala? Bonso a yi Munpiilee 1:​28, Jehoova da yelko la Adama ane Hawaa ka ba biiriŋ na paale a teŋsare.

16. Aminekaŋaŋ bo yɛlɛ zuŋ ka Setaana da teɛrɛ ka o da naaŋ baŋ yeleŋ ka Jehoova ba toɔ̃ paale o poboɔbo na?

¹⁶ Bo gbɛre ka Setaana da na baŋ lɛ teɛrɛ ka Naaŋmen na deŋ? Aminekaŋaŋ Setaana da teɛrɛŋ ka Jehoova na terɛɛ sori ka Adama ane Hawaa dɔge biiri naŋ ba pɛgeyi a daŋ koŋ pɛgeyi zaa meŋ. (Ikil. 7:20; Uro. 3:23) Kyɛ ka lɛŋ da e, a Dɛɛvul da naaŋ yeleŋ ka Jehoova ba toɔ̃ vɛŋ ka o poboɔbo na nyɛ eebo. Bonso Naaŋmen poboɔbo la ka Adama ane Hawaa biiri naŋ pɛgeyi a kyɛ tuuro o noɔre paale a teŋsare ŋa zu zaa ka o e Paradiisi.

17. Sobuo ka Jehoova tu kyɛ leɛ sɛgre yɛlɛ aneazaa ka Setaana, Adama ane Hawaa da zagrɛɛ o noɔre? Ka bo yɛlɛŋ na nyɛ eebo? (Kaa a foto meŋ.)

¹⁷ Setaana da ba baŋ yɛlɛ na Jehoova naŋ boɔrɔ ka o e na fẽẽ zaa. Kyɛ Jehoova yɛŋ da baŋɛɛ yɛlɛ na meŋɛ oŋ na e ka o poboɔbo na nyɛ eebo aneazaa ka Setaana, Adama ane Hawaa da zagrɛɛ o noɔre. (Yiem. 92:5) Jehoova da vɛŋɛɛŋ ka Adama ane Hawaa dɔge biiri a wuli ka o ba e ziri-ŋmaara. Jehoova da wuleeŋ meŋ ka ka o naŋ boɔrɔ ka o e yelkaŋa, bonzaa kyebe a na pigoo sori. O da eɛ yelkaŋa naŋ na vɛŋ ka o poboɔbo nyɛ eebo, a tuuro a “yaaŋaa” kaŋa naŋ na faa Adama ane Hawaa biiri zaa naŋ sagra Jehoova noɔre. (Mun. 3:15; 22:18) Ana yaaŋaa ŋa la na kpi a de o nyɔvore yɔɔ deɛ nensaaleba. Setaana da ba kaara soriŋ ka lɛ na eŋ zaa! Bonso nɔmmo meŋɛmeŋɛ zuŋ la ka Jehoova ko te a yɔɔdeɛbo ŋa. (Mat. 20:28; Gyn. 3:16) Setaana ba taa ana gyogo ŋa fẽẽ zaa, o maŋ boɔrɛɛ o yoŋ boma. A yɔɔdeɛbo zuŋ, bo yɛlɛ la na nyɛ eebo? Ka Yezu Yuoŋ Turi Naaŋ Diibu naŋ wa baare, Adama ane Hawaa biiri naŋ pɛgeyi a tuuro Jehoova noɔre na zeŋ la a teŋsare ŋa zuŋ paradiisi poɔŋ, aŋa lɛ na Jehoova naŋ da boɔrɔ a piilee saŋa na. A lɛ saŋa a na waa ŋa Jehoova naŋ yelka “Omega.”

WALA TEŊ NA BAŊ E KA TE SAGEDIIBU TE NAŊ TAA JEHOOVA NƆ-EŊNAA NAŊ KYAARE PARADIISI NA E KPEƐŊAA

18. Bo yɛlɛ ata la ka Jehoova de wuli te ka o boɔbo na nyɛɛ eebo meŋɛmeŋɛ? (Kanne a daga ŋa, “A Yɛlɛ Ata Ŋa Zuŋ Teŋ Na Baŋ Sage Jehoova Nɔ-Eŋnee Di.”)

¹⁸ A zannoo ŋa poɔŋ, te zanne nyɛɛ yɛlɛ mine zuŋ teŋ na baŋ sagedi ka a teŋsare ŋa na leɛ la Paradiisi. Bo yɛlɛ teŋ na baŋ yel a eŋ noba mine faŋa ka a yɛlɛ ŋa na nyɛɛ eebo meŋɛmeŋɛ? A dɛndɛŋ soba, Jehoova meŋɛ la eŋ a noɔre. A Yel-iriwulaa gane na yeleeŋ ka: “Ka a soba na naŋ da zeŋ a nakogi zu da yeli, ‘Nyɛ, N erɛ la ka a yɛlɛ zaa na leɛ yelpaalaa.’” O taa la a kpeɛ̃o, a faŋa, ane a boɔbo ka o vɛŋ ka a noɔre emmo ŋa nyɛ eebo. A yiiloŋ soba, Jehoova meŋɛ baŋɛɛŋ ka a yɛlɛ ŋa na nyɛɛ eebo yaga zaa, azuŋ Jehoova nimitɔɔreŋ gba, a waa ŋa a yɛlɛ nyɛɛ eebo baare. Azuŋ oŋ da yelka: “A yelbie ama taa la dɛloo kyɛ waa yelmeŋɛ. . . . A e baarɛɛ la!” A taaloŋ soba, ka o naŋ wa piili yelkaŋa o maŋ eɛ a yel te baare, azuŋ oŋ yelka: “Maa la a Alefa ane a Omega.” Jehoova na wuliŋ ka Setaana eɛ ziri-ŋmaara, a koŋ baŋ pigoo sori meŋ ka o ta vɛŋ ka o boɔbo nyɛ eebo.

19. Ka a naŋ wa e kpeɛŋaa ko noba mine ka ba sage Naaŋmen nɔ-eŋnaa naŋ kyaare Paradiisi na di, wala hoŋ na e soŋ ba?

¹⁹ Teɛre baŋ ka, ka hooŋ maŋ wa manna yɛlɛ na Jehoova naŋ yel a wuli ka o noɔre emmo na nyɛɛ eebo na korɔ noba, a na eŋɛɛ ho meŋ sagediibu faŋa. Azuŋ ka hooŋ wa manna Jehoova nɔ-eŋnee naŋ be Yel-iriwulaa 21:4 na yɛlɛ korɔ neɛ kaŋa a kyaare a Paradiisi yɛlɛ, kyɛ ka neɛ kaŋaŋ wa yelka, “A yɛlɛ ŋa nomaŋ yɛŋ kyɛ a koŋ baŋ nyɛ eebo,” wala hoŋ na e? Ho na baŋ kannɛɛ o wɛlbo 5 ane 6 ko o soba a wuluu a muni? Wuli lɛ Jehoova meŋɛ naŋ yel a wuli ka o nɔ-eŋnaa na na nyɛɛ eebo.​—Aiz. 65:16.