Iona
4 Ngazo pe, tha madrine pi kö Iona, nge tru catr la elëhni i angeic. 2 Matre angeic a thithi jë koi Iehova, me hape: “Iehova fe, celë hi lo hnenge hna mekun lo eni petre kö ngöne la nöjeng. Celë hi kepin matre kötre pi ni a tro Tasesa. Ke atre hi ni laka, Akötresie ka itrotrohni nyipë, nge ka utipin, nge ka hmitre troa elëhni, nge ka tru trenge ihnimi nyipici, Akötresie ka xele ma wange la akötr. 3 Haawe Iehova fe, epi tro nyipëti a xome la meleng, ke ka loi ju kö la tro ni a mec hune la troa mel.”
4 Matre hnei Iehova hna hnyingë angeic ka hape: “Nyipici ö kö la eö a elëhni tune lai?”
5 Ame hnei Iona hna tro qa Nineve, me lapa ngöne la götrane koië ne la traon. Nge angeic a acile jë la ketre neköi ihmelekap me lapa fene gaa xapo, matre goeëne la ka troa traqa kowe la traon. 6 Ame hnei Iehova Akötresie hna acian la ketre gee* nyine titaxapo hune la he i Iona, matre aupunyi angeic. Madrine catre pi hë Iona kowe lai feja.*
7 Ngo ame hë e kaqa ne lai, hnene la nyipi Akötresie hna upe la ketre wanak troa xuje la gee,* matre qaqacile pi hi ej. 8 Nge ame hë la kola cici la jö, hnei Akötresie hna upe la enyi ka idreuth qa koië; catrehnine catre la jö matre kolo ha enuenu la he i Iona, nge angeic a sipone jë troa mec me hape, “Ka loi ju kö la tro ni a mec hune la troa mel.”
9 Ame hnei Akötresie hna hnyingë Iona ka hape: “Nyipici ö kö la eö a elëhni tune lai pine la feja?”*
Öni angeic: “Ka meköti la elëhning, nge goi pi meci fe ni ke tru catr la elëhning.” 10 Ngo öni Iehova jë hi: “Eö a utipine lai feja,* ngo pë pe huliwa hnei ö hna kuca matre tro ej a cia. Hnen ej hna cia xan ngöne la ca jidr, me meci ngöne la ketre jidr. 11 Nge ame ni ke, tha tro kö ni a utipi Nineve lo traon ka tru, hna lapan hnene la 120 000 lao atr ka thatre la loi me ngazo,* nge gaa tru hnei öni?”