Itre Edromë
22 Ka loi ju kö la troa hlemu loi* hune la troa trenamo;
Ka loi ju kö la troa metrötrë* së hune la troa hetre sileva me gool.
2 Ceitune* hi la ka trenamo memine la ka pë ewekë:
Iehova la ka xupi nyidroti asë.
3 Ame la atr ka hmek, angeic a öhne la jol me zae,
Ngo ame la ka majemin kapa asë la hna qaja, ke angeice kö a tro me xeni pun.
4 Ame la thangane la ipië me xoue Iehova
Ke troa trenamo, me kapa la iatruny, me mel.
5 Hetre ka ithiny me itre theth ngöne la gojenyi ne la atr ka huliwa qenatrekënö,
Ngo kola tro ananyin ej hnene la atr ka wangatrune la mele i angeic.
6 Inine jë la nekö trahmany* la gojeny nyine tro angeic a trongën;
Ngacama tro ju hë angeic a qatr, ngo tha tro kö angeic a trotrij.
7 Tro la trenamo a musinëne la itre ka pë ewekë,
Nge tro la ka sipo, a nyihluene la ka hamën.
8 Ame la atre traane la ka tha meköti kö, ke tro angeic a menuëne la akötr,
Nge tro ha patre la jia ne elëhni i angeic.
9 Tro ha amanathithine la atre ham,*
Ke angeic a thawa la a i angeic memine la ka pë ewekë.
10 Helëne pi la ka ihnyima sai,
Nge tro ha patre la iwesitrë;
Tha tro hmaca kö a ihmönyinyi* me iqaqa.
11 Ame la atr ka hetre hni ka wië, nge ka hetre trengewekë ka menyik
Ke tro hë la joxu a nyi sinee i angeic.
12 Kola thupëne la atrehmekun hnene la luemeke i Iehova,
Ngo nyidrëti a lepetrije la itre trengewekë ne la atr ka mele thoi.
13 Önine la ka geny: “Hetre liona e kuhu trön!
Tro ha humuthi ni nyipine la traon!”
14 Ketre hnaop ka jui la që ne la itre föe ka nyiape menu.*
Nge tro ha kei e cili hnene la atr hna tha kapa hnei Iehova.
16 Ame la ka atrekënöne la ka pë ewekë matre troa trenamo
Memine la ka hamë ahnahna kowe la trenamo
Ke tro asë hi nyidroti a pë ewekë.
17 Hnangenyëne ju nge drenge ju la trengewekë ne la itre ka inamacan,
Matre fe la hni i ö kowe la atrehmekun qaatheng,
18 Ke tro hë eö a madrin troa thupën itre ej e kuhu hni i ö,
Matre tha tro kö itre ej a patr ngöne la që i ö.
19 Nge matre tro eö a mejiune koi Iehova,
Tro ni a hamë eö enehila la atrehmekun.
20 Hapeu, tha hnenge kö lo hna cinyianyine koi ö,
Me hamëne la itre eamo me atrehmekun,
21 Matre ini ö la itre trengewekë ka nyipici, nge nyine mejiune kow,
Matre tro eö a hamëne la itre ithuemacanyi ka nyipici kowe la atre upi ö?
22 The atrekënöne kö la ka pë ewekë, ke ka pë ewekë angeic,
Nge the qanangazone kö la ka co ngöne la qëhnelö ne la traon,
23 Ke tro kö Iehova a sipu isigöli angatr
Nge tro nyidrëti a xome* la mele ne la itre ka atrekënö angatr.
24 The ce tro lapa kö memine la atr ka elëelëhni
The thele kö troa ce huliwa memine la atr ka canga elëhni,
25 Matre tha tro kö eö a xom la itre thiina i angeic
Nge matre tha tro kö a tra thethi ö kö.
26 The sine kö la itre ka sisiny,
Lo itre ka sisiny troa të la gufa ne la ketre.
27 Maine pëkö manie* i ö nyine nyithupen,
Ke tro ha thapa la ili hnei ö hna mekölen!
28 The kötrëne kö la ifego hna amë ekö
Hnene la itre qaaqaa i ö.
29 Öhne kö eö la atr ka maca ngöne la huliwa i angeic?
Tro angeic a cil qëmekene la itre joxu;
Tha tro kö angeic a cil qëmekene la itre atre menu.