Salamo
Thatraqane la atre jumi traem. Masekil* i Dravita, nyine nyiman cememine la itre nyine elo miuzik ka hetre filen.
55 Akötresieti fe, epi drenge ju la thithing,
Nge the drei simine kö la eni a sipo nyipë troa utipi ni.
2 Pane drei ni ju nge sa jë koi ni.
Tha lapa hnyawa kö ni pine la hnenge hna hnehengazon,
Nge eni a nyenyape hmohmo
3 Pine la itre trengewekë ne la ithupëjia
Me aqane catrehnine la atr ka ngazo.
Ke angatr a heti ni hnei akötr,
Nge angatr a lapa fë trengehni me methinë ni.
4 Tru la xou e kuhu hning,
Nge kola trotro tranyi ni hnene la xoue mec.
5 Kola kei tranyi ni hnei xou me hmengöhmengön,
Nge kola cila ngongo la ngönetreing.
6 Öninge pala hi: “Maine hetre iapenge ju tune la piny!
Tro hë ni a sesë matre lapa tingetinge pi ni.
7 Tro hë ni a kötr kowe la gaa nany.
Tro hë ni a mele ngöne la hnapapa. (Sela)
8 Tro hë ni a nyinyap kowe la ketre hnë zae
Matre kötrene la enyi ka catr memine la wene.”
9 Iehova fe, amenu* angatre pi, nge atriane pi la itre mekuna i angatr,
Ke hnenge hna öhne la iakötrë me iwesitrë ngöne la traon.
10 E lai me jidr, lue ej a tro hune la itre ihag;
Hna haöthe la traon hnei iangazo me akötr.
11 Kola lapan ej hnene la akötr;
Tha patre kö la iaxösisi me iaö qa ngöne la itre gaa tru atr.
12 Tha ketre ithupëjia kö la ka qaqa ni;
Ke maine ju, ijije hi tro ni a xomihnin.
Tha ketre ithupëjia kö la ka cile koi ni;
Ke maine ju, ijije hi tro ni a zae angeic.
13 Ngo eö hi, lo atr ka tung,
Nge sipu sineeng, lo hnenge hna atre hnyawa.
14 Lue ka ce mele hi nyiso;
Hnei nyiso lo hna ce tro kowe la uma i Akötresie memine la ka ala nyim.
15 Ngo epi tro la mec a asesëkötrë angatr!
Loi e tro angatr a uti koi Hua* nge mele kö angatr;
Ke kola lapa la ngazo e kuhu hni i angatr me nyipi angatr.
16 Ngo ame ni, tro ni a hë koi Akötresie,
Nge tro Iehova a amele ni.
17 Ke ame e hej, me hmakany, me hnaipajö, tha tingetinge kö ni, nge eni a treij,*
Ngo nyidrëti a dreng la eni a ewekë.
18 Tro kö nyidrëti a amele* ni qa ngöne la itre ka isi me eni, nge tro kö nyidrëti a hamë ni la tingeting,
Pine laka, ala nyimu la itre ka cile koi ni.
19 Tro Akötresieti a dreng me sa koi angatr,
Ke nyidrëti la atre mus qaane lo itre drai ekö. (Sela)
Ngo tro angatr a xele ma saze,
Ene la itre ka tha xoue Akötresieti kö.
20 Hnei angeic* hna isi memine la itre ka mele tingeting me angeic;
Tha metrötrëne kö angeic la hnei angeic hna sisiny.
21 Menyike catre kö la itre trengewekë i angeic hune la batra,
Ngo iwesitrë pe la ka ej e kuhu hni i angeic.
Menyike catre kö la itre trengewekë i angeic hune la oel,
Ngo itre ej pe la itre taua hna uth.
22 Nue pi koi Iehova la ehnefe i ö,
Nge tro nyidrëti a sajuë eö.
Tha tro jë kö nyidrëti a nue troa kei* la atr ka meköt.
23 Ngo ame nyipë, Akötresieti fe, tro nyipëti a autinyi angatr ngöne la hnaop ka jui.
Ame la itre atr ka aneni madra me iaö, tha tro kö angatr a traqa kowe la sin ne la mele i angatr.
Ngo ame ni, tro ni a mejiune koi nyipë.