Salamo
Salamo i Dravita, nyine amekunën.
38 Iehova fe, the eamo ni kö ngöne la nyipëti a wesitr,
Nge the haji ni kö ngöne la nyipëti a elëhni.
2 Ke hna jaqa ni hnene la itre ane pehna i nyipë,
Nge hace hë la ime i nyipëti hung.
3 Wezipo asë* hë la ngönetreing pine la elëhni i nyipë.
Pëkö tingeting ngöne la itre juneng pine la ngazong.
4 Ke kola të hune la heng la itre ngazong;
Kösë ketre ehnef ka hace hnenge hna thatreine thu.
5 Kola punepun me si trenge pi la itre eatreng
Pine la triang.
6 Eni a hnehengazo nge hleuhleu catre ni;
O drai, eni a treije trootro.
7 Drenge hi ni la kola idreuth e kuhu hning;*
Wezipo asë hë la ngönetreing.
8 Kucakuca ha ni nge pë hnyawa trengecatreng;
Eni a ho kötr pine la akötr ka ej e kuhu hning.
9 Iehova fe, atre kö nyipëti la itre aja ne la hning,
Nge tha ka sihngödri kö koi nyipëti la itre aweng.
10 Kola manomano la wenethëhming, me nue ni hnene la egöcatreng,
Nge tha melemele hë la luemekeng.
11 Kola kötre ni hnene la itre sinatrongeng pine la itre kakötreng,
Nge kola cil ananyi ni hnene la itre sipu sineeng.
12 Ame la itre ka thele troa humuthi ni, angatr a tra thethi ni;
Ame la itre ka thele troa akötrë ni, angatr a qeje ihumuth;
O drai, angatr pala hi a qaja la itre trenge iaö.
13 Ngo tune la simi hnangenyë, tha drenge kö ni;
Tune la hum, tha eni kö a fe la qëng.
14 Ceitui eni hë memine la atr ka tha drenge kö,
Nge thatreine kö la qëng troa isigöli ni.
15 Iehova fe, nyipëti la hnenge hna lapa treqen,
Nge hnei nyipëti hna sa koi ni, Iehova Akötresing fe.
16 Ke öninge lo: “Epi tha tro kö angatr a madrine la eni a akötr
Me pi tru koi ni e tro la lue cang a ucic.”
17 Ke xönë hi tro ni a kei,
Nge tha patre kö la akötre qaatheng.
18 Hnenge hna qaja amamane la triang;
Tha lapa hnyawa kö ni pine la ngazong.
19 Ngo itre ka maca* me catr la itre ithupëjiang,
Ala nyimu hë la itre ka methinë ni ngo pëkö kepin.
20 Hnei angatr hna të la ngazo koi ni, ngacama hnenge hna kuca la loi;
Hnei angatr hna icilekeu me eni pine ni trongëne la loi.
21 Iehova fe, the nuetriji ni kö.
Akötresinge fe, the ananyi ni kö.
22 Iehova fe, atre amele* ni,
Canga traqa pi troa xatua ni.