Salamo

26 Iehova fe, ameköti ni jë hnei nyipë, ke hnenge hna trongëne la nyipicing;*

Nyipëti la hnenge hna mejiune kow Iehova fe, matre tha enienije kö ni.

 2 Iehova fe, waipengöi ni jë hnei nyipë, nge tupathi ni ju;

Nyihnyawane jë la itre mekunang ka jui* me itre aliene la hning.

 3 Eje pala hi qëmekeng la ihnimi nyipici i nyipë,

Nge eni a tro ngöne la nyipici i nyipë.

 4 Tha eni kö a ce tro lapaa* memine la itre ka thoi,

Nge eni a kötrene la itre ka juetrë thiina.*

 5 Methinge troa nyi sineen la itre ka ngazo,

Nge tha eni kö a ce tro me itre ka iakötrë.

 6 Tro ni a wasine la lue imeng ngöne la thiina ka pë ethan,

Nge Iehova fe, tro ni a tro kanothe la ita ne huuje i nyipë,

 7 Matre troa drenge la nine ole

Me qaja atrune la nöjei huliwa i nyipë nyine hain.

 8 Iehova fe, hnime catre ni la uma hnei nyipëti hna mele ngön,

Lo götran hna lapan hnene la lolo i nyipë.

 9 The apatrenyi ni kö memine la itre atr ka ngazo

Nge the ce xome kö la meleng memine la itre atr ka isi,*

10 Ene la angetre kuca la itre huliwa nyine hmahman hnene la lue ime i angatr,

Lo itre ka kapa la mani hna hamën juetrën hnene la ime maca i angatr.

12 Kola të la lue cang ngöne la gaa meköt:

Ngöne la icasikeu* ka tru, tro ni a atrunyi Iehova.