Isaia
57 Kola meci la atr ka meköt,
Ngo pëkö ka semesinen.
Hna xome* la itre atr ka mele nyipici,
Nge pëkö ka atrehmekun laka, hna xome la atr ka meköt
Hnene* la akötr.
2 Angeic a lö hnine la tingeting.
Ame la nöjei atr ka trongëne la meköt, angatr a mano hune la itre ili* i angatr.
3 “Ngo easenyi jë epun,
itre neköne la föe ka trene iöni,
itre neköne la trahmanyi ka nyixetë me föe ne gojeny:
4 Epuni a hnyima sai drei?
Epuni a fe angangane la që i epun me puë drei?
Hapeu, tha epuni kö lo itre nekönatr ka tha idrei,
Lo itre matran ka iaö,
5 Lo itre ka meci fë aja fene la itre sinöe ka tru,
Lo nöjei sinöe asë ka hatr,
Ene la itre ka humuth la itre nekönatr ngöne la itre hnathup,*
Fene la itre gaa kaqa ne git?
6 Ame la hnei ö hna kapa, ke eje ngöne la itre etë ka jijia ne la hnathup.*
Eje hi, celë hi edrö i ö.
Hnei eö fe hna tro fë waina nyine fi huuj me itre ahnahna koi angatr.
Hapeu, tro kö ni a madrine* la itre ewekë cili?
7 Hnei ö hna amë la ili i ö hune la wetr ka tru nge ka draië,
Nge hnei ö hna elë matre huujëne la itre huuj e cili.
8 Hnei ö hna acile la idrola i ö nyine hatren, tröne la qëhnelö me itre hune qëhnelö.
Hnei ö hna nuetriji ni me amamane la ngönetrei i ö;
Hnei ö hna elë me atrune la ili i ö.
Hnei ö hna sisinyi me angatr.
Aja i ö troa mekölene la itre ili i angatr,
Me goeëne la kahmitrötre* ne la trahmany.
9 Hnei ö hna uti koi Melek* memine la oel
Me nyimu senitr.
Hnei ö hna upe la itre ka tro fë maca i ö koi gaa nany,
Matre hnei ö hna sipu uti koi Hua.*
10 Hnei ö hna isine troa trongëne la nöjei jë i ö,
Ngo tha qaja kö eö ka hape: ‘Ka gufa la hnenge hna kuca!’
Hetre trengecatre i ö hmaca ha.
Matre tha hnei ö kö hna cil.*
11 Drei la hnei ö hna xouen nge ka axouenyi ö
Matre nyiqane thoi jë eö?
Tha meku ni hë hnei ö.
Pëkö ca hnei ö hna semesinen.
Pine laka, hnenge hna lapa thaup me lapa acony,*
Tha hnei ö kö hna xoue ni.
12 Tro hë ni a amamane la ‘meköti’ ö memine la itre huliwa i ö,
Nge tro itre ej a pë thangane koi ö.
13 Maine tro eö a sipo ixatua,
Tha tro jë kö a amele eö hnene la hnënge idrola i ö?
Tro ha aca tro ufi angatr asë hnene la eny,
Tro ha apatrenyi angatr hnene la hnepe enyi ka co,
Ngo tro ha hetrenyi la nöj hnene la atre zae theng
Nge tro angeic a lapane la wetreng ka hmitrötr.
14 Tro ha qaja ka hape: ‘Xupe jë, xupe jë la ketre gojeny! Hnëkëne jë la jë i ö!
Huletrije pi la nöjei ewekë ka thingi jëne la nöjeng.’”
15 Ke hane hi la hna qaja hnene La Ka Draië nge Ka Sisitria,
Lo ka mele epine palua nge ka hmitrötr la ëje i nyidrë:
“Eni a lapane la gaa draië me gaa hmitrötr,
Ngo ce eni fe memine la itre ka awe, me ka ipië,
Matre amelene hmaca la itre mekuna ne la itre ka ipië
Memine la hni ne la itre ka awe.
16 Ke tha tro kö ni a icilekeu me angatr uti hë epin
Tha tro kö ni a elëhni koi angatr uti hë epine palua;
Ke wanga kucakuca jë la atr hneng,
Ene la nöjei ewekë asë ka mano hnenge hna xup.
17 Hnenge hna elëhni kowe la ngazo i angeic,* pine angeic qenatrekënö,
Matre hnenge hna lepi angeic, nge ngöne la wesitr, hnenge hna nuetriji* angeic.
Ngo hnei angeice pala hi hna drengethenge la hni i angeic, me ujë tune la atr ka tha mele nyipici.
18 Hnenge hna öhne la itre aqane ujë i angeic,
Ngo tro kö ni a amele angeic me eatrongë angeic
Nge tro hmaca kö ni a akeukawanyi* angeic, memine la itre ka ce treij me angeic.”
19 “Tro ni a amë la nyine iatruny hune la itre ihneqë.*
Tro ha atre la tingeting ka cile hut hnene la atre lapa gaa nany me gaa easeny,” öni Iehova,
“Nge tro kö ni a amele angeic.”
20 “Ngo ceitune hi la itre atr ka ngazo memine la hnagejë ka holehol, nge ka tha hane kö hao drai,
Me tune la itre tim ka hule lapaan la itre drawa memine la hngöl.
21 Pëkö tingeting thene la itre atr ka ngazo,” önine la Akötresing.