Pane Tus Kowe La Angetre Thesalonika

4 Haawe ange trejin, ase hë eahuni amekötine koi nyipunie la aqane troa ujë matre amadrinë Akötresie, nge celë hi hnei nyipunieti hna kuca. Ngo enehila, eahuni a sipone me iele nyipunie ngöne la ëje i Iesu Joxu, matre tro pala kö a kuca apexejen. 2 Ke atre hë nyipunie la itre hna amekötin* qaathei Iesu Joxu.

3 Aja i Akötresie tro nyipunie a pë ethan me iananyi memine la kuci ngazo.* 4 Nge nyipiewekë tro nyipunie a atre la aqane troa isa xomehnöthi ngönetrei, matre tro pala hi ej a pë ethan, nge troa kapa hnei Akötresie. 5 Nge the tro kö a nyinyape thele la itre aja ka sis, tune la aqane ujë ne la itre ka thatre Akötresie. 6 Haawe, ngöne la götrane cili, the tro kö ketre a sasaithe la itre ifego hna amekötine koi angeic, matre akötrëne la trejine me angeic, ke tro kö Iehova* a nyithupene hnyawa thenge la itre aqane ujë cili, tune lo hne huni hna qaja ha me hmekë nyipunie. 7 Nyipici, tha hnei Akötresieti kö hna hë së kowe la thiina ka sis, ngo kowe la thiina ka hmitrötr. 8 Haawe, ame la atre thipetrije lai, tha angeice kö a thipetriji atr, ngo Akötresieti pe, atre hamë nyipunie la uati hmitrötr.

9 Ngo ame göne la ihnimi trejin, tha nyipiewekë kö tro huni a cinyihane koi nyipunie, ke Akötresie la atre ini nyipunie troa ihnimikeu. 10 Nge celë hi hnei nyipunie hna kuca kowe la itre trejin ngöne la nöje Makedonia asë, ngo ange trejin, eahuni pe a iele nyipunie troa kuca apexejen. 11 Nge isine jë troa mele tingeting, nge the lö hnine menune kö la ifekë jolen, ngo catre jë pe isa huliwa tune lo hne huni hna ini nyipunie, 12 matre öhne jë hnei itre atr e trön la aqane tro hnyawa i nyipunie, nge tro angatr a atre laka, pëkö ewekë ka pë thei nyipunie.

13 Ketre ange trejin, tha ajane kö huni tro nyipunieti a thatre la pengöne la itre ka meköl ngöne la mec, matre tha tro kö nyipunie a hleuhleu catr tune la itre ka pë mejiun. 14 Maine ka lapaune së ka hape, meci hë Iesu nge ase hë amele nyidrëti hmaca, haawe jëne Iesu, tro fe Akötresie a amejëne hmaca koi nyidrë lo itre ka meköle ngöne la mec. 15 Nge hane hi la ini hne huni hna hamë nyipunie thenge la trengewekë i Iehova,* maine tro së, itre ka mele petre kö, a mel uti hë la ijine celë hë la Joxu, tha tro kö së lai a thipatrëne la itre ka meköl ngöne la mec; 16 ke tro la Joxu a uti qa hnengödrai me sue tune la tane isi, tane la trongene isi ne la itre angela, nge tro nyidrëti a uti fë la trutru i Akötresie, matre tro la nöjei hlue i Keriso ka meköle ngöne la mec a mejë pa. 17 Thupene lai, tro hë së itre ka mele pe, a ce me angatr. Tro ha xome draië së hnene la iaw, matre iöhnyi me Joxu e koho; nge qaane ju hi lai, tro pala pë hë së a ce me Joxu. 18 Haawe, the mano kö nyipunie iakeukawanyikeu jëne la itre trengewekë cili.