Iobu
28 “Hetre hnë troa thele sileva
Me hnë troa huliwane la gool;
2 Hna xome la fao qa kuhu hnadro,
Nge hna ahmune* la etë matre mama pi la kopa.
3 Kola lö ngöne la gaa mit hnene la atr;
Nge angeic a thele hnyawa la itre etë ka tru thupen,
Ngöne la gaa mit me melöhlem.
4 Angeic a sine la itre hnaop tröne la itre traon,
Ngöne la itre götrane gaa nany, nge pëkö ka tro e cili;
Itre atr a ut me thip trootro.
5 Kola cia la xen hune la ihnadro;
Ngo ame e kuhu fen, kola enienij la ihnadro kösë hna dreuth hnei eë.*
6 Nge ame hnine la itre etë cili, hetre safairo,
Nge hetre gool ngöne la xaxau.
8 Pëkö öni ka ihej ka tro e cili;
Nge pëkö neköi liona ka trongëne la gojenyi cili.
9 Kola lepe la etë ka ixöj hnene la atr;
Nge angeic a ukapiëne la itre trepene la itre wetr.
10 Nge ngöne la itre git, angeic a sine la itre jë i tim;
Nge luemeke i angeic a thele la itre etë ka melemel.
11 Angeic a thinge la itre qeqe ne tim
Me traqa fë kowe la lai la itre ewekë hna juetrën.
12 Ngo tro sa öhn ekaa la inamacan,
Nge ekaa la qaane la atrehmekun?
13 Pëkö ka atre la thupene la inamacan,
Nge patre kö ej ngöne la nöje ne la itre ka mel.
14 Matre önine la itre tim ka jui: ‘Patre kö eje the hun!’
Nge önine la hnagejë: ‘Ketre patre kö theng!’
15 Thatreine kö troa itön ej memine la nyipi gool;
Me tuluthe la sileva nyine nyithupen ej.
16 Thatreine kö troa itön ej memine la gool ne Ofira
Memine la etë soama ka tru thupen me safairo.
17 Thatreine kö troa aceitunën ej memine la gool, memine la ver;
Me nyihnan ej hnene la ketre trengene hna kuca hnei nyipi gool.*
18 Nge nanyi pala ha la troa qeje agojij* me etë ka melemel,
Ke sisitria kö la inamacan hune la trenge penina.
19 Thatreine kö troa aceitunën ej memine la etë topazio ne Aithiope;
Nge thatreine kö troa itön ej memine la nyipi gool.
20 Ngo ka fetra qa kaa la inamacan,
Nge ka xulu qa kaa la atrehmekun?
21 Hna juetrën ej qëmekene la nöjei ewekë ka mel
Me azaen kowe la itre waco ne hnengödrai.
22 Nge önine la hnëjin me mec ka hape,
‘Hne huni hi hna dreng la kola qeje inamacan.’
23 Ngo atre hi Akötresie la jëne tro kowe la inamacan;
Nyidrëti hmekuje hi la ka atre la göhnen ej,
24 Ke öhne hi nyidrëti la itre cane la fene hnengödrai,
Memine la nöjei ewekë asë e celë fen.
25 Ame lo nyidrëti a amekötine la ecatrene* la eny
Me tuluthe la itre tim,
26 Me acili wathebo kowe la mani
Me nyi jëne la iaw me hedreng,
27 Hnei nyidrëti hna öhne la inamacan me qejepengöne ej;
Me acile ej, me tupath ej.
28 Nge öni nyidrëti kowe la atr ka hape:
‘Goeën! Ame la troa xoue Iehova, ke celë hi inamacan,
Nge ame la troa thipetrije la ngazo, ke celë hi atrehmekun.’”