Hnaaluene Tus i Aqane Lapa Itre Joxu
2 Ame hnei Solomona hna amekötine troa xupe la uma ne hmi göne la ëje i Iehova, me uma i joxu. 2 Solomona a nyithupene jë la 70 000 lao atre ka huliwa,* me 80 000 lao atre ka thupi etë, nge ka huliwa ngöne la itre wetr, me 3 600 lao tane huliwa. 3 Ketre, hnei Solomona hna iupi fë maca koi Hirama joxu ne Turo, öni nyidrë: “Kuca jë koi ni la hnei nyipë hna kuca koi Dravita kemeng, lo nyipë a iupi fë sinöe arasi koi nyidrë, matre xupe la hnalapa i joxu. 4 Eje hi, eni a xupe la uma kowe la ëje i Iehova Akötresing, me hnëkën* thatraqai nyidrë. E cili, tro ha dreuth qëmeke i nyidrë la itre sinöe ka pui lolo, me tro fë pala hi la falawa nyine amaman, me itre huuj ne dreuth asë e hmakanyi me hej, e nöjei Sabath me treu ka hnyipixe, me itre ijine feet i Iehova Akötresi hun. Celë hi hnëqa nyine troa kuca lapaan hnei Isaraela. 5 Tro ni a xupe la uma atraqatr, ke draië kö la Akötresi hun hune la itre xa haze. 6 Ngo drei la ka ijije troa xupe la uma i nyidrë? Ke tha ijije kö la hnengödrai asë* troa nyi hnalapa i nyidrë. Nge ka ue ni matre troa xupe la uma i nyidrë? Ijijinge hi troa xupi hnë huuj, me hnë huhajine la itre huuj qëmeke i nyidrë. 7 Haawe enehila, upe jë koi ni la ketre atr ka atreine kuci huliwa, nge ka atreine huliwa gool, me sileva, me kopa, me fao, me pene mamoe ka madra, me fil ka madra, me fil ka bulu, ketre atre ka atreine siji ewekë ka catr. Tro angeic a huliwa e Iudra me Ierusalema, memine la itre atreng ka atreine huliwa, itre atr hnei kaka Dravita hna nue koi ni. 8 Nge iupi fë pi koi ni qa Lebanona la itre sinöe arasi, me göti me alemuga,* ke atre hi ni laka, ka atreine sa sinöe ne Lebanona la itre ka huliwa koi nyipë. Tro hë la itre ka huliwa koi ni a ce huliwa me itre hlue i nyipë. 9 Tro fe angatr a hnëkë sinöe atrunyi koi ni, ke tro ha atraqatre la uma hnenge hna troa xup. 10 Goeën, tro ni a hamë xeni kowe la itre ka huliwa i nyipë, itre ka sa sinöe: 20 000 kori* ne qitr, me 20 000 kori ne bali, me 20 000 bath* ne waina, me 20 000 bath ne oel.”
11 Ame hnei Hirama joxu ne Turo hna fejan la maca celë, me iupi fë koi Solomona, kola hape: “Hnei Iehova hna acili nyipë troa joxu, ke nyidrëti a hnime la nöje i nyidrë.” 12 Nge öni Hirama hmaca: “Epi troa atrunyi Iehova Akötresi Isaraela, atre xupe la hnengödrai me ihnadro, ke hnei nyidrëti hna hamëne koi Dravita joxu, la nekö trahmanyi ka inamacan, ka hmek, nge ka itrotrohni, nekö trahmanyi ka troa xupe la uma koi Iehova, me xupe la uma i joxu. 13 Eni a upi Hiramabi koi nyipë, ketre atre ka atreine huliwa, nge ka inamacan. 14 Angeic la neköne la ketre föe ne la tribu ne Dana, nge atre Turo la kem. Atreine catr angeic huliwane la gool, me sileva, me kopa, me fao, me etë, me sinöe, me pene mamoe ka madra, me fil ka bulu, me imano ka hmelele, me fil ka madra. Atreine hi angeic sija la nöjei ewekë, me nöjei desë, me xötrethenge la nöjei tulu hna upi angeic troa kuca. Tro angeic a ce huliwa me itre atre i nyipë ka atreine huliwa, me itre atre ka atreine huliwa i Dravita joxu, keme i nyipë. 15 Haawe enehila, epi tro nyipëti joxu a iupi fë la qitr, me bali, me oel me waina, hnei nyipëti hna sisinyi troa hamën koi itre ka huliwa koi nyipë. 16 Nge tro pë hë huni a sa sinöe qa Lebanona, tro huni a hamën thenge la aja i nyipë, nge tro huni a iothekeun, me iupi fë jëne hnagejë a tro Iopa. Nge tro pë hë nyipëti a aelën a tro Ierusalema.”
17 Ame hnei Solomona hna e la etrune la itre ka lapa trenyiwa e Isaraela, thupene la hna e atr hnei Dravita keme i nyidrë. Matre ala 153600 angatr. 18 Ame hnei Solomona hna acile la ala 70 000 troa huliwa,* nge 80 000 troa thupi etë hnine la itre wetr, nge 3 600 troa tane huliwa ka iup.