Salamo
Thatraqane la atre jumi traem. Masekil* i Dravita, ngöne la kola thuemacanyi Saulo hnei Doega atre Edroma ka hape, qai Dravita thei Ahimelek.
52 Atr ka catre fe, hnauëne laka, eö a selëne la itre huliwa i ö ka ngazo?
O drai, ka cile huti la ihnimi nyipici i Akötresie.
2 Ka ixöj la thineme i ö tune la nyine iciny,
Nge ej a mekun troa kuca la ngazo me huliwa thoi.
3 Hnime catre kö eö la ngazo hune la loi,
Nge pi tro kö eö a thoi hune la troa qaja la nyipici. (Sela)
4 Thinem ka iaö fe,
Hnime catre eö la nöjei trengewekë ka iakötrë!
5 Celë hi matre, tro Akötresie a apatren palua eö;
Tro nyidrëti a ee eö me hule triji ö qa hnine la itate i ö;
Tro nyidrëti a feje triji ö qa ngöne la nöje ne la itre ka mel. (Sela)
6 Tro la itre ka meköt a öhne lai me hetre metrötr atraqatr,
Nge tro hë angatr a hnyima fë la ka iakötrë me hape:
7 “Hane hi la atr ka tha xomi Akötresieti kö nyine hnë zae i angeic,
Ngo ka lapa qale pe kowe la etrune la itre mo i angeic
8 Ngo ame ni, tro ni a tune la ioliv* ka cia hlöeë ngöne la uma i Akötresie;
Tro ni a mejiune kowe la ihnimi nyipici i Akötresie, uti hë epin, epine palua.
9 Eni a ajan troa atrunyi nyipë uti hë epine palua, ke hetre hnei nyipëti hna kuca;
Qëmekene la itre hlue i nyipë ka mele nyipici,
Tro ni a mejiune kowe la ëje i nyipë, ke celë hi ewekë ka lolo.