Isaia
46 Bel a thil, nge Nebo a wenini.
Hna atë la itre idrola i angatr hune la itre öni ka thue la itre ehnef,
Tune la itre trengetreng ka hace hune la itre öni ka kucakuca.
2 Nyipici, nyidroti a wenini me thil;
Thatreine kö nyidroti amelen la itre idrola i nyidro hna thu kösë ehnef,*
Matre kolo fe a xomi nyidro a tro gaa nany.
3 “Drei ni ju itre matra i Iakobo fe, me itre matra i Isaraela ka lapa pe,
Lo hnenge hna sajuën qëmekene troa hnahon, me xep e kuhu hni.
4 Uti hë la tro epuni a qatr, tha tro kö ni a saze;
Uti hë la troa qia la itre pene he i epun, tro ni a sajuë epun.
Tune la hnenge hna kuca ha, tro ni a xepi epun, me sajuë epun, me amele epun.
5 Epuni a aceitunë ni me drei, me xom ceitunë ni me drei?
Drei la ka ihmeku me eni, kösë ceitui nyio hi?
6 Hetrenyi la itre ka xom qa ngöne la watrenge i angatr la itre gool ka nyimutre;
Angatr a tuluth la itre sileva hune la itulu.
Angatr a nyithupene la atre huliwa sileva matre xupi haze.
Thupene lai, angatr a thil me nyihluen ej.
7 Angatr a xututh ej hune la hnaiape i angatr;
Angatr a kapa uti hë la göhnen ej, me acil e cili.
Tha enije kö la idrola qa lai.
Angatr a sipo ixatua kow ej, ngo tha sa kö;
Thatreine kö ej amelen la ketre atr ka awe.
8 Mekune kö la ewekë celë, nge catre pi.
Lapa mekune ju, itre ka eni wathebo.
9 Mekune ju lo itre ewekë hnapan,
The thëthëhmine kö laka, Akötresieti ni, nge pëkö ketre.
Akötresieti ni, nge pëkö ka tung.
10 Qa ngöne la qaan, eni la atre qaja amamane la pun,
Nge qaan ekö, eni a qaja la itre ewekë hna tha kuca petre kö.
Ke öning: ‘Ame la hnenge hna mekun,* ke tro ha eatr,
Nge ame la hnenge hna ajan, ke tro ni a kuca.’
11 Eni a hën qa koië la waco ka thele tha,
Qa ngöne la ketre nöje gaa nany, la atr ka troa eatrëne la ajang.
Ase hë ni qaja, nge tro ni a eatrën.
Ase hë ni mekun, nge tro ni a aejën.
12 Drei ni ju hnei epun itre ka catre që,*
Epun itre ka iananyi memine la meköt.
13 Hnenge hna alemine la meköting;
Tha nanyi kö ej,
Nge tha tro kö ni a hmitr troa amelen.
Tro ni traqa fë la iamele* e Ziona, memine la lolong koi Isaraela.”