Pane Tus Samuela
2 Ame hnei Hana hna thithi me hape:
“Hning a madrin koi Iehova;
Tru hë la trengecatreng hnei Iehova.
Kola nganga la qëng koi itre ithupëjiang,
Ke eni a madrin la itre aqane iamele i nyipë.
2 Pëkö atre ka hmitrötr tui Iehova,
Pëkö sa i nyipë,
Nge pëkö git ka catr tune la Akötresi së.
3 Loi ju hë hna ithanata pi tru;
Nge the tro kö la që i epun a ithanata menu,
Ke ame Iehova, Akötresieti lai ka atre asë,
Nge ka meköti la aqane ameköti huliwa i nyidrë.
4 Xecie hë la itre tane pehna ne la itre atr ka catr,
Ngo hna aegöcatrene la itre ka kucakuca.
5 Ame lo itre ka xeni hnyawa, kola ha thele huliwa matre itö falawa,
Ngo ame lo itre ka mecijiin, meji hë angatr.
Ame lo föe ka tha hnaho, angeic a hnahone la 7 lao nekö trahmany,
Ngo ame lo ka nyimu neköne trahmany, tha hnaho hmaca kö angeic.
6 Iehova a humuth me amelen;
Nyidrëti a autine koi Hua me amejën.
7 Iehova a apë ewekën me atrenamon;
Nyidrëti a thaipiën me adraiën.
8 Nyidrëti a acilën la ka co qa ngöne la dro;
Me amejën la ka pë ewekë qa ngöne la hnatresij,
Me alapa angatr nyipine la itre nekö i joxu,
Me thue göhnë ka nyipi lolo koi angatr.
Iehova la atrekë ewekëne la trepene la ihnadro,
Nge hun ej, nyidrëti a atë la fen.
9 Nyidrëti a thupëne la hna feke ca ne la itre ka nyipici koi nyidrë,
Ngo troa humuthe mitine la itre atr ka kuca la ngazo,
Ke tha hnei trengecatre kö matre huune pi la atr.
10 Tro Iehova a apatrene la itre ka isi me nyidrë;
Nge tro Iehova a akeciqan la hedreng e hnengödrai matre amamane la trenge hni i nyidrë.
Tro Iehova a iameköti e cailo fen,
Tro nyidrëti a hamë men kowe la joxu hna acil
Me atrune la trengecatr ne la atr hnei nyidrëti hna iën.”
11 Ame hnei Elekana hna bëeke hmaca kowe la hnalapa i angeic e Rama. Ngo ame la nekönatr, nyëne a nyiqaane huliwa koi Iehova, nge kola thupë nyën hnei Eli, lo atre huuj.
12 Ngo ame lo lue nekö i Eli, lue atre lai ka ngazo thiina, ke tha metrötrë Iehova kö nyidro. 13 Tha kapa madrine hmaca kö nyidro lo xeni hna thawa koi itre atre huuj, lo hna hamën hnene la nöj. Hane pë hë la aqane kuca i nyidro: Ame la kola boel la huuj hna tro fë hnei ketre, fetra pi hi la ketre hlue ne la atre huuj, nge angeic a traqa fë ifok atraqatr ka köni meken. 14 Angeic a thine ju la mitr hnine la itrengen, maine hnine la öl, maine hnine la öle ka tru, maine hnine la kaserol. Matre ame la nöjei mitr hna thin hnei ifok, kola xom asë hnene lai atre huuj. Celë hi aqane ujë i nyidro kowe la nöjei nekö i Isaraela ka tro fë huuj e Silo. 15 Nge ame itre xa ijin, qëmekene tro la atr ka tro fë huuj a dreu giris, kola canga traqa la ketre hlue ne la atre huuj, me hape: “Hamëne pi kowe la atre huuj la mitr nyine rotin, ke xele kö nyidrë ma kapa qaathei eö la mitr hna boelën. Tro hi nyidrëti a xome la mitr ka hatr.” 16 Ngo e tro la atr a sa ka hape: “Loi e tro ni a pane dreuthe lai giris. Nge tro pë hë eö a xome la hnei eö hna ajan.” Önine lo hlu ka hape: “Waea, hamë ni pi enehila, wanga tro ni a thapa qaathei eö!” 17 Haawe, atraqatre la ngazo ne la itre hlu qëmeke i Iehova, ke tha metrötrëne hë angatre la itre huuj hna traqa fë koi Iehova.
