Iona
3 Ame hnei Iehova hna nyi hnaaluene ithanata koi Iona, me hape: 2 “Mejë jë a tro Nineve lo traon ka tru, nge tro fë jë la maca hnenge hna ahnithe koi ö.”
3 Ame hnei Iona hna mejë a tro Nineve, tune lo hna amekötin hnei Iehova. Ka tru catr e Nineve,* ke tro lai a köni drai ne tro matre trongën asë la traon. 4 Nge hnei angeic hna lö hnine la traon, me tro ngöne la drai ka pexej, me sue trootro ka hape: “Ngöne pe hi la 40 lao drai, tro ha apatrenyi Nineve.”
5 Ame hnene la angetre Nineve hna lapaune koi Akötresie. Hnei angatr hna amekötin troa tha xen me heetrë ibëek ka tru thenyin, qaane ju hi la ka co uti hë la ka tru. 6 Nge ame hë la joxu ne Nineve a drenge la maca, hnei nyidrëti hna uti qa ngöne la theron, me unatrije la hnaheetre i joxu matre heetrë ibëek ka tru thenyin, me lapa ngöne la hnatresij. 7 Nge hnei nyidrëti hna iupi fë maca kowe la angetre Nineve ka hape:
“Hane hi la hna amekötin hnei joxu me itre he ne nöj: Tha tro kö la ketre atr maine öni ka co maine ka tru, a xen la ketre ewekë. Tha tro pi kö angatr a xen me iji tim. 8 Loi e tro asë hi la itre atr me itre öni a heetrë ibëek ka tru thenyin; loi e tro angatr a hë catre draië koi Akötresie, me nuetrije la itre huliwa ka ngazo, me itre aqane ujë i angatr ka iakötrë. 9 Nge maine jë, tro hë la nyipi Akötresie a saze mekun,* me nuetrije la elëhni i nyidrë, nge e cili, tha tro kö sa mec.”
10 Matre ame hë la nyipi Akötresie a öhne la aqane ujë i angatr, la angatr a nuetrije la itre huliwa ka ngazo, saze pi hi la mekuna i nyidrë.* Tha lepi angatre ju kö hnei nyidrë, tune lo aqane qaja i nyidrë.