Esetera
5 Ngöne la hnaakönine drai, hnei Esetera hna heetrëne la itre iheetre ne isola, me cil ngöne la götrane gaa pë ihakun ne la hnalapa i joxu, lo ka qëmek kowe la itre hnahage i joxu. Nge ame la joxu, nyidrëti a lapa hune la therone i nyidrë, ngöne la hnahag ne la theron, qëmekene la hnë lö. 2 Matre ame hë la joxu a öhnyi Esetera ka cil ngöne la götrane gaa pë ihakun, hnimi Esetera ju hi nyidrë, matre hnei nyidrëti hna line koi eahlo la sine tö gool. Ame hnei Esetera hna tro koi nyidrë, me ketr la pune la sine tö.
3 Matre önine la joxu: “Nyipoti a u isola Esetera? Hetre sipo i nyipo? Maine tro nyipoti a sipone la sine la baselaiang, tro ni a hamë nyipo!” 4 Ngo öni Esetera ka hape: “Maine ka loi koi joxu, tro la joxu me Hamana a traqa enehila troa xen, ke hnenge hna hnëkë xeni koi joxu.” 5 Matre hnene la joxu hna amekötin kowe la itre atre i nyidrë ka hape: “Tro jë koi Hamana, nge upi angeice jë troa canga traqa, tune la hna sipon hnei Esetera.” Ame hnei joxu me Hamana hna tro troa xeni la hna hnëkën hnei Esetera.
6 Nge ame hë la kola iji waina,* önine la joxu koi Esetera: “Hetre aja i nyipoti kö? Tro ni a kapa. Maine pena, hetre sipo i nyipo? Tro fe ni a hamë nyipo la sine la baselaiang!” 7 Ngo öni Esetera ka hape: “Hane hi la ajang memine la sipong: 8 Maine kola hnimi ni hnei joxu, nge maine ka loi koi joxu troa eatrëne la ajang me kapa la sipong, epi tro la joxu me Hamana a traqa troa xeni elany, ke tro hmaca kö ni a kuci xeni koi nyidro. Nge elany, tro hë ni a qaja la siponge koi joxu.”
9 Thupene lai, hnei Hamana hna tro me madrin, me hnyimahnyima. Ngo ame ju hi la angeic a öhnyi Modikai ngöne la qëhnelö ne la uma i joxu, me öhne laka, tha cile kö Modikai, nge tha Modikai kö a xou angeic, elë catre jë hi la hni Hamana. 10 Ngo hnei Hamana hna xomihni, me tro kowe la hnalapa i angeic. Nge angeic a hëne jë la itre sine i angeic, me Zeres, lo ifënekö i angeic. 11 Nge hnei angeic hna nyiqaane selë angeic, ke trene mani catr angeic, nge tru hnei nekö i angeice trahmany, nge ketre, hnei angeice hna kapa qaathei joxu la musi ka tru, memine la götrane qa ka draië kö hune la itre xa he ne nöj, me itre ka huliwa koi joxu.
12 Nge öni Hamana hmaca ka hape: “Ngo tha ase pala kö, ke eni casi hi la hna hën hnei isola Esetera troa ce xeni me joxu. Nge elanyi hmaca, hna hë ni me joxu kowe la hnalapa i eahlo. 13 Ngo tro ni a madrine tune kaa, nge eni pala hi a öhnyi Modikai, lo atre Iudra ka lapa ngöne la qëhnelö ne la uma i joxu?” 14 Ame hnei Zeres lo ifënekö i angeic, me itre sine i angeic hna sa koi Hamana ka hape: “Upe jë troa acile la ketre ipoto ka 50 lae kubit.* Nge elanyi hmakany, sipone jë koi joxu troa athipi* Modikai, nge tro jë hë troa ce xeni me joxu.” Nge madrine ju hi Hamana kowe la eamo cili, matre hnei angeic hna upe troa acile la ipoto.