Ieremia
17 “Hna cinyanyin la ngazo i Iudra hnene la ketre peen fao.
Hna sija lai ngöne la itre hni i angatr hnene la ketre peen diama
Me hune la itre jian ne la itre ita ne huuje i angatr,
2 Nge itre nekö i angatre pe a mekun lo itre ita ne huuj me itre poto ka hmitrötr* i angatr
Ezine la ketre sinöe ka cia hlöeë hune la itre sasala ka draië,
3 Hune la itre wetr ka draië ngöne la itre götrane ka tru.
Pine la ngazo hnei ö hna kuca ngöne la itre götrane i ö
Tro ni a nu kowe la itre atrekënö la itre ewekë me itre trengamo i ö, eje hi, itre hnë hmi gaa hmitrötre i ö.
4 Tro hë eö a sipu nuetrij la edrö hnenge hna hamë eö.
Nge tro ni a musinë eö troa nyihluene la itre ithupëjia ngöne la nöj hnei ö hna thatre,
Ke zö i ö matre kola mele la elëhning kösë eë.*
Tro hë ej a mel uti hë epine palua.”
5 Hane hi la hna qaja hnei Iehova:
“Hnëjine la atr* ka mejiune kowe la itre atr,
Me kowe la trengecatre i atr,
Nge ka ajean la hni i angeic qaathei Iehova.
6 Tro hë angeic a tune la sinöe ka cile cas ngöne la hnapapa.
Tha tro kö angeic a öhnyi loi,
Ngo tro pe angeic a lapa ngöne la gaa qaqacil ne la hnapapa,
Me ngöne la gaa tru sotr laka, pëkö ca ka mel e cili.
8 Tro hë angeic a tune la sinöe hna traan ezine la tim,
Laka, itre iwaan a nyenyap kowe la jë i tim.
Tha tro kö angeic a dreng la kola traqa la idreuth,
Ngo tro pala hi a hatr la itre dröne i angeic.
Ngöne la macatre ne qaqacil, tha tro kö angeic a hnehengazo,
Nge tro pala hi angeic a wa wen.
9 Ka iaö* catre la hni hune la nöjei ewekë asë, nge ka catre fë aja.*
Drei la ka atrepengön ej?
10 Ame eni Iehova, eni a goeëne la hni,
Eni a waipengöne la itre mekun ka sihngödr,*
Matre nyithupen kowe la itre atr thenge la isa aqane ujë i angatr,
Me itre huliwa i angatr.
11 Ame la ka trenamo qa ngöne la hna huliwa qenatrekënö,*
Ke ceitui angeic memine la neköi waco ka xawane la ifekë wakujan.
Tro hë angeic a pë mo nge mele pala kö angeic,
Nge tro ha mama laka, ka pë wangatrehmekun angeic.”
12 Ka draië la therone ka lolo i Akötresie qane lo qaan,
E cili hi la uma ne hmi së.
13 Iehova fe, lo mejiune i Isaraela,
Tro la itre ka nuetriji nyipëti a hmahma.
Tro ha cinyanyine ngöne la dro la ëje ne la itre ka ananyi* nyipë,*
Ke hnei angatre hna nuetriji nyipë Iehova, lo qeqe ne tim.
14 Iehova fe, aloinyi ni jë matre loi pi ni.
Amele ni jë matre mele pi ni,
Ke nyipëti la nyine tro ni a atrun.
15 Ngo öni itre xane koi ni:
“Tune kaa ha lo hna perofetan hnei Iehova?
Eatrëne jë hë!”
16 Ngo ame kö ni, tha ase kö ni cil troa kuca la hnëqa ne atre thup, me xötrethenge nyipë,
Nge tha hnenge kö hna ajan troa traqa la drai ne akötr.
Ame nyipë, atre hnyawa hi nyipë la itre hna qaja hnene la qëng;
Hna traqa la itre ewekë cili qëmekei nyipë!
17 The aciane kö la xou e kuhu hning.
Nyipëti hi la hnë zaeng ngöne la eni a akötr.
18 Loi e tro la itre ka axösisi ni a hmahma,
Ngo tha tro kö ni a hmahma.
Loi e tro angatr a xou,
Ngo tha tro kö ni a xou.
Axulune pi koi angatr la drai ne akötr,
Nge lep anyilanyilanyi angatre ju, eje hi, apatrenyi angatre hnyawa pi.*
19 Hane hi la hnei Iehova hna qaja koi ni: “Tro jë troa cil ngöne la qëhnelö ne la itre nekön ne la nöj, lo hnë lö me tro ne la itre joxu ne Iudra, me ngöne la nöjei qëhnelö ne Ierusalema. 20 Nge qa i ö troa qaja koi angatr ka hape: ‘Drenge ju la maca i Iehova, epun itre joxu ne Iudra, me epuni asë itre trahmanyi ne Iudra, me epuni asë itre atrene Ierusalema, ka lö qa ngöne la itre qëhnelö cili! 21 Hane hi la hna qaja hnei Iehova: “Wai epuni pala kö: the kepe ka hace kö ngöne la drai Sabath, nge the lö fë ehnefe kö qa ngöne la itre qëhnelö ne Ierusalema. 22 Ngöne la drai Sabath, the lö fë pi kö la ketre ehnef qa ngöne la itre uma i epun, nge tha tro kö epuni a kuca la ketre huliwa. Loi e troa hmitrötr la drai Sabath, tune lo hnenge hna ahnith kowe la itre qaaqa i epun. 23 Ngo tha hnei angatre kö hna drenge me hnangenyën. Hnei angatre pe hna xele* ma idrei, me tha kapa la ihaji.”’
24 “‘“Ngo maine tro epuni a drei ni hnyawa,” öni Iehova, “maine tha tro kö epuni a lö fë ehnef qa ngöne la itre qëhnelö ne la traon e Sabath, me tha huliwa ngöne la drai cili, ke epuni a metrötrën ej tune la ketre drai ka hmitrötr, 25 haawe, tro hë la itre joxu me itre nekö i joxu ka lapane la therone i Dravita a lö qa ngöne la itre qëhnelö ne la traon cili, hune la itre ikariota me itre hos, ene la itre joxu, me itre nekö i joxu, me angetre Iudra me Ierusalema; nge tro ha lapane la traone cili uti hë epine palua. 26 Eje hi, tro la itre atr a traqa qa ngöne la itre traon e Iudra, me itre götran xötreithi Ierusalema, me qa ngöne la nöje i Beniamina, me itre traon ngöne la hnathup, me qa hune la itre wetr, me qa ngöne la Negeb.* Tro hë angatr a traqa fë kowe la uma i Iehova, la itre huuje ne dreuth asë, me itre huuj, me itre huuje ne wene feja memine la libanu, me itre huuje ne ole.*
27 “‘“Ngo maine tha drei ni kö hnei epun, maine tha metrötrëne kö epuni la drai Sabath tune la ketre drai ka hmitrötr, maine tro epuni a kepe ka hace, me lö fë ehnef qa ngöne la itre qëhnelö ne Ierusalema e Sabath, haawe, tro hë ni a manithe la itre qëhnelö ne Ierusalema; tro la eë a dreuthetrije la itre ita ne thup hna eköhagen, nge tha tro kö ej a pi.”’”