Atre Cainöj
12 Haawe, the thëthëhmine kö la Atre Xupi ö Ka Sisitria, e nekö trahmany petre kö eö, qëmekene troa traqa la itre drai ngazo,* me itre macatre ne tro eö a qaja ka hape: “Xele hë ni ma hane mel,” 2 qëmekene troa miti la jö, memine la lai, memine la treu me itre wëtresij, nge qëmekene troa bëeke hmaca la itre iaw thupene* mani, 3 ngöne la ijine kola hmengöhmengöne la itre atre thupë hnalapa, nge kola tro wenini la itre atr ka catr, nge tha amudromudro qitre hmaca kö la itre föe, ke ala xalaithe pe hi angatr, nge hajihaji hë la luemeke ne la itre föe ka tu qa ngöne la mamalama, 4 nge kola thing la itre qëhnelö ka qëmek koi gojeny, nge kola co trootro la mejene imulë, nge kola iahlë hnene la waco ka ho, nge tha nyima catre hë la itre jajiny. 5 Ketre, kola ha xouene la itre gaa draië, me meci hnei xou e cahu gojeny. Nge kola eng la iamad, me genyi la sipa, nge kaqa ha la wene sinöe* ka thue aja troa xen, ke kola tro la atr kowe la hnei angeic hna troa lapa uti hë epin, nge itre ka hnëmec a tro e cahu gojeny. 6 Eje hi, meku nyidrëti kö qëmeken troa xeci la eno sileva, nge troa thë akaqan la kap hna kuca hnei gool, nge troa thë la trengene tim ngöne la hna tha tim, memine la puli* nyine huli eno ne tha tim. 7 Ame hna bëeke hmaca la xaxau kowe la ihnadro, ngöne lo göhnen ej ekö. Nge kola bëeke hmaca la trengecatre ne la mel kowe la nyipi Akötresie, lo atre hamën ej.
8 Önine la atre acasin, “Pëkö ca eloin!* Ka gufa asë hi.”
9 Ngacama ka inamacan la atre acasin, ngo hnei angeic pala hi hna inine la nöj la itre hnei angeic hna atre. Hnei angeic hna mekune hnyawane me sine thel, matre ce xawane* la itre edromë ka nyimutre. 10 Hnene la atre acasine hna isine troa öhne la itre trengewekë ka mingöming, me cinyanyine la itre trengewekë ka nyipici me ka meköt.
11 Ceitu me itre usis la itre trengewekë ne la itre ka inamacan, nge ceitu me itre fao hna jeng la itre trengewekë i angatr hna cinyanyin; itre ej a fetra qaathene la ca atre thupë mamoe. 12 Neköng, eni a canga hmekë eö göne la itre xaa hna cinyanyin: Huliwa ka pë pun la troa kuca la itre itus, nge ka aluzi trengecatr.*
13 Haawe, hane hi la ini: Xouene ju la nyipi Akötresie, nge drengethenge jë la itre hnei nyidrëti hna amekötin, ke celë hi hnëqa ne la atr. 14 Ke tro la nyipi Akötresie a amekötin la nöjei huliwa asë, uti fe hë la itre ewekë hna kuca juetrën, matre wang ka hape, ka loi kö maine ka ngazo.