18 Ngo ame Samuela, nyën a nyihlue i Iehova me fena* la iefoda* lino, ngacama nekönatre petre kö. 19 Nge e nöjei macatre, thine i nyën a cane koi nyën la ca iheetre ka qea, nge ka pë imen. Hana a tro fë la iheetr cili, la angeic me föi angeic a elë troa tro fë la huuj ne la macatre. 20 Ngöne la ketre drai, hnei Eli hna amanathithi Elekana, me föi angeic. Öni Eli koi Elekana: “Epi tro Iehova a aijijë eö troa hnaho hmaca memine la föe celë, nyine nyihnane lo hna nue koi Iehova.” Nge nyidroti a bëeke hmaca jë kowe la hnalapa. 21 Ame hnei Iehova hna utipi Hana, matre hnaho hmaca pi angeic. Hnei Hana hna hnahone la köni xa nekö trahmany, me lue jajiny. Nge Samuela pala hi a tru trootro qëmeke i Iehova.
22 Ngöne la ijine cili, qatre catre hë Eli. Nge atre hë nyidrë la aqane ujë ne la lue nekö i nyidrë kowe la nöj. Nge goi drenge fe nyidrëti laka, nyidroti a ce meköl me itre föe ka huliwa ngöne la hnë lö ne la itat ne icasikeu. 23 Matre öni nyidrë ka hape: “Hnauëne la epone pala hi a ujë tun? Ka ngazo catre la aqane qeje epon hnene la nöj. 24 Loi ju hë lue neköng, ke ngazo pala ha la hna qaja ngöne la nöje i Iehova. 25 Maine tro ketre atr a ngazo koi ketre, ijiji angeice pala kö troa hë Iehova matre xatua angeic. Ngo e traqa jë ketre ngazo koi Iehova, drei la ka atreine thithi sai angeic?” Ngo nyidroti kö a pi hun, ke ase hë Iehova mekun troa humuthi nyidro. 26 Nge ngöne la ijine cili, Samuela a tru trootro. Nge hna hnimi nyën hnei Iehova memine la nöj.
27 Ame la ketre drai, fetra pi hi la ketre atre i Akötresie, nge hetre maca i angeic koi Eli. Öni angeic: “Hane hi la hna qaja hnei Iehova: ‘Hapeu, tha hnenge kö lo hna amamai ni kowe la fami ne la itre qaaqaa i eö, lo angatr a nyihlue i Farao e Aigupito? 28 Nyipine la nöjei lapa ne Isaraela, hnenge hna iëne la qaaqaa i eö troa atre huuje koi ni, nge troa huuj hune la ita ne huujeng, me dreu ka pui loi, me fena la iefoda* qëmekeng. Nge hnenge lo hna hamën kowe la fami ne la qaaqaa i eö, la nöjei huuj ne dreuth hna tro fë hnei angetre Isaraela. 29 Hnauëne la epuni a tha nyipiewekëne la huuj hnenge hna amekötin hnine la umang? Nge hnauëne laka, ka tru kö la lue nekö i eö hung? Nge epuni a öni fë nemene la ka sisitria ne la itre huuj hna tro fë hnene la nöjeng Isaraela?
30 “‘Celë hi matre eni Iehova, Akötresie Isaraela, hnenge lo hna qaja xeciëne ka hape: “Fami eö, me fami ne la qaaqaa i eö la atrekë hnëqan troa huliwa koi ni uti hë epin.” Ngo enehila, eni Iehova a qaja ka hape: “Pë hmaca kö, ke ame la atre atrunyi ni, tro fe ni a atrun. Ngo ame la ka methinë ni, tro fe ni a methinën.” 31 Goeën! Easenyi hë la itre drai ne tro ni a thapa la trengecatre i epun, eö me fami ne la qaaqaa i eö, matre tha tro kö a mel aqeanyi la ketre atrene la fami eö. 32 Nge maine tro ju hë a tingetinge la nöje Isaraela, ngo tro pala kö a hetre ithupëjia me eö ngöne la umang, nge tha tro hmaca kö a hetre qatr ngöne la fami eö. 33 Ngo tro pe ni a nue la ketre matra i eö troa huliwa ngöne la ita ne huujeng, nge tro la luemeke i eö a geny, nge tro eö a latresi pi angeic. Nge ame la munëne la fami eö, tro angatr a mec hnei taua. 34 Nge ame la ewekë ka troa traqa kowe la lue nekö i eö, Hofeni me Fineasa, ke hatrene koi eö. Casi hi la drai ne tro nyidroti a mec. 35 Nge tro hë ni a iëne la ketre atre huuj ka mele nyipici. Nge tro angeic a trongëne la aja ne la hning, nge tro ni a acatrene la itre matra i angeic. Tro hë angatr a itre xötre atre huuj uti hë epin, nge tro angeic a nyi atre huuj kowe la hnenge hna iën. 36 Tro hë la itre atrene la fami eö ka mele pe, a thili koi angeic me sipo mani me falawa. Nge tro la matra i eö a hape: “Hane jë thue hnëqang thene la itre atre huuj, matre hetre ange falawa.”’”