Ieremia
28 Hane hi la ka traqa ngöne la macatre cili, lo kola nyiqaane musi hnei Zedekia joxu ne Iudra, ene lo hna 5 ne treu ne la hna 4 ne macatre ne mus i angeic. Hnei Hanania perofeta, nekö i Azura qa Gibeona, hna qaja koi Ieremia qëmekene la itre atre huuj memine la ka ala nyim, hnine la uma ne hmi i Iehova ka hape: 2 “Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Tro ni a hutra la nyine isilekeun ne la joxu ne Babulona. 3 Thupene la lue macatre, tro ni a abëekëne qa Babulona, la nöjei jia ne huliwa ne la uma ne hmi i Iehova, lo hna xom hnei Nebukaneza joxu ne Babulona.’” 4 Nge tro ni a bëeke sai Iekonia nekö i Iehoiakima joxu ne Iudra, memine la angetre Iudra hna kötre fë a tro Babulona,’ öni Iehova, ‘ke tro ni a hutra la nyine isilekeun ne la joxu ne Babulona.’”
5 Ame hnei Ieremia perofeta hna sa koi Hanania perofeta qëmekene la itre atre huuj, me itre ka icilenyi hnine la uma ne hmi i Iehova. 6 Öni Ieremia: “Amen!* Epi tro Iehova a eatrën! Epi tro Iehova a eatrën la hnei ö hna perofetan, ene la troa bëeke fë la itre jia ne huliwa ne la uma ne hmi i Iehova, me itre hna kötre fë a tro Babulona! 7 Ngo pane drenge ju la maca hnenge hna troa qaja koi ö me kowe la nöje ce. 8 Ame ekö, hnene la itre perofeta ka tro pa, hna tro fë maca kowe la itre nöj ka nyimutre me itre baselaia ka tru. Hnei angatr hna perofetan la itre isi, me itre akötr, me itre mec ka ixötrekeu. 9 Nge maine tro la ketre perofeta a qeje tingeting, nge troa eatre la hnei angeic hna qaja, ke e cili, tro ha mama ka hape, Iehova la ka upi angeic.”
10 Ame hnei Hanania perofeta hna xome la nyine isilekeun qa ngöne la nyinawa i Ieremia perofeta, me hutra. 11 Matre öni Hanania jë hi qëmekene la ka ala nyim: “Hane hi la hna qaja hnei Iehova: ‘Aqane tro hi ni lai a hutra la nyine isilekeun, hna amë hnei Nebukaneza joxu ne Babulona hune la nyinawa ne la itre nöj, thupene la lue macatre.’” Ame hna tro pi hnei Ieremia perofeta.
12 Thupene la Hanania perofeta a ase hutra la nyine isilekeun hna atë hune la nyinawa i Ieremia perofeta, öni Iehova jë hi koi Ieremia: 13 “Tro jë a qaja koi Hanania ka hape: ‘Hane hi la hna qaja hnei Iehova: “Hnei ö hna hutra la itre sinöe nyine isilekeun, ngo tro pë hë eö a nyihnan hnei fao ne isilekeun.” 14 Ke hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “Tro ni a amë hune la nyinawa ne la itre nöj, la nyine isilekeun hna kuca hnei fao, matre tro angatr a nyihlue i Nebukaneza joxu ne Babulona. Tro ha musinë angatr troa nyihlue i angeic. Nge goi tro fe ni a hamë angeic la itre öni wael.”’”
15 Matre öni Ieremia jë hi koi Hanania: “Pane drenge ju Hanania! Tha Iehova kö la ka upi ö, nge hnei ö hna kuca matre tro la nöj a mejiun kowe la trengathoi. 16 Matre hane hi la hna qaja hnei Iehova: ‘Dreng! Eni hë la a apatrenyi ö qa la fen.* Tro hë eö a mec ngöne la macatre celë, ke hnei ö hna ukune la nöj troa icilekeu me Iehova.’”
17 Ame hna mec hnei Hanania perofeta, ngöne ju kö lai hna 7 ne treu ne la macatre cili.