Angetre Amekötin

16 Ngöne la ketre drai, hnei Samasona hna tro Gaza, nge öhne ju hi angeic e cili la ketre föe ne gojeny. Ame hnei angeic hna lö kowe la hnalapa i nyën. 2 Nge hna thuemacane la angetre Gaza ka hape: “Samasona ha la!” Matre ngöne la jidr ka pexej, hnei angatr hna kanoth la götrane cili, me zae ngöne la qëhnelö ne la traon, ke öni angatr: “Tro sa humuthi angeic e fetra ha la jö.”

3 Ngo hnei Samasona hna meköl e cili uti hë e minui. Nge ame hë la kola minui, hnei angeic hna mejë me ea la lue götrane qëhnelö ne la traon, memine la lue ecatren ne qëhnelö, me ce huletrij memine la agö ne thingi qëhnelö. Ame hnei angeic hna ajön trongën, me elë fë hune la wetr qëmeken e Heberona.

4 Thupene lai, hnei angeic hna nyiqaane ajane la ketre föe ka lapa ngöne la hnathup* e Sorek, Delila la ëjen. 5 Matre hnene la itre joxu ne la angetre Filisiti hna tro troa qaja koi nyën ka hape: “Thele jë* la qaane la mene i angeic, memine la nyine tro huni a kuca, matre othi angeic, me xom aconyi angeic. Nge maine tro eö a kuca lai, ke tro huni a isa hamë eö la 1 100 lao pies sileva.”

6 Thupene lai, hnei Delila hna hnyingë Samasona ka hape: “Pane qaja jë koi ni la qaane la trengecatre i ö. Nge troa othi ö hnei nemen matre troa xom aconyi ö?” 7 Öni Samasona jë hi: “Maine troa othi ni hnene la 7 lao otretr ne pehna, lo tha hna huliwane petre kö, nge tha hna aqaqacilëne kö, haawe, tro hë ni a kucakuca me tune la ketre atre menu.” 8 Ame hnene la itre joxu ne la angetre Filisiti hna tro fë koi Delila la 7 lao otretr ne pehna, lo tha hna huliwane petre kö, nge tha hna aqaqacilëne kö. Nge hnei nyën hna othi angeic memin. 9 Ngo kola izaeny la itre trahmany ngöne la ketre hnahag e koië pun. Ame hnei nyën hna sue ka hape: “Samasona, angetre Filisiti hë la!” Nge hnei Samasona hna axecien la itre otretr, tune la kola axecien la lino hna dreuth. Matre pëkö ala cas e angatr ka atre la qaane la mene i angeic.

10 Matre öni Delila jë hi koi Samasona: “Dreng, ase hë eö thoi me qene xeti he ni!* Pane qaja jë koi ni ka hape, troa othi ö hnei nemen.” 11 Ame hnei angeic hna sa ka hape: “Maine troa othi ni hnene la itre eno ka hnyipixe, nge tha hna huliwane petre kö, haawe tro hë ni a kucakuca me tune la ketre atre menu.” 12 Matre hnei Delila hna xom la itre eno ka hnyipixe, me othi angeic, me sue ka hape: “Samasona, angetre Filisiti hë la!” (Ngöne la ijine cili, kola izaeny la itre trahmanyi ngöne la ketre hnahag.) Ngo hnei Samasona hna axecien la itre eno, kösë ketre theny.

13 Thupene lai, öni Delila jë hi: “Uti hë enehila, hnei ö pala hi hna thoi me qene xeti he ni. Qaja jë koi ni troa othi ö hnei nemen.” Ame hnei angeic hna sa ka hape: “Loi e tro eö a xome la 7 lao pene heng hna el, matre troa ce el memine la theny ne la ketre imaano.” 14 Matre hnei nyën hna acatren la itre pene he i angeic hna el memine la ca pine, me sue ka hape: “Samasona, angetre Filisiti hë la!” Ame hnei angeic hna hlë qa hna meköl, me huletrij la pine memine lai theny.

15 Matre öni Delila hmaca jë hi: “Eö a qaja ka hape, eö a hnimi ni, ngo tha eö kö a fe la hni i ö koi ni. Akönia qene xeti he ni hë hnei ö, nge tha qaja kö eö la qaan la mene i ö.” 16 Pine laka, nyëne pala hi a iele angeic e nöjei drai, matre kucakuca ha Samasona, nge hmanono hë angeice koi nyën. 17 Ame hnei angeic hna fe la hni i angeic koi nyën me hape: “Tha hna hane kö cine la heng qane lo kola hnaho ni,* ke Nazeri ni koi Akötresie. Maine troa cine la heng, tro ha pë trengecatreng, nge tro hë ni a kucakuca tune la itre atre menu.”

18 Matre ame hë la Delila a öhne laka, ase hë Samasona fe la hni i angeic, hnei nyën hna canga hën la itre joxu ne Filisiti me hape: “Trohemi hë epun, ke ase hë angeic fe la hni i angeic koi ni.” Ame hnei angatr hna traqa fë kowe la hnalapa i Delila, lo mani hnei angatr hna sisinyi troa hamë nyiën. 19 Ame hnei Delila hna ameköle Samasona hune la lue iwatingöneca i nyën, me hëne la ketre atr troa xöj la 7 lao hna ele ihe i Samasona. Thupene lai, hnei nyën hna nyiqaane xom aconyi angeic, ke patre trootro hë la trengecatre i angeic. 20 Matre hnei nyën hna sue ka hape: “Samasona, angetre Filisiti hë la!” Nge hlë jë hi angeic me hape: “Tro hmaca kö ni a kuca tun e cili lo, tha tro jë kö angatre lai a ee ni.” Ngo thatre pe angeic laka, patre hë Iehova qaathei angeic. 21 Matre hnene la angetre Filisiti hna xolouthi angeic, me sea la luemeke i angeic, me uti sai angeic a tro Gaza, me ceinë angeic hnei kopa. Nge angatr a upi angeice jë troa amudromudro qitr ngöne la kalabus. 22 Ngo thupene la hna cine la he i angeic, hna nyiqaane cia hmaca la itre pene he i angeic.

23 Ame ngöne la ketre drai, hnene la itre joxu ne la angetre Filisiti hna ce cas troa tro fë huuj koi Dagona haze i angatr, me feetëne la ijine cili, ke öni angatr: “Ase hë la haze së nue Samasona koi së, lo ithupëjia me easë!” 24 Matre ame hë la angatr a öhne la idrola, hnei angatr hna atrune la haze i angatr me hape: “Hnene la haze së hna nue la ithupëjia me easë kowe la ime së, lo atre angazone la nöj me humuth la ka ala nyimu the së.”

25 Nge pine laka, madrine catr angatr, öni angatr: “Tro jë a thei Samasona, matre tro sa pane hnyima.” Matre hnei angatr hna thei Samasona qa ngöne la kalabus troa hnyimasai angeic. Nge hna acili angeic nyipine la itre ikapa. 26 Ame hnei Samasona hna qaja kowe la nekö trahmanyi ka eatrongë angeic ka hape: “Pane amë ju la lue imeng hune la itre ikapa ka cilaxome la uma hmitrötr, matre tro ni a qalën.” 27 (Tiqa catre la uma hmitrötr hnei trahmanyi me föe. Nge e cili fe la itre joxu ne Filisiti asë, nge hune la uma, traqa koi 3 000 lao trahmanyi me föe ka goeën me hnyimasai Samasona.)

28 Matre hnei Samasona hna xëwe koi Iehova me hape: “Iehova Joxu Ka Sisitria, Akötresieti fe, meku ni kö hnei nyipë. Epi tro nyipëti aca aegöcatrenyi ni hmaca ngöne la drai ce, matre tro ni a nyithupene kowe la angetre Filisiti, pine la hnei angatr hna kuca kowe la ketre alamekeng.”

29 Ame hnei Samasona hna qalëne la lue ikapa e kuhu nyipin ka cilaxome la uma hmitrötr; hnei angeic hna atë la ime maca i angeic hune la ketre ikapa, me ime mi i angeic hune la ketre. 30 Matre angeic a sue jë ka hape: “Epi tro ni a ce mec memine la angetre Filisiti!” Ame hnei angeic hna nu asë la trengecatre i angeic troa ukun la lue ikapa, nge hnene la uma hmitrötr hna kei tran la itre joxu memine la nöjei atr asë. Nge tru catre hmaca kö la itre atr hnei angeic hna humuth ngöne la drai cili, hune lo mele pala kö angeic.

31 Thupene lai, hnene la itre trejin me angeic, memine la fami ne la keme i angeic hna ce uti troa xututhe la ngönetrei i angeic, me kelemi angeic nyipi Zorea me Esetaol ngöne la hua i Manoa keme i angeic. Hnei Samasona hna ameköti Isaraela koi 20 lao macatre.