Isaia
14 Ke tro Iehova a utipi Iakobo, nge tro hmaca nyidrëti a ië Isaraela. Tro nyidrëti a alapa* angatr ngöne la nöje i angatr, nge tro la itre trenyiwa a traqa koi angatr me cas memine la itre matra i Iakobo. 2 Eje hi, tro la itre nöj a bëeke sai angatr kowe la itre hnalapa i angatr, nge tro la itre matra i Isaraela a xomi angatr nyine hlu ngöne la nöje i Iehova. Nge tro angatr a akalabusin lo itre ka akalabusi angatr, me thahluën lo itre ka folosa* angatr.
3 Nge ame ngöne la drai ne tro Iehova a aupune la akötre i ö, me axapone la hni i ö qa ngöne la ithahluë, 4 tro hë eö a e gufan la edromë celë matre troa hnyima fë la joxu ne Babulona me hape:
“Ekölöhini pë hë lo atre ithahluë!
Patre hë la iangazo!
5 Ase hë Iehova hutra la jia ne la itre atr ka ngazo,
Lo sine tö ne la itre tan,
6 Lo atr ka lepe lapaan la itre nöj cememine la trengehni,
Ene lo atre musinëne la itre nöj hnene la elëhni me iaxösisi ka pë pun.
7 Ngo upu hë la ihnadro, nge mano hë ej.
Kola madrin la itre atren.
8 Tro fe la itre göti,
Me itre arasi ne Lebanona a madrin, ke kei hë eö.
Öni angatr: ‘Qaane lo eö a kei,
Pëhë atr ka traqa troa sai eahun.’
9 Kolo fe a enienij la Hua*
Ke ej a hnëkë troa kepe eö.
Ej a ahlën thatraqai ö lo itre ka pë trengecatr ngöne la mec,
Ene lo itre joxu ka iaxösisi* ne la fen.
Ej a amejën la itre joxu ne la itre nöj qa ngöne la itre therone i angatr.
10 Angatr asë a isa qaja ka hape,
‘Eö fe a hane kucakuca tu hun?
Eö fe hë a hane tui eahun?
11 Ase hë autine koi Hua* la pi tru i ö,
Memine la mejene la itre nyine elo miuzike i ö.
Eö a meköl hune la hnënge wanak tune la ketre ili,
Nge kola sitrë eö hnene la itre piagotr.’
12 Ekölöhini ö, ke kei hë eö qa hnengödrai,
Eö lo wëtresij ka melemel, lo nekön ne la kaqa ne lai!
Kei hë eö e kuhu hnadro,
Eö lo atre ngaane la itre nöj!
13 Öni eö lo: ‘Tro ni a elë e koho hnengödrai.
Tro ni a adraiëne la theroneng e koho hune la itre wëtresij i Akötresie,
Nge tro ni a lapane la wetr ne icasikeu,
Ngöne la itre götran e kolopi qa.
14 Tro ni a elë hune la itre iaw;
Tro hë ni a tun la Atre Ka Draië Catr.’
15 Ngazo pe, tro ha kuiëne meköti ö koi Hua,
Ngöne la itre götran gaa jui ne la hnaop.
16 Tro la itre ka öhnyi ö a goeë tili ö;
Tro angatr a waipengöi ö me hape,
‘Angeice hi lo ka enijëne la fen,
Me axouene la itre baselaia,
17 Me nyi hnapapan la fene hnengödrai
Me thë la itre traon,
Nge ka xele ma nue hmaca la itre hna akalabusin?’
18 Ame la itre xaa joxu ne la itre nöj,
Angatr asë hi a meköl hnyawa ngöne la lolo i angatr,
Ngöne la isa hua* i angatr.
19 Ngo ame pe eö, hna triji ö, nge pëkö hua i ö,
Tro eö a tune la zin hna sisin,
Hna meköle tran hnene la itre atr hna kuluhmath,
Nge hna kuiën ngöne la ketre hnaop hna nyialien hnei etë,
Tro hë eö a tune la ngönetrei hna tro waja.
20 Tha tro kö eö a itronyi me angatr ngöne la hua,
Ke hnei ö hna apatrene la nöje i ö,
Me humuthe la itre atrene la nöje i ö.
Tha tro hmaca kö a hane qaja la itre matra ne la itre atr ka ngazo.
21 Hnëkëne jë la götran hnë troa humuthe la itre nekö i angeic
Pine la ngazo ne la itre qaaqaa i angatr,
Matre tha tro kö angatr a cil me thapa la ihnadro
Me atiqane la fen hnene la itre traone i angatr.”
22 “Tro ni a cile koi angatr,” öni Iehova joxu ne la itre trongene isi e hnengödrai.
“Nge tro ni a xometrij qa Babulona la itre ëj, me itre ka lapa pe, me itre matran, me itre xötr api angatr,” öni Iehova.
23 “Eje hi, tro ni a kuca matre tro ej a zi ne la itre kifoda,* me zi ne la tim; nge tro ni a burumën ej hnene la uke burum ne apatren,” öni Iehova joxu ne la itre trongene isi e hnengödrai.
24 Hnei Iehova joxu ne la itre trongene isi e hnengödrai hna sisinyi ka hape:
“Tro ha traqa tune lo hnenge hna mekun,
Nge tro ha eatr tune lo hnenge hna axeciën.
25 Tro ni a anyilanyilane la atre Asuria ngöne la nöjeng,
Nge tro ni a waja fici angeic hune la itre wetreng.
Tro ha patre la ehnef hnei angeic hna atë hune la nöjeng,
Nge tro ha una la ehnefe i angeic qa hune la lue hnaiape i angatr.”
26 Hane hi la hna axeciën kowe la fene hnengödrai,
Nge hane hi la im ka hnëkë* troa lepe la itre nöj asë.
27 Ke ase hë Iehova joxu ne la itre trongene isi e hnengödrai axecien,
Nge drei la ka atreine atrian?
Ke hnëkë hë la ime i nyidrë troa lep,
Nge drei la ka atreine troa ajean ej?
28 Ame ngöne la macatre ne mec i Ahaza joxu, hna traqa la hnëewekë celë:
29 “Angetre Filisiti fe, the madrine kö laka,
Hna axeciëne la tö ka lepi ö.
Ke troa xulu qa ngöne la iwaan ne la un, la un ka poizin,
Nge ame la matran ej, ke un ka poizin nge ka sesësesë.*
30 Tro la hna pane hnahon ne la itre ka pë ewekë a hetre xen
Nge tro ha meköle tingeting la itre ka pë mo,
Ngo tro ni a humuthe la waane i ö hnene la mecijiin,
Nge tro ha humuthe la itre matra i ö ka lapa pe.
31 Qëhnelö fe, Sue jë! Nge traone fe, treije jë!
Ke Filisiti fe, tro hë eö a kucakuca!
Kola xulu qa kolopi la haj,
Nge pëkö atr thene la itre ithupëjia* ka huli hmitr.”
32 Nemene la nyine troa sa kowe la itre ka tro fë maca ne la nöj?
Ka hape, ase hë Iehova ami trepene Ziona,
Nge troa zae e cili hnene la itre atr ka ipië ne la nöje i nyidrë